.jpg)
រូបកន្លាតមួយក្បាល នៅក្នុងខ្លួនមនុស្សម្នាក់ និងសារដែលត្រូវបានគេបង្ហោះនៅតាមបណ្តាញសង្គមហ្វេសប៊ុក។ រូបថត ហ្វេសប៊ុក
ភ្នំពេញៈ ក្រសួងសុខាភិបាលនៅថ្ងៃទី ២០ ខែមេសា ឆ្នាំ ២០១៨ បានចេញសេចក្តីប្រកាសព័ត៌មានមួយ បដិសេធទាំងស្រុង ចំពោះការចុះផ្សាយព័ត៌មានមិនពិត នៅក្នុងបណ្តាញសង្គមហ្វេសហ៊ុក ដែលបង្ហោះពីករណីរូបថត X-ray ដែលអះអាងថា ជារបស់បុរសម្នាក់រស់នៅខេត្តព្រៃវែង ដោយអះអាងពីការមានសត្វកន្លាតមួយក្បាល កំពុងតែរស់នៅក្នុងខ្លួនរបស់បុរសរូបនោះ ដែលបានធ្វើឲ្យបុរសម្នាក់នោះមានការឈឺចាប់។
ការចេញសេចក្តីប្រកាសព័ត៌មានរបស់ក្រសួងសុខាភិបាលនេះ គឺធ្វើឡើង បន្ទាប់ពីមានអត្ថបទមួយនៅលើទំព័រហ្វេសប៊ុករបស់ឈ្មោះ «មើល កុំសាន (Merl Komsan)» ដោយមានភ្ជាប់ជាមួយនឹងរូបថត X-ray ដែលបង្ហាញពីសត្វកន្លាតមួយក្បាលកំពុងរស់នៅក្នុងខ្លួនរបស់បុរសម្នាក់នៅខេត្តព្រៃវែង។
អត្ថបទដែលត្រូវបានគេបង្ហោះ ហើយត្រូវបានចែកចាយតៗគ្នា នៅតាមបណ្តាញសង្គមហ្វេសប៊ុកក្នុងរយៈពេលប៉ុន្មានថ្ងៃចុងក្រោយនេះ បានសរសេរថា នេះជារូបថត X-ray របស់បុរសម្នាក់នៅខេត្តព្រៃវែង ដែលគាត់ត្រូវបានលោកវេជ្ជបណ្ឌិតប្រាប់ថា មានសត្វកន្លាតមួយក្បាលកំពុងតែរស់នៅក្នុងខ្លួនរបស់គាត់ ទើបធ្វើឲ្យគាត់មានអាការៈឈឺចុកចាប់សាច់ស្មាបែបនេះ ហើយត្រូវឲ្យគាត់ទៅព្យាបាលនៅបរទេស។ បន្ទាប់ពីការណែនាំរបស់គ្រូពេទ្យ បុរសរូបនេះ បានលក់ផ្ទះ និងខ្ចីលុយធនាគារអស់ជាច្រើន ដើម្បីយកលុយទៅព្យាបាលនៅប្រទេសឥណ្ឌា។
ព័ត៌មានមិនពិតនេះ បានសរសេរទៀតថា នៅពេលទៅដល់ប្រទេសឥណ្ឌា បន្ទាប់ពីការថត X-ray រួចហើយ លោកវេជ្ជបណ្ឌិត បានប្រាប់ទៅបុរសអ្នកព្រៃវែងនោះវិញថា សត្វកន្លាតដែលថតបាននោះ គឺវាស្ថិតនៅក្នុងម៉ាស៊ីន X-ray របស់មន្ទីរពេទ្យខេត្តព្រៃវែង មិនមែននៅក្នុងស្មារបស់គាត់ឡើយ។
សេចក្តីប្រកាសព័ត៌មាន របស់ក្រសួងសុខាភិបាល បានសរសេរថា បន្ទាប់ពីបានឃើញនូវការចុះផ្សាយបែបនេះ ក្រសួងបានធ្វើការស្រាវជ្រាវឃើញថា អត្ថបទដែលបានចុះផ្សាយខាងលើនេះ «គឺជាអត្ថបទដែលបានកែបន្លំ ខ្លឹមសារពីអត្ថបទដើម ដែលបានចុះផ្សាយដោយហ្វេសប៊ុកមានម្ចាស់ផេកឈ្មោះ Medecine Life -ជីវិតគ្រូពេទ្យ ដែលខ្លឹមសារបានសរសេរពីសាច់រឿងនៅប្រទេសនីហ្សេរីយ៉ា មិនមែននៅមន្ទីរពេទ្យខេត្តព្រៃវែងនោះឡើយ»។
សេចក្តីប្រកាសនេះបានព្រមានថា៖«ក្រសួងសុខាភិបាលសូមប្រកាសច្រានចោលនូវព័ត៌មានច្នៃប្រឌិត និងជាការលេងសើចរបស់ម្ចាស់ផេកឈ្មោះ មើល កុំសាន (Merl Komsan) ខាងលើនេះ ដែលធ្វើឲ្យមានការប៉ះពាល់ ដែលធ្វើឲ្យមានការប៉ះពាល់ដល់កិត្តិយស និងសេចក្តីថ្លៃថ្នូរដល់វិស័យសុខាភិបាលកម្ពុជា ហើយនឹងចាត់វិធានការតាមផ្លូវច្បាប់ប្រសិនបើម្ចាស់ផេកនេះ នៅតែបន្តការផ្សព្វផ្សាយនិងមិនកែតម្រូវទៅតាមអត្ថបទដើម និងសាច់រឿងដូចបានជម្រាបជូនខាងលើនេះ»៕
