.jpg)
ស្លាកសញ្ញាទីក្រុងស្អាត នៅសួនច្បារខាងមុខព្រះបរមរាជវាំង។ ហេង ជីវ័ន
ភ្នំពេញៈ ក្រសួងទេសចរណ៍តាមរយៈគណៈកម្មាធិការជាតិវាយតម្លៃទីក្រុងស្អាត គ្រោងនឹងរៀបចំកម្មវិធីទិវាជាតិ ទីក្រុងស្អាត លើកទី៧ ឆ្នាំ ២០១៩ ក្រោមប្រធានបទ «ទីក្រុងស្អាត ទីក្រុងផ្តល់ភាពកក់ក្តៅ» អមជាមួយពិធីប្រគល់ជយលាភី ធុរកិច្ច បៃតង ក្នុងវិស័យទេសចរណ៍លើកទី ៣ និងជយលាភីបដិសណ្ឋារកិច្ចល្អរបស់ច្រកទ្វារអន្តរជាតិលើកទី ២ ដែលនឹងប្រារព្ធធ្វើនៅថ្ងៃទី ២៧ ខែកុម្ភៈ។
សេចក្តីជូនដំណឹងរបស់ក្រសួងទេសចរណ៍ចេញផ្សាយនៅថ្ងៃទី ២៣ ខែមករា បានឲ្យដឹងថា ដើម្បីឲ្យទិវាជាតិទីក្រុងស្អាតលើកទី ៧ ប្រព្រឹត្តឡើងដោយជោគជ័យ គណៈកម្មាធិការជាតិវាយតម្លៃទីក្រុងស្អាត ស្នើឱ្យអភិបាលរាជធានី-ខេត្ត ទាំងអស់ រៀបចំកម្មវិធីចំនួន២ គឺទី ១.កម្មវិធីបញ្ជ្រាបការយល់ដឹង និង ទី២ កម្មវិធីសម្អាតទីក្រុង នៅថ្ងៃទី ២៧ ខែកុម្ភៈ ឆ្នាំ ២០១៩។
ក្រសួងទេសចរណ៍បានប្រាប់ទៅអភិបាល និងអភិបាលរងរាជធានី-ខេត្ដទទួលបន្ទុកទីក្រុងស្អាត អភិបាលក្រុង-ខណ្ឌ ត្រូវប្រើប្រាស់គ្រប់មធ្យោបាយផ្សព្វផ្សាយដើម្បីជូនដំណឹងដល់សាធារណជនឲ្យបានដឹងអំពីការប្រារព្ធ ទិវាជាតិទីក្រុងស្អាតលើកទី៧ ឆ្នាំ ២០១៩ ពិសេសកម្មវិធីបញ្ជ្រាបការយល់ដឹង និងការសម្អាតទីក្រុងរបស់ខ្លួន ដើម្បីអំពាវនាវឲ្យមានការចូលរួម គាំទ្រទាំងអស់គ្នា។
ទិវាជាតិទីក្រុងស្អាតលើកទី ៧ នេះ ក្រសួងទេសចរណ៍បានដាក់ចេញនូវពាក្យស្លោកមួយចំនួនរួមមាន «ប្រជាពលរដ្ឋគ្រប់រូបជាម្ចាស់នៃភាពស្អាត និងភាពបៃតង នៅតាមទីក្រុងរបស់ខ្លួន និងពលរដ្ឋគំរូចូលរួមគិតគូរពីបរិស្ថាន និងសោភណភាពទីក្រុង» ជាដើម។
លោក កែន សត្ថា អភិបាលខេត្ដកែប ដែលជាខេត្ដមានសក្ដានុពលទេសចរណ៍នៅកម្ពុជា ថ្លែងថា ចំពោះការរៀបចំទីក្រុងឲ្យក្លាយទៅជាទីក្រុងស្អាត ខេត្ដកែបមិនមែនទើបតែចាប់ផ្ដើមអនុវត្ដនៅពេលក្រសួងជូនដំណឹងនោះទេ ប៉ុន្ដែគឺត្រូវអនុវត្ដវិធានការសម្អាតទីក្រុង និងការផ្សព្វផ្សាយអប់រំ ជារៀងរាល់ថ្ងៃ។
ទាក់ទងនឹងទីក្រុងស្អាតនេះលោកអភិបាលបន្ដថា ខេត្ដកែបធ្លាប់ទទួលបានពាន «និរន្តរភាពទីក្រុងស្អាតអាស៊ាន» ពីប្រទេសប្រ៊ុយណេ ឆ្នាំ ២០១៧ សំដៅលើខ្យល់ស្អាត ទឹកស្អាត និងដីស្អាត។
លោកថា៖ «កិច្ចការងាររៀបចំទីក្រុងស្អាតនេះ យើងធ្វើជាប្រចាំ មិនសម្រាប់តែប្រចាំឆ្នាំទេ។ ក្នុងឆ្នាំនេះយើងខិតខំពង្រឹងនិងពង្រីកនូវហេដ្ឋារចនាសម្ព័ន្ធ ផ្លូវថ្នល់ ឲ្យទៅជាផ្លូវថ្នល់ទេសចរណ៍ស្ដង់ដាមានផ្លូវរថយន្ដ ទោចក្រយានយន្ដ ផ្លូវធ្វើដំណើរដោយកង់ និងផ្លូវថ្មើរជើង ដែលយើងត្រូវរៀបចំឲ្យមានសួនច្បារនិងបំពាក់ភ្លើងពណ៌ និងអំពូលភ្លើងដែលប្រើថាមពលកើតឡើងវិញជាដើម»។
លោក វ៉ី សំណាង អភិបាលខេត្ដកំពង់ស្ពឺ បានថ្លែងដែរថា លោកបានបញ្ជាឲ្យក្រុមការងារថ្នាក់ខេត្ដ ធ្វើការផ្សព្វផ្សាយទៅដល់ប្រជាពលរដ្ឋឲ្យចេះរៀបចំទុកដាក់សំរាមឲ្យបានត្រឹមត្រូវ។
លោកអភិបាលបន្ដថា៖ «យើងក៏កំពុងធ្វើចលនា ទៅគ្រប់រោងចក្រ សហគ្រាស ឲ្យពួកគាត់ចូលរួម ជាថវិកា និងសម្ភារ ប្រមូលសំរាម និងទិញរថយន្ដប្រមូលសំរាម។ ខ្ញុំជឿថា បន្ទាប់ពីមានការយល់ដឹងពីបងប្អូនប្រជាពលរដ្ឋយើងហើយយើងមានក្រុមការងារដើរប្រមូលសំរាមចល័តទៀត យើងជឿថារឿងសម្អាតទីក្រុងនេះនឹងរឹតតែប្រសើរថែមទៀត»។
លោកថា៖ «យើងខិតខំជំរុញទៅគ្រប់កន្លែងទាំងអស់ជុំវិញការរៀបចំទីក្រុងស្អាតនេះ។ និយាយរួមទាំងមន្ដ្រីនិងបងប្អូនប្រជាពលរដ្ឋនិងម្ចាស់រោងចក្រសហគ្រាសនាំគ្នាចូលរួមថែរក្សាបរិស្ថាន»។
លោក វ៉ី សំណាង ឲ្យដឹងថា បច្ចុប្បន្នខេត្តកំពង់ស្ពឺបានផ្តួចផ្ដើម ចែកជូនចានស្រាក់ និងដបទឹកដល់កម្មករ កម្មការិនី នៅតាមរោងចក្រ ដើម្បីកាត់បន្ថយការប្រើប្រាស់ថង់ប្លាស្ទិកផងដែរ។
លោក ផៃ ប៊ុនវណ្ណៈ អភិបាលរងខេត្ដព្រះសីហនុ ថ្លែងថា ខេត្ដព្រះសីហនុបាននិងកំពុងធ្វើការងារទៅលើការកែលម្អហេដ្ឋារចនាសម្ព័ន្ធ និងការសម្អាតតាមមាត់ឆ្នេរសមុទ្រ ឲ្យក្លាយទៅជាឆ្នេរគំរូ។ លោកបន្ដថា៖ «យើងមិនឲ្យមានទឹកកខ្វក់ហូរចូលសមុទ្រទៀតទេព្រោះពីមុនមកវាធ្លាប់មានបញ្ហាខ្លះព្រោះការអភិវឌ្ឍវិស័យសំណង់មានការកើនឡើង»។
លោកថា៖ «ឥឡូវនេះយើងកំពុងរៀបចំឆ្នេរ មានឆ្នេរនៅអូរត្រេសឲ្យក្លាយទៅជាឆ្នេរគំរូ។ ចំណែកឆ្នេរអូរឈើទាល យើងកំពុងរៀបចំតូបលក់ដូរឲ្យទៅជាស្ដង់ដាដែរ»៕
