ភ្នំពេញៈ ក្រុមគ្រូពេទ្យ និងបេក្ខជនស្ម័គ្រចិត្ដជួរមុខដែលបានចូលរួមប្រយុទ្ធប្រឆាំងជំងឺកូវីដ ១៩ ជាង ៤ ពាន់នាក់ ត្រូវបានក្រសួងសុខាភិបាលស្នើសុំទៅក្រសួងមុខងារសាធារណៈ ដើម្បីបញ្ចូលក្នុងក្របខ័ណ្ឌមន្ត្រីរាជការក្នុងវិស័យសុខាភិបាល សម្រាប់ក្របខ័ណ្ឌឆ្នាំ ២០២១ ខណៈក្រសួងមុខងារសាធារណៈបាន និងកំពុងពិនិត្យសំណុំឯកសារបេក្ខជនទាំងនេះ។
លោក ព្រុំ សុខា រដ្ឋមន្ត្រីក្រសួងមុខងារសាធារណៈកាលពីថ្ងៃទី ១០ ខែឧសភា បានបង្កើតក្រុមការងារមួយដើម្បីពិនិត្យលើសំណុំឯកសារក្រុមគ្រូពេទ្យ និងបេក្ខជនស្ម័គ្រចិត្ដជួរមុខដែលក្រសួងសុខាភិបាលបានស្នើសុំជ្រើសរើសបញ្ចូលក្នុងក្របខ័ណ្ឌចំនួន ៣ ពាន់នាក់។ ចំណែកនៅថ្ងៃទី ១៩ ខែឧសភា ក្រសួងសុខាភិបាលបានស្នើសុំបន្ថែមបេក្ខជនចំនួន ១ ១៤៤ នាក់ទៀតដែលនាំឱ្យបេក្ខជនត្រូវជ្រើសរើសកើនឡើងដល់ចំនួន ៤ ១៤៤ នាក់។
សេចក្ដីសម្រេចរបស់លោក ព្រុំ សុខា ស្ដីពីការបន្ថែមភារកិច្ចដល់ក្រុមការងារពិនិត្យសំណុំឯកសារបេក្ខជនចំនួន ១ ១៤៤ នាក់ទៀត ដែលត្រូវជ្រើសរើសបញ្ចូលក្នុងក្របខ័ណ្ឌមន្ត្រីរាជការសុខាភិបាលឆ្នាំ ២០២១ នេះគឺយោង លិខិតស្នើសុំរបស់ក្រសួងសុខាភិបាលចុះកាលពីថ្ងៃទី ១២ ខែឧសភា។
សំណើរបស់ក្រសួងសុខាភិបាលគឺស្នើសុំបញ្ចូលបេក្ខជនដែលត្រូវជ្រើសរើសនេះក្នុងក្របខ័ណ្ឌសុខាភិបាល និងចាត់ឱ្យបេក្ខជនដែលត្រូវជ្រើសរើសនោះទៅបម្រើការងារនៅតាមអង្គភាពនានាក្រោមឱវាទក្រសួងសុខាភិបាល និងមន្ទីរសុខាភិបាលនៃរដ្ឋបាលរាជធានី-ខេត្ត ដោយរៀបចំបៀវត្សរ៍តាមប្រភេទក្របខ័ណ្ឌ ស្របតាមលក្ខន្តិកៈដោយឡែកនៃក្របខ័ណ្ឌនីមួយៗ។
លោក យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈដែលជាប្រធានក្រុមការងារពិនិត្យសំណុំឯកសារបេក្ខជនដែលត្រូវជ្រើសរើសបញ្ចូលក្នុងក្របខ័ណ្ឌនេះបានថ្លែងកាលពីម្សិលមិញថា រហូតមកទល់ពេលនេះ ក្រុមគ្រូពេទ្យ និងបេក្ខជនស្ម័គ្រចិត្ដជួរមុខជាង ៤ ១៤៤ នាក់ហើយ ដែលក្រសួងសុខាភិបាលស្នើមកក្រសួងមុខងារសាធារណៈពិនិត្យសំណុំឯកសារដើម្បីបញ្ចូលក្នុងក្របខ័ណ្ឌ។
លោកបានថ្លែងថា៖ «ក្រុងការងារយើងកំពុងពិនិត្យសំណុំឯកសារបេក្ខជនដែលក្រសួងសុខាភិបាលបានស្នើជ្រើសរើសបញ្ជូលក្នុងក្របខ័ណ្ឌនេះដោយសារកិច្ចការងារនេះត្រូវមានការសហការជាមួយអង្គភាពដែលពាក់ព័ន្ធរួមជាមួយក្រសួងសុខាភិបាល ដើម្បីកំណត់នីតិវិធីលើការពិនិត្យផ្ទៀងផ្ទាត់ឯកសារ»។
លោក យក់ ប៊ុនណា បានឱ្យដឹងថា បេក្ខជនដែលក្រសួងសុខាភិបាលស្នើសុំបញ្ចូលក្នុងក្របខ័ណ្ឌទាំងជាង ៤ ពាន់នាក់នេះ ភាគច្រើនលើសលប់គឺជាអ្នកមានជំនាញផ្នែកសុខាភិបាល។ ប៉ុន្ដែក៏មានបេក្ខជនតិចតួចមានជំនាញ គាំទ្រនៅក្នុងវិស័យសុខាភិបាលដែរ ដូចជា ជំនាញកិច្ចការងារមួយចំនួនពាក់ព័ន្ធនឹងដំណើការរដ្ឋបាលជាដើម។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាបានលើកឡើងថា ក្នុងស្ថានភាពបច្ចុប្បន្ន កម្ពុជាត្រូវការបុគ្គលិកជំនាញផ្នែកសុខាភិបាលច្រើន ដើម្បីឆ្លើយតបទៅនឹងការរីករាលដាលនៃជំងឺកូវីដ១៩។
លោកបានថ្លែងថា៖ «អ្វីដែលខ្ញុំចង់លើកទឹកចិត្ដ ដើម្បីធ្វើទៅឱ្យមានប្រសិទ្ធភាពខ្លាំងគឺត្រូវប្រើប្រាស់ធនធានមន្ដ្រីដែលជ្រើសរើសនេះឱ្យបានទៅដល់គ្រប់កន្លែងដែលកំពុងមានការខ្វះខាត។ យើងត្រូវបែងចែកមន្ដ្រីទាំងនោះទៅតាមតំបន់ដែលត្រូវការពួកគាត់ជាចាំបាច់ ជាជាងគ្រាន់តែជ្រើសរើសមន្ដ្រីច្រើនពេក»។
លោកបានបន្ថែមថា យុទ្ធសាស្ដ្រដើម្បីកាត់បន្ថយការចំណាយថវិកាជាតិច្រើន គឺត្រូវបែងចែកមន្ដ្រីទៅគ្រប់កន្លែងចាំបាច់គឺមិនត្រូវទុកពួកគាត់នៅផ្ដុំគ្នាតែទីក្រុងទេ គឺត្រូវបញ្ជូនពួកគាត់ទៅថ្នាក់ក្រោមជាតិដែលត្រូវការ។
លោកបានបញ្ជាក់ថា៖ «បញ្ហានេះ មិនមែនតែក្រសួងសុខាភិបាលទេ ក្រសួងផ្សេងទៀតដូចជាក្រសួងអប់រំ យុវជន និងកីឡា ក៏បែងចែកមន្ដ្រីឱ្យបានទៅដល់ទីដាច់ស្រយាលដែលជាតំបន់ត្រូវការចាំបាច់ខ្លាំងដែរ ដោយសារតែយើងសង្កេតឃើញភាគច្រើនគ្រូសម្បូរនៅតែទីក្រុងទេ»។
យោងសេចក្ដីសម្រេចចុះថ្ងៃទី ២២ ខែ ធ្នូ ឆ្នាំ ២០២០ របស់លោកនាយករដ្ឋមន្ត្រី ហ៊ុន សែន បានសម្រេចផ្ដល់ក្របខ័ណ្ឌបន្ថែម ជាករណីពិសេសដល់ក្រសួងសុខាភិបាលសម្រាប់ឆ្នាំ ២០២១ ដើម្បីបម្រើការងារប្រយុទ្ធប្រឆាំងនឹងជំងឺកូវីដ ១៩។
អនុវត្ដតាមរយៈសេចក្ដីសម្រេចនេះ លោក ព្រុំ សុខា កាលពីថ្ងៃទី ១០ ខែឧសភា បានសម្រេចបង្កើតក្រុមការងារពិនិត្យសំណុំឯកសារបេក្ខជនដែលត្រូវជ្រើសរើសដោយបានចាត់តាំងឱ្យ លោក យក់ ប៊ុនណា ជាប្រធានក្រុមការងារ និងមន្ដ្រីពាក់ព័ន្ធក្រោមចំណុះក្រសួងចំនួន ២៧ រូបទៀត ជាអនុប្រធាន និងជាសមាជិកដើម្បីធ្វើការងារនេះ៕
វីដេអូ៖