.jpg)
សិស្សចាប់ផ្ដើមចូលរៀនវិញនៅសាលាបឋមសិក្សាស្ទឹងមានជ័យកាលពីថ្ងៃម្សិលមិញ។ រូបថត ហុង មិនា
ភ្នំពេញៈ ក្រសួងអប់រំ យុវជន និងកីឡាបានវាយតម្លៃខ្ពស់ចំពោះការបើកដំណើរការសាលារៀនក្នុងដំណាក់កាលទី ៣ ដោយអះអាងថា បានប្រព្រឹត្តទៅជាប្រក្រតីទៅតាមការគ្រោងទុក ខណៈដែលគ្រប់សាលារៀនទាំងអស់នៅទូទាំងប្រទេសបានប្រតិបត្តិតាមស្តង់ដាសុវត្ថិភាព ដែលបានដាក់ចេញបានល្អប្រសើរ។
ក្នុងថ្ងៃដំបូងនៃការបើកដំណើរការគ្រឹះស្ថានសិក្សាដំណាក់កាលទី ៣ នាថ្ងៃទី ២ ខែវិច្ឆិកា ម្សិលមិញលោក ហង់ជួន ណារ៉ុន រដ្ឋមន្ត្រីក្រសួងអប់រំបានចុះពិនិត្យការដំណើរការបើកសាលារៀនឡើងវិញនៅវិទ្យាល័យ ជា ស៊ីម សន្ធរម៉ុក និងបានប្រគល់សម្ភារមួយចំនួនដូចជា ម៉ាស់ អាល់កុល ដល់សាលារៀនដើម្បីប្រើប្រាស់ផងដែរ។
ក្នុងឱកាសនោះលោក ហង់ជួន ណារ៉ុន បានថ្លែងថា គ្រប់សាលាទាំងអស់ត្រូវតែអនុវត្តឱ្យបាននូវការអនុវត្តតាមស្តង់ដាអនាម័យ SOP របស់ក្រសួងសុខាភិបាល បន្ទាប់ពីទទួលបាននូវការអនុញ្ញាតពីប្រមុខរាជរដ្ឋាភិបាល ដើម្បីបញ្ចៀសការឆ្លងរីករាលដាលជំងឺកូវីដ ១៩។
លោកថ្លែងថា៖ «សូមថ្លែងអំណរគុណចំពោះលោកគ្រូ អ្នកគ្រូ មន្ទីរអប់រំ និងអាជ្ញាធររាជធានីភ្នំពេញដែលបានរួមចំណែកក្នុងការប្រយុទ្ធប្រឆាំងនឹងជំងឺកូវីដ ១៩។ ទោះបីស្ថានភាពជំងឺនេះមានភាពធូរស្រាលតែទាមទារនូវការប្រុងប្រយ័ត្នដើម្បីឱ្យការសិក្សាដំណើរការទៅប្រកបដោយសុវត្ថិភាព»។
ការបើកដំណើរការសាលារៀនក្នុងដំណាក់កាលទី ៣ នេះគឺក្រសួងអប់រំ បានអនុញ្ញាតឱ្យគ្រប់សាលារដ្ឋ និងឯកជនទាំងអស់ចាប់ពីថ្នាក់មត្តេយ្យដល់ថ្នាក់ មធ្យមសិក្សា អាចដំណើរការសិក្សាជាធម្មតាដោយកំណត់ចំនួនសិស្សក្នុង ១ ថ្នាក់ ២៥ នាក់ និងកំណត់ពេលវេលាឱ្យបានជាក់លាក់ទៅតាមកាលវិភាគដែលបានកំណត់។
ជាមួយគ្នានេះចំពោះគ្រឹះស្ថានសិក្សាសាធារណៈទាំងអស់ក៏អាចចាប់ផ្តើមដំណើរការឡើងវិញនូវសេវារថយន្តដឹកសិស្ស បណ្ណាល័យ សកម្មភាពអប់រំកាយ និងកីឡា សកម្មភាពសិស្បៈ និងសេវាអាហារដ្ឋានផងដែរ ដោយគ្រាន់តែត្រូវអនុវត្តឱ្យបានម៉ឺងម៉ាត់នូវគោលការណ៍ប្រតិបត្តិស្តង់ដាក្នុងបរិបទជំងឺកូវីដ ១៩។
លោក ហង់ ជួន ណារ៉ុន (ពាក់ក្រវាត់ ក) ពីម្សិលមិញ។ រូបថត ក្រសួងអប់រំ
លោក រស់ សុវាចា អ្នកនាំពាក្យក្រសួងអប់រំបានប្រាប់ ភ្នំពេញ ប៉ុស្តិ៍ កាលពីម្សិលមិញថា ក្រសួងអប់រំអាចវាយតម្លៃបឋមថា ថ្ងៃចូលរៀនដំបូងនៃការបើកដំណើរការសាលារៀនក្នុងដំណាក់កាលទី ៣ នេះមានដំណើរការជាប្រក្រតី តាមការគ្រោងទុក។
លោកបន្តថា ជារួមក្រសួងបានសង្កេតឃើញថា សាលារៀនទាំងអស់ទាំងសាលារដ្ឋ និងសាលាឯកជនអាចអនុវត្តទៅតាមការប្រតិបត្តិស្តង់ដាដែលបានដាក់ចេញ។
លោកបញ្ជាក់ថា៖ «សាលារៀនទាំងអស់បានរៀបចំបរិស្ថានសាលារៀន និងថ្នាក់រៀនបានសមរម្យដើម្បីធានាសុវត្ថិភាពក្នុងការសិក្សា និងបង្រៀន។ សាលារៀនទាំងអស់បានបែងចែកវេនសិក្សាទៅតាមការកំណត់របស់ក្រសួង»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យបានថ្លែងពីម្សិលមិញថា តាមការចុះអង្កេតរបស់លោកស្រីមើលឃើញថា សិស្សានុសិស្ស បង្ហាញក្តីសប្បាយរីករាយដែលបានវិលត្រឡប់មកថ្នាក់រៀនវិញ បើទោះបីនៅតាមសាលាមួយចំនួននៅមានខ្វះខាតសម្ភារប្រើប្រាស់សម្រាប់ការពារជំងឺកូវីដ ១៩ យ៉ាងណាក្តី។
លោកស្រី ឆាយ៉ាវី បានសង្កត់ធ្ងន់ថា៖ «អ្វីដែលខ្ញុំឃើញសាលាមួយចំនួនគឺគាត់មានឧបករណ៍គ្រប់គ្រាន់ ម៉ាស៊ីនវាស់កម្តៅត្រឹមត្រូវ ខណៈសាលាមួយចំនួនតូចមិនទាន់មានគ្រប់ស្តង់ដាទេ។ ប៉ុន្តែដោយសារតែកង្វះខាត ដូច្នេះការខ្វះខាតបន្តិចបន្តួចនេះ គឺមិនមែនជាបញ្ហានោះទេ ព្រោះអ្នកគ្រូ-លោកគ្រូយើងបានត្រៀមខ្លួនរួចជាស្រេច ដើម្បីការពារហានិភ័យទាំងនេះ»។
ខណៈដែលនៅតាមតំបន់មួយចំនួននៅកំពុងប្រឈមនឹងបញ្ហាទឹកជំនន់នៅឡើយ លោកស្រី ឆាយ៉ាវី បានស្នើឱ្យសាលារៀននៅតាមតំបន់រងគ្រោះទាំងនោះគួរតែពិចារណា បន្ធូរបន្ថយអវត្តមានសិស្ស និងផ្តល់ភាពងាយស្រួលដល់សិស្សានុសិស្សក្នុងអំឡុងពេលនេះផងដែរ៕
