ភ្នំពេញៈ ក្រសួងសុខាភិបាលបានអំពាវនាវជាថ្មីឱ្យពលរដ្ឋប្រុងប្រយ័ត្ន ចំពោះការបរិភោគត្រីក្រពតចំនួន ៣ ប្រភេទ ដែលបណ្ដាលឱ្យពុលឈឺ និងស្លាប់ ដែលការអំពាវនាវនេះបានធ្វើឡើង ស្របពេលករណីពុលត្រីក្រពតនៅតែបន្តកើតឡើង ថ្វីដ្បិតក្រសួងធ្លាប់ធ្វើការណែនាំ ជារឿយៗក្ដី។ នេះបើតាមសេចក្ដីជូនដំណឹងមួយចេញផ្សាយកាលពីថ្ងៃទី ២០ កុម្ភៈ។
សេចក្ដីជូនព័ត៌មាននេះបានឱ្យដឹងថា ចាប់ពីឆ្នាំ ២០១៧ រហូតដល់ថ្ងៃទី ១៩ ខែកុម្ភៈឆ្នាំ ២០១៩ នេះ គឺមានករណីពុលត្រីក្រពតកើតឡើងចំនួន ៧ លើក នៅក្នុងខេត្តចំនួន៤ ដូចជាខេត្តក្រចេះ កោះកុង សៀមរាប ស្របពេលខេត្តបន្ទាយមានជ័យ បានកើតឡើងករណីពុលត្រីក្រពតជាលើកទី ៣ កាលពីថៃ្ងទី ១៩ ខែកុម្ភៈ ដែលបានធ្វើឱ្យគ្រួសារមួយពុលឈឺ ៥ នាក់ និងស្លាប់ម្នាក់។
ក្រសួងសុខាភិបាលអះអាងថា ក្នុងចំណោមករណីពុលត្រីក្រពតទាំង ៧ លើកនេះ គឺបានធ្វើឱ្យមនុស្សស្លាប់សរុប ៥ នាក់ និងពុលឈឺចំនួន ៤០ នាក់។ ដើម្បីជាការរំឭកអំពីវិធានការការពារកុំឱ្យមានករណីពុលកើតឡើងបន្ថែមទៀត ក្រសួងសុខាភិបាលបញ្ជាក់ថា ក្នុង ចំណោមត្រីក្រពតចំនួន ១០ ប្រភេទ គឺមាន ៣ ប្រភេទដែលពុល ទី១ ប្រភេទត្រីក្រពតឈ្មោះTetraodon cochinchinensis ឬហៅថាត្រីក្រពតកូសាំងស៊ីន ទី២ Monotrete leiurus និងទី៣ Tetraodon fluviatillis។
ស្រាវជ្រាវរបស់ក្រសួង ត្រីក្រពតទាំង ៣ ប្រភេទនេះ គឺមានជាតិពុលខ្ពស់ ហើយនៅពេលជាតិពុលជ្រាបទៅប៉ះពាល់ប្រព័ន្ធសរសៃប្រសាទកណ្ដាល គឺអាចបណ្ដាលឱ្យស្លាប់។ ពួកត្រីក្រពតទាំងនេះ មានជាតិពុលខ្ពស់បំផុតនៅរដូវកូនបន្តពូជ ដែលស្ថិតនៅខែកុម្ភៈដល់ខែមីនា និងស្ថិតនៅចន្លោះខែ កក្កដាទៅខែកញ្ញា ហើយចំពោះមេជីវិត និងពងរបស់វាមានជាតិពុលខ្ពស់ជាងគេ បន្ទាប់មកថ្លើម ពោះវៀន ស្បែក និងសាច់។
ក្រសួងសុខាភិបាលពន្យល់ថា បន្ទាប់ពីបរិភោគត្រីក្រពតទាំងនេះពីរយៈពេល ២០ នាទីទៅដល់ ២ ម៉ោង គឺមានរោគសញ្ញា ដូចជារមាស់ចាក់ៗនៅបបូរមាត់ និងមាត់ បន្ទាប់មកឈឺក្បាល វិលមុខ រមាស់ចាក់ៗនៅចុងអវយវៈ មានការពិបាកនិយាយ បាត់លំនឹងដងខ្លួន ខ្សោយសាច់ដុំ ខ្វិន ស្ពឹកចុងដៃចុងជើង ក្អួត រាក ល្ហិតល្ហៃ រឹងថ្គាម ឬអាចឱ្យពុលស្លាប់តែម្ដង ហើយស្ថិតក្នុងស្ថានភាពពុលខ្លាំង គឺធ្វើឱ្យថប់ដង្ហើមស្លាប់។
ក្រសួងអះអាងបន្តថា ការធ្វើឱ្យក្អួត គឺអាចជួយបញ្ចេញជាតិពុលមួយចំណែក ហើយត្រូវប្រញាប់ទៅរកការជួយសង្គ្រោះជាបន្ទាន់នៅមណ្ឌលសុខភាពឬមន្ទីរពេទ្យដែលនៅជិតបំផុត។ លើសពីនេះ ជាតិពុលក្នុងត្រីក្រពតទាំងនោះ មិនអាចកម្ចាត់ចោលតាមរយៈការចម្អិនឱ្យឆ្អិន ឬដាក់ឱ្យកកឡើយ។
ភ្នំពេញប៉ុស្ដិ៍មិនអាចទាក់ទងតាមទូរស័ព្ទទៅលោក លី សូវ៉ាន់ មន្ត្រីនាំពាក្យនិងលោក ម៉ម ប៊ុនហេង រដ្ឋមន្ត្រីក្រសួងសុខាភិបាលដើម្បីសុំការបញ្ជាក់បន្ថែមបានទេ ពីម្សិលមិញ។
លោក កែវ សុភ័ក្ត្រា ប្រធានមន្ទីរសុខាភិបាលខេត្តបន្ទាយមានជ័យបានលើកឡើងថា បន្ទាប់ពីមានករណីពុលត្រីក្រពតចុងក្រោយនៅខេត្តរបស់លោក ក្រសួងសុខាភិបាលបានជំរុញឱ្យមន្ត្រីខេត្តពាក់ព័ន្ធទាំងអស់រហូតដល់មេភូមិនិងប៉ូលិសប៉ុស្ដិ៍ ត្រូវធ្វើការផ្សព្វផ្សាយទៅដល់ប្រជាពលរដ្ឋឱ្យបានទ្រង់ទ្រាយធំ និងឱ្យបានទូទាំងខេត្ត ព្រោះរយៈកាលកន្លងមកអាជ្ញាធរ បានចុះអប់រំចំពោះតែទីតាំងណាដែលកើតមានករណីពុលត្រីក្រពតប៉ុណ្ណោះ។
លោកបានថ្លែងថា៖ «យើងផ្សព្វផ្សាយពីថ្នាក់លើដល់ថ្នាក់ក្រោម មានន័យថា ពីខេត្ត ក្រុង ស្រុក ភូមិ និងតំបន់ដាច់ស្រយាលថែមទៀត តាមបណ្ដាញរបស់ក្រសួងសុខាភិបាល និងអាជ្ញាធរថែមទៀត»។
ចំណែកលោក ស៊ុំ ច័ន្ទគា មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបន្ទាយមានជ័យបានលើកឡើងថា ថ្វីដ្បិតកន្លងមកមានការផ្សព្វផ្សាយពីសំណាក់អាជ្ញាធរផ្ទាល់និងតាមវិទ្យុ កាសែត និងទូរទស្សន៍យ៉ាងព្រោងព្រាតក្ដី ប៉ុន្តែពលរដ្ឋខ្លះនៅតែមិនព្រមស្ដាប់តាមការណែនាំ ហើយនៅតែបរិភោគត្រីក្រពតដដែល ដោយសារពួកគាត់ចាត់ទុកថា ត្រីក្រពតគឺជាប្រភេទត្រីដែលមានរសជាតិឆ្ងាញ់ជាងត្រីផ្សេងៗទៀត ជាពិសេសវាជាអាហារដែលអ្នកពិសាស្រាចូលចិត្តក្លែម។
លោកថា៖ «ដល់ពេលឱ្យតម្លៃអ៊ីចឹងទៅធ្វើឱ្យការទប់ស្កាត់ទប់មិនបានទាល់តែខ្លួនគាត់ (ពលរដ្ឋ) ហ្នឹង ដាក់សញ្ញាមួយគឺសញ្ញាក្បាលខ្មោច នៅពេលគាត់ឃើញត្រីក្រពតទៅគាត់ខ្លាចញញើត ទើបអាចទៅរួច។ ឱ្យគាត់ខ្លាច (បាត់បង់) អាយុជីវិតគាត់ហើយត្រីក្រពត និងអាយុជីវិតតើគាត់យកមួយណា ឱ្យគាត់ស្គាល់តម្លៃអ៊ីចឹង»៕