បន្ទាយមានជ័យៈ ក្រសួងសុខាភិបាលបានប្រកាសពីករណីផ្ទុះឡើងនៃជំងឺឈីក (Chikunngunya) នៅក្នុងភូមិមួយចំនួននៃសង្កាត់ប៉ោយប៉ែត និងបានព្រមានពីការឆ្លងរីករាលដាលនៃជំងឺនេះ។ ដើម្បីទប់ស្កាត់ការរីករាលដាលជំងឺនេះ មន្ត្រីសុខាភិបាលនៅតាមបណ្តាខេត្តផ្សេងទៀតបានបើកយុទ្ធនាការបាញ់ថ្នាំសម្លាប់មូស និងដាក់ថ្នាំអាបែតតាមពាងទឹកប្រជាពលរដ្ឋ។
សេចក្តីប្រកាសព័ត៌មានរបស់ក្រសួងសុខាភិបាលចុះថ្ងៃទី ២៣ កក្កដា ឲ្យដឹងថាចាប់តាំងពីថ្ងៃទី ១៩ ខែកក្កដា រហូតដល់ថ្ងៃទី ២២ កក្កដា ប្រជាពលរដ្ឋនៅភូមិក្បាលកោះ ភូមិអូរជ្រៅ ភូមិប៉ោយប៉ែត ភូមិព្រៃគប់ ភូមិអូរនាង និងអូរឫស្សីនៃសង្កាត់ប៉ោយប៉ែតមានចេញរោគសញ្ញាគ្រុនក្តៅដោយមានកម្តៅ ៣៨ អង្សាសេ ឡើងកន្តួលក្រហមលើស្បែក និងឈឺសន្លាក់ដៃជើង។
ក្រុមមន្ត្រីជំនាញបានចុះស្រាវជ្រាវអង្កេតក្នុងភូមិទាំងនេះរួមទាំងផ្ទះប្រជាពលរដ្ឋ ដើម្បីពិនិត្យស្ថានភាពជាក់ស្តែងដោយមានពលរដ្ឋក្មេងចាស់ ប្រុសស្រីចំនួន ១៦៨ នាក់ ដោយក្នុងនោះអ្នកដែលមានបញ្ហាសុខភាពត្រូវបានបញ្ជូនមកពិនិត្យ និងសម្រាកព្យាបាលនៅមន្ទីរពេទ្យ។
សេចក្តីប្រកាសបញ្ជាក់ថា៖ «បានបញ្ជូនបុគ្គលដែលមានបញ្ហាសុខភាពមកពិនិត្យ និងព្យាបាលនៅមណ្ឌលសុខភាពប៉ោយប៉ែត ១ និងមន្ទីរពេទ្យបង្អែកប៉ោយប៉ែតមានចំនួន ៣២ នាក់ ប៉ុន្តែបច្ចុប្បន្នស្ថានភាពរបស់ពួកគាត់មានសភាពធូរស្បើយហើយ»។
ក្រសួងសុខាភិបាលឲ្យដឹងទៀតថា ស្របតាមលក្ខណៈបច្ចេកទេសក្រុមការងារក៏បានប្រមូលសំណាកវត្ថុវិភាគឈាមចំនួន ២២ នាក់ ដើម្បីធ្វើតេស្តរកមើលវីរុសគ្រុនឈីក និងរកមើលវីរុសកញ្រឹ្ជលស្អូច (Meansles-Rubella) ចំនួន ៦០ នាក់ និងយកសំណាកសម្រាប់ធ្វើតេស្តរកវីរុសកូវីដ ១៩ ចំនួន ២២ នាក់។ ក្រសួងបន្តថា សំណាកទាំងអស់នោះត្រូវបានបញ្ជូនមកមន្ទីរពិសោធន៍វិទ្យាសាស្ត្រប៉ាស្ទ័រកម្ពុជាដែលជាលទ្ធផលបឋមបង្ហាញថា គឺជាករណីគ្រុនឈីក។
ក្រសួងបញ្ជាក់ថា៖ «បច្ចុប្បន្នក្រៅពីការទប់ស្កាត់នូវការចម្លងវីរុសកូវីដ១៩ នៅកម្ពុជា ការលេចឡើងនូវជំងឺគ្រុនឈីកសាជាថ្មីឡើងវិញនៅខេត្តបន្ទាយមានជ័យដែលនេះអាចជាបញ្ហាសុខភាពសាធារណៈ ១ ទៀតដែលប្រឈមទៅនឹងហានិភ័យអាចឲ្យមានការឆ្លងរាលដាលពីបុគ្គលម្នាក់ទៅបុគ្គលម្នាក់ពីគ្រួសារ ១ ទៅគ្រួសារ ១ ពីភូមិ ១ ទៅភូមិ ១ ពីឃុំ ១ ទៀតជាដើម តាមរយៈមូសខ្លាញីខាំដែលចល័តគ្រប់ទីកន្លែង»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលត្រូវបានស្រង់សម្តីក្នុងសេចក្តីប្រកាសនេះថា ការទប់ស្កាត់ជំងឺឈីកក៏ដូចជាការទប់ស្កាត់ជំងឺគ្រុនឈាមដែរដោយផ្អែកទៅលើការការពារកុំឲ្យមានមូសខ្លាញីខាំតាមរយៈការកម្ចាត់វត្ថុដក់ទឹកដែលជាជម្រកនៃការកកើតសត្វមូស។ លោកស្នើឲ្យប្រជាពលរដ្ឋចូលរួមអនុវត្តវិធានការតាមការណែនាំរបស់ក្រសួងសុខាភិបាល និងអាជ្ញាធរមូលដ្ឋានដើម្បីសុខភាពខ្លួនអ្នក គ្រួសារអ្នក និងសហគមន៍ចៀសផុតពីជំងឺគ្រុនឈីក និងជំងឺគ្រុនឈាម។
លោកបញ្ជាក់ថា៖ «ខ្ញុំសូមជំរុញឲ្យថ្នាក់ដឹកនាំមូលដ្ឋានគ្រប់ថ្នាក់ទាំងអស់ ចលនាប្រជាជននៅក្នុងសហគមន៍ក្នុងការកំចាត់ជម្រកមូសខ្លាដែលនាំឲ្យកកើតដង្កូវទឹក និងមានមូសបង្កជំងឺ ស្លៀកពាក់ខោអាវវែង និងសម្រាន្តក្នុងមុង។ ពេលមានជំងឺដែលមានរោគសញ្ញាដូចខាងលើនេះសូមអញ្ជើញទៅមណ្ឌលសុខភាព ឬមន្ទីរពេទ្យបង្អែកដែលនៅជិតលោកអ្នក»។
លោក ឡេ ច័ន្ទសង្វាត ប្រធានមន្ទីរសុខាភិបាល ខេត្តបន្ទាយមានជ័យ ប្រាប់ភ្នំពេញប៉ុស្តិ៍ពីម្សិលមិញថា បន្ទាប់កើតមានករណីផ្ទុះជំងឺឈីកក្នុងភូមិទាំងនេះ ក្រុមការងារឆ្លើយតបបន្ទាន់នៃមន្ទីរសុខាភិបាលខេត្តបានបន្តចុះបាញ់ថ្នាំសម្លាប់មូសខ្លានៅភូមិគោលដៅក្នុងក្រុងប៉ោយប៉ែត។ លោកបន្តថានេះជាផ្នែកមួយនៃការអន្តរាគមន៍ទប់ស្កាត់ជំងឺគ្រុនឈីក និងជំងឺគ្រុនឈាមដែលមានភ្នាក់ងារចម្លងគឺមូសខ្លា។
លោកអំពាវនាវឲ្យប្រជាពលរដ្ឋនៅក្នុងក្រុងប៉ោយប៉ែតក៏ដូចទូទាំងខេត្ត សូមប្រុងប្រយ័ត្នចំពោះការផ្ទុះឡើងនៃជំងឺគ្រុនឈីកនេះដោយត្រូវចូលរួមសហការអនុវត្តនូវវិធានការបំបាត់ជម្រកមូសខ្លា សម្អាតអនាម័យបរិស្ថានតាមផ្ទះសំបែង គេងក្នុងមុង និងបើមានបញ្ហាសុខភាពត្រូវប្រញាប់ទៅទទួលយកសេវាពិនិត្យ និងព្យាបាលនៅមណ្ឌលសុខភាពមន្ទីរពេទ្យដែលនៅជិតផ្ទះបំផុត។
លោកបញ្ជាក់ថា៖ «សូមមេត្តាចូលរួមផ្តល់ព័ត៌មានជូនទៅក្រុមទ្រទ្រង់សុខភាពភូមិ មេភូមិ និងអាជ្ញាធរមូលដ្ឋានអំពីបញ្ហាជំងឺ ឬព័ត៌មានសុខភាពផ្សេងៗ ដើម្បីឲ្យមន្ទីរសុខាភិបាលខេត្ត ស្រុកប្រតិបត្តិ មណ្ឌលសុខភាព និងមន្ទីរពេទ្យជួយអន្តាគមន៍បានឆាប់រហ័ស និងទាន់ពេលវេលា»។
មិនខុសគ្នានេះដែរលោក គួង ឡូ ប្រធានមន្ទីរសុខាភិបាលខេត្តព្រះវិហារថ្លែងថា លំនៅឋានរបស់ប្រជាពលរដ្ឋចំនួន ៣ ភូមិជាប់នឹងព្រំដែនប្រទេសឡាវស្ថិតក្នុងឃុំកំពង់ស្រឡៅ ស្រុកឆែបក៏ត្រូវបានបើកយុទ្ធនាការចុះបាញ់ថ្នាំសម្លាប់មូសនេះផងដែរ បន្ទាប់ពីមានអ្នកជំងឺជាច្រើនសង្ស័យថា មានជំងឺឈីក។
លោកបន្តថា ក្រៅពីនេះមន្ត្រីសុខាភិបាលខេត្តក៏បានដាក់ថ្នាំអាបែតចំនួន ៣ តោនតាមពាងទឹក អាងទឹកពលរដ្ឋ ដើម្បីសម្លាប់មូសនៅទូទាំងខេត្ត។ លោកថា៖ «ការដែលយើងបាញ់ថ្នាំនេះដោយសារតែយើងមានការសង្ស័យពីការរាតត្បាតនៃជំងឺគ្រុនឈីកនេះ ចំណែកជំងឺគ្រុនឈាមមិនទាន់មាននៅក្នុងសហគមន៍យើងនៅឡើយទេ»។
បើតាមក្រសួងសុខាភិបាលជំងឺគ្រុនឈីក មិនបណ្តាលឲ្យប៉ះពាល់ដល់អាយុជីវិតនោះទេ ដោយគ្រាន់តែធ្វើឲ្យអ្នកជំងឺមានអាការឈឺសន្លាក់ដៃជើងយូរឆ្នាំ ហើយវានឹងជាសះស្បើយក្នុងអំឡុងពេល ១ សប្តាហ៍ ឬយូរជាងនេះ ប៉ុន្តែបើសិនជាអ្នកជំងឺមានជំងឺឈីកក្នុងអំឡុងពេលមានជំងឺផ្សេងទៀតនឹងអាចបណ្តាលឲ្យប៉ះពាល់ដល់អាយុជីវិត៕