.jpg)
លោកស្រី ប៉ុង លីមសាន បង្ហាញស្មាតហ្វូនសុខាភិបាល។ ហេង ជីវ័ន
ភ្នំពេញៈ ក្រសួងសុខាភិបាលដាក់ដំណើរការកម្មវិធី Smart Hospital e-Health Yoeung នៅក្នុងមន្ទីរពេទ្យព្រះអង្គឌួងដែលជាកម្មវិធីដំណោះស្រាយបច្ចេកវិទ្យាសុខាភិបាលកម្ពុជាដំបូងគេនៅកម្ពុជា ដោយផ្តល់ភាពងាយស្រួលសម្រាប់អ្នកជំងឺ និងវេជ្ជបណ្ឌិតក្នុងការគ្រប់គ្រងកំណត់ត្រាប្រវត្តិព្យាបាល និងការណាត់ជួបដោយស្វ័យប្រវត្តិនៅលើទូរស័ព្ទដៃ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងក្នុងឱកាសប្រកាសដាក់ឲ្យដំណើរការនូវកម្មវិធីនេះកាលពីថ្ងៃចន្ទថា មន្ទីរពេទ្យអង្គឌួងគឺជាមន្ទីរពេទ្យរដ្ឋដំបូងគេដែលបានដាក់ឲ្យដំណើរការនូវកម្មវិធីបច្ចេកវិទ្យាសុខាភិបាលថ្មីនេះ បន្ទាប់ពីបានទទួលជោគជ័យក្នុងដំណើរការកម្មវិធីមន្ទីរពេទ្យឌីជីថល «ពេទ្យយើង»។
លោកបន្តថា ការដាក់ដំណើរការនេះ ក៏ព្រោះតែក្រុមគ្រូពេទ្យទាំងអស់ក្នុងមន្ទីរពេទ្យនេះបានយល់ដឹងអំពីសារៈសំខាន់នៃបច្ចេកវិទ្យា និងអាចប្រើប្រាស់នូវបច្ចេកវិទ្យាបានយ៉ាងស្ទាត់ជំនាញ។
លោកបញ្ជាក់ថា៖ «កម្មវិធីនេះអាចគ្រប់គ្រងទិន្នន័យរបស់អ្នកជំងឺបានទាំងអស់ឲ្យតែមកមន្ទីរពេទ្យប៉ុន្មាន គឺមានក្នុកម្មវិធីនេះប៉ុណ្ណឹង។
(កម្មវិធីនេះ) គ្រប់គ្រងទាំងទិន្នន័យ គ្រប់គ្រងទាំងឱសថ ទាំងបរិក្ខារ និងការប្រើប្រាស់ដោយបានដាក់បញ្ចូលក្នុងនេះទាំងអស់»។
លោក ម៉ម ប៊ុនហេង បានអះអាងថា រដ្ឋាភិបាលមានមហិច្ឆតា និងចក្ខុវិស័យក្នុងការដំឡើងកម្មវិធីប្រព័ន្ធគ្រប់គ្រងមន្ទីរពេទ្យឌីជីថល «ពេទ្យយើង» និងឈានទៅដល់ការប្រើប្រាស់កម្មវិធី Smart Hospital e-Health Yoeung គ្រប់មន្ទីរពេទ្យរដ្ឋទូទាំងប្រទេស។
លោករដ្ឋមន្ត្រីក៏បានជំរុញផងដែរដល់គ្រប់មន្ទីរពេទ្យនៅកម្ពុជាត្រូវស្វែងយល់ និងត្រូវវិវត្តខ្លួនឲ្យទាន់បច្ចេកវិទ្យាជាមុនសិន តាមរយៈការកសាងហេដ្ឋានរចនាសម្ព័ន្ធនៅក្នុងមន្ទីរពេទ្យ និងចំណេះរបស់ក្រុមគ្រូពេទ្យ។
លោកស្រី ប៉ុង លីមសាន សហស្ថាបនិក និងជានាយកប្រតិបត្តិនៃកម្មវិធីមន្ទីរពេទ្យឌីជីថល «ពេទ្យយើង» បានឲ្យដឹងថា អ្នកជំងឺអាចប្រើប្រាស់បច្ចេកវិទ្យានេះបានតាមរយៈកាតឌីជីថល e-Health Yoeung មានលេខកូដកាតចំនួន ១៦ ខ្ទង់ និង QR កូដមួយដែលតំណាងឲ្យអ្នកជំងឺម្នាក់។
លោកស្រីបានថ្លែងបន្តថា អ្នកជំងឺដែលមានកាតមួយនេះនឹងអាចទទួលបានកំណត់ត្រាវេជ្ជសាស្ត្ររបស់ខ្លួនពីមន្ទីរពេទ្យផ្សេងៗដែលពួកគាត់ធ្លាប់ទៅដោយស្វ័យប្រវត្តិ គ្រាន់តែចុះឈ្មោះកាតរបស់ពួកគាត់នៅមន្ទីរពេទ្យនោះតែប៉ុណ្ណោះ។ ជាពិសេសក្រោយពីមានកាត និងប្រើប្រាស់កម្មវិធីលើទូរស័ព្ទដៃ e-Health Yoeung App ពួកគាត់អាចទៅព្យាបាលនៅមន្ទីរពេទ្យ ហើយរបាយការណ៍ការព្យាបាលទាំងអស់នឹងបង្ហាញដោយស្វ័យប្រវត្តិទៅក្នុងទូរស័ព្ទដៃរបស់គាត់។
លោកស្រីបានបញ្ជាក់ថា៖ «ទាំងកាត និងកម្មវិធីសុខភាពលើទូរស័ព្ទដៃ e-Health Yoeung App មានមុខងារសំខាន់ៗដែលមានអត្ថប្រយោជន៍ជាច្រើនដល់អ្នកជំងឺ និងវេជ្ជបណ្ឌិត។ នៅក្នុងកម្មវិធីលើទូរស័ព្ទដៃមានមុខងារដូចជាការគ្រប់គ្រងកំណត់ត្រាប្រវត្តិជំងឺការណាត់ជួប និងប្រព័ន្ធរំឭកណាត់ជួបពេទ្យស្វ័យប្រវត្តិការគ្រប់គ្រងព័ត៌មានផ្ទាល់ខ្លួន ការអានអត្ថបទគន្លឹះថែទាំសុខភាពប្រចាំថ្ងៃព្រមទាំងព័ត៌មានថ្មីៗពីក្រសួងសុខាភិបាល និងស្ថាប័នជំនាញនានាក្នុងវិស័យសុខាភិបាល»។
លោក លូ លីឃាង នាយកមន្ទីរពេទ្យព្រះអង្គឌួងបានឲ្យដឹងផងដែរថា បច្ចុប្បន្ននេះសង្កេតឃើញថា ពេលអ្នកជំងឺទៅពេទ្យម្តងៗពួកគាត់ត្រូវកាន់ឯកសារប្រវត្តិជំងឺច្រើនមានការបាត់បង់លំបាកប្រាប់ប្រវត្តិជំងឺទៅវេជ្ជបណ្ឌិត និងចំណាយពេលយូរក្នុងការទទួលសេវាព្យាបាល។
លោក លីឃាង បានថ្លែងឲ្យដឹងទៀតថា៖ «នេះគឺជាភាពជោគជ័យមួយដែលមន្ទីរពេទ្យព្រះអង្គឌួងបានសម្រេចបំពាក់កម្មវិធីមន្ទីរពេទ្យវៃឆ្លាត e-Health Yoeung និងកាតសុខភាពវៃឆ្លាតនៅមន្ទីរពេទ្យមួយនេះ ដើម្បីក្លាយជាមន្ទីរពេទ្យឈានមុខគេក្នុងការផ្តល់សេវាសុខាភិបាលឌីជីថលជូនដល់ពលរដ្ឋកម្ពុជា និងអ្នកមកទទួលសេវាព្យាបាលនៅមន្ទីរពេទ្យ»។
លោកបញ្ជាក់ថា៖ «បើទោះយើងជាមន្ទីរពេទ្យរដ្ឋមែន ប៉ុន្តែយើងខំវិវត្តខ្លួនឲ្យខ្លាំង ព្រោះសម័យបច្ចេកវិទ្យាដល់ដំណាក់កាលនេះហើយ ដែលយើងត្រូវធ្វើវា ហើយអ្នកជំងឺ គាត់ត្រូវតែដឹងថា គាត់ឈឺ គាត់ត្រូវតែមកមន្ទីរពេទ្យ។ នេះមិនមែនបានន័យថា យើងបង្ខំគាត់ទេ។ ប៉ុន្តែគាត់ត្រូវតែដឹងខ្លួនគាត់ បើទោះជាគាត់ភ្លេច នៅពេលគាត់មានការរំឭកនៅតាមទូរស័ព្ទដៃ គាត់នឹងយល់»។
តាមសេចក្តីប្រកាសព័ត៌មានរួមរបស់កម្មវិធីប្រព័ន្ធគ្រប់គ្រងមន្ទីរពេទ្យឌីជីថល “ពេទ្យយើង” និងក្រុមហ៊ុនហ្វឺសវីម៉ិនថេកអេស៊ា បានឲ្យដឹងថា កម្មវិធីឌីជីថល «ពេទ្យយើង» បានចាប់ស្រាវជ្រាវ និងផលិតតាំងពីឆ្នាំ ២០១៣ និងចាប់ផ្តើមដាក់ឲ្យដំណើរការនៅមន្ទីរពេទ្យដំបូងគេនៅដើមឆ្នាំ ២០១៧។
រហូតដល់បច្ចុប្បន្នមានគ្លីនិកមន្ទីរពេទ្យរដ្ឋ និងឯកជនចំនួនជិត ១៤០ បានចុះឈ្មោះប្រើកម្មវិធីមន្ទីរពេទ្យឌីជីថល «ពេទ្យយើង» នៅរាជធានីភ្នំពេញ និងតាមបណ្តាខេត្តចំនួន ១២ នៅកម្ពុជា ខណៈកម្មវិធីឌីជីថលមួយនេះមានអ្នកចុះឈ្មោះប្រើសកម្មជាង ៥ ០០០ នាក់៕
វីដេអូ៖
