ភ្នំពេញ: លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានធ្វើលិខិតផ្លូវការនាពេលថ្មីៗកន្លងមកនេះជូនដំណឹងដល់ប្រធានមន្ទីរសុខាភិបាលរាជធានី-ខេត្តទូទាំងប្រទេស ត្រូវចាត់វិធានការផ្លូវច្បាប់ប្រឆាំងអ្នកប្រកបអាជីវកម្មព្យាបាលជំងឺ និងដើរចាក់ថ្នាំខុសច្បាប់ ក្រោយពីមានផលប៉ះពាល់សុខភាព និងឈានដល់ការបាត់បង់ជីវិតប្រជាពលរដ្ឋ។
យោងតាមសេចក្ដីជូនដំណឹងរបស់រដ្ឋមន្ត្រីក្រសួងសុខាភិបាលចេញកាលពីថ្ងៃទី ២៧ ឧសភា ឆ្នាំ ២០១៩ ជូនដំណឹងដល់ប្រធានមន្ទីរសុខាភិបាលរាជធានី-ខេត្ត បានឲ្យដឹងថា៖ «ក្រសួងសុខាភិបាលបានសង្កេតឃើញថា នៅមានអ្នកប្រកបអាជីវកម្មព្យាបាលជំងឺ និងដើរចាក់ថ្នាំខុសច្បាប់ បណ្ដាលឲ្យខាតបង់ថវិកា ប៉ះពាល់ដល់សុខភាព និងឈានដល់ការបាត់បង់អាយុជីវិតប្រជាពលរដ្ឋទៀតផង។ ក្នុងករណីនេះ ដើម្បីឈានទៅដល់ការលុបបំបាត់ទាំងស្រុងនូវសេវាសុខាភិបាលខុសច្បាប់លោកនិង លោកស្រីប្រធានមន្ទីរសុខាភិបាលរាជធានី-ខេត្ត ចាត់ចែង រៀបចំឯកសារគតិយុត្តប្ដឹងទៅសាលាដំបូងរាជធានី-ខេត្ត ចំពោះអ្នកប្រកបអាជីវកម្មព្យាបាលជំងឺ និងដើរចាក់ថ្នាំខុសច្បាប់នៅក្នុងដែនសមត្ថកិច្ចរៀងៗខ្លួន»។
នៅក្នុងខែ ឧសភា ឆ្នាំ ២០១៩ នេះ មន្ទីរសុខាភិបាលខេត្តស្វាយរៀងបានចាត់វិធានការផ្លូវច្បាប់បានបញ្ជូនឈ្មោះមនុស្សជិត ៤០០ នាក់ ដែលជាអ្នកប្រកបអាជីវកម្មព្យាបាលជំងឺនិងដើរចាក់ថ្នាំខុសច្បាប់ទៅតុលាការ ហើយក្រុមអ្នកប្រកបអាជីវកម្មបែបនេះនៅក្នុងខេត្តត្បូងឃ្មុំក៏ត្រូវបានតុលាការកោះហៅបំភ្លឺជាបន្តបន្ទាប់។
លោក កែរ រដ្ឋា ប្រធានមន្ទីរសុខាភិបាលខេត្តស្វាយរៀង កាលពីថ្ងៃទី ២១ ខែ ឧសភា បានបញ្ជូនឈ្មោះគ្រូពេទ្យចំនួន ៣៩៣ នាក់ ដែលប្រកបមុខរបររកស៊ីដើរចាក់ថ្នាំ និងព្យាបាលជំងឺប្រជាពលរដ្ឋយ៉ាងអនាធិបតេយ្យនៅតាមភូមិ ស្រុក ដោយគ្មានសញ្ញាបត្រ និងគ្មានច្បាប់អនុញ្ញាតពីមន្ទីរសុខាភិបាលខេត្ត ឬក្រសួងសុខាភិបាល ទៅសាលាដំបូងខេត្តស្វាយរៀង ដើម្បីតម្កល់ទុកជាការព្រមានរាល់សកម្មភាពរបស់ពួកគាត់។
លោក កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ ក៏បានប្ដឹងគ្រូពេទ្យចំនួន ១៤៨ នាក់ ទៅសាលាដំបូងខេត្តត្បូងឃ្មុំដែរ ដោយតុលាការនៅថ្ងៃទី ២៦ ឧសភា បានកោះហៅគ្រូពេទ្យចំនួន ១៧ នាក់ ក្នុងចំណោម ១៤៨ នាក់ ឲ្យចូលឆ្លើយបំភ្លឺក្នុងសវនាការ ពាក់ព័ន្ធរឿងប្រកបមុខរបរដើរព្យាបាលជំងឺប្រជាពលរដ្ឋនៅតាមមូលដ្ឋានដោយគ្មានច្បាប់អនុញ្ញាត ខណៈគ្រូពេទ្យចំនួន ១៣១ នាក់ផ្សេងទៀត ត្រូវបានកោះហៅជាបន្តបន្ទាប់តាមបណ្ដឹងរបស់មន្ទីរសុខាភិបាលខេត្តត្បូងឃ្មុំ។
លោក អោ វណ្ណថេន ប្រធានមន្ទីរសុខាភិបាលខេត្តកំពង់ស្ពឺ កាលពីម្សិលមិញបានថ្លែងថា លិខិតរបស់ក្រសួងនេះ គ្រាន់តែជាសារក្រើនរំឭកប៉ុណ្ណោះ ព្រោះវិស័យសុខាភិបាលក៏បានច្បាប់គ្រប់គ្រងការដើរចាក់ថ្នាំខុសច្បាប់ និងជួញដូរឱសថក្លែងក្លាយរួចទៅហើយ។
លោកបន្តថា៖ «ប្រហែលជាឯកឧត្តមរដ្ឋមន្ត្រី គាត់មើលឃើញថា ថ្នាក់ក្រោមហ្នឹង លែងសូវធ្វើការងារនេះ ធ្វើមួយប្រាវអ៊ីចឹង គាត់ទម្លាក់ដៃចោលវិញ ហើយបញ្ហាក៏កើតឡើងមកវិញ អ៊ីចឹងបានជាគាត់រំឭកយើងម្ដងទៀត »។
លោក នុត ស៊ីណាត ប្រធានមន្ទីរសុខាភិបាលខេត្តតាកែវ បានថ្លែងថា លោកបានទទួលលិខិតនេះហើយៗ កំពុងធ្វើការប្រជុំគណៈកម្មការចម្រុះដើម្បីធ្វើការស្រាវជ្រាវតាមមូលដ្ឋានដែលជាដែនសមត្ថកិច្ចរបស់អាជ្ញាធររៀងៗខ្លួន។
លោក ស៊ីណាត បញ្ជាក់ថា៖ «ខាងខ្ញុំដើរធ្វើជាប្រចាំ ប៉ុន្ដែយើងគ្រាន់តែឲ្យគាត់ធ្វើកិច្ចសន្យាបញ្ឈប់សកម្មភាពគាត់ ឬព្រមាន តែឥឡូវនេះ ខាងក្រសួងគាត់បញ្ជាមកគឺខ្ញុំនឹងកោះប្រជុំគណៈកម្មការដើម្បីធ្វើការងារនេះ គឺបើមានអ្នកនៅបំពានកិច្ចសន្យា យើងឈប់ឲ្យគាត់ធ្វើកិច្ចសន្យាហើយ គឺប្ដឹងឡើងតុលាការតែម្ដង»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានថ្លែងថា តាមច្បាប់រដ្ឋធម្មនុញ្ញរបស់កម្ពុជា គឺរដ្ឋាភិបាលជាអ្នកធានាទៅលើសុខុមាលភាពពលរដ្ឋ។ ដូច្នេះ ប្រព័ន្ធដឹកនាំ គ្រប់គ្រងក្រសួងសុខាភិបាល គឺជាស្ថាប័នមួយដែលធានាថា ពលរដ្ឋកម្ពុជាទាំងអស់ត្រូវតែមានសិទ្ធិទទួលបានសុខុមាលភាពល្អ។
លោកបន្តថា៖ «កន្លងមកយើងឃើញមានអ្នករងគ្រោះជាច្រើនដោយសារពេទ្យគ្មានជំនាញវិជ្ជាជីវៈត្រឹមត្រូវ ដើរទៅចាក់ថ្នាំ ព្យាបាល តាមមូលដ្ឋានពេញទឹកពេញដី។ ជាពិសេសជាក់ស្ដែងដូចនៅខេត្តបាត់ដំបង គ្រូពេទ្យភូមិម្នាក់ដើរចាក់ចម្លងមេរោគអេដស៍ចូលក្នុងខ្លួនពលរដ្ឋស្ទើរមួយភូមិ អ៊ីចឹងវាជារឿងគ្រោះថ្នាក់ណាស់។ ការធ្វើនេះ (វិធានការរបស់ក្រសួងសុខាភិបាល) ឲ្យមានតម្លាភាព ត្រឹមត្រូវ កុំរើសអើងបក្ខពួកនយោបាយជាដើម»៕