.jpg)
អ្នកគ្រូម្នាក់កំពុងបង្រៀនសិស្សនៅសាលារៀន ១ ក្នុងក្រុងភ្នំពេញ។ រូបថត ភ្នំពេញប៉ុស្តិ៍
ភ្នំពេញៈ ក្រសួងអប់រំ យុវជន និងកីឡាប្រកាសឲ្យមន្ទីរអប់រំ ឬអង្គភាពក្រោមឱវាទទីស្តីការក្រសួងទាំងអស់នៅទូទាំងប្រទេសផ្អាកការផ្លាស់ប្តូរទីកន្លែងបម្រើការងាររបស់បុគ្គលិកអប់រំក្នុងឆ្នាំនេះ ដើម្បីពិនិត្យ និងដោះស្រាយស្ថានភាពលើស-ខ្វះគ្រូបង្រៀននៅតាមគ្រឹះស្ថានសិក្សា។
សេចក្តីជម្រាបជូនចេញថ្ងៃទី ៥ មិថុនា ចុះហត្ថលេខាដោយលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានឲ្យដឹងថា ការសម្រេចនេះគឺដើម្បីឲ្យក្រសួងអប់រំមានមូលដ្ឋានក្នុងការបន្តពិនិត្យ និងដោះស្រាយស្ថានភាពលើស-ខ្វះគ្រូបង្រៀន ជាពិសេសគ្រូបង្រៀនកម្រិតឧត្តមនៅតាមគ្រឹះស្ថានសិក្សាសាធារណៈ។
ក្រសួងអប់រំបានបញ្ជាក់ថា៖ «ក្រសួងសម្រេចផ្អាកការផ្លាស់ប្តូរទីកន្លែងបម្រើការងាររបស់បុគ្គលិកអប់រំទាំងការផ្លាស់ប្តូរក្នុងរាជធានី-ខេត្ត និងការផ្លាស់ប្តូរឆ្លងរាជធានី-ខេត្តសម្រាប់ឆ្នាំ ២០២០។ អាស្រ័យដូចបានជម្រាបជូនខាងលើនេះសូមឯកឧត្តម លោកជំទាវ លោក លោកស្រី ចាត់ចែងផ្សព្វផ្សាយឲ្យបានទូលំទូលាយ និងមានចំណាត់ការបន្តតាមការគួរ»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាប្រាប់ភ្នំពេញប៉ុស្តិ៍ពីម្សិលមិញថា ដោយសារតែកម្ពុជានៅមានបញ្ហាខ្វះគ្រូបង្រៀនទើបតម្រូវឲ្យក្រសួងត្រូវរៀបចំផែនការក្នុងពេលខាងមុខ ដើម្បីជ្រើសរើសគ្រូបង្រៀនបន្ថែមសម្រាប់បំពេញកន្លែងខ្វះខាត។ លោកបន្តថា ការជ្រើសរើសគ្រូបន្ថែមនេះក៏ដើម្បីឆ្លើយតបទៅនឹងចំនួនសិស្សានុសិស្សបច្ចុប្បន្ន និងអនាគត បើទោះជាការរីករាលដាលនៃជំងឺកូវីដ ១៩ មិនទាន់មានការចុះថយក៏ដោយ។
លោកបញ្ជាក់ថា៖ «ការផ្អាកការផ្លាស់ប្តូរទីកន្លែងបម្រើការងាររបស់បុគ្គលិកអប់រំក្នុងឆ្នាំនេះ គឺជាករណីថ្មី ដោយសារក្រសួងអប់រំ យុវជន និងកីឡាមានផែនការជ្រើសរើសគ្រូបង្រៀនកម្រិតឧត្ដម បង្រៀននៅវិទ្យាល័យឱ្យគ្រប់តាមតម្រូវការនាពេលខាងមុខ។
បើតាមលោក រស់ សុវាចា បានឲ្យដឹងថានៅឆ្នាំ ២០២០ នេះគ្រូបង្រៀនគ្រប់កម្រិតនៅទូទាំងប្រទេសមានប្រមាណ ១២ ម៉ឺននាក់។ តាមផែនការ ក្រសួងត្រូវការជ្រើសរើសគ្រូបង្រៀនកម្រិតឧត្ដមបន្ថែម ដើម្បីបំពេញការខ្វះគ្រូប្រមាណ ៣ ០០០ នាក់។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ លើកឡើងថាក្នុងអំឡុងពេលនេះបើពិតជាមានការជ្រើសរើសគ្រូបង្រៀនបន្ថែមមែននោះ គឺគ្រាន់តែជាការខ្ជះខ្ជាយថវិការដ្ឋប៉ុណ្ណោះ។ ព្រោះអំឡុងពេលកូវីដនេះ សូម្បីតែគ្រូបង្រៀន ក៏មិនអាចបំពេញការងាររបស់ខ្លួនបានផង។
លោកស្រីបន្តថាផែនការជ្រើសរើសគ្រូបង្រៀនថ្មីនេះអាចគ្រាន់តែជាការជ្រើសរើស បក្ខពួក ឬបុគ្គលដែលមានសែស្រឡាយរបស់ខ្លួនតែប៉ុណ្ណោះ។
លោកស្រីបញ្ចាក់ថា៖ «យើងមើលចំពោះគ្រូបង្រៀនដែលថាខ្វះហ្នឹង គឺឃើញថាដូចជាមិនខ្វះទេ។ ព្រោះអីគ្រូច្រើនណាស់ ដែលគាត់បង្រៀនអត់គិតក្នុងក្របខ័ណ្ឌរដ្ឋ ព្រោះអី អ្នកគ្រូលោកគ្រូយើង ដោយសារតែប្រាក់ខែគាត់តិច គាត់ព្យួរកន្លែងមួយ គាត់ទៅបម្រើកន្លែងមួយ។ កន្លងមកប្រាក់ខែតិចនៅសាលារដ្ឋ ពួកគាត់នាំគ្នាទៅបង្រៀននៅសាលាឯកជន។ គ្រាន់តែមានឈ្មោះកូនខ្មោច [មានឈ្មោះអត់បង្រៀន] គឺមានច្រើនគួរសមដែរ ប៉ុន្តែគ្រាន់តែគេធ្វើមិនដឹងមិនឮ»៕
វីដេអូ៖
