ភ្នំពេញៈ ក្រសួងអប់រំ យុវជន និង កីឡាគ្រោងចំណាយថវិកាប្រមាណពី ៤ ទៅ ៦ លានដុល្លារសហរដ្ឋអាមេរិកសម្រាប់ការរៀបចំដំណើរការនៃការ-ប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅថ្ងៃទី ២០-២១ ខែសីហានេះ ដែលមានសិស្សចំនួន ១១៧ ០៦២ នាក់។
លោក ព្រីង មរកត ប្រធាននាយកដ្ឋានមធ្យមសិក្សាចំណេះទូទៅនៃក្រសួងអប់រំ យុវជន និងកីឡាបានថ្លែងកាលពីម្សិលមិញថា៖ «ខ្ញុំចាំមិនសូវច្បាស់ដែរ! ប៉ុន្ដែការចំណាយចំពោះដំណើរការប្រឡងឆ្នាំនេះ ប្រហែលចាប់-ពី ៤-៦ លានដុល្លារ ឬពី ១ ៥០០ លានរៀល ទៅ ១ ៦០០ លានរៀលអីហ្នឹង»។
លោកអះអាងថា ការប្រឡងបាក់ឌុបឆ្នាំនេះសរុបទាំងថ្នាក់វិទ្យាសាស្ត្រ និង ថ្នាក់វិទ្យាសាស្ត្រសង្គម មានមណ្ឌលប្រឡងចំនួន ១៩៥ មណ្ឌល ដែលមាន៤ ៧១៦ បន្ទប់ នៅរាជធានី-ខេត្តទាំង ២៥។
កាលពីឆ្នាំ២០១៧ បេក្ខជនមានវត្តមានសរុបចំនួន ៩៩ ៧២៨ នាក់ ហើយជាលទ្ធផល គឺមានបេក្ខជនប្រឡងជាប់ចំនួន ៦៣ ៦៦៨ នាក់។
លោក មរកត ថ្លែងថា រហូតមកដល់ពេលនេះក្រសួងបានរៀបចំមណ្ឌលប្រឡងទូទាំងប្រទេសសម្រេចបាន៩០ភាគរយ។
លោក ថ្លែងថា៖«មិនមានអ្វីប្រែប្រួលទេចំពោះការប្រឡងឆ្នាំនេះ យើងនៅតែប្រព្រឹត្ដទៅដូចជាការប្រឡងរយៈកាល៤ឆ្នាំកន្លងមកអ៊ីចឹង។ ក្រៅពីនេះយើង មានតែរឹតបន្តឹងកម្រិតវិន័យ និងភាពខ្វះ-ចន្លោះចំពោះការគ្រប់គ្រង»។
គួរបញ្ជាក់ថា បាក់ឌុប ឆ្នាំនេះ នឹងប្រព្រឹត្តទៅនៅថ្ងៃទី ២០-២១ ខែសីហា នេះ។
ក្រសួងអប់រំ យុវជន និងកីឡា បានអំពាវនាវដល់បេក្ខជនទាំងអស់ ត្រូវគោរពបទប្បញ្ញត្តិនៃការប្រឡង ឱ្យបានល្អប្រសើរ ជាពិសេសមិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិកគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។
ក្នុងករណីរកឃើញ ត្រូវចាត់ទុកថា បានប្រព្រឹត្តសកម្មភាពផ្ទុយនឹងបទប្បញ្ញត្តិ និងកម្រិតវិន័យចំពោះបេក្ខជន និងត្រូវបានកំណត់ឱ្យធ្លាក់ជាស្វ័យប្រវត្តិ៕