.jpg)
ក្រសួងសេដ្ឋកិច្ច និងហិរញ្ញវត្ថុ។ ហុង មិនា
ភ្នំពេញៈ ក្រសួងសេដ្ឋកិច្ច និងហិរញ្ញវត្ថុចេញសារាចរណែនាំស្ដីពីការធ្វើវិចារណកម្ម និងការពង្រឹង ប្រសិទ្ធភាពចំណាយថវិកាថ្នាក់ជាតិឆ្នាំ ២០២១ បន្ទាប់ពីវិធាននៃការបិទខ្ទប់នៅទីតាំងភូមិសាស្ត្រមួយចំនួនកំពុងធ្វើឲ្យមានផលប៉ះពាល់ជាទូទៅដល់ក្របខ័ណ្ឌច្បាប់ថវិកាជាតិឆ្នាំ ២០២១។
សារាចរណែនាំថ្មី ចុះថ្ងៃទី ៥ ខែឧសភា របស់ក្រសួងសេដ្ឋកិច្ចបានឲ្យដឹងថា ក្នុងពេលនៃការផ្ទុះរីករាលដាលនូវជំងឺកូវីដ ១៩ ជាពិសេសក្នុងព្រឹត្តិការណ៍សហគមន៍ ២០ កុម្ភៈ ឆ្នាំ ២០២១ ដែលឈានទៅអនុវត្តវិធានការបិទខ្ទប់នៅទីតាំងភូមិសាស្ត្រមួយចំនួន កំពុងធ្វើឱ្យមានផលប៉ះពាល់ដល់ក្របខ័ណ្ឌច្បាប់ថវិកាជាតិឆ្នាំ ២០២១ ជាទូទៅ។
ចំពោះវិបត្តិនេះតម្រូវឲ្យរាជរដ្ឋាភិបាលត្រូវធ្វើវិចារណកម្មចំណាយថវិកាឡើងវិញ ក្នុងបុព្វហេតុសន្សំ ធនធាន ដើម្បីបង្វែរថវិកាមកដោះស្រាយបញ្ហាជាអាទិភាពនាពេលបច្ចុប្បន្ន ក្នុងការប្រយុទ្ធប្រឆាំងនឹងការរីករាលដាលនៃជំងឺកូវីដ១៩ និងទប់ទល់ផលប៉ះពាល់អវិជ្ជមានមកលើសង្គមសេដ្ឋកិច្ចកម្ពុជា។
ក្នុងន័យនេះ ក្រសួងសេដ្ឋកិច្ច និងហិរញ្ញវត្ថុក៏បានណែនាំដល់គ្រប់ក្រសួង ស្ថាប័ន រដ្ឋបាលកណ្ដាល គ្រឹះស្ថានសាធារណៈរដ្ឋបាល និងអង្គភាពជាក្រុមប្រឹក្សា អាជ្ញាធរ និងគណៈកម្មាធិការរបស់រាជរដ្ឋាភិបាលនូវវិធានការសម្រាប់អនុវត្តការធ្វើវិចារណកម្ម និងពង្រឹងប្រសិទ្ធភាពចំណាយថវិកាឆ្នាំ ២០២១ នេះដែរ។
លោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានលើកឡើងក្នុងសារាចរណែនាំនេះយ៉ាងដូច្នេះថា ការធ្វើវិចារណកម្ម និងការពង្រឹងប្រសិទ្ធភាពចំណាយដែលបានដាក់ចេញនេះត្រូវបានគិតគូររៀបចំឡើងក្នុងក្របខ័ណ្ឌនៃការធានាប្រក្រតីភាពនៃស្ថាប័នរដ្ឋ និងរក្សាលំនឹងជីវភាពប្រជាជន។
លោកបន្តថា ទន្ទឹមនឹងនេះ ការសន្សំធនធានថវិកា ក៏ដើម្បីបង្វែរទៅបំពេញឲ្យបាន នូវសេចក្តីត្រូវការចាំបាច់ និងបន្ទាន់របស់រាជរដ្ឋាភិបាលក្នុងការប្រយុទ្ធប្រឆាំងនឹងការរាតត្បាតនៃជំងឺកូវីដ ពិសេសក្នុងអំឡុងពេលនៃការអនុវត្តវិធានការបិទខ្ទប់នៅទីតាំងភូមិសាស្ត្រមួយចំនួនផងដែរ។
លោកបញ្ជាក់ថា៖ «ដើម្បីបង្កើនសុវត្ថិភាព និងដោះស្រាយជីវភាពជូនប្រជាពលរដ្ឋគ្រប់រូប ជាពិសេសគ្រួសារក្រីក្រ និងជនងាយរងគ្រោះ។ គ្រប់ក្រសួង ស្ថាប័ន គ្រឹះស្ថានសាធារណៈ រដ្ឋបាលពាក់ព័ន្ធ និងអង្គភាពក្រោមឱវាទនៃក្រសួងសេដ្ឋកិច្ច និងហិរញ្ញវត្ថុ ត្រូវអនុវត្តសារាចរណែនាំនេះឱ្យមានប្រសិទ្ធភាពចាប់ពីថ្ងៃចុះហត្ថលេខាតទៅ»។
តាមសារាចរណែនាំរបស់ក្រសួងសេដ្ឋកិច្ច គឺតម្រូវឲ្យក្រសួង ស្ថាប័នមួយចំនួន ត្រូវធ្វើវិចារណកម្មលើចំណាយចរន្តថវិកាថ្នាក់ជាតិយ៉ាងហោចណាស់ ៥០ ភាគរយនៃឥណទានអនុម័ត និងវិចារណកម្មចំណាយមូលធនថវិកាថ្នាក់ជាតិ ដោយត្រូវកាត់ព្យួរប្រមាណ ១១ ភាគរយនៃកញ្ចប់ឥណទានរួម។
យ៉ាងណាក្តី សារាចរនេះក៏បានលើកលែងសម្រាប់ថវិការដ្ឋបាលថ្នាក់ក្រោមជាតិ និងមន្ទីរជំនាញរាជធានី ខេត្តទាំងអស់ដែលកំពុងមានភារកិច្ចច្រើនក្នុងដំណាក់កាលប្រយុទ្ធប្រឆាំងនឹងការរាតត្បាតនៃជំងឺកូវីដ១៩ ព្រមទាំងផ្តល់ការលើកលែងវិចារណកម្មថវិកាចំណាយចរន្តរបស់ក្រសួងសុខាភិបាល ក្រសួងការពារជាតិ និងក្រសួងមហាផ្ទៃ (ផ្នែកសន្តិសុខសាធារណៈ)។
ការលើកលែងនេះដោយសំអាងថា ស្ថាប័នទាំងនេះបាននិងកំពុងចូលរួមផ្ទាល់ ក្នុងសកម្មភាពទប់ស្កាត់ ការរាតត្បាតនៃជំងឺកូវីដ១៩ ហើយស្ថាប័នទាំង ៣ នេះ ក៏អាចធ្វើនិយ័តកម្មឥណទានផ្ទៃក្នុងឲ្យអស់លទ្ធភាពតាមនីតិវិធីហិរញ្ញវត្ថុជាធរមាន ដើម្បីបំពេញតម្រូវការចាំបាច់ ផ្នែកអន្តរាគមន៍ទៀតផង។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបាននិយាយថា ការដែលក្រសួងធ្វើវិចារណកម្ម ចំណាយថវិកាថ្នាក់ជាតិយ៉ាងដូច្នេះ គឺបង្ហាញថា រដ្ឋាភិបាល ពិតជាកំពុងមានបញ្ហាប្រឈមផ្នែកហិរញ្ញវត្ថុជាខ្លាំងក្នុងការទប់ស្កាត់វិបត្តិនេះ ហើយជាពិសេសនោះគឺការចំណាយទៅលើការព្យាបាល និងប្រយុទ្ធប្រឆាំងផ្សេងៗទៀតទៅនឹងជំងឺកូវីដ។
លោក ប៉ា ច័ន្ទរឿន បារម្ភថា ការកាត់បន្ថយខ្ទង់ចំណាយទៅលើក្រសួងទាំងអស់នេះ គឺនឹងធ្វើឲ្យប៉ះពាល់ដល់គុណភាព លទ្ធភាព និងសកម្មភាព ព្រមទាំងផ្នែកសេវាកម្ម ដែលក្រសួងទាំងនោះត្រូវផ្តល់ជូនប្រជាពលរដ្ឋ ខណៈការកាត់បន្ថយចំណាយនេះ មិនត្រឹមតែធ្វើឲ្យសង្គមទាំងមូលរងផលប៉ះពាល់ពីវិបត្តិកូវីដ ១៩ ប៉ុណ្ណោះទេ គឺធ្វើឲ្យក្រសួងមួយចំនួនមិនអាចមានលទ្ធភាពបំពេញការងារឲ្យបានពេញលេញតាមការគ្រោងទុក៕
