លោក ម៉ម ប៊ុនហេង ក្នុងសន្និសីទកាសែតមួយកន្លងមក។ ហុង មិនា
ភ្នំពេញៈ បន្ទាប់ពីមានការផ្ទុះនូវការឆ្លងជំងឺកូវីដ១៩នៅខេត្តសាមុតសាខននៃប្រទេសថៃ រដ្ឋមន្រ្តីក្រសួងសុខាភិបាលកម្ពុជាលោក ម៉ម ប៊ុនហេង បានណែនាំជាបន្ទាន់ឱ្យថ្នាក់ដឹកនាំនៅតាមខេត្តជាប់ព្រំដែនត្រូវតែបង្កើនការប្រុងប្រយ័ត្នខ្ពស់ក្នុងការត្រួតពិនិត្យរាល់អ្នកដំណើរ និងត្រូវធ្វើចត្តាឡីស័កចំនួន ១៤ ថ្ងៃរាល់អ្នកដំណើរចូលមកកម្ពុជា។
ជាមួយគ្នានេះ លោកនាយករដ្ឋមន្រ្តី ហ៊ុន សែន បានផ្តល់ប្រាក់ឧបត្ថម្ភទៅដល់ខេត្តចំនួន ៧ ដែលនៅជាប់ព្រំដែនកម្ពុជា-ថៃសម្រាប់ប្រជាពលរដ្ឋក្រីក្រក្នុងពេលធ្វើចត្តាឡីស័ក។
លោក ម៉ម ប៊ុនហេង បានឱ្យដឹងតាមរយៈសេចក្តីណែនាំបន្ទាន់នៅថ្ងៃម្សិលមិញថា ក្រសួងសុខាភិបាលថៃបានដាស់តឿនឱ្យប្រុងប្រយ័ត្នសម្រាប់មន្ទីរពេទ្យនៅទីក្រុងបាងកកស្តីពីការផ្ទុះឡើងនូវការឆ្លងរាលដាលនៃជំងឺកូវីដ១៩នៅខេត្តសាមុតសាខនរហូតដល់ជាង ៥០០ នាក់ដែលបានឆ្លងដែលភាគច្រើនជាប្រជាជនភូមាដែលបានបំផ្លាស់ទីមកធ្វើការនៅក្នុងខេត្តនោះ។ រហូតមកដល់ពេលនេះមានការប្រកាសឱ្យបិទខេត្តនេះពីម៉ោង ២២:០០ នាទីយប់ដល់ម៉ោង ០៥:០០ នាទីភ្លឺរហូតដល់ថ្ងៃទី ៣ ខែមករា ឆ្នាំ ២០២១។
លោក ប៊ុនហេង បានបន្តថា៖ «ក្រសួងចេញសេចក្តីណែនាំជាបន្ទាន់នេះ ដោយសារតែខេត្តសាមុតសាខននេះមានចម្ងាយមកប្រទេសកម្ពុជាប្រហែលជា ៣០០ គីឡូម៉ែត្រ និងមានខេត្តដែលមានច្រកចេញចូលជាមួយប្រទេសថៃ ដូចជាខេត្តកោះកុង ពោធិ៍សាត់ បាត់ដំបង បន្ទាយមានជ័យ និងខេត្តឧត្តរមានជ័យជាដើម និងដើម្បីការពារការចម្លងវីរុសកូវីដ១៩ ចូលមកក្នុងប្រទេសកម្ពុជាជាយថាហេតុដោយសារការចល័តរបស់បុគ្គល ឬរបស់អ្នកដំណើរដែលមានផ្ទុកវីរុសកូវីដ១៩»។
លោករដ្ឋមន្រ្តីបានធ្វើការណែនាំ និងអំពាវនាវទៅដល់ខេត្តជាប់ព្រំដែនកម្ពុជា-ថៃ ត្រូវបង្កើនការប្រុងប្រយ័ត្នខ្ពស់ក្នុងការត្រួតពិនិត្យរាល់អ្នកដំណើរដែលចូលមកកម្ពុជាដោយត្រូវឆែកសុខភាពឱ្យបានហ្មត់ចត់ជាទីបំផុត ជាពិសេសត្រូវវាស់កម្ដៅ បំពេញទម្រង់ប្រកាសសុខភាពអ្នកដំណើរឱ្យបានត្រឹមត្រូវជាទីបំផុត។
លោក ម៉ម ប៊ុនហេង ថា រាល់អ្នកដំណើរចូលមកកម្ពុជាត្រូវដាក់ឱ្យធ្វើចត្តាឡីស័កចំនួន ១៤ ថ្ងៃជាចាំបាច់ និងត្រូវយកវត្ថុសំណាកអ្នកដំណើរ បញ្ជូនមកធ្វើតេស្តនៅវិទ្យាស្ថានប៉ាស្ទ័រកម្ពុជា វិទ្យាស្ថានជាតិសុខភាពសាធារណៈ និងមន្ទីរពេទ្យខេត្តសៀមរាបនៅថ្ងៃដែលបុគ្គលមកដល់ច្រកចូលប្រទេសកម្ពុជា។ លោកថា៖ «អាជ្ញាធរថ្នាក់ក្រោមជាតិ ត្រូវចូលរួមនៅក្នុងការត្រួតពិនិត្យការធ្វើចត្តាឡីស័កអ្នកដំណើរចូលមកកម្ពុជានេះឱ្យបានត្រឹមត្រូវ ចៀសវាងការរបូតចេញពីទីកន្លែងធ្វើចត្តាឡីស័ក ដោយយថាហេតុណាមួយដែលយើងមិនបានដឹង។ ឯអ្នកនៅតាមសហគមន៍ត្រូវផ្តល់ព័ត៌មានដល់អាជ្ញាធរភូមិ-ឃុំ បើមានជនចំណូលថ្មី ចូលសហគមន៍របស់ខ្លួន»។
ជាមួយគ្នានេះលោក ហ៊ុន សែន បានផ្តល់ប្រាក់ឧបត្ថម្ភដល់ខេត្តចំនួន ៧ ដោយក្នុង ១ ខេត្តៗមានចំនួន ៥០ លានរៀល។ ខេត្តទាំងនោះមាន ខេត្តបាត់ដំបង បន្ទាយមានជ័យ ប៉ៃលិន ព្រះវិហារ ឧត្តរមានជ័យ ពោធិ៍សាត់ និងខេត្តកោះកុង។
បើតាមលោកស្រី យក់ សម្បតិ្ត អ្នកនាំពាក្យក្រសួងសុខាភិបាលថ្លែងប្រាប់សារព័ត៌មាន ហ្វ្រេសញូវនៅថ្ងៃម្សិលមិញថាលោកនាយករដ្ឋមន្រ្តីបានដាក់បទបញ្ជាទៅអាជ្ញាធរខេត្តទាំង ៧ នោះឱ្យពង្រឹងការធ្វើចត្តាឡីស័កសម្រាប់ពលករខ្មែរដែលត្រឡប់មកពីប្រទេសថៃរយៈពេល ១៤ ថ្ងៃពេញ ដើម្បីទប់ស្កាត់ការចម្លងជំងឺកូវីដ។
ក្រសួងសុខាភិបាលបានឱ្យដឹងពីម្សិលមិញថា អ្នកជំងឺកូវីដដែលបានរកឃើញពាក់ព័ន្ធនឹងព្រឹត្តិការណ៍សហគមន៍ ២៨ វិច្ឆិកាគិតមកដល់ថ្ងៃទី ១៩ ខែធ្នូ ឆ្នាំ ២០២០ មានចំនួន ៤១ នាក់ដែលក្នុងនោះអ្នកដែលព្យាបាលជាសះស្បើយ ចំនួន ៣០ នាក់។
នៅថ្ងៃទី ១៩ ខែធ្នូ លោក ម៉ម ប៊ុនហេង ក៏បានចេញសេចក្តីប្រកាសព័ត៌មានស្តីពីការកែសម្រួលការអនុវត្តវិធានការសុខាភិបាល និងការធ្វើចត្តាឡីស័កចំនួន ១៤ ថ្ងៃពេញលេញ ចំពោះអ្នកការទូត និងមន្រ្តីអង្គការអន្តរជាតិដែលកាន់ទិដ្ឋាការការទូត ដោយអ្នកទាំងនោះត្រូវមានវិញ្ញាបនបត្របញ្ជាក់សុខភាព ចេញដោយអាជ្ញាធរសុខាភិបាលទទួលស្គាល់ដោយប្រទេសសាមីបញ្ជាក់ថា គ្មានកូវីដមានសុពលភាពរយៈពេល ៧២ ម៉ោងមុនពេលចេញដំណើរ។ នៅពេលមកដល់កម្ពុជាអ្នកទាំងនោះ ត្រូវឆ្លងកាត់ការយកសំណាកទៅធ្វើតេស្តដោយក្រុមគ្រូពេទ្យវិជ្ជាជីវៈកម្ពុជា។
លោកថា ស្ថានតំណាងបរទេស និងក្រុមការងារអង្គការសហប្រជាជាតិនៅកម្ពុជាត្រូវធានាលើការត្រួតពិនិត្យឱ្យបានហ្មត់ចត់ក្នុងការអនុវត្តរបស់អ្នកទទួលបានទិដ្ឋាការការទូតកម្ពុជា ការធ្វើចត្តាឡីស័ក ១៤ ថ្ងៃពេញលេញ។ ក្នុងករណីមានអ្នកដំណើរណាម្នាក់ដែលធ្វើតេស្តមានវីរុសកូវីដ-១៩ ក្រសួងសុខាភិបាលនឹងបញ្ជូនអ្នកវិជ្ជមានវីរុសកូវីដ១៩ ទៅមន្ទីរពេទ្យតាមការកំណត់របស់ក្រសួងសុខាភិបាល។
លោក ម៉ម ប៊ុនហេង បញ្ជាក់ថា៖ «ធ្វើចត្តាឡីស័ក ១៤ ថ្ងៃ ពេញលេញនៅនិវាសដ្ឋានរបស់ស្ថានទូត ឬគេហដ្ឋានដាច់ដោយឡែកក្នុងករណីអ្នកការទូត ដែលមិនស្នាក់នៅក្នុងនិវាសដ្ឋានរបស់ស្ថានទូត ឬគេហដ្ឋានដាច់ដោយឡែកត្រូវធ្វើចត្តាឡីស័ក ១៤ ថ្ងៃពេញលេញនៅសណ្ឋាគារ Himawari និងស្ថិតក្រោមការត្រួតពិនិត្យរបស់ស្ថានទូត អង្គការអន្តរជាតិសាមី និងមន្រ្តីសុខាភិបាលដោយរាល់ការចំណាយទាំងអស់គឺជាបន្ទុករបស់សាមីខ្លួនផ្ទាល់»។
គិតត្រឹមថ្ងៃម្សិលមិញកម្ពុជាមានអ្នកវិជ្ជមានជំងឺកូវីដ១៩ចំនួន ៣៦២ នាក់ក្នុងនោះអ្នកព្យាបាលជាសះស្បើយ ៣៤៥ នាក់ និងអ្នកជំងឺកំពុងសម្រាកព្យាបាលមានចំនួន ១៧ នាក់៕
វីដេអូ៖
.jpg)
