.jpg)
លោក រស់ សុវាចា អ្នកនាំពាក្យក្រសួងអប់រំ ក្នុងកិច្ចប្រជុំកាលពីម្សិលមិញ។ ហ៊ាន រង្សី
ភ្នំពេញៈ កាលពីថ្ងៃម្សិលមិញ ក្រសួងអប់រំ យុវជន និងកីឡាបានចេញផ្សាយគោលការណ៍ប្រតិបត្តិស្ដង់ដាសម្រាប់ដំណើរការសាលារៀនឡើងវិញក្នុងបរិបទជំងឺឆ្លងកូវីដ ១៩។ ការចេញផ្សាយគោលការណ៍នេះធ្វើឡើងស្របពេលសាលារៀនចំនួន ២០ កំពុងបើកដំណើរការឡើងវិញចាប់ពីដើមខែសីហានេះទៅ។
នៅក្នុងគោលការណ៍ណែនាំដែលមានចំនួន ៩ ទំព័របានបញ្ជាក់ថា សាលារៀនដែលត្រូវបើកដំណើរការឡើងវិញ គឺត្រូវបាញ់ថ្នាំសម្លាប់មេរោគមុនដំណើរការគ្រឹះស្ថានសិក្សានៅបន្ទប់សិក្សា បណ្ដាល័យ បន្ទប់ពិសោធន៍ អាហារដ្ឋាន បង្គន់អនាម័យ និងកន្លែងលាងដៃជាដើមត្រូវរក្សាសីតុណ្ហភាពក្នុងបន្ទប់រៀនមិនឱ្យទាបជាង ២៤ អង្សាសេ ត្រូវបោសសម្អាតបន្ទប់សិក្សាជាប្រចាំថ្ងៃ និងត្រូវបើកបង្អួច ឬទ្វារឱ្យពន្លឺថ្ងៃ និងខ្យល់ចេញចូលគ្រប់គ្រាន់ក្នុងម៉ោងសិក្សា។
លើសពីនេះសាលារៀនត្រូវរៀបចំតុកៅអីអង្គុយដោយរក្សាគម្លាតសុវត្ថិភាពយ៉ាងហោចណាស់ ២ ម៉ែត្រពីគ្នាសិស្សក្នុងមួយបន្ទប់មិនឱ្យលើស ២០ ទៅ ២៥ នាក់ និងចៀសវាងការប្រមូលផ្ដុំកកកុញ និងឈរតម្រង់ជួរឃ្លាតពីគ្នាចាប់ពី ១,៥ ម៉ែត្រ។
នៅក្នុងគោលការណ៍ដដែលគឺសាលារៀនផ្អាកដំណើរការបណ្ណាល័យ កន្លែងកម្សាន្ត ទីលានកីឡា និងមិនត្រូវឱ្យសិស្សខ្ចីសៀវភៅគ្នាទៅវិញទៅមក ត្រូវយាមកាមមិនឱ្យអ្នកគ្មានភារកិច្ចចូលបរិវេណសាលា និងត្រូវរក្សាគម្លាត ១,៥ ម៉ែត្រនៅពេលប្រាស្រ័យទាក់ទងគ្នា។
ក្នុងករណីមានអ្នកត្រូវវាស់កម្ដៅកើនដល់ ៣៧,៥ អង្សាឡើងទៅត្រូវអនុញ្ញាតឱ្យឈប់សម្រាកនៅផ្ទះ។ សិស្ស និងបុគ្គលិកសិក្សាទាំងអស់ត្រូវយកចំណីអាហារមកពីផ្ទះរៀងៗខ្លួនត្រូវអង្គុយបរិភោគអាហារមានគម្លាតពីគ្នា ១,៥ ម៉ែត្រ និងត្រូវហាមឃាត់ការលក់ចំណីអាហារនៅក្នុង និងជាប់របងសាលារៀន។
ក្រសួងអប់រំព្រមានថា ក្នុងករណីគ្រឹះស្ថានសិក្សាណាពុំបានអនុវត្តតាមគោលការណ៍ដោយយកចិត្តទុកដាក់ និងបណ្ដាលឱ្យមានការផ្ទុះឆ្លងរាលដាលជំងឺកូវីដ១៩ជាយថាហេតុ គឺគណៈគ្រប់គ្រងសាលាទាំងនោះត្រូវប្រឈមនឹងវិធានការច្បាប់ និងវិធានការរដ្ឋបាល។
ការចេញគោលការណ៍ទាំងនេះ ស្របពេលសាលារៀនអន្តរជាតិរបស់ឯកជនចំនួន ២០ ជាសាលាមានស្ដង់ដាសុវត្ថិភាពខ្ពស់នៅភ្នំពេញ និងតាមបណ្ដាខេត្តមួយចំនួនទៀតដូចជាខេត្តសៀមរាប និងបាត់ដំបងបានចាប់ផ្ដើមដំណើរការឡើងវិញ ក្រោយពីបានបិទបណ្ដោះអាសន្នតាំងពីខែមីនាមក។
លោក រស់ សុវាចា អ្នកនាំពាក្យក្រសួងអប់រំធ្លាប់បញ្ជាក់ថា ការពិចារណាបើកសាលារៀនដំណាក់កាលទី ២ និងទី ៣ ជាបន្តបន្ទាប់ទៀត គឺអាស្រ័យលើការវាយតម្លៃចំពោះការបើកសាកល្បងសាលារៀនដំណាក់កាលទី ១ នេះ។
ប្រទេសកម្ពុជា បានរាយការណ៍ករណីឆ្លងជំងឺកូវីដ១៩លើកដំបូងកាលពីថ្ងៃទី ២៧ ខែមករា លើជនជាតិចិនម្នាក់ដែលបានធ្វើដំណើរមកកាន់ខេត្តព្រះសីហនុ ប៉ុន្តែការប្រកាសបិទសាលារៀននៅក្នុងខែមីនា គឺធ្វើឡើងបន្ទាប់ពីជំងឺកូវីដបានឆ្លងលើពលរដ្ឋខ្មែរជាលើកដំបូងជាបុរសរស់នៅក្នុងខេត្តសៀមរាប និងក្រោយពីមានគ្រូបង្រៀនជនជាតិបរទេសម្នាក់នៅសាលារៀន CIS នៅកោះពេជ្រត្រូវបានគេរាយការណ៍ថា ឆ្លងជំងឺកូវីដ១៩។
កម្ពុជាបានរាយការណ៍អ្នកឆ្លងជំងឺកូវីដ១៩សរុបចំនួន ២៤១ នាក់ បន្ទាប់ពីមានមន្ត្រីជាន់ខ្ពស់ស្ថានទូតសហរដ្ឋអាមេរិកម្នាក់ទៀតត្រូវបានក្រសួងសុខាភិបាលរាយការណ៍កាលពីម្សិលមិញថា បានឆ្លងជំងឺកូវីដ១៩ ដែលធ្វើឲ្យមន្ត្រីជាន់ខ្ពស់ស្ថានទូតនេះកើនដល់ ៤ នាក់ដែលបានឆ្លងជំងឺនេះ។ ជាមួយគ្នានេះក៏មានអ្នកជាសះស្បើយបន្ថែមចំនួន ៣ នាក់ទៀតដែរ និងបានធ្វើឱ្យអ្នកជាសះស្បើយកើនដល់ ២០០ នាក់។
លោកនាយករដ្ឋមន្ត្រី ហ៊ុន សែន ធ្លាប់លើកឡើងថា កម្ពុជាដែលរកឃើញករណីច្រើនបំផុតនាំចូលពីក្រៅប្រទេសគឺកំពុងគ្រប់គ្រងបានការចម្លងកូវីដ១៩ មិនឱ្យឆ្លងចូលទៅក្នុងសហគមន៍ ដោយសារមានការអនុវត្តវិធានការរឹតបន្តឹងខ្លាំងចាប់តាំងពីថ្ងៃទី ២០ ឧសភា មកដែលបានតម្រូវឱ្យអ្នកដំណើរមកពីក្រៅប្រទេសទាំងអស់ត្រូវធ្វើតេស្ដរកជំងឺកូវីដ ១៩ និងត្រូវធ្វើចត្តាឡីស័ក ១៤ ថ្ងៃ មុនអនុញ្ញាតឱ្យចូលទៅរស់នៅក្នុងសហគមន៍។
ប៉ុន្តែនៅរយៈពេលចុងក្រោយនេះ មានអ្នកធ្វើចត្តាឡីស័កមួយចំនួនបានរត់គេចចេញពីកន្លែងធ្វើចត្តាឡីស័កជាបន្តបន្ទាប់ដែលមន្ត្រីព្រួយបារម្ភថា អាចបង្កឱ្យមានការឆ្លងទៅដល់អ្នកក្នុងសហគមន៍។
លោក ចាន់ ថា អភិបាលរងខេត្តព្រៃវែងបានប្រាប់ភ្នំពេញ-ប៉ុស្ដិ៍កាលពីថ្ងៃម្សិលមិញថា កាលពីវេលាម៉ោង ៤ ទៅ ៥ ល្ងាចថ្ងៃទី ៣ សីហា នៅអំឡុងពេលមេឃកំពុងធ្លាក់ភ្លៀងមានបុរស ២ នាក់ ដែលធ្វើចត្តាឡីស័កនៅក្នុងវិទ្យាល័យ ហ៊ុន សែន កំពង់លាវស្រុកកំពង់លាវបានរត់ចេញពីមណ្ឌលចត្តាឡីស័ក ហើយបានធ្វើដំណើរទៅកាន់លំនៅឋានរបស់ខ្លួនស្ថិតក្នុងភូមិបឹងជ័រ ឃុំព្រៃទឹង ស្រុកស៊ីធរកណ្ដាល ខេត្តព្រៃវែង។
លោកថា៖ «មូលហេតុដែលពួកគាត់ល្មើសនឹងកាតព្វកិច្ចរបស់ពួកគាត់គឺដោយសារពួកគាត់ជឿថា ពួកគាត់គ្មានជំងឺកូវីដ ១៩។ គាត់បានទៅជួបជាមួយមិត្តភក្តិផឹកស្រាបៀរជាមួយគ្នានៅពេលដែលសមត្ថកិច្ចយើងបានទៅយកពួកគាត់មកវិញនៅម៉ោង ១០។ ប្រជាជនហ្នឹងគឺគាត់ប្រហែស និងព្រហើនតែម្ដង»។
លោកបន្តថា បុរសទាំង ២ នេះត្រូវបានដាក់ឱ្យធ្វើចត្តាឡីស័កបន្ថែមចំនួន ១៤ ថ្ងៃទៀត ដើម្បីព្រមានទៅដល់អ្នកធ្វើចត្តាឡីស័កផ្សេងទៀត ហើយអាជ្ញាធរកំពុងប្រមូលព័ត៌មានបន្ថែមទៀតអំពីអ្នកដែលបានជួបជាមួយបុរសទាំងពីរ បន្ទាប់ពីពួកគេបានគេចចេញពីកន្លែងធ្វើចត្តាឡីស័ក ហើយក្នុងនោះមិត្តភក្ដិដែលផឹកស្រាបៀរជាមួយគ្នារួមទាំង បងប្អូន និងឪពុកម្ដាយនឹងត្រូវយកមកធ្វើចត្តាឡីស័ក ១៤ ថ្ងៃដូចគ្នាដែរ។
អភិបាលរងខេត្តដដែលនេះបន្តថា ប្រសិនបើមិនរត់គេចពីកន្លែងធ្វើចត្តាឡីស័កបុរសទាំង ២ ដែលត្រូវបានធ្វើចត្តាឡីស័កបន្ទាប់ពីវិលត្រឡប់មកពីប្រទេសម៉ាឡេស៊ីកាលពីថ្ងៃទី ២៣ កក្កដា គឺអាចចាកចេញពីមណ្ឌលធ្វើចត្តាឡីស័កនៅថ្ងៃទី ៧ សីហា ប្រសិនបើការធ្វើតេស្តលើកទី ៣ គ្មានជំងឺកូវីដ ១៩ នៅថ្ងៃទី ៦ សីហា។
កាលពីថ្ងៃទី ១៧ កក្កដា ក៏ស្ដ្រីខ្មែរអាមេរិកាំងម្នាក់ដែលបានធ្វើដំណើរជាមួយអ្នកឆ្លងជំងឺកូវីដ ១៩ មកពីសហរដ្ឋអាមេរិកបានរត់ចេញពីកន្លែងធ្វើចត្តាឡីស័កក្នុងសណ្ឋាគារមួយនៅភ្នំពេញ ហើយបានជិះតាក់ស៊ីទៅស្នាក់នៅក្នុងសណ្ឋាគារមួយទៀតនៅក្នុងខេត្តកំពង់ចាម និងត្រូវបានមន្ត្រីរកឃើញវិញនៅថ្ងៃទី ១៨ ខែកក្កដា។
ស្ដ្រីរូបនេះត្រូវបានពិន័យ ១ លានរៀល និងបានឲ្យធ្វើកិច្ចសន្យា ប៉ុន្តែក្រោយពីបានធ្វើចត្តាឡីស័កបាន ១៤ ថ្ងៃ និងបន្ទាប់ពីធ្វើតេស្ដលើកទី ៣ ស្ដ្រីខ្មែរអាមេរិកាំងនោះគឺគ្មានជំងឺកូវីដ ១៩ នោះទេ និងត្រូវបានអនុញ្ញាតឱ្យចាកចេញពីកន្លែងធ្វើចត្តាឡីស័កទៅផ្ទះវិញកាលពីថ្ងៃទី ២៩ កក្កដា៕
