ភ្នំពេញៈ ក្រសួងអប់រំ យុវជន និងកីឡាតាមរយៈការណែនាំពីលោកនាយករដ្ឋមន្ដ្រី ហ៊ុន សែន កំពុងរៀបចំដំណើរការបើកសាលារៀនឡើងវិញដោយត្រូវធ្វើជា ៣ ដំណាក់កាល ក៏ប៉ុន្តែមិនទាន់បានកំណត់ពេលនៃការចាប់ផ្ដើមនៅឡើយទេ។ នេះបើតាមអ្នកនាំពាក្យក្រសួងអប់រំកាលពីម្សិលមិញ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានថ្លែងប្រាប់ភ្នំពេញប៉ុស្ដិ៍ថា តាមអនុសាសន៍ណែនាំរបស់លោកនាយករដ្ឋមន្ត្រីលើការបើកដំណើរការសាលារៀនទាំងអស់ឡើងវិញនេះ គឺជំហររបស់ក្រសួងអប់រំ យុវជន និងកីឡានឹងត្រូវប្រព្រឹត្តទៅតាម ៣ ដំណាក់កាលគឺដំណាក់កាលទី ១ បើកសាលារៀនមានស្តង់ដាសុវត្ថិភាពខ្ពស់ ដំណាក់កាលទី ២ បើកសាលារៀនមានស្តង់ដាមធ្យម និងដំណាក់កាលទី ៣ បើកសាលារៀនមានស្តង់ដាអប្បបរមា។
លោកបានថ្លែងថា៖ «សម្រាប់ដំណាក់កាលទី ១ ក្រសួងអប់រំ យុវជន និងកីឡា បាននិងកំពុងសហការជាមួយគ្រប់ភាគីពាក់ព័ន្ធ ជាពិសេសក្រសួងសុខាភិបាល និងក្រសួងសេដ្ឋកិច្ច និងហិរញ្ញវត្ថុដោយពិភាក្សាលើវិធានការសុខុមាលភាព និងកត្តាសង្គមសេដ្ឋកិច្ច»។
លោក សុវាចា បានបញ្ជាក់ថា នាពេលខាងមុខនេះក្រសួងអប់រំនឹងជម្រាបសាធារណជនពីកាលបរិច្ឆេទ និងវិធានការចាំបាច់នានាសម្រាប់ដំណាក់កាលទី ១។ ចំណែកដំណាក់កាលទី ២ និងដំណាក់កាលទី ៣ គឺចំណុះលើដំណាក់កាលទី ១ ពោលគឺក្រសួងនឹងពិនិត្យតាមដានយ៉ាងយកចិត្តទុកដាក់លើដំណាក់កាលទី ១ រួចនឹងបន្តពិនិត្យករណីដំណាក់កាលទី ២ និងដំណាក់កាលទី ៣ ដោយយោងទៅលើផែនការដែលក្រសួងអប់រំបានរៀបចំជាមួយក្រសួងស្ថាប័នពាក់ព័ន្ធ។
ទាក់ទងនឹងបញ្ហានេះកាលពីម្សិលមិញលោក ម៉ម ប៊ុនហេង រដ្ឋមន្ត្រីក្រសួងសុខាភិបាលដែលជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ រួមទាំងថ្នាក់ដឹកនាំក្រសួងសុខាភិបាលក៏បានប្រជុំពិភាក្សាជាមួយ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡារួមទាំងក្រុមការងារផងដែរ ដើម្បីពិនិត្យលទ្ធភាពក្នុងការបើកដំណើរការសាលារៀនឡើងវិញជាបណ្តើរៗនេះ។
យោងតាមហ្វេសប៊ុករបស់ក្រសួងសុខាភិបាលដែលបានផ្សព្វផ្សាយកាលពីម្សិលមិញឱ្យដឹងថា កិច្ចប្រជុំនេះគឺបានពិនិត្យលទ្ធភាពក្នុងការបើកដំណើរការឡើងវិញជាបណ្តើរៗនូវគ្រឹះស្ថានអប់រំអន្តរជាតិស្តង់ដាកម្រិតខ្ពស់មួយចំនួន។ ក៏ប៉ុន្តែត្រូវគោរពតាមគោលការណ៍សំខាន់ៗស្របតាមវិធានការសុខាភិបាលដើម្បីធានាមិនឱ្យមានការឆ្លងរីករាលដាលនៃជំងឺកូវីដ ១៩ ដោយមានការត្រួតពិនិត្យ និងតាមដានពីក្រុមការងារអន្តរក្រសួង។
ជុំវិញការងារនេះលោក ហង់ជួន ណារ៉ុន ធ្លាប់បានថ្លែងនៅក្នុងសន្និសីទសារព័ត៌មានក្នុងពិធីបើកការដ្ឋានជួសជុល និងកែលម្អអគារ «មជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយ» នៅវិទ្យាល័យព្រះស៊ីសុវត្ថិកាលពីថ្ងៃ ២២ មិថុនា ថាក្រសួងអប់រំបានរៀបចំយុទ្ធសាស្ត្ររួចហើយក្នុងការរៀបចំបើកដំណើរការសាលារៀនឡើងវិញនេះ។
លោកថា ការបើបើកសាលារៀនវិញគឺចាប់ផ្ដើមដំណើរការពីសាលាដែលមានស្ដង់ដាខ្ពស់។
ប៉ុន្ដែសាលាដែលមានសិស្សកកកុញដែលមិនអាចអនុវត្តបានតាមវិធានការរបស់ក្រសួងសុខាភិបាល ឬក៏អង្គការសុខភាពពិភពលោកគឺមិនទាន់អាចអនុញ្ញាតឱ្យបើកវិញទេ។
បើតាមលោក ហង់ជួន ណារ៉ុន សិស្សចំណេះដឹងទូទៅរបស់រដ្ឋទាំងអស់មាន ៣ លាននាក់។
ប៉ុន្តែក្នុងចំណោមនោះមានសិស្សប្រមាណតែ ១,៥ លាននាក់ប៉ុណ្ណោះដែលទទួលបានសេវាការសិក្សាតាមប្រព័ន្ធឌីជីថល (អនឡាញ)។ ចំណែកសិស្ស ១,៥ លាននាក់ទៀតត្រូវពឹងលើការសិក្សាតាមសៀវភៅសិក្សាគោលរបស់ក្រសួងអប់រំ៕