ភ្នំពេញៈ ក្រសួងអប់រំកំពុងធ្វើការពិនិត្យ និងវាយតម្លៃទៅលើឯកសារចំនួន ៦២១ ចំណងជើង ដែលដាក់ដោយគ្រឹះស្ថានឧត្តមសិក្សារដ្ឋ និងឯកជនចំនួន ១៥ ដែលស្នើសុំមូលនិធិដើម្បីរៀបរៀងសៀវភៅសិក្សា សម្រាប់និស្សិតនៅកម្រិតឧត្ដមសិក្សា។
សេចក្ដីប្រកាសព័ត៌មានរបស់ក្រសួងអប់រំ យុវជន និងកីឡានៅថ្ងៃទី ១៤ ខែមករា ស្ដីពីវឌ្ឍនភាពនៃការផ្ដល់មូលនិធិនេះបង្ហាញថា ក្នុងចំណោមគ្រឹះស្ថានឧត្តមសិក្សារដ្ឋ និងឯកជនចំនួន ១៥ ដែលបានដាក់ពាក្យស្នើសុំថវិកាដើម្បីរៀបរៀងសៀវភៅសិក្សា សម្រាប់និស្សិតនៅកម្រិតឧត្ដមសិក្សាសរុបចំនួន ៦២១ ចំណងជើង មូលនិធិស្រាវជ្រាវគំនិតច្នៃប្រឌិត និងនវានុវត្តន៍ (មូលនិធិ ស.គ.ន) បានធ្វើលិខិតឆ្លើយតបទៅកាន់គ្រឹះស្ថានឧត្តមសិក្សាចំនួន ១៣ និងកំពុងពិនិត្យសំណើនៃគ្រឹះស្ថានឧត្តមសិក្សាចំនួន ២ ទៀត។
ក្រសួងអប់រំឱ្យដឹងថា ជាជំហានទី២ នៃនីតិវិធីបន្តគ្រឹះស្ថានឧត្តមសិក្សាចំនួន ៤ (ត្រូវជា ១៩៦ ចំណងជើង) បានប្រគល់ជូនមូលនិធិ ស.គ.ន នូវសំណុំឯកសារបន្ថែមរួមមាន ១- សេចក្តីព្រាងមាតិកាសៀវភៅដោយបញ្ជាក់អំពីចំណងជើង និងចំណងជើងរង។ ២- ការបរិយាយលើមុខវិជ្ជា (Course description)។ ៣- សេចក្តីសង្ខេបនៃសៀវភៅ (Sy-nopsis ឬ Abstract) ដោយមានការពិនិត្យវាយតម្លៃ និងអនុម័តពីក្រុមប្រឹក្សាវិទ្យាសាស្ត្រ ឬក្រុមប្រឹក្សាអប់រំនៃគ្រឹះស្ថានឧត្តមសិក្សានីមួយៗ។ ក្រសួងបញ្ជាក់ថា៖ «មូលនិធិ ស.គ.ន កំពុងពិនិត្យ និងវាយតម្លៃលើសំណុំឯកសារទាំងនេះដើម្បីបន្តនីតិវិធីហិរញ្ញវត្ថុ និងការចុះកិច្ចព្រមព្រៀងផ្តល់ថវិកាឧបត្ថម្ភ»។
ក្រសួងអប់រំបានវាយតម្លៃខ្ពស់ ចំពោះការបោះជំហានប្រកបដោយមនសិការវិជ្ជាជីវៈនៃគ្រឹះស្ថានឧត្តមសិក្សា និងបុគ្គលិកអប់រំទាំងអស់ក្នុងការរៀបចំ រៀបរៀង កែលម្អ និងនិពន្ធសៀវភៅសិក្សាដើម្បីបង្កើនបរិមាណ លើកកម្ពស់គុណភាព និងពង្រឹងសមធម៌នៃធនធានសិក្សាជាខេមរភាសាសម្រាប់និស្សិតដែលកំពុងបន្តការសិក្សា និងត្រៀមខ្លួនធ្វើការស្រាវជ្រាវនៅកម្រិតឧត្តមសិក្សា។
ក្រសួងបញ្ជាក់ថា៖ «សៀវភៅសិក្សាជាផ្នែកមួយនៃការទទួលស្គាល់គុណភាពអប់រំលើគ្រឹះស្ថានឧត្តមសិក្សា និងជាធនធានសិក្សាដែលជាមូលដ្ឋានមួយដ៏សំខាន់ក្នុងការគាំទ្រដល់ការបង្រៀន និងរៀន ហើយត្រូវមានបរិមាណគ្រប់គ្រាន់ ឆ្លើយតបទៅនឹងកម្មវិធីអប់រំ និងតម្រូវការសិក្សាស្រាវជ្រាវ»។
បើតាមក្រសួងអប់រំជាគោលការណ៍ គឺគ្រឹះស្ថានឧត្តមសិក្សាទាំងអស់ត្រូវមានសៀវភៅសិក្សា ដែលប្រើជាគោលសម្រាប់មុខវិជ្ជានីមួយៗ។ ចំនួនសៀវភៅសិក្សាដែលគ្រប់គ្រាន់សម្រាប់ការស្រាវជ្រាវ និងការសិក្សារបស់និស្សិត ត្រូវមានយ៉ាងតិច ១ ចំណងជើងក្នុង ១ មុខវិជ្ជា ហើយត្រូវតម្កល់យ៉ាងតិច ១២ ច្បាប់នៅក្នុងបណ្ណាល័យ ឬអាចរកបានតាមប្រព័ន្ធអេឡិចត្រូនិក។
ក្រសួងអប់រំបន្តលើកទឹកចិត្តដល់គ្រឹះស្ថានឧត្តមសិក្សារដ្ឋ និងឯកជនដែលបានស្នើសុំមូលនិធិបន្ថែមសម្រាប់បង្កើនចំនួនចំណងជើងសៀវភៅ ដែលមិនទាន់បានដាក់ពាក្យស្នើសុំឱ្យចូលរួមឲ្យបានកាន់តែច្រើនបន្ថែមទៀត ដើម្បីជាគុណប្រយោជន៍ដល់តម្រូវការនៃនិស្សិតកម្ពុជាក្នុងការសិក្សា និងស្រាវជ្រាវនៅកម្រិតឧត្តមសិក្សា។
លោក ហេង វ៉ាន់ដា ប្រធានក្រុមប្រឹក្សាភិបាល សមាគមគ្រឹះស្ថានឧត្ដមសិក្សាកម្ពុជាសាទរចំពោះលទ្ធផលនៃការបង្កើតមូលនិធិរបស់ក្រសួងនេះ ដែលបានជំរុញ និងលើកទឹកចិត្ដដល់អ្នកសិក្សាស្រាវជ្រាវ ដើម្បីមានឱកាសចងក្រងរៀបរៀងសៀវភៅសម្រាប់ឱ្យសិស្សសិក្សានៅតាមគ្រឹះស្ថានឧត្ដមសិក្សា។
លោកថ្លែងថា៖ «យើងដឹងហើយថា បច្ចុប្បន្នវិស័យអប់រំកំពុងប្រឈមផលប៉ះពាល់ខ្លាំងបណ្ដាលមកពីការរីករាលដាលជំងឺកូវីដ-១៩ ដូច្នេះការផ្ដល់មូលនិធិនេះគឺជាការប្រសើរណាស់សម្រាប់អ្នកសិក្សាស្រាវជ្រាវនៅគ្រឹះស្ថានឧត្ដមសិក្សា»។
លោក រស់ សុវាចា អ្នកនាំពាក្យក្រសួងអប់រំថ្លែងថា ការផ្ដល់មូលនិធិនេះគឺជាជំហានថ្មីមួយទៀត ដើម្បីឆ្លើយតបចំពោះបំណងប្រាថ្នារបស់និស្សិតកម្ពុជា ក្នុងការទទួលបានធនធានសិក្សាជាខេមរភាសាឱ្យបានគ្រប់គ្រាន់ មានគុណភាព និងប្រកបដោយសមធម៌។ លោកថា៖ «ការផ្ដល់មូលនិធិនេះ គឺដើម្បីរួមចំណែកលើកកម្ពស់វប្បធម៌នៃការស្រាវជ្រាវ បំផុសគំនិតច្នៃប្រឌិត ដើម្បីជាប្រយោជន៍ដល់វិស័យអប់រំ ដើម្បីឆ្លើយតបទៅនឹងទីផ្សារពលកម្ម និងសកលភាវូបនីយកម្ម»។
ក្រសួងសេដ្ឋកិច្ច និងក្រសួងអប់រំកាលពីថ្ងៃទី ១៩ ខែ តុលា ឆ្នាំ ២០២០ បានផ្តួចផ្ដើមគំនិត បង្កើតមូលនិធិ ស.គ.ន នេះឡើង ដើម្បីឧបត្ថម្ភថវិកាដល់អ្នកនិពន្ធ អ្នកសិក្សាស្រាវជ្រាវលើការរៀបរៀងនិពន្ធ និងកែលម្អសៀវភៅ (Text book) ដែលត្រូវប្រើប្រាស់នៅកម្រិតឧត្តមសិក្សា៕