ភ្នំពេញៈ ក្នុងគោលបំណងដើម្បីដោះស្រាយបញ្ហាអនក្ខរកម្ម ក្រសួងអប់រំបានយកចិត្តទុកដាក់រៀបចំគោលនយោបាយអប់រំក្រៅប្រព័ន្ធ និងគោលនយោបាយសិក្សាពេញ ១ ជីវិត រៀបចំលិខិតបទដ្ឋានគាំទ្រដែលមានអនុក្រឹត្យ ប្រកាស និងសេចក្តីណែនាំការអនុវត្តកម្មវិធីអប់រំក្រៅប្រព័ន្ធ និងផែនការយុទ្ធសាស្ត្រ និងបង្កើនកិច្ចសហការជាមួយដៃគូអភិវឌ្ឍន៍ និងផ្នែកឯកជន។
លោក រស់ សុវាចា អ្នកនាំពាក្យក្រសួងអប់រំថ្លែងកាលពីថ្ងៃចន្ទថា ក្រសួងក៏បានយកចិត្តទុកដាក់លើការផ្សព្វផ្សាយរៀបចំ និងកែលម្អកម្មវិធីសិក្សា ដែលមានកម្មវិធីអក្ខរកម្មថ្នាក់ជាតិ និងកម្មវិធីអក្ខរកម្មសម្រាប់កម្មករនៅតាមរោងចក្រសហគ្រាស។ លើសពីនេះក្រសួងក៏ផ្តល់ក្របខ័ណ្ឌគ្រូអក្ខរកម្មជាប់កិច្ចសន្យាជាមួយប្រាក់ឧបត្ថម្ភប្រចាំខែពី ៥០ ភាគរយ ទៅ ៦០ ភាគរយ នៃប្រាក់បៀវត្សរ៍គ្រូបឋមសិក្សាចេញថ្មី។
លោកបន្តថាក្រសួងក៏យកចិត្តទុកដាក់ផ្តល់សម្ភារសម្រាប់ដំណើរការថ្នាក់រៀន និងរៀបចំដំណើរការថ្នាក់នៅតំបន់ដែលមានអនក្ខរជនច្រើននៅតាមរាជធានីខេត្តទាំង ២៥ តាមមណ្ឌលអប់រំកែប្រែ ពន្ធនាគារ រោងចក្រ និងសហគ្រាស។
លោក សុវាចា ថ្លែងថា៖ «អក្ខរកម្មជាស្ពានចម្លងអក្ខរជនទៅកាន់ភាពរឹតតែភ្លឺស្វាង ដើម្បីអភិវឌ្ឍន៍បុគ្គល ក្រុមគ្រួសារ និងសង្គមជាតិ។ ដោយសារអក្ខរជនជាកាតាលីករសកម្មក្នុងការចូលរួមលើកកម្ពស់ការងារសង្គម វប្បធម៌ និងសេដ្ឋកិច្ច ក្រសួងអប់រំ យុវជន និងកីឡាទទួលអនុវត្តអនុសាសន៍សម្តេចតេជោ (ហ៊ុន សែន) ជាពិសេសដើរតួសម្របសម្រួលយន្តការពាក់ព័ន្ធ»។
បើតាមលោក រស់ សុវាចា អត្រាអក្ខរកម្មយុវជនអាយុពី ១៥ ឆ្នាំ ដល់ ២៤ ឆ្នាំ មាន ៩៤,៦ ភាគរយ និងអត្រាអក្ខរកម្មជនពេញវ័យមាន ៨២,៥ ភាគរយ នៅឆ្នាំ ២០១៧។
ក្នុងទិវាអក្ខរកម្មជាតិថ្ងៃទី ៨ ខែ កញ្ញាខាងមុខ តាមរយៈសារលិខិតកាលពីថ្ងៃទី ១៩ សីហា លោកនាយករដ្ឋមន្ត្រី ហ៊ុន សែន បានបញ្ជាក់ថាក្នុងអាណត្តិទី ៦ របស់រដ្ឋាភិបាល ក្រសួងអប់រំបានសហការជាមួយក្រសួងមហាផ្ទៃបានបើកថ្នាក់អក្ខរកម្មបាន ២៥ ថ្នាក់ដល់អ្នកជាប់ឃុំឃាំងចំនួន ៥៩២ នាក់ នៅតាមមណ្ឌលអប់រំកែប្រែ និងពន្ធនាគាររាជធានី-ខេត្ត។
លោក ហ៊ុន សែន បន្តថាការបើកថ្នាក់រៀននេះគឺដើម្បីផ្តល់ឱ្យអ្នកជាប់ឃុំឃាំងទទួលបានចំណេះដឹង ជំនាញ មុខរបរ ការចេះអាន ចេះសរសេរ ចេះគិតលេខ និងចេះដោះស្រាយបញ្ហាពាក់ព័ន្ធនឹងជីវភាពប្រចាំថ្ងៃ។
លោកបញ្ជាក់ថា៖ «ពួកគេ (អ្នកជាប់ឃុំ) នឹងមានឱកាសរៀនសូត្របន្តលើជំនាញមុខរបរដើម្បីរកប្រាក់ចំណូល បន្ទាប់ពីទទួលបានសិទ្ធិសេរីភាព និងការធ្វើសហរណកម្មទៅក្នុងសង្គមជាតិឡើងវិញ»។ ក្រៅពីនេះលោក ហ៊ុន សែន បញ្ជាក់ទៀតថាក្រសួងអប់រំបានសហការជាមួយវិស័យឯកជននៅតាមរោងចក្រចំនួន ១១ ដោយឱ្យកម្មករបានចូលរៀនកម្មវិធីអក្ខរកម្មដើម្បីធ្វើឱ្យការបំពេញការងាររបស់ពួកគេប្រសើរជាងមុន និងជាមូលដ្ឋានគ្រឹះក្នុងការស្វែងរកការងារដែលមានប្រាក់ចំណូលខ្ពស់ជាងមុន។ ម្ចាស់រោងចក្រក៏បានទទួលបានប្រយោជន៍ពីកម្មវិធីអក្ខរកម្មនេះដែរ។
លោកនាយករដ្ឋមន្ត្រីបានអំពាវនាវដល់ស្ថាប័នជាតិ អន្តរជាតិ សហគមន៍ និងប្រជាពលរដ្ឋឱ្យយកចិត្តទុកដាក់ខ្ពស់ជាបន្តទៀតដល់ការងារអក្ខរកម្ម ក៏ដូចជាការងារអប់រំទាំងក្នុងប្រព័ន្ធ និងក្រៅប្រព័ន្ធ ដើម្បីបន្តចូលរួមលើកកម្ពស់ការងារអក្ខរកម្មនៅកម្ពុជាឱ្យកាន់តែមានប្រសិទ្ធភាពថែមទៀត។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពបានថ្លែងកាលពីថ្ងៃចន្ទថា អនក្ខរជននេះជាជនដែលសំខាន់ដែលត្រូវជួយ។ កាលណាពួកគាត់មិនសូវចេះអក្សរ សមត្ថភាពក្នុងការប្រកបរបររកស៊ីរស់នៅក្នុងសង្គមមានជួបបញ្ហា។ ពួកគាត់ត្រូវទទួលបានការគាំទ្រក្នុងការទទួលបានព័ត៌មានជាក់លាក់ និងការបណ្តុះបណ្តាលដើម្បីឲ្យមានសមត្ថភាពរកចំណូល។
លោក គិមអេង បានថ្លែងថា៖ «បញ្ហាដែលយើងផ្តល់វិជ្ជាជីវៈ គួរតែធ្វើយ៉ាងណាកុំឱ្យគ្នាមករៀនដល់ទីក្រុង។ ឲ្យគ្នារៀនមានសមត្ថភាពដែលអាចទៅរៀននៅតាមថ្នាក់ឃុំថ្នាក់អីហ្នឹង រឿងសំខាន់ ហើយម្យ៉ាងវិញទៀតគឺត្រូវតែមានទិន្នន័យច្បាស់លាស់ហើយនិងការជួយ ជាពិសេសឃុំ សង្កាត់ អាចយកថវិកាឃុំមួយចំនួន ហើយយើងបណ្តុះបណ្តាល កសាងសមត្ថភាពឱ្យគាត់ដែរ»។
បើតាមលោក រស់ សុវាចា ក្រសួងអប់រំបានសហការជាមួយដៃគូជាច្រើនក្នុងការងារអក្ខរកម្មនេះជាពិសេសសហការជាមួយអង្គការយូណេស្កូ (UNESCO)៕