.jpg)
ជនបរទេសឈររង់ចាំធ្វើតេស្ត រកមេរោគកូវីដ១៩ នៅវិទ្យាស្ថានសុខភាពសាធារណៈកាលពីថ្ងៃទី២៣ ខែកុម្ភៈ ឆ្នាំ២០២១។ ហេង ជីវ័ន
ភ្នំពេញ៖ ក្រសួងសុខាភិបាល នៅថ្ងៃព្រហស្បតិ៍ ទី ២៥ ខែ កុម្ភៈ ឆ្នាំ ២០២១ នេះ បានប្រកាសពីការរកឃើញករណីវិជ្ជមានកូវីដ ១៩ បន្ថែមចំនួន ៦៥ នាក់ទៀត ដោយក្នុងនោះករណីឆ្លងក្នុងព្រឹត្តិការណ៍សហគមន៍ ២០ កុម្ភៈ ចំនួន ៥៨ នាក់ ដែលធ្វើឱ្យចំនួនអ្នកឆ្លងក្នុងសហគមន៍លើកទី៣ នេះកើនឡើងសរុបរហូតទៅដល់ ១៩៤ នាក់។
យោងតាមសេចក្តីប្រកាសព័ត៌មានរបស់ក្រសួងបានឱ្យដឹងថា ករណីថ្មីដែលបានឆ្លងក្នុងព្រឹត្តិការណ៍សហគមន៍ ២០ កុម្ភៈ ចំនួន ៥៨ នាក់នេះ មានភាគច្រើនជនជាតិចិន ក្រៅពីនេះមានជនជាតិវៀតណាមចំនួន ៩ នាក់ ខ្មែរចំនួន ៥ នាក់ កូរ៉េ ១ នាក់ សិង្ហបុរី ១ នាក់ និងជនជាតិជប៉ុនចំនួន ១ នាក់។
អ្នកឆ្លងកូវីដទាំងអស់នេះ ត្រូវបានដាក់ឱ្យសម្រាកព្យាបាល នៅមណ្ឌលចត្តាឡីស័ករាជធានីភ្នំពេញ ដែលសាលារាជធានីភ្នំពេញបានសម្រេចយកកន្លែងនោះដាក់ព្យាបាលអ្នកជំងឺកូវីដ ១៩។
ក្រសួងសុខាភិបាលបានបន្តថា សម្រាប់អ្នកជំងឺជាជនជាតិចិនចំនួន ៦ នាក់ ដែលជាអ្នកដំណើរចូលមកកម្ពុជា បានធ្វើតេស្តដើម្បីសុំវិញ្ញាបនបត្របញ្ជាក់សុខភាព កាលពីថ្ងៃទី ២៣ ខែ កុម្ភៈ ឆ្នាំ ២០២១ ដោយសារពួកគាត់មានបំណងវិលត្រលប់ទៅកាន់ប្រទេសកំណើតវិញ ប៉ុន្តែលទ្ធផលរបស់ពួកគាត់វិជ្ជមានកូវីដ ១៩។
អ្នកជំងឺទាំង ៦ នាក់នេះ ស្នាក់នៅក្រុងព្រះសីហនុ ខេត្តព្រះសីហនុ និងបានដាក់ឱ្យសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ។
ចំណែកអ្នកជំងឺ ០១ នាក់ទៀត ជាអ្នកដំណើរមកពីក្រៅប្រទេស គឺជាជនជាតិខ្មែរ បម្រើការនៅអង្គការសហប្រជាជាតិ (កងទ័ពមួកខៀវ UN) ស្នាក់នៅស្រុកកូនមុំ ខេត្តរតនគិរី។
ជាមួយគ្នានេះដែរ ក្រសួងក៏បានបញ្ជាក់ពីអ្នកជំងឺចំនួន ១៥ នាក់ ដែលរកឃើញវិជ្ជមានកូវីដ ១៩ កាលពីថ្ងៃទី ២៤ ខែកុម្ភៈ ដោយក្រុមការងារ បានទទួលយកពួកគាត់មកដាក់ព្យាបាល នៅតាមមន្ទីរពេទ្យរដ្ឋរួចរាល់ហើយ លើកលែងតែចំនួន ០៣ នាក់ទៀត ដែលក្រុមការងារកំពុងស្វែងរកបន្ថែមទៀត។
គួរបញ្ជាក់ផងដែរថា អាជ្ញាធរ បានរកឃើញទីតាំងសរុបចំនួន ៦៣ កន្លែង ដែលមានការពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ និងបានប្រកាសឱ្យប្រជាពលរដ្ឋ ដែលមានការពាក់ព័ន្ធនឹងទីតាំងទាំងនោះ មកធ្វើតេស្តរកវីរុសកូវីដ ១៩ ។
គិតត្រឹមថ្ងៃទី ២៥ ខែ កុម្ភៈ ឆ្នាំ ២០២១ នេះ កម្ពុជារកឃើញអ្នកឆ្លងវីរុសកូវីដ ១៩ ចំនួន ៦៩៧ នាក់ ក្នុងនោះអ្នកជំងឺកំពុងសម្រាកព្យាបាល មានចំនួន ២១៧ នាក់៕
