ភ្នំពេញៈ លោកស្រី ឱ វណ្ណឌីន អ្នកនាំពាក្យក្រសួងសុខាភិបាលអំពាវនាវដល់ប្រជាពលរដ្ឋត្រូវបញ្ឈប់ការទិញឱសថព្យាបាលជំងឺទឹកនោមផ្អែមតាមរយៈអ្នកលក់អនឡាញលើបណ្ដាញសង្គមហ្វេសប៊ុក ព្រោះអាចបង្កគ្រោះថ្នាក់ដល់អាយុជីវិត ទន្ទឹមគ្នានេះដែរ ក្រសួងក៏ព្រមានចាត់វិធានការតាមផ្លូវច្បាប់ជាធរមាន បើនៅតែបន្តផ្សាយលក់ដោយគ្មានច្បាប់អនុញ្ញាត។
លោកស្រី ឱ វណ្ណឌីន ថ្លែងថាព្រោះតែនិន្នាការបច្ចេកវិទ្យាទំនើបនាពេលបច្ចុប្បន្ន ជនខិលខូចបានឆ្លៀតឱកាសផ្សព្វផ្សាយលក់ឱសថ និងបរិក្ខារពេទ្យលើអនឡាញយ៉ាងអនាធិបតេយ្យ ដូច្នេះក្រសួងសុខាភិបាលអំពាវនាវដល់ភាគីពាក់ព័ន្ធ និងអាជ្ញាធរមានសមត្ថកិច្ចជួយចាត់វិធានការតាមផ្លូវច្បាប់ផងដែរ។
លោកស្រីថ្លែងថា៖ «ការព្យាបាលជំងឺទឹកនោមផ្អែម គឺតម្រូវឱ្យមានការពិនិត្យព្យាបាលតាមបច្ចេកទេសវេជ្ជសាស្ត្រ ដោយគ្រូពេទ្យដែលមានការបណ្តុះបណ្តាលត្រឹមត្រូវ។ ការទិញថ្នាំមកព្យាបាលខ្លួនឯងនឹងមានគ្រោះថ្នាក់ដល់អាយុជីវិត។ ប្រជាពលរដ្ឋដែលមានបញ្ហាសុខភាព កុំទិញឱសថនោះប្រើប្រាស់ ហើយត្រូវទៅស្វែងរកការពិនិត្យព្យាបាលពីគ្រូពេទ្យដែលមានជំនាញត្រឹមត្រូវទទួលស្គាល់ពីក្រសួងសុខាភិបាល»។
លោកស្រីបញ្ជាក់ថា៖ «ជនដែលផ្សាយតាមអនឡាញនូវឱសថ ឬបរិក្ខារពេទ្យគ្មានច្បាប់អនុញ្ញាតពីក្រសួងសុខាភិបាលត្រូវតែបញ្ឈប់ជាបន្ទាន់ ហើយក្រសួងនឹងចាត់ការតាមផ្លូវច្បាប់ជាធរមាន។ ត្រូវគោរពច្បាប់គ្រប់គ្រងឱសថ ដែលមានជាធរមាន ដែលគ្រប់មុខឱសថត្រូវតែចុះបញ្ជិកានៅក្រសួងសុខាភិបាល ហើយការផ្សព្វផ្សាយឱសថតាមរូបភាពណាក៏ដោយក៏ត្រូវតែមានច្បាប់អនុញ្ញាតពីក្រសួងសុខាភិបាលដែរ។ ដូច្នេះពលរដ្ឋត្រូវចូលរួមរាយការណ៍មកក្រសួងសុខាភិបាលនូវភាពមិនប្រក្រតីទាំងឡាយ ជាមួយនឹងប្រភពច្បាស់លាស់ ដើម្បីជាមូលដ្ឋាននៃការស្រាវជ្រាវ និងចាត់វិធានការបានទាន់ពេល»។
លោកស្រីបញ្ជាក់ថា៖ «បើយើងមិនជឿ និងមិនទិញ គឺមិនបារម្ភដល់ហានិភ័យសុខភាព ហើយអ្នកលក់ក៏លក់មិនដាច់ យូរៗទៅឈប់ឯងហើយ។ ក្រសួងក៏កំពុងបន្តស្រាវជ្រាវលើករណីទាំងនេះ (អ្នកលក់ឱសថគ្មានច្បាប់លើអនឡាញ) ជាបណ្តើរៗ។ កន្លងមកក្រសួងក៏បានចាត់ការផាកពិន័យ និងបិទបានមួយចំនួនហើយដែរ»។
អ្នកលក់ឱសថតាមអនឡាញដែលមាន គណនីឈ្មោះ «ស្តេចឱសថបុរាណខ្មែរ សញ្ញានាគរាជ» ទីតាំងនៅភ្នំពេញបានឱ្យដឹងតាមរយៈសារបង្ហោះដែលមានខ្លឹមសារថា អ្នកដែលមានបញ្ហាជំងឺលើសជាតិស្ករ ឬជំងឺទឹកនោមផ្អែមដែលបានព្យាយាមព្យាបាលដោយប្រើថ្នាំបារាំង ថ្នាំខ្មែរ ថ្នាំផ្សេងៗទៀតមិនបានផល ឬទើបនឹងកើតជំងឺនេះមិនបាច់លេបថ្នាំពេទ្យនាំតែប៉ះពាល់ដល់គ្រឿងក្នុងទៅថ្ងៃមុខនោះទេ តែត្រូវប្រើថ្នាំបុរាណខ្មែរផ្សំឡើងពីធម្មជាតិសុទ្ធសាធដោយមិនប្រើប្រាស់ជាតិគីមី ឬសារធាតុរក្សាទុកផ្សេងៗ ១០០% និងមិនប៉ះពាល់ដល់សុខភាព ដែលមានតម្លៃត្រឹម ៥០ ដុល្លារក្នុង ១ ឈុត ពិសាក្នុងរយៈពេល ១ ខែកន្លះទៅ ២ ខែ។
លោកស្រី ជា ទូច អ្នកឯកទេសជំងឺទឹកនោមផ្អែម និងជាអតីតនាយិកាមជ្ឈមណ្ឌលជំងឺទឹកនោមផ្អែមកម្ពុជា (Cambodia Diabetes Center) អំពាវនាវដល់ពលរដ្ឋកុំប្រើប្រាស់ឱសថបុរាណគ្រប់ប្រភេទ ព្រោះអាចប៉ះពាល់ដល់សុខភាព។ បើពលរដ្ឋមានជំងឺទឹកនោមផ្អែមត្រូវស្វែងរកពេទ្យជំនាញផ្នែកវេជ្ជសាស្ដ្រដើម្បីព្យាបាល។
លោកស្រីថ្លែងថា៖ «មានពលរដ្ឋជាច្រើនគាត់ធ្លាប់ទាក់ទងមកសួរខ្ញុំដែរ ខ្ញុំតែងតែប្រាប់គាត់ថា កុំចេះតែជឿហ្វេសប៊ុក។ អ្នកលក់ថ្នាំព្យាបាលលើហ្វេសប៊ុក គ្មានអ្នកណាអាចយកជាការបានទេ។ ដូចជាអ្នកលក់ខ្លះថា ស្លឹកម្រុំអាចព្យាបាលទឹកនោមផ្អែមបានជាសះអ្វីនោះ គឺមិនពិតទេ ព្រោះឱសថអ្វីក៏ដោយគឺត្រូវមានកម្រិតត្រឹមត្រូវតាមស្ដង់ដាវេជ្ជសាស្ត្រ មិនអាចចេះតែប្រើៗបានទេ»។
ពលរដ្ឋមានផ្ទុកជំងឺទឹកនោមផ្អែម ២ នាក់ គឺលោក ម៉ូវ យ៉ុង រស់នៅស្រុកស្អាង ខេត្ដកណ្តាល និងលោក ប៉ក់ ឃី រស់នៅខេត្ដបន្ទាយមានជ័យបានបញ្ជាក់ថា ពួកលោកមិនដែលទិញថ្នាំតាមអនឡាញ ឬហ្វេសប៊ុកយកមកប្រើទេ ហើយតែងតែទៅទទួលថ្នាំបង្ការជំងឺនេះដោយឥតគិតកម្រៃនៅមន្ទីរពេទ្យរដ្ឋធំៗដូចជា មន្ទីរពេទ្យព្រះកុសុមៈ មន្ទីរពេទ្យមិត្ដភាពខ្មែរ-សូវៀតជាដើម៕