ភ្នំពេញៈ ដោយបារម្ភពីការប៉ះពាល់ដល់សុខភាព និងអាយុជីវិតរបស់ប្រជាពលរដ្ឋក្នុងអំឡុងពិធីបុណ្យចូលឆ្នាំប្រពៃណីជាតិខ្មែរខាងមុខ និងពិធីសែនដូនតាផ្សេងៗ ក្រសួងសុខាភិបាលបានណែនាំដល់ពលរដ្ឋទាំងអស់កុំឱ្យពិសាស្រាដែលផលិតមិនត្រឹមត្រូវតាមបច្ចេកទេស។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលថ្លែងថា ស្របពេលក្រសួងសុខាភិបាលកំពុងយកចិត្តទុកដាក់ទប់ស្កាត់ការចម្លងវីរុសកូវីដ១៩ដែលនៅតែមានហានិភ័យធំនៅឡើយក្រសួងសុខាភិបាលក៏មានការបារម្ភអំពីឱកាសផ្ទុះជំងឺឆ្លងផ្សេងៗទៀតដូចជា ការពុលចំណីអាហារ ការពុលស្រា ដែលតែងតែកើតមានឡើង។
លោកបន្តថា៖ «ក្រសួងសុខាភិបាលសូមលើកទឹកចិត្តគ្រប់ៗគ្នាឱ្យចូលរួមអនុវត្តនូវវិធានការប្រុងប្រយ័ត្ន រួមទាំងការការពារផ្ទាល់ខ្លួន និងក្រុមគ្រួសាររបស់ខ្លួនក្នុងអំឡុងពិធីបុណ្យចូលឆ្នាំប្រពៃណីខ្មែរ និងពិធីសែនព្រេននានា ដើម្បីចៀសផុតពីបញ្ហា ពុលចំណីអាហារ ឬពុលស្រាជាដើម»។
លោក ម៉ម ប៊ុនហេង អំពាវនាវថា សូមកុំពិសាស្រាដែលបិត ឬលាយគ្មានបច្ចេកទេសត្រឹមត្រូវ និងគ្មានការត្រួតពិនិត្យហាមដាច់ខាតកុំយកសារធាតុមេតាណុលលាយធ្វើស្រាស ដែលបង្កឱ្យពុល និងស្លាប់។
លោកបន្ថែមថា៖ «អាជ្ញាធរ ខេត្ត ស្រុក ក្រុង ត្រូវចាត់តាំងកម្លាំងគ្រប់គ្រង ឃ្លាំមើល និងទប់ស្កាត់ការលក់ស្រា ផលិត ឬលាយគ្មានបច្ចេកទេសត្រឹមត្រូវ និងណែនាំប្រជាពលរដ្ឋចៀសវាងយកសារធាតុមេតាណុលលាយធ្វើស្រាសដែលបង្កឱ្យពុល និងស្លាប់បាត់បង់ជីវិត»។
លោក អៀ ប៊ុនធឿន ស្នងការរងនគរបាលខេត្តកំពង់ឆ្នាំង ជាខេត្តដែលធ្លាប់កើតមានករណីពលរដ្ឋពុលស្រាជាង ១៣០ នាក់ និងស្លាប់ជាង ១០ នាក់កាលពីចុងឆ្នាំមុន ប្រាប់ភ្នំពេញប៉ុស្តិ៍ថា នៅក្នុងសប្តាហ៍នេះកងកម្លាំងនគរបាលខេត្តនឹងចុះធ្វើការអប់រំ ផ្សព្វផ្សាយទៅដល់ប្រជាពលរដ្ឋទូទាំងខេត្តឱ្យមានការប្រុងប្រយ័ត្ន និង កុំពិសាស្រាសដែលអាចធ្វើឱ្យមានការប៉ះពាល់ដល់សុខភាព និងអាយុជីវិត។
លោកមានប្រសាសន៍ថា៖ «ក្នុងពិធីបុណ្យចូលឆ្នាំប្រពៃណីចិន និងវៀតណាមខាងមុខនេះខាងរដ្ឋបាលខេត្តបានចេញសេចក្តីណែនាំរួចហើយ ហើយខាងនគរបាលក៏នឹងធ្វើការផ្សព្វផ្សាយទៅដល់ប្រជាពលរដ្ឋផងដែរទាក់ទងនឹងការពិសាស្រាស ខណៈដែលមិនមានប្រជាពលរដ្ឋមានការពុលស្រាសនេះកើតមានទៀតក៏ដោយ»៕
វីដេអូ៖