.jpg)
លោក ហង់ជួន ណារ៉ុន រដ្ឋមន្ត្រីក្រសួងអប់រំ ថ្លែងនាពេលកន្លងមក។ រូបថត ហ៊ាន រង្សី
ភ្នំពេញៈ ក្រសួងអប់រំ យុវជន និងកីឡាសហការជាមួយសាកលវិទ្យាល័យជាតិគ្រប់គ្រង វិទ្យាស្ថានបច្ចេកវិទ្យាកម្ពុជា និងអង្គការ UNDP បានធ្វើសន្និសីទស្ដីពី «យុវជន និងបច្ចេកវិទ្យា» នៅវិទ្យាស្ថានបច្ចេកវិទ្យាដើម្បីបង្ហាញយុវជនឱ្យត្រៀមខ្លួនក្នុងយុគសម័យឌីជីថល ដោយត្រូវខិតខំរៀនសូត្រឲ្យមានចំណេះដឹងខ្ពស់ ដើម្បីត្រៀមខ្លួនចូលរួមអភិវឌ្ឍសង្គម និងសេដ្ឋកិច្ចប្រទេសជាតិ។
លោក ហង់ជួន ណារ៉ុន រដ្ឋមន្ត្រីក្រសួងអប់រំថ្លែងក្នុងពេលបើកសន្និសីទនេះកាលពីម្សិលមិញថា រាជរដ្ឋាភិបាលកម្ពុជាបានដាក់ចេញនូវចក្ខុវិស័យឆ្នាំ ២០៣០ ដើម្បីប្រែក្លាយកម្ពុជាឱ្យក្លាយទៅជាប្រទេសមានប្រាក់ចំណូលមធ្យម កម្រិតខ្ពស់ និងឆ្នាំ ២០៥០ ជាប្រទេសមានប្រាក់ចំណូលកម្រិតខ្ពស់។ ដូច្នេះក្រសួងអប់រំបានដាក់ចេញនូវរបៀបវារៈ កំណែទម្រង់វិស័យអប់រំក្នុងគោលដៅលើកកម្ពស់គុណភាពអប់រំដោយធ្វើយ៉ាងណាឱ្យវិស័យអប់រំឆ្លើយតបទៅនឹងការអភិវឌ្ឍសេដ្ឋកិច្ចលើការបណ្ដុះបណ្ដាលធនធានមនុស្សឱ្យមានគុណភាពខ្ពស់ និងឆ្លើយតបនឹងចក្ខុវិស័យ និងបរិបទសេដ្ឋកិច្ចថ្មីៗនេះ។
លោកថ្លែងថា៖ «ដូច្នេះគោលដៅនៃសន្និសីទនេះគឺដើម្បីត្រៀមខ្លួនថា តើយុវជនយើងនៅក្នុងយុគសម័យឌីជីថលនេះត្រូវត្រៀមខ្លួនយ៉ាងដូចម្ដេច? ខ្ញុំសូមវាយតម្លៃខ្ពស់ចំពោះសាកលវិទ្យាល័យ ជាតិគ្រប់គ្រង និងវិទ្យាស្ថានបច្ចេកវិទ្យាកម្ពុជាក៏ដូចជាអង្គការ UNDP ដែលបានសហការគ្នារៀបចំសន្និសីទនេះឡើង ដើម្បីជម្រាបជូនដល់យុវជន តើថាយុវជនកម្ពុជាសម័យថ្មីនេះត្រូវមានគុណសម្បត្ដិយ៉ាងដូចម្ដេច និងត្រៀមលក្ខណៈយ៉ាងដូចម្ដេច ដើម្បីឆ្លើយតបទៅនឹងចក្ខុវិស័យរបស់រាជរដ្ឋាភិបាលក្នុងយុគសម័យថ្មីនេះ»។
លោករដ្ឋមន្ដ្រីបន្ដថាក្នុងរយៈពេល ៦ ឆ្នាំកន្លងទៅនេះក្រសួងក៏បានដាក់ចេញនូវរបៀបវារៈ កំណែទម្រង់វិស័យអប់រំគ្រប់កម្រិត ទាំងកម្រិតបឋមសិក្សា មធ្យមសិក្សា តាមរយៈការបង្កើតសាលារៀនជំនាន់ថ្មី និងការបណ្ដុះបណ្ដាលផ្នែកបច្ចេកវិទ្យា ជាពិសេសផ្នែកបង្រៀនវិទ្យាសាស្ដ្រ និងបច្ចេកវិទ្យា។ ក្រសួងក៏បានវិនិយោគកាន់តែច្រើនទៅលើសាកលវិទ្យាល័យ ដើម្បីឱ្យសាកលវិទ្យាល័យត្រៀមខ្លួនផងដែរ។ លោកបន្តថា៖ «ការអប់រំតាមបែបឌីជីថលនេះមានគោលដៅដើម្បីប្រើប្រាស់បច្ចេកវិទ្យាក្នុងការដោះស្រាយបញ្ហាសេដ្ឋកិច្ច និងសង្គម ជាពិសេសដើម្បីត្រៀមលក្ខណៈក្នុងការបង្កើតទីក្រុងវៃឆ្លាត និងការបង្កើតអគារវៃឆ្លាត»។
លោករដ្ឋមន្ដ្រីបានណែនាំថា យុវជនត្រូវចេះប្រើទាំងបច្ចេកវិទ្យា និងត្រូវមានទាំងចំណេះដឹងទាំងបំណិនសម្រាប់ដោះស្រាយបញ្ហាផ្សេងៗ និងត្រូវមានភាពជាអ្នកដឹកនាំផងដែរ។ ការអប់រំតាមបែបឌីជីថលនេះទាមទារនូវបុគ្គលិកលក្ខណៈរបស់យុវជនខ្លាំងគឺត្រូវចេះធ្វើការងារជាក្រុម ចេះប្រើប្រាស់ឧបករណ៍ឌីជីថល មានដូចជា អ៊ែប (App) ផ្សេងៗជាដើម។ យុវជនត្រូវមានការទទួលខុសត្រូវមានការប្ដេជ្ញាចិត្ដខ្ពស់ ហើយត្រូវរៀនជាប់ជានិច្ចពេញមួយជីវិត ដើម្បីចាប់យកជាជំនាញថ្មី និងចេះផ្សុំាខ្លួនទៅនឹងសភាពការណ៍ដែលប្រែប្រួល។
លោករដ្ឋមន្ដ្រីបញ្ជាក់ថា៖ «កម្ពុជាត្រូវការធនធានមនុស្សដែលមានគុណភាពខ្ពស់អាចប្រកួតប្រជែងបានជាមួយប្រទេសផ្សេងៗទៀតក្នុងតំបន់។ ដូច្នេះគោលដៅនៃការអប់រំរបស់យើងគឺធ្វើយ៉ាងណាឱ្យយុវជនអាចត្រៀមខ្លួនមានទាំងវិជ្ជាសម្បទា បំណិនសម្បទា កាយសម្បទា ចរិយាសម្បទា និងជាពលរដ្ឋល្អចូលរួមចំណែកនៅក្នុងការអភិវឌ្ឍសេដ្ឋកិច្ច និងសង្គម»។
លោក ហោ ប៉េង សាកលវិទ្យាធិការនៃសាកលវិទ្យាល័យជាតិគ្រប់គ្រងថ្លែងបញ្ជាក់ដែរថា សន្និសីទនេះមានអ្នកចូលរួមជាយុវជន និងនិស្សិតជិត ២ ពាន់នាក់ពីគ្រឹះស្ថានឧត្ដមសិក្សា និងអង្គការយុវជននៅតាមស្ថាប័នរដ្ឋ និងឯកជន។
លោកបន្ដថា សន្និសីទនេះមានគោលបំណង ចែករំលែកចំណេះដឹង បន្ថែមពីនិន្នាការថ្មីនៃការវិវឌ្ឍបច្ចេកវិទ្យារបស់ពិភពលោក បដិវត្តន៍ឧស្សាហកម្មទី ៤ ភាពជឿនលឿននៃបច្ចេកវិទ្យាសេដ្ឋកិច្ចឌីជីថល និងសក្ដានុពលនៃទីផ្សារការងារដែលបង្កើតឡើងដោយបច្ចេកវិទ្យានេះ ដើម្បីឱ្យយុវជនអាចរៀបចំខ្លួន និងត្រៀមខ្លួនសម្រាប់ការងារថ្មីៗក្នុងពេលអនាគត។
លោកថ្លែងថា៖ «សន្និសីទនេះក៏មានគោលបំណង ចែករំលែកព័ត៌មានពាក់ព័ន្ធមួយចំនួន និងចំណេះដឹងជាក់ស្ដែងផ្ដល់ជូនដល់យុវជននិស្សិតដែលមានចំណាប់អារម្មណ៍ស្វែងយល់ពីរបៀបបង្កើតកម្មវិធីឌីជីថលទាក់ទងនឹងការងារយុវជនដែលក្រសួងអប់រំ យុវជន និងកីឡាកំពុងយកចិត្ដទុកដាក់ក្នុងការរៀបចំបង្កើតឱ្យមានកម្មវិធីសិក្សាថ្មីៗបន្ថែមទៀត»។
លោក ហោ ប៉េង បង្ហាញថាសេដ្ឋកិច្ចពិភពលោកកំពុងមានការផ្លាស់ប្ដូរ ដោយសារការវិវឌ្ឍដ៏ឆាប់រហ័ស និងកំណើននៃការប្រើប្រាស់បច្ចេកវិទ្យាព័ត៌មាន និងទូរគមនាគមន៍។ ទោះបីជាសម្ទុះនៃការផ្លាស់ប្ដូរផ្នែកប្រព័ន្ធឌីជីថលមានភាពខុសគ្នាពីប្រទេសមួយទៅប្រទេសមួយទៀតក្ដីក៏បំផ្លាស់ប្ដូរនេះបានជះឥទ្ធិពលលើបណ្ដាប្រទេសទាំងអស់លើពិភពលោក។ ការផ្លាស់ប្ដូរនេះអាចជាឱកាសផងដែរ និងជាការប្រឈមសម្រាប់ប្រទេសកំពុងអភិវឌ្ឍន៍៕
