ភ្នំពេញៈ ក្រសួងអប់រំ យុវជន និងកីឡាក្នុងឆ្នាំសិក្សា ២០២១-២០២២ បានប្រកាសប្រឡងជ្រើសរើស និងបណ្ដុះបណ្ដាលគ្រូបង្រៀនកម្រិតឧត្ដមចំនួន ១ ០០០ នាក់ តាមប្រព័ន្ធបណ្ដុះបណ្ដាល «បរិញ្ញា+១» និងចំនួន ១០០ នាក់ទៀតតាមប្រព័ន្ធបណ្ដុះបណ្ដាល «បរិញ្ញា+២» សម្រាប់បង្រៀនសិស្សតាមសាលារដ្ឋនានា ចាប់ពីថ្នាក់ទី ១០ ដល់ថ្នាក់ទី ១២។
ដោយឡែកក្រសួងក៏បានប្រកាសប្រឡងជ្រើសរើសគ្រូបង្រៀនកម្រិតឧត្តមចំនួន ៨៥ នាក់ទៀត សម្រាប់បម្រើការងារនៅតាមគ្រឹះស្ថានឧត្តមសិក្សាសាធារណៈ និងអង្គភាពនានាក្រោមឱវាទទីស្តីការក្រសួង។ នេះបើយោងតាមក្រសួងអប់រំ។
យោងតាមលិខិតរបស់ក្រសួងអប់រំជម្រាបទៅកាន់ប្រធានអង្គភាពក្រោមឱវាទ និងប្រធានមន្ទីរអប់រំរាជធានី-ខេត្ដចុះថ្ងៃទី ២១ ខែឧសភា បានឱ្យដឹងថា ក្នុងឆ្នាំសិក្សា ២០២១-២០២២ នេះ ក្រសួងអប់រំត្រូវការប្រឡងជ្រើសរើស និងបណ្ដុះបណ្ដាលគ្រូបង្រៀនកម្រិតឧត្ដមចំនួន ១ ០០០ នាក់ តាមប្រព័ន្ធបណ្ដុះបណ្ដាល «បរិញ្ញា+១» និងចំនួន ១០០ នាក់តាមប្រព័ន្ធបណ្តុះបណ្តាល «បរិញ្ញា+២» ដើម្បីចាប់ផ្ដើមទទួលការបណ្តុះបណ្តាលនៅថ្ងៃទី ១១ ខែតុលា ឆ្នាំ ២០២១ នៅវិទ្យាស្ថានជាតិអប់រំ។ កាលបរិច្ឆេទផុតកំណត់ទទួលពាក្យបេក្ខជននៅថ្ងៃទី ៩ ខែកក្កដា ឆ្នាំ ២០២១។ រីឯសម័យប្រឡង ថ្ងៃទី ១៥ ខែសីហា ឆ្នាំ ២០២១។
លោក រស់ សុវាចា អ្នកនាំពាក្យក្រសួងអប់រំថ្លែងពីម្សិលមិញថា ការប្រឡងជ្រើសរើស និងបណ្ដុះបណ្ដាលគ្រូបង្រៀនកម្រិត «បរិញ្ញា+១» និងកម្រិត «បរិញ្ញា+២» នេះជាការប្រឡងជ្រើសរើសវិលជុំដែលក្រសួងតែងតែធ្វើជារៀងរាល់ឆ្នាំ។ ប៉ុន្ដែកាលពីឆ្នាំ ២០២០ ដោយសារតែបញ្ហាកូវីដក្រសួងផ្អាកក្នុងការប្រឡងជ្រើសរើស ១ ឆ្នាំ។
លោកថ្លែងថា៖ «ដូច្នេះឆ្នាំនេះ គឺក្រសួងមានតម្រូវការជ្រើសរើស។ តាមសេចក្ដីជូនដំណឹងរបស់ក្រសួងបានបញ្ជាក់ហើយថា ការប្រឡងជ្រើសរើសឆ្នាំនេះ ប្រសិនបើក្រសួងអាចប្រឡងជ្រើសរើសដោយផ្ទាល់បាន ក្រសួងនឹងធ្វើ ប៉ុន្ដែបើមិនអាចប្រឡងដោយផ្ទាល់បានទេ ក្រសួងនឹងធ្វើតាមអនឡាញ»។
លោក សុវាចា បានពន្យល់ថា ភាពខុសគ្នារវាងគ្រូបង្រៀនកម្រិត «បរិញ្ញា+១» និងកម្រិត «បរិញ្ញា+២» គឺសម្រាប់គ្រូបង្រៀនកម្រិត «បរិញ្ញា+១» គឺជាគ្រូដែលមានសញ្ញាបត្របរិញ្ញាបត្រហើយទទួលបានការបណ្ដុះបណ្ដាលរយៈពេល ១ ឆ្នាំនៃការបណ្ដុះបណ្ដាលគរុកោសល្យ (វិធីសាស្ដ្រនៃការបង្រៀនសិស្ស)។ ចំណែកគ្រូបង្រៀនកម្រិត «បរិញ្ញា+២» គឺជាគ្រូបង្រៀនដែលមានសញ្ញាបត្រកម្រិតបរិញ្ញាបត្រ ដែលទទួលបានការបណ្ដុះបណ្ដាលគរុកោសល្យ និងការបណ្ដុះបណ្ដាលឯកទេសរយៈពេល ២ ឆ្នាំ កម្រិតបរិញ្ញាបត្រជាន់ខ្ពស់ (Master Degree)។
ដោយឡែកកាលពីថ្ងៃទី ៦ ខែឧសភា ក្រសួងអប់រំក៏បានប្រកាសប្រឡងជ្រើសរើសគ្រូបង្រៀនកម្រិតឧត្តមសិក្សាចំនួន ៨៥ នាក់ផងដែរ សម្រាប់បម្រើការងារនៅតាមគ្រឹះស្ថានឧត្តមសិក្សាសាធារណៈ និងអង្គភាពក្រោមឱវាទទីស្តីការក្រសួង។
បេក្ខជនដែលមានបំណងចូលរួមការប្រឡងប្រជែងត្រូវទាញយកសំណុំឯកសារតាមគេហទំព័ររបស់ក្រសួង Facebook.com/moeys.gov.kh ចាប់ពីថ្ងៃជូនដំណឹងរហូតដល់ថ្ងៃទី ៣០ ខែកញ្ញា ឆ្នាំ ២០២១ ជាកំហិត។ រីឯសម័យប្រឡងប្រព្រឹត្តនៅថ្ងៃទី ២១ ខែ តុលា ឆ្នាំ ២០២១។
ក៏ប៉ុន្តែក្រសួងអប់រំបានបញ្ជាក់ថា បេក្ខជនណាដែលមិនមានបណ្ណចាក់វ៉ាក់សាំងការពារជំងឺកូវីដ ១៩ ឬលិខិតបញ្ជាក់ជាផ្លូវការពីមន្ទីរសុខាភិបាលរាជធានី ខេត្ដ គឺមិនអនុញ្ញាតឱ្យចូលរួមប្រឡងឡើយ។ លោក រស់ សុវាចា បានបញ្ជាក់ថា៖ «មូលហេតុដែលក្រសួងតម្រូវឱ្យបេក្ខជនប្រឡងគឺជាអ្នកដែលទទួលបានវ៉ាក់សាំងការពារជំងឺកូវីដ ១៩ នេះ គឺក្រសួងបន្តចូលរួមជាមួយរាជរដ្ឋាភិបាលនៅក្នុងការគ្រប់គ្រងបង្ការទប់ស្កាត់ ការរីករាលដាលនៃជំងឺកូវីដ ១៩»។
ក្រសួងអប់រំបានឱ្យដឹងថា បេក្ខជនដែលចង់ចូលរួមប្រឡងគ្រូកម្រិតឧត្ដម កម្រិត «បរិញ្ញា+១» និងកម្រិត «បរិញ្ញា+២» អាចទៅដាក់ពាក្យនៅតាមមន្ទីរអប់រំរាជធានី-ខេត្ត។ ចំណែកបេក្ខជននៅតាមអង្គភាពនានាក្រោមឱវាទក្រសួងអប់រំ និងនៅរាជធានីភ្នំពេញត្រូវដាក់នៅវិទ្យាស្ថានជាតិអប់រំ។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនឯករាជ្យកម្ពុជា (CITA) បានថ្លែងថា ការដែលក្រសួងប្រកាសជ្រើសរើសគ្រូបង្រៀនក្នុងដំណាក់កាលរីករាលដាលជំងឺកូវីដ ១៩ នេះអាចមានភាពខ្វះចន្លោះនូវតម្លាភាពសម្រាប់បេក្ខជនដែលប្រឡងចូល។
លោកស្រីថ្លែងថា៖ «វាអាចជាអំពើពុករលួយមួយដែលក្រសួងប្រកាសជ្រើសរើសគ្រូបង្រៀននៅក្នុងសម័យកូវីដ ១៩ កំពុងរីករាលដាលនេះ ដោយសារការប្រឡងជ្រើសរើសគ្រូពេលនេះវាងាយស្រួលដល់ពួកគាត់ (ក្រសួង) ក្នុងការជ្រើសរើសបេក្ខជនតាមតែការចង់បានបក្ខពួកខ្សែពួកគាត់»។
យ៉ាងណា លោក រស់ សុវាចា បានបញ្ជាក់ថា៖ «គ្រប់ទម្រង់នៃការប្រឡងក្រោមឱវាទក្រសួងអប់រំ យុវជន និងកីឡា បន្តអនុវត្ដយ៉ាងម៉ឺងម៉ាត់នូវគោលការណ៍ច្បាប់ យុត្ដិធម៌ តម្លាភាព និងលទ្ធផលអាចទទួលយកបាន»។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានថ្លែងថា ការកំណត់លក្ខខណ្ឌចំពោះបេក្ខជនដែលត្រូវប្រឡងដោយតម្រូវឱ្យចាក់គ្រប់ចំនួនដូសជាមុននេះ គឺជាការល្អដើម្បីធានានូវសុខសុវត្ថិភាពសម្រាប់បេក្ខជន។
លោកថា៖ «ប៉ុន្ដែបើការដាក់កំហិតដោយមិនបានគិតពិចារណាទៅលើលក្ខខណ្ឌមួយចំនួនដូចជា ចំនួនវ៉ាក់សាំងនៅមានចំនួនកំណត់នៅឡើយនាពេលបច្ចុប្បន្ន ហើយការស្វែងរកការចាក់វ៉ាក់សាំងរបស់បេក្ខជននោះ ត្រូវចំណាយពេលច្រើន ហើយទី២ ប្រសិនបើបេក្ខជនប្រឡងនោះមានបញ្ហាសុខភាពដែលមិនអាចទទួលវ៉ាក់សាំងបាន ប៉ុន្ដែបេក្ខជនមានសមត្ថភាពនោះក៏អាចបង្កឱ្យមានការរើសអើង ឬភាពអយុត្ដិធម៌សម្រាប់បេក្ខជនផងដែរ»៕