.jpg)
សមត្ថកិច្ចជំនាញពេលពិនិត្យអាល់កុលដែលត្រូវគេដាក់លក់នៅហាងមួយនៅម្តុំផ្សារអូឡាំពិក។ រូបថត សហការី
ភ្នំពេញៈ ក្រសួងសុខាភិបាល និងអគ្គនាយកដ្ឋានកាំកុងត្រូលកាលពីថ្ងៃពុធ បានណែនាំ និងប្រកាសអនុវត្ដវិធានការផ្លូវច្បាប់ចំពោះអាជីវករម្ចាស់ឱសថស្ថាន និងឱសថការី ក្រោយពីសង្កេតឃើញមានការចរាចរ ចែកចាយ និងលក់ផលិតផលអាល់កុលក្លែងក្លាយដល់ប្រជាពលរដ្ឋសម្រាប់យកទៅលាងសម្អាតដៃបង្ការជំងឺកូវីដ ១៩ ខណៈអាល់កុលក្លែងក្លាយនេះអាចធ្វើឱ្យប៉ះពាល់ដល់សុខភាព និងអាយុជីវិត។
ក្រសួងសុខាភិបាលបានឱ្យដឹងថា បច្ចុប្បន្ននេះមានឱសថស្ថាន ឱសថស្ថានរងមួយចំនួនបានទិញ អាល់កុលមកលក់ ដោយពុំមានប្រភពច្បាស់លាស់ដែលមានគុណភាពមិនត្រឹមត្រូវតាមស្តង់ដា ខណៈដែលពលរដ្ឋទាំងអស់កំពុងត្រូវការអាល់កុលជាចាំបាច់ក្នុងការបង្ការការចម្លងជំងឺកូវីដ ១៩ នៅកម្ពុជា ដោយអាល់កុលមួយចំនួនមានការលាយសារធាតុមេតាណុលជាមួយអេតាណុល និងអាល់កុលមួយចំនួនទៀតពុំមានសារធាតុអេតាណុលទេគឺមានតែសារធាតុមេតាណុលតែប៉ុណ្ណោះ។
ក្រសួងសុខាភិបាលបញ្ជាក់ថា៖ «អាល់កុលប្រើប្រាស់សម្រាប់សម្លាប់មេរោគគឺជាល្បាយដែលមានសារធាតុអេតាណុលជាមួយទឹកដោយមិនត្រូវមានសារធាតុផ្សេងទៀតទេ ជាពិសេសសារធាតុមេតាណុល។ ចំពោះសារធាតុមេតាណុលមិនត្រូវបានគេប្រើប្រាស់សម្រាប់សម្លាប់មេរោគទេ ដោយសារធាតុនេះមានមុខងារសម្លាប់មេរោគខ្សោយបំផុត ប៉ុន្តែវាអាចបណ្ដាលឱ្យពុលនឹងគ្រោះថ្នាក់ដល់អាយុជីវិតទៀតផងក្នុងករណីប្រើប្រាស់សារធាតុនេះមិនបានត្រឹមត្រូវ»។
ដោយឡែកអគ្គនាយកដ្ឋានកាំកុងត្រូលបានសង្កេតឃើញថា មានអាជីវករមួយចំនួនបានលួចនាំចូល និងចែកចាយនូវផលិតផលអាល់កុលក្លែងក្លាយជាច្រើនដែលមិនមានស្លាកសញ្ញា និងប្រភពច្បាស់លាស់។ អាល់កុលដែលបាន និងកំពុងចរាចរលើទីផ្សារទាំងនោះភាគច្រើនគឺមិនមែនជាប្រភេទអាល់កុលធម្មតា (អេទីលអាល់កុល) ដែលមានមុខងារប្រើសម្រាប់គោលបំណងលាងសម្អាតដៃបង្ការការចម្លងមេរោគទេ ប៉ុន្តែគឺជាសារធាតុមេតាណុលដែលមានបរិមាណខ្ពស់រហូតដល់ ៨០ ភាគរយ។
អគ្គនាយកដ្ឋានកាំកុងត្រូលបានបញ្ជាក់ថា៖ «ជាទូទៅការលាងសម្អាតដៃដោយប្រើប្រាស់អាល់កុលដែលមានកម្រិតមេតាណុលខ្ពស់ដូចដែលបានរកឃើញទាំងនេះអាចជ្រាបចូលក្នុងស្បែក និងបង្កគ្រោះថ្នាក់ធ្ងន់ធ្ងរដល់សុខភាព ជាពិសេសអាចប៉ះពាល់ដល់លទ្ធភាពនៃការមើលឃើញរបស់ភ្នែក។ សារធាតុមេតាណុលនេះអាចបង្កគ្រោះថ្នាក់ដល់ជីវិតប្រសិនបើមានការយកទៅប្រើប្រាស់លាយធ្វើជាភេសជ្ជៈគ្រឿងស្រវឹងផ្សេងៗ»។
ក្រសួងសុខាភិបាលបានណែនាំដល់ម្ចាស់ឱសថស្ថាន និងឱសថការីទទួលបន្ទុកបច្ចេកទេសនៅតាមឱសថស្ថាន ឱសថស្ថានរងទូទាំងប្រទេសត្រូវគ្រប់គ្រងឱសថស្ថានរបស់ខ្លួនដោយអនុវត្ដឱ្យបានស្របតាមច្បាប់ និងលិខិតបទដ្ឋាននានាដែលមានជាធរមាន។ គ្រប់ឱសថស្ថាន ឱសថស្ថានរង ត្រូវទិញអាល់កុលដែលមានប្រភពច្បាស់លាស់ដោយមានវិក្កយបត្ររក្សាទុកត្រឹមត្រូវដើម្បីឱ្យក្រសួងសុខាភិបាលអាចតាមដានក៏ដូចជាស្វែងរកប្រភពជាក់លាក់នៅពេលដែលរកឃើញថា អាល់កុលនោះពុំមានភាពត្រឹមត្រូវ។
ក្រសួងបញ្ជាក់ថា៖ «ក្នុងករណីក្រសួងរកឃើញម្ចាស់ឱសថស្ថាន ឱសថស្ថានរង ឬឱសថការី ទទួលបន្ទុកបច្ចេកទេសនៅតាមឱសថស្ថានឱសថស្ថានរងណា មិនអនុវត្ដតាមការណែនាំនេះក្រសួងសុខាភិបាលនឹងមានវិធានការតឹងរ៉ឹងទៅតាមផ្លូវច្បាប់ដែលមានជាធរមាន»។
ចំណែកអគ្គនាយកដ្ឋានកាំកុងត្រូលបានណែនាំដល់អាជីវករ និងប្រជាពលរដ្ឋដែលជាអ្នកប្រើប្រាស់នូវវិធានការមួយចំនួនដូចជា ពលរដ្ឋជាអ្នកប្រើប្រាស់មេត្ដាកុំទិញផលិតផលអាល់កុលដែលគ្មានស្លាកសញ្ញា និងមិនមានបញ្ជាក់ពីប្រភពច្បាស់លាស់ ដើម្បីប្រើប្រាស់សម្រាប់ការលាងសម្អាតកម្ចាត់មេរោគ ឬបង្ការការចម្លងជំងឺកូវីដ ១៩។
អគ្គនាយកដ្ឋានកាំកុងត្រូលបញ្ជាក់ថា ការនាំចូល និងចែកចាយផលិតផលអាល់កុលសម្រាប់ប្រើប្រាស់ត្រូវដាក់ស្លាកសញ្ញាមានបញ្ជាក់ពីប្រភពអាសយដ្ឋានអ្នកចែកចាយ ឬដាក់លក់ និងមានឈ្មោះផលិតផលព្រមទាំងកម្រិតអាល់កុលគិតជាភាគរយនៃអេទីលអាល់កុលឱ្យបានត្រឹមត្រូវ។
អគ្គនាយកដ្ឋានកាំកុងត្រូលបន្តថា៖ «នឹងចាត់វិធានការផ្លូវច្បាប់ជាធរមានចំពោះអាជីវករណាដែលសមត្ថកិច្ចរកឃើញថាបានចរាចរ ឬដាក់លក់ផលិតផលអាល់កុលក្លែងក្លាយដូចបានរៀបរាប់ខាងលើ»៕
