ភ្នំពេញៈ ក្រសួងសុខាភិបាលបានព្រមានចាត់វិធានការតាមផ្លូវច្បាប់ចំពោះអ្នកផ្សព្វផ្សាយលក់ផលិតផលគ្រឿងសម្អាង និងឱសថតាមប្រព័ន្ធ Facebook និង Online ដែលគ្មានលេខប្រវេទន៍ និង គ្មានការទទួលស្គាល់ពីក្រសួងសុខាភិបាល។
យោងតាមសេចក្ដីជូនដំណឹងដែលភ្នំពេញប៉ុស្តិ៍ទទួលបានកាលពីចុងសប្ដាហ៍បានឲ្យដឹងថា ផលិតផលគ្រឿងសម្អាងម៉ាក K&L និងឱសថឈ្មោះ Auclaty 625mg ព្រមទាំងឱសថជាច្រើនមុខទៀតដែលគ្មានលេខប្រវេទន៍ និងគ្មានការទទួលស្គាល់ពីក្រសួងសុខាភិបាលត្រូវបានគេផ្សព្វផ្សាយលក់យ៉ាងអនាធិបតេយ្យតាមប្រព័ន្ធបណ្ដាញសង្គម Facebook និង Online។
លោក ហេង ប៊ុនគៀត ប្រធាននាយកដ្ឋានឱសថ ចំណីអាហារ បរិក្ខារពេទ្យ និង គ្រឿងសម្អាងបានឲ្យដឹងនៅក្នុងសេចក្ដីជូនដំណឹងនោះដោយបានអំពាវនាវដល់អ្នកប្រើប្រាស់ បញ្ឈប់ការទិញ និងប្រើប្រាស់នូវផលិតផលគ្រឿងសម្អាង និងឱសថអត់ច្បាប់ទាំងនោះជាបន្ទាន់ និង ត្រូវរាយការណ៍ប្រាប់សមត្ថកិច្ចឲ្យបានលឿនតាមដែលអាចធ្វើទៅបាន អំពីទីតាំង ឬអត្តសញ្ញាណអ្នកនាំចូល និងធ្វើចរាចរណ៍ចែកចាយនូវផលិតផលទាំងនោះដើម្បីមានចំណាត់ការទៅតាមផ្លូវច្បាប់។
ជាមួយគ្នានេះលោក ប៊ុនគៀត បានព្រមានចាត់វិធានការទៅតាមផ្លូវច្បាប់ផងដែរ ចំពោះម្ចាស់គណនីបណ្ដាញសង្គមទាំងអស់ដែលនៅតែបន្តការនាំចូល ផ្សព្វផ្សាយលក់ និងចែកចាយបន្តនូវផលិតផលគ្រឿងសម្អាង និងឱសថអត់ច្បាប់ទាំងនោះ។
លោកបានបញ្ជាក់ថា៖ «ម្ចាស់គណនីបណ្ដាញសង្គមទាំងអស់ដែលបានធ្វើការផ្សព្វផ្សាយលក់ផលិតផលគ្រឿងសម្អាង និងឱសថ អត់ច្បាប់ត្រូវបញ្ឈប់ការនាំចូលផ្សព្វផ្សាយលក់ និងចែកចាយបន្តជាបន្ទាន់។ ក្នុងករណីរឹងរូសមិនអនុវត្តតាមសេចក្ដីជូនដំណឹង ក្រសួងនឹងចាត់វិធានការទៅតាមផ្លូវច្បាប់»។
ម្ចាស់គណនី Facebook ឈ្មោះ គឹមលាង ស្គីនឃែរ, K&L Cosmestic brand, Kimhorn Thim និងម្ចាស់គណនីផ្សេងទៀតដែលបានផ្សព្វផ្សាយលក់ផលិតផលគ្រឿងសម្អាង និងឱសថទាំងនោះមិនអាចទាក់ទងស្នើសុំការពន្យល់បានទេកាលពីម្សិលមិញ។
ថ្វីបើនៅក្នុងសេចក្ដីជូនដំណឹងនោះ ក្រសួងមិនបានបញ្ជាក់អំពីកម្រិតនៃផលប៉ះពាល់ផ្នែកសុខភាពចំពោះការប្រើប្រាស់នូវផលិតផលគ្រឿងសម្អាង និង ឱសថទាំងនោះក្ដី ប៉ុន្តែមន្ត្រីជំនាញផ្នែកបច្ចេកទេសនៃនាយកដ្ឋាន ឱសថ ចំណីអាហារ បរិក្ខារពេទ្យ និងគ្រឿងសម្អាងបានប្រាប់ភ្នំពេញប៉ុស្តិ៍ក្នុងលក្ខខណ្ឌមិនបញ្ចេញឈ្មោះថា ជាទូទៅ ផលិតផលគ្រឿងសម្អាង និងឱសថគឺជាអាវុធមុខ ២ ដែលអាចលើកសម្រស់អ្នកប្រើប្រាស់ឲ្យស្រស់ស្អាតជាងវ័យ និង មានសុខភាពរឹងមាំ ប៉ុន្តែវាក៏អាចបំផ្លាញរូបសម្រស់ និង សុខភាពរបស់អ្នកប្រើបាស់ដល់កម្រិតដែលពិបាកនឹងស្រោចស្រង់វិញផងដែរ ប្រសិនបើវាត្រូវបានផ្សំឡើងពីសារធាតុដែលត្រូវបានហាមឃាត់ ឬផ្សំឡើងមិនត្រឹមត្រូវតាមលក្ខណៈស្ដង់ដាបច្ចេកទេស។
មន្ត្រីបានឲ្យដឹងថា៖ «កន្លងមក គ្រឿងសម្អាងខុសច្បាប់មួយចំនួនដែលសមត្ថកិច្ចជំនាញយើងបង្ក្រាបបាន ពិសេសគ្រឿងសម្អាងដែលធ្វើឲ្យស្បែកស គឺយើងបានធ្វើតេស្តរកឃើញមានលាយសារធាតុហាមឃាត់ជាច្រើនមុខ ដែលក្នុងនោះមានទាំងសារធាតុបារតដែលធ្វើឲ្យអ្នកប្រើប្រាស់ប្រឈមការកើតជំងឺមហារីក និងជំងឺផ្សេងៗផងដែរ»៕