.jpg)
លោក ហង់ជួន ណារ៉ុន រដ្ឋមន្ត្រីក្រសួងអប់រំ។ ហុង មិនា
ភ្នំពេញៈ ក្រសួងអប់រំ យុវជន និងកីឡាបានប្រកាសឱ្យគ្រឹះស្ថានសិក្សារដ្ឋ និងឯកជនបើកដំណើរការឡើងវិញចាប់ពីថ្ងៃចន្ទ ទី ២៣ ខែ វិច្ឆិកា ឆ្នាំ ២០២០ តទៅ ហើយការប្រឡងសញ្ញាបត្រមធ្យមសិក្សាបឋមភូមិ និងទុយិភូមិ (បាក់ឌុប) គឺនៅតែដំណើរការដដែល។
លោក ហង់ជួន ណារ៉ុន រដ្ឋមន្ត្រីក្រសួងអប់រំបានថ្លែងក្នុងសន្និសីទកាសែតកាលពីម្សិលមិញថា ក្រសួងបានស្នើសុំគោលការណ៍ពីនាយករដ្ឋមន្ត្រីដើម្បីបើកគ្រឹះស្ថានសិក្សារដ្ឋ និងឯកជនឡើងវិញទាំងអស់ក្នុងរាជធានីភ្នំពេញ និងទីរួមខេត្តកណ្តាល ដើម្បីឱ្យសិស្សានុសិស្សចូលរៀនជាប្រក្រតីឡើងវិញក្នុងដំណាក់កាលទី៣ នេះ។
ម្យ៉ាងវិញទៀតក្រសួងក៏បានប្រកាសបើកឱ្យដំណើរការឡើងវិញនូវពហុកីឡដ្ឋានជាតិអូឡាំពិកក៏ដូចជាអនុញ្ញាតឱ្យមានការលេងកីឡាផ្សេងៗដោយអនុវត្តទៅតាមគោលការណ៍ស្តង់ដា ដែលក្រសួងបានដាក់ចេញដោយធានាបាននូវការរក្សាគម្លាតសុវត្ថិភាព និងការរក្សានូវស្តង់ដាសុខភាពអនាម័យផងដែរ។
លោក ហង់ជួន ណារ៉ុន បញ្ជាក់ថា៖ «ក្រសួងអប់រំ សូមប្រកាសឱ្យសិស្សានុសិស្ស មាតាបិតាអ្នកអាណាព្យាបាល លោកគ្រូអ្នកគ្រូ សូមបើកដំណើរការគ្រឹះស្ថានសិក្សាឡើងវិញទាំងរដ្ឋ និងឯកជនចាប់ពីថ្ងៃទី ២៣ ខែវិច្ឆិកា តទៅ»។
លោករដ្ឋមន្ត្រីក៏បានអំពាវនាវឱ្យគ្រឹះស្ថានសិក្សាទូទាំងប្រទេសកម្ពុជាសុំបន្តអនុវត្តឱ្យបានម៉ឺងម៉ាត់នូវគោលការណ៍អនុវត្តស្តង់ដា និងសុវត្ថិភាពសិក្សា និងអនាម័យនៅតាមគ្រឹះស្ថានសិក្សាឱ្យបានខ្ជាប់ខ្ជួនដើម្បីបន្តការពារកុំឱ្យមានកើតជំងឺកូវីដ ១៩ នេះ ជាពិសេសការពារកុំឱ្យមានការរីករាលដាលជំងឺកូវីដ ១៩ ចូលទៅក្នុងសហគមន៍។
ក្រសួងអប់រំក៏នឹងរៀបចំឱ្យមានការប្រឡងសញ្ញាបត្រមធ្យមសិក្សាបឋមភូមិនៅថ្ងៃទី ៣០ ខែវិច្ឆិកា ហើយនឹងរៀបចំការប្រឡងសញ្ញាបត្រទុតិយភូមិ (បាក់ឌុប) នៅថ្ងៃទី ២១-២២ ខែធ្នូ ឆ្នាំ ២០២០ ដដែលនៅតាមគ្រឹះស្ថានសិក្សា។ លោករដ្ឋមន្ត្រីបានណែនាំឱ្យគ្រឹះស្ថាននីមួយៗធ្វើការវាយតម្លៃពីការអនុវត្តកម្មវិធីសិក្សាហើយចេញវិញ្ញាសាទៅតាមការអនុវត្តកម្មវិធីសិក្សា ដែលទាំងនេះមិនមានបញ្ហាអ្វីចោទនោះទេ។
ចំពោះការប្រឡងបាក់ឌុប ក្រសួងនឹងសុំឱ្យគ្រឹះស្ថានសិក្សានីមួយៗវាយតម្លៃថា តើការអនុវត្តកម្មវិធីសិក្សានីមួយៗនោះបានចប់ ឬមួយយ៉ាងណា? ដូចនេះក្រសួងនឹងពិនិត្យមើល និងដាក់ចេញនូវវិញ្ញាសាទៅតាមការអនុវត្តកម្មវិធីសិក្សានោះតែម្តង។
លោក ជួនណារ៉ុន បញ្ជាក់ថា៖ «សូមឱ្យសិស្សានុសិស្សទាំងអស់ ជាពិសេសសិស្សនៅរាជធានីភ្នំពេញដែលអាក់ខានមិនបានរៀនក្នុងចំនួន ២ សប្តាហ៍នេះ សូមខិតខំប្រឹងប្រែងរៀនសូត្រត្រៀមប្រឡងសញ្ញាបត្រមធ្យមសិក្សាបឋមភូមិ និងទុតិយភូមិ ហើយសុំឱ្យគ្រឹះស្ថានសិក្សារៀបចំបង្រៀនបន្ថែមដើម្បីបំពេញនូវអ្វីដែលខ្វះខាត»។
ជាមួយគ្នានេះផងដែរ លោករដ្ឋមន្ត្រីក៏បានផ្តាំផ្ញើទៅដល់សិស្សានុសិស្សទាំងអស់កុំឱ្យមានការរើសអើងរវាងសញ្ញាបត្រដែលប្រឡងក្នុងអំឡុងពេលមានវិបត្តិកូវីដ និងសញ្ញាបត្រកាលពីមិនទាន់មានកូវីដ ពីព្រោះក្រសួងនៅតែរក្សាស្តង់ដាសិក្សាដដែល ដោយសារតែចង់ឱ្យសិស្សានុសិស្សមានសមត្ថភាពខ្ពស់ចេញទៅអាចរកការងារធ្វើបានអាចរៀនបន្តបាន។
បើតាមលោក ណារ៉ុន នៅតាមបណ្តាប្រទេសផ្សេងៗមិនបានប្រឡងទេ ដោយគ្រាន់តែយកពិន្ទុដែលរៀនក្នុងថ្នាក់ធ្វើជាលទ្ធផលដើម្បីទទួលស្គាល់សញ្ញាបត្រទុតិយភូមិតែម្តង ប៉ុន្តែសម្រាប់ប្រទេសកម្ពុជានៅតែបន្តការប្រឡងដដែលគឺដោយសារលោកមិនចង់ឱ្យមានការរើសអើងទេ សម្រាប់សិស្សក្នុងអំឡុងពេលនៃការរីករាលដាលជំងឺកូវីដ១៩នេះ ប៉ុន្តែទោះបីជាកូវីដក្តី តែគាត់ក៏អាចរៀនចប់ប្រកបដោយគុណភាព។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ (CITA) ថ្លែងប្រាប់ ភ្នំពេញ ប៉ុស្តិ៍ ពីម្សិលមិញថា ជាការល្អប្រសើរដែលក្រសួងបានបើកឱ្យមានការសិក្សាជាធម្មតាវិញតាមគ្រឹះស្ថានសិក្សារដ្ឋ និងឯកជន ដោយសារស្ថានភាពនៃបញ្ហាកូវីដ១៩ក្នុងប្រទេសកម្ពុជាមានភាពល្អប្រសើរឡើងវិញ។
លោកស្រីថា៖ «នេះជាការល្អ ដោយសារការប្រឡងសញ្ញាបត្រទុតិយភូមិជិតមកដល់ផងដែរដែលសិស្សានុសិស្សត្រូវសិក្សាសម្រាប់ត្រៀមក្នុងការប្រឡងបញ្ចប់ការសិក្សាជាពិសេសកុមារតូចៗក៏បានចូលរៀនវិញដែលជាការសម្រាលបន្ទុករបស់ឪពុកម្តាយផងដែរ»។ លោកស្រីមានសុទ្ធិដ្ឋិនិយមថា ក្រសួងនឹងមានការសម្រាល និងបន្ធូរបន្ថយទៅលើវិញ្ញាសាទៅដល់សិស្សានុសិស្សប្រឡងសញ្ញាបត្របាក់ឌុបក្នុងឆ្នាំសិក្សាដែលមានការរីករាលដាលជំងឺកូវីដនេះ៕
វីដេអូ៖
