ភ្នំពេញៈ ក្រសួងអប់រំ យុវជន និងកីឡានឹងរៀបចំកម្មវិធីប្រឡងប្រណាំងសាលារៀនស្អាតតាមរយៈរូបភាព ដែលនឹងប្រព្រឹត្តទៅជារៀងរាល់ខែចាប់ពីឆ្នាំ ២០២១ តទៅ។ កម្មវិធីនេះនឹងផ្តល់ឱកាសដល់គ្រឹះស្ថានសិក្សាសាធារណៈនៅទូទាំងប្រទេសចាប់ពីកម្រិតមត្តេយ្យសិក្សាដល់ថ្នាក់ទី ១២ ចូលរួមប្រជែងបង្ហាញស្នាដៃ។
បើតាមសេចក្តីប្រកាសរបស់ក្រសួងអប់រំ យុវជន និងកីឡា ការផ្តួចផ្តើមបង្កើតកម្មវិធីនេះឡើង គឺក្នុងគោលដៅលើកទឹកចិត្តគ្រឹះស្ថានសិក្សាទាំងអស់ឱ្យយកចិត្តទុកដាក់រៀបចំបរិស្ថានសាលាឱ្យបានស្អាត មានអនាម័យមានខ្យល់អាកាសល្អបរិសុទ្ធ។ ប៉ុន្តែក្នុងសេចក្តីប្រកាសរបស់ក្រសួងក៏មិនបានបញ្ជាក់ពីកាលបរិច្ឆេទច្បាស់លាស់នៃការចាប់ផ្តើមកម្មវិធីប្រកួតប្រជែងនេះដែរ។
ក្រសួងបញ្ជាក់ថា៖ «បើបរិវេណសាលាមានអំណោយផលល្អនោះក៏អំណោយផលដល់ការសិក្សារបស់សិស្សានុសិស្ស ដែលជាចំណែកមួយក្នុងការលើកកម្ពស់គុណភាពអប់រំនៅកម្ពុជាផងដែរ។ ក្រសួងអប់រំអំពាវនាវឱ្យគ្រឹះស្ថានសិក្សាសាធារណៈនានាទូទាំងប្រទេសត្រៀមខ្លួនក្នុងការចូលរួមកម្មវិធីប្រកួតប្រជែងខាងលើ»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ប្រាប់ ភ្នំពេញ ប៉ុស្តិ៍ ពីម្សិលមិញថា ដោយសារការប្រកាសប្រឡងប្រណាំងសាលារៀនស្អាតនេះក្រសួងទើបប្រកាសឡើងថ្មីៗ ដូច្នេះព័ត៌មានលម្អិត និងលក្ខខណ្ឌនៃកម្មវិធីប្រកួតប្រជែងនឹងត្រូវជម្រាបជូនពេលក្រោយ។
លោកថា៖ «ចំពោះជយលាភីនឹងប្រកាសជារៀងរាល់ខែដោយសាលាដែលមានបរិស្ថានសាលារៀនស្អាតជាងគេ គោរពតាមលក្ខខណ្ឌដែលបានកំណត់នឹងទទួលបានលិខិតបញ្ជាក់ជយលាភីពីក្រសួងអប់រំ យុវជន និងកីឡា»។
លោក ង៉ូវ ឈុនហាក់ នាយកវិទ្យាល័យចាក់អង្រែ រាជធានីភ្នំពេញប្រាប់ ភ្នំពេញ ប៉ុស្តិ៍ ពីម្សិលមិញថា រយៈពេលជាច្រើនឆ្នាំហើយដែលវិទ្យាល័យរបស់លោកបានខិតខំប្រឹងប្រែងអភិវឌ្ឍសាលារៀនឱ្យមានអនាម័យល្អ និងសោភណភាពស្អាត សម្រាប់ការសិក្សារបស់សិស្សានុសិស្ស។
លោកបន្តថា បើទោះជាច្រើនឆ្នាំមកនេះ វិទ្យាល័យរបស់លោកមិនអាចជាប់បានពានរង្វាន់ ប៉ុន្តែក៏បានចូលរួមឱ្យសិស្សានុសិស្ស និងលោកគ្រូ អ្នកគ្រូ បានចូលរួមយ៉ាងសកម្មក្នុងការរៀបចំសម្អាតអនាម័យសាលាឱ្យបានល្អប្រសើរ។
លោកថ្លែងថា៖ «យើងត្រៀមជានិច្ចក្នុងការប្រឡងប្រណាំងសាលារៀនស្អាតនេះ។ ឆ្នាំថ្មីនេះ យើងរំពឹងថា ការប្រកួតក្នុងពេលខាងមុខយើងនឹងឈ្នះ ព្រោះការប្រកួតនឹងធ្វើឡើងជារៀងរាល់ខែ ហើយបើទោះមិនឈ្នះក៏យើងបានស្អាតសម្រាប់ឱ្យសិស្សយើងមានអារម្មណ៍ល្អក្នុងការសិក្សាដែរ។ យើងនឹងខិតខំប្រឹងប្រែងរៀបចំសាលារបស់យើងបន្ថែមទៀត»។
សូមជម្រាបថា កន្លងទៅក្រសួង អប់រំ យុវជន និងកីឡាបានបង្កើតការប្រឡងប្រណាំងជាច្រើនដោយរាប់ចាប់ពីការប្រឡងប្រណាំងសាលាស្អាត សាលាដែលបានអនុវត្តអនាម័យបានល្អ រួមទាំងជយលាភីដល់លោកគ្រូ អ្នកគ្រូ និងសិស្សានុសិស្សដែលមានគំនិតច្នៃប្រឌិតបានល្អ។ ការបង្កើតកម្មវិធីទាំងនេះ ក្រសួងអះអាងថា គឺដើម្បីចូលរួមលើកកម្ពស់ការអប់រំនៅកម្ពុជា។
ទោះយ៉ាងណាលោកស្រី អ៊ុក ឆាយ៉ាវី ប្រធានសមាគមគ្រូបង្រៀន កម្ពុជាឯករាជ្យលើកឡើងថា ការបង្កើតឱ្យមានការប្រឡងប្រណាំងនៅតាមសាលារៀននេះ បើមើល ១ ជ្រុង គឺបង្ហាញថាល្អ និងផ្តល់ភាពជាគំរូ។ ប៉ុន្តែលោកស្រី ថាបើមើល ១ ជ្រុងទៀត គឺវាបានបង្កការលំបាកដល់លោកគ្រូ អ្នកគ្រូនៅតាមសាលាជាច្រើន។ ព្រោះថានៅពេលមានការប្រកាសយ៉ាងដូច្នេះ គឺនៅតាមសាលាទាំងអស់តម្រូវឱ្យលោកគ្រូ អ្នកគ្រូ ត្រូវចំណាយថវិកាផ្ទាល់ខ្លួន និងពេលវេលា ដើម្បីធ្វើយុទ្ធនាការនេះដែលប៉ះពាល់ដល់ម៉ោងសិក្សា និងជីវិតប្រចាំថ្ងៃ។
លោកស្រីអះអាងថា៖ «ខ្ញុំឃើញ ផ្ទាល់ភ្នែកតែម្តង ទើបខ្ញុំមានអំណះអំណាងបែបនេះ។ ការដែលប្រកួតយកស្នាដៃសាលាណាមួយពាក់ព័ន្ធនឹងសាលាគំរូ សាលាស្អាតហ្នឹងគឺអត់ឃើញលទ្ធផលបានទៅដល់អ្នកគ្រូលោកគ្រូទេ គឺបានតែទៅលើបុគ្គល។ ឧទាហរណ៍សាលា ១ បានលេខ ១ គឺលុយថវិកានេះបានតែទៅលើនាយកសាលា មិនបានទៅលើអ្នកដែលខិតខំឯណា»។
ជាដំណោះស្រាយលោកស្រី អ៊ុក ឆាយ៉ាវី ផ្តល់ជាយោបល់ថា នៅពេលមានការប្រកាសឱ្យមានការប្រឡងប្រណាំងដូច្នេះ ក្រសួងគួរតែបញ្ចេញកញ្ចប់ថវិកាដល់សាលាទាំងនោះ ដើម្បីឱ្យពួកគេអាចប្រើប្រាស់ថវិកាសម្រាប់ប្រើប្រាស់ក្នុងការអភិវឌ្ឍសាលា។ ថ្នាក់ដឹកនាំសាលាក៏គួរមានការចូលរួមដឹកនាំដោយឆ្លាតវៃ មិនត្រូវមានការបង្ខិតបង្ខំឱ្យលោកគ្រូ អ្នកគ្រូ ចំណាយពេលវេលា និងថវិកាផ្ទាល់នោះទេ ព្រោះស្ថានភាពគ្រូបង្រៀននៅពេលនេះ កំពុងជួបប្រទះនូវការលំបាក៕