ភ្នំពេញៈ ក្រសួងអប់រំ យុវជន និងកីឡាកាលពីម្សិលមិញបានជូនដំណឹងដល់សិស្សានុសិស្ស និស្សិត និងសាធារណជនទាំងអស់ទាក់ទងនឹងការប្រកួតប្រជែងបង្កើត App ក្នុងទូរស័ព្ទដៃដើម្បីឱ្យបុគ្គលិកអប់រំ ឬអាចប្រើប្រាស់ផ្សេងទៀតអាចទទួល និងផ្ដល់ព័ត៌មានទាក់ទងនឹងបញ្ហាជំងឺកូវីដ១៩ ដែលកំពុងរីករាលដាលក្នុងពិភពលោក។
សេចក្ដីជូនដំណឹងដែលចុះហត្ថលេខាដោយលោក ហង់ជួន ណារ៉ុន រដ្ឋមន្ដ្រីក្រសួងអប់រំបានឱ្យដឹងថា ការប្រកួតប្រជែងបង្កើត App នេះមានឈ្មោះថា «Khmer Education Covid-19 App» ស្ថិតក្រោមមូលនិធិ «ការស្រាវជ្រាវគំនិតច្នៃប្រឌិត និងនវានុវត្ដន៍» របស់ក្រសួងអប់រំ។ សេចក្ដីជូនដំណឹងបញ្ជាក់ថា «គោលដៅចម្បងនៃការប្រកួតប្រជែងនេះគឺបង្កើត «Khmer Education Covid-19 App» ដែលអាចដំឡើងនៅលើទូរស័ព្ទដៃ និងអាចប្រើប្រាស់បានទាំងប្រព័ន្ធប្រតិបត្ដិការ iOS និង Android»។
តាមសេចក្ដីជូនដំណឹងនេះអ្នកដែលចាប់អារម្មណ៍ត្រូវសរសេរឯកសារទស្សនាទានមួយដោយបង្ហាញពីក្របខ័ណ្ឌ និងគោលគំនិតនៃការបង្កើត App នេះ។ ក្រសួងនឹងជ្រើសរើស និងផ្ដល់រង្វាន់ជូនដល់ស្នាដៃឯកសារទស្សនាទានល្អចំនួន ១០ ដោយបេក្ខជន ឬក្រុមនីមួយៗនឹងត្រូវទទួលបានថវិការង្វាន់ ២ លានរៀល និងបណ្ណសរសើរចំនួន ១ ខណៈបេក្ខជន ឬក្រុមបេក្ខជននីមួយៗដែលជាប់ជយលាភីស្នាដៃល្អជាងគេដើម្បីបង្កើតជា «Khmer Education Covid-19 App» ផ្លូវការនឹងត្រូវបានរង្វាន់ចាប់ពី ២០ លានរៀលទៅ ៤០ លានរៀល និងបណ្ណសរសើរចំនួន ១។
ក្រសួងឱ្យដឹងទៀតថាកម្មវិធីនេះបើកទូលាយដល់សាធារណជនទូទៅដោយបេក្ខជនអាចចូលរួមប្រកួតជាលក្ខណៈបុគ្គល ឬជាក្រុមបានដោយមិនមានកំណត់សមាជិក និងជំនាញឡើយ។ ប៉ុន្ដែក្រសួងលើកទឹកចិត្ដដល់បេក្ខជនដែលមានសមាជិកក្រុមគួរមានជំនាញខុសៗគ្នា ដើម្បីអាចផ្ដល់គំនិតទូលំទូលាយក្នុងការបង្កើត App នេះ។
យ៉ាងណាក្ដីក្រសួងអប់រំតម្រូវឱ្យ «Khmer Education Covid-19 App» មានលក្ខណសម្បត្ដិដែលអាចផ្ដល់សេវាយ៉ាងហោចណាស់ ៥ ដូចជា «ព័ត៌មានទូទៅស្ដីពីជំងឺកូវីដ-១៩» ក្នុងនោះមានប្រវត្ដិនៃការផ្ទុះជំងឺកូវីដ ១៩ (Epidemiology) រោគសញ្ញា (Signs and Symptoms) មូលហេតុនៃការឆ្លងរោគ (Cause) ការធ្វើរោគវិនិច្ឆ័យ (Diagnosis) ការបង្ការ និងការការពារ (Prevention) ជាដើម។
ក្រសួងក៏តម្រូវឱ្យ App នេះមាន «បច្ចុប្បន្នភាពនៃជំងឺ និងការរីករាលដាល» ផងដែរ ដើម្បីឲ្យអ្នកប្រើប្រាស់អាចទទួលព័ត៌មានពិតប្រាកដ និងទាន់ហេតុការណ៍ដែលផ្សព្វផ្សាយដោយរាជរដ្ឋាភិបាល និងស្ថាប័នជំនាញជាពិសេសក្រសួងអប់រំ និងក្រសួងសុខាភិបាលស្ដីពីស្ថានភាពនៃការរកឃើញករណីឆ្លងជំងឺ និងវិធានការចូលរួមគ្រប់គ្រងទប់ស្កាត់ និងបង្ការ។
ក្រៅពីនោះក្រសួងអប់រំក៏តម្រូវឱ្យ App នេះមានលក្ខណសម្បត្ដិផ្សេងផងដែរ ដូចជា «ការតាមដានដំណើរ និងប្រវត្ដិនៃការធ្វើដំណើរ»។ មានន័យថាអ្នកប្រើប្រាស់ App នេះអាចកត់ត្រាពីប្រវត្ដិនៃការធ្វើដំណើររបស់ខ្លួន (Tracking the travel history) ហើយប្រសិនបើអាចគឺការប្រើសមត្ថភាព Facial Recognition របស់ទូរស័ព្ទ ដើម្បីកត់ត្រាមុខ ឬអត្តសញ្ញាណមនុស្សដែលខ្លួនបានជួបក្នុងរង្វង់ ៣ ម៉ែត្រពីខ្លួន (ប្រសិនបើអ្នកប្រើ App នេះបានថតរូប) និងមានភ្ជាប់ជាមួយ «ការស្នើសុំជំនួយ» ក្នុងករណីចាំបាច់បំផុតដោយអ្នកប្រើអាចចុចលើប៊ូតុងណាមួយដើម្បីផ្ញើសារខ្លីៗ ឬរាយការណ៍ជាបន្ទាន់ បើមានសង្ស័យពីជំងឺកូវីដ ១៩ នេះ។
ជុំវិញករណីជំងឺកូវីដ ១៩ នេះលោក រស់ សុវាចា អ្នកនាំពាក្យក្រសួងអប់រំ យុវជន និងកីឡាមិនបានអត្ថាធិប្បាយបន្ថែមទេកាលពីម្សិលមិញដោយលោកបានស្នើអ្នកសារព័ត៌មានយោងខ្លឹមសារទាំងស្រុងនៃសេចក្តីណែនាំនានារបស់ក្រសួងអប់រំ យុវជន និងកីឡា។
លោកបញ្ជាក់ថា៖ «សូមមេត្តាពិនិត្យលទ្ធភាពបង្វែរមុំការផ្សព្វផ្សាយដោយបន្ថែមខ្លឹមសារស្តីពីវិធានការលើកកម្ពស់អនាម័យរបស់បុគ្គលិកអប់រំគ្រប់លំដាប់ថ្នាក់ និងសិស្សានុសិស្សគ្រប់កម្រិតសិក្សាដោយយោងលើប្រភពព័ត៌មានក្រសួងអប់រំក្រសួងសុខាភិបាល និងអង្គការសុខភាពពិភពលោកស្តីពីវិធានការទប់ស្កាត់ការរាលដាលកូវីដ ១៩។ ទង្វើនេះអាចមានគុណតម្លៃបន្ថែមសម្រាប់គ្រប់ភាគីពាក់ព័ន្ធ»៕