ភ្នំពេញៈ ក្រសួងអប់រំ យុវជន និងកីឡាបានថ្កោលទោសដាច់អហង្ការចំពោះសមាគមគ្រូបង្រៀនកម្ពុជាឯករាជ្យដែលបានអំពាវនាវឱ្យគ្រូបង្រៀនទូទាំងប្រទេសចូលធ្វើបាតុកម្មប្រឆាំងការចាប់ខ្លួនប្រធានស្តីទីគណបក្សសង្គ្រោះជាតិលោក កឹម សុខា ដោយក្រសួងចាត់ទុកថាជាទង្វើមិនឯករាជ្យខណៈសមាគមនេះយល់ឃើញថាបើមានការចាប់ខ្លូនជារឿងអយុត្តិធម៌បំផុត។
សេចក្តីថ្លែងការណ៍របស់សមាគមគ្រូបង្រៀនកម្ពុជាឯករាជ្យកាលពីថ្ងៃទី ២៩ ខែឧសភាបានកត់សម្គាល់ថាក្នុងពេលចុងក្រោយនេះមានការរំលោភសិទ្ធិមនុស្ស និងរដ្ឋធម្មនុញ្ញយ៉ាងធ្ងន់ធ្ងរពីសំណាក់អ្នកកាន់អំណាច។
ក្នុងករណីនេះសមាគម «អំពាវនាវដល់លោកគ្រូ-អ្នកគ្រូចូលរួមកូដកម្ម ឬបាតុកម្មអហិង្សាស្របច្បាប់ក្នុងករណីមានការចាប់ខ្លួនលោក កឹម សុខា អ្នកតំណាងរាស្ត្រដែលកំពុងមានអភ័យឯកសិទ្ធិនៅឡើយ»។
បន្ទាប់ពីមានការអំពាវនាវនេះក្រសួងអប់រំបានចេញសេចក្តីថ្លែងការណ៍មួយពីថ្ងៃទី ៣០ ឧសភា ដោយបានថ្កោលទោសសមាគមគ្រូបង្រៀនកម្ពុជាឯករាជ្យថាមិនបានដើរតួនាទីឯករាជ្យពិតប្រាកដផ្ទុយទៅវិញបម្រើគណបក្សនយោបាយប៉ុណ្ណោះ។
ក្រសួងបន្តថា៖ «ទង្វើនេះបានបង្ហាញឱ្យឃើញកាន់តែច្បាស់ថាសមាគមគ្រូបង្រៀនកម្ពុជាឯករាជ្យមិនមែនជាសហជីពឯករាជ្យដែលបម្រើឱ្យផលប្រយោជន៍បុគ្គលិកអប់រំឡើយហើយអង្គការមួយនេះគឺគ្រាន់តែជាកូនជឹងគណបក្សសង្គ្រោះជាតិប៉ុណ្ណោះ»។
ក្រសួងសង្កត់ធ្ងន់ថានាពេលកន្លងមកលោក រ៉ុង ឈុន អតីតប្រធានសមាគមគ្រូបង្រៀនកម្ពុជាឯករាជ្យ និងជាសកម្មជនរបស់បក្សសង្គ្រោះជាតិក៏ធ្លាប់រៀបចំបាតុកម្មច្រើនលើកច្រើនសាដែរ ដែលមានចរិតជាបាតុកម្មនយោបាយពិសេសបាតុកម្មក្នុងខែមេសាឆ្នាំ ២០១៤ ក្នុងគោលដៅផ្តួលរំលំរដ្ឋាភិបាលស្របច្បាប់។
ប៉ុន្តែសេចក្តីថ្លែងការណ៍របស់សមាគមគ្រូបង្រៀនកម្ពុជាឯករាជ្យមួយទៀតចុះហត្ថលេខាដោយប្រធានស្តីទីលោកស្រី អ៊ុក ឆាយ៉ាវី បានសម្តែងការសោកស្តាយចំពោះប្រតិកម្មរបស់ក្រសួងអប់រំដែលបានថ្កោលទោសមកលើសមាគមរបស់ខ្លួន។
សេចក្តីថ្លែងការណ៍បញ្ជាក់ថា៖ «សមាគមគឺជាអង្គការឯករាជ្យលើកកម្ពស់សិទ្ធិសេរីភាព និងបម្រើផលប្រយោជន៍គ្រូបង្រៀនក្នុងករណីលោក កឹម សុខា គឺជារឿងអយុត្តិធម៌បំផុតប្រសិនបើតុលាការចាប់ខ្លួនគាត់នោះជាហេតុធ្វើឱ្យសមាគមត្រូវតែចេញការពារយុត្តិធម៌។ «ដូច្នេះការអំពាវនាវនេះគឺជាការប្រើសិទ្ធិស្របតាមច្បាប់រដ្ឋធម្មនុញ្ញដើម្បីប្រឆាំងនឹងភាពអយុត្តិធម៌គឺមិនមែនបម្រើឱ្យនយោបាយគណបក្សប្រឆាំង ឬការពារជនទុច្ចរិតឡើយ»។
តាមរយៈសេចក្តីថ្លែងការណ៍នេះបានឆ្លើយតបវិញថាផ្ទុយទៅវិញរដ្ឋមន្ត្រីក្រសួងអប់រំទេដែលបានកំពុងបម្រើឱ្យគណបក្សកាន់អំណាចទាំងផ្កាប់មុខខុសពីគោលការណ៍ទាំងលក្ខណៈជាតិ និងអន្តរជាតិ។
សេចក្តីថ្លែងការណ៍ឆ្លើយឆ្លងគ្នានេះកើតមានបន្ទាប់ពីសមត្ថកិច្ចដែលមានអាវុធស្ទើរគ្រប់ដៃបានព្យាយាមចាប់ខ្លួនលោក កឹម សុខា កាលពីថ្ងៃទី ២៦ ខែ ឧសភា នៅម្តុំផ្លូវនរោត្តមជិតផ្សារបឹងកេងកងដោយរថយន្តលោក កឹម សុខា ត្រូវបានឆែកឆេរតែមិនមានវត្តមានប្រធានស្តីទីគណបក្សសង្គ្រោះជាតិក្នុងរថយន្តឡើយ។ បន្ទាប់មកកាលពីថ្ងៃចន្ទរដ្ឋសភាដែលមានតែសមាជិកមកពីគណបក្សកាន់អំណាចចំនួន ៦៨ រូបបានបើកកិច្ចប្រជុំមួយដោយសម្រេចបើកដៃឱ្យតុលាការបន្តនីតិវិធីលើលោក កឹម សុខា តែមិនបានដកអភ័យឯកសិទ្ធិគាត់ឡើយ។
ជាការកត់សម្គាល់មិនត្រឹមតែសមាគមគ្រូបង្រៀនកម្ពុជាឯករាជ្យនេះទេដែលបានអំពាវឱ្យគ្រូបង្រៀនចូលធ្វើបាតុកម្មប្រសិនបើមានការចាប់ខ្លួនលោក កឹម សុខា នោះក្រៅពីនោះក៏មានសហព័ន្ធនិស្សិតបញ្ញវន្តកម្ពុជា និងលោក ជា មុនី ប្រធានសហជីពសេរីកម្មករក៏បានអំពាវនាវដូចគ្នាដែរ។
បើទោះជា សមត្ថកិច្ចព្យាយាមចាប់ខ្លួនលោក កឹម សុខា ក្តីមន្ត្រីជាន់ខ្ពស់គណបក្សប្រឆាំងលោក អេង ឆៃអ៊ាង បានចេញមុខប្រកាសថាលោក កឹម សុខា នឹងស្ថិតនៅទីស្នាក់ការគណៈបក្សក្នុងសង្កាត់ចាក់អង្រែដោយមិនមានការភ័យខ្លាចឡើយ៕
