.jpg)
សិស្សសាលាចតុមុខ អង្គុយរៀនដោយទទូរកន្សែង។ សហការី
ភ្នំពេញៈ ខណៈដែលកម្ដៅកើនឡើងខ្លាំង ដែលអាចឡើងលើសពី ៤០ អង្សាសេ ក្រសួងអប់រំ យុវជន និងកីឡា បានប្រកាសឱ្យគ្រប់គ្រឹះស្ថានសិក្សា កាត់បន្ថយម៉ោងសិក្សាដើម្បីបង្ការទប់ស្កាត់ហានិភ័យ និងចៀសវាងជំងឺផ្សេងៗ ដែលអាចធ្វើឲ្យប៉ះពាល់ដល់សុខភាពរបស់សិស្ស និងគ្រូបង្រៀន។
តាមសេចក្តីប្រកាសរបស់ក្រសួងអប់រំកាលពីថ្ងៃទី ២៥ ខែ មេសា ក្រសួងបានកាត់បន្ថយម៉ោងសិក្សារបស់សិស្ស នៅពេលព្រឹក ចូលរៀននៅម៉ោង ៧:០០ និងចេញនៅម៉ោង ១០ និង ៣០ នាទីដែលពីមុនសិស្សចេញនៅម៉ោង ១១:០០។ នៅពេលរសៀលចូលរៀននៅម៉ោង ១៣ និង ៣០ នាទី និងចេញនៅម៉ោង ១៧:០០។ នៅពេលផុតរដូវក្តៅ ម៉ោងសិក្សានេះនឹងត្រូវប្តូរមកម៉ោងសិក្សាដូចដើមវិញ។
លោក រស់ សុវាចា អ្នកនាំពាក្យក្រសួងអប់រំ បានប្រាប់ភ្នំពេញប៉ុស្តិ៍កាលពីម្សិលមិញថា ក្រសួងបានគិតគូរយ៉ាងល្អិតល្អន់ ទៅដល់សុខភាពរបស់សិស្សានុសិស្ស នៅគ្រប់កម្រិតថ្នាក់ក៏ដូចជាគ្រូបង្រៀន ជាពិសេសកុមារតូចៗ។
លោកបានបញ្ជាក់ថា៖ «ក្រសួងជឿជាក់ថា នេះគឺជាការចូលរួមមួយទៅលើការថែរក្សាសុខភាពរបស់បុគ្គលិកអប់រំដែលពាក់ព័ន្ធ និងសិស្សានុសិស្ស»។
លោកបន្តថា ការកើនឡើងកម្ដៅគឺជាកត្តាមួយនៅក្នុងចំណោមកត្តាជាច្រើន ដែលមានឥទ្ធិពលមកលើសុខភាពរបស់លោកគ្រូអ្នកគ្រូនិងសិស្សានុសិស្សក៏ដូចជា អ្នកពាក់ព័ន្ធនៅក្នុងវិស័យអប់រំ។
បើតាមលោក សុវាចា ក្រសួងបានបន្តធ្វើការជាមួយយន្តការមួយរបស់ខ្លួនដែលមានឈ្មោះថា «គណៈកម្មការគ្រប់គ្រងគ្រោះមហន្តរាយវិស័យអប់រំ» ដែលបង្កឱកាសឱ្យក្រសួងធ្វើការពិនិត្យ និងតាមដានយ៉ាងជិតស្និទ្ធជាមួយនឹងក្រុមការងារនៅគ្រប់កម្រិត មានកម្រិតមន្ទីរ កម្រិតស្រុក និងកម្រិតសាលារៀន។ «នេះមានន័យថានៅគ្រប់កម្រិតថ្នាក់នោះ គឺគាត់មានលទ្ធភាពគ្រប់គ្រងក៏ដូចជាឆ្លើយតបទៅនឹងករណីដែលគាត់បានជួបនៅតាមមូលដ្ឋានរៀងៗខ្លួន»។
បើតាមលោក សុវាចា ការកាត់បន្ថយម៉ោងសិក្សាគឺអនុវត្តពីកម្រិតកុមារតូច រហូតដល់កម្រិតវិទ្យាល័យ នៅគ្រឹះស្ថានអប់រំរដ្ឋ និងឯកជន។
លោក ឡាយ បូរ៉ា ប្រធានមន្ទីរអប់រំ ខេត្តក្រចេះ បានឲ្យដឹងថា លោកបានផ្សព្វផ្សាយលិខិតទៅកាន់ក្រុង ស្រុក និងគ្រឹះស្ថានសិក្សាសាធារណៈ កាលពីថ្ងៃទី ២៦ ខែ មេសា។
លោកនឹងអនុវត្តលិខិតនេះ តាមស្ថានភាពជាក់ស្តែង គឺក្នុងករណីមិនឡើងកម្ដៅ គឺសិស្សចូលរៀននៅម៉ោងធម្មតាដូចដើម។ បើកម្ដៅនៅតែកើនឡើង នោះនឹងត្រូវអនុវត្តទៅតាមលិខិត។
លោកថា ការកាត់បន្ថយម៉ោងសិក្សាកន្លះម៉ោងនេះ ធ្វើឱ្យសិស្សខាតម៉ោងសិក្សាមែនប៉ុន្តែវាសំខាន់លើសុខភាពរបស់សិស្ស។ «ខេត្តខ្ញុំជាក់ស្តែងនៅហ្នឹង យើងដឹងថា កម្ដៅត្រឹម ៣៦ (អង្សា) ៣៧ (អង្សា) អី វារឿងធម្មតា»។
លោកបញ្ជាក់ ចំពោះវិធានការទប់ស្កាត់កម្ដៅកើនឡើង លោកបានសហការជាមួយអាជ្ញាធរដែនដី អង្គការពាក់ព័ន្ធមួយចំនួន ដោយបានជីកអណ្តូង និងជួសជុលអណ្តូងបានច្រើននៅក្នុងខេត្ត។
លោកថា៖ «ដោយឡែក ខេត្តក្រចេះ ទីរួមខេត្តកន្លងមកទីជនបទមួយចំនួនក៏ឡើងកម្ដៅដែរឡើងដល់ ៤០ (អង្សា) ទៅ ៤១ (អង្សា) នៅតាមតំបន់ជាក់ស្តែង។ យើងនៅត្រៀមរហូត។ មានបញ្ហាអ្វីយើងព្យាយាមដោះស្រាយ តាមស្ថានភាពជាក់ស្តែង»។
លោក វាសនា វរលក្ខណ៍ នាយកសាលាស្តីទីនៃសាលាបឋមសិក្សានិងអនុវិទ្យាល័យឆ្នុកទ្រូខេត្តកំពង់ឆ្នាំង ឲ្យដឹងថា លោកបានកាត់បន្ថយម៉ោងសិក្សារបស់សិស្សរួចហើយកាលពីថ្ងៃទី ២៦ ខែ មេសា។
បើតាមលោក វរលក្ខណ៍ កម្ដៅនៅសាលារបស់លោកបានឡើងដល់ទៅពី ៤០ ទៅ ៤១ អង្សាសេ ដោយសារតំបន់នេះជាតំបន់គោកពាក់កណ្តាល និងទឹកពាក់កណ្តាល ហើយស្ថិតនៅផុតពីដើមឈើ និងព្រៃ ដែលបណ្តាលឱ្យសាលារៀននេះទទួលកម្ដៅខ្លាំង។
លោក ថា៖ «និយាយរួមតែកន្លែងណាអត់ដើមឈើ ចំហាយ (ក្តៅ) វាទទួលខ្លាំង ពីព្រោះវាជះកម្ដៅមក»។
លោកក៏បានឲ្យដឹងផងដែរថា សាលារៀនរបស់លោកមិនត្រឹមតែទទួលរងកម្ដៅខ្លាំងនោះទេ តែថែមទាំងខ្វះទឹកសម្រាប់ប្រើប្រាស់ទៀត។ ពេលខ្លះសាលាអនុញ្ញាតឱ្យសិស្សរៀនដោះ អាវនៅពេលកម្ដៅឡើងខ្លាំង។
ក្នុងអំឡុងពេលកម្ដៅកើនឡើងខ្លាំងនេះដែរ ក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី ២៦ ខែ មេសា ក៏បានអំពាវនាវឱ្យកម្មករនិយោជិតយកចិត្តទុកដាក់អនុវត្តឱ្យបានខ្ជាប់ខ្ជួន តាមសេចក្តីជូនព័ត៌មានរបស់ក្រសួងសុខាភិបាល ស្តីពីការបង្ការជំងឺបណ្តាលមកពីអាកាសធាតុក្តៅខ្លាំង និងអំពាវនាវឱ្យម្ចាស់សហគ្រាសអនុវត្តឱ្យបានហ្មត់ចត់នូវវិធានការ ១១ ចំណុចរបស់ក្រសួងការងារ ដើម្បីទប់ទល់នឹងកម្ដៅកើនឡើងនេះ៕
