.jpg)
កូនសិស្សត្រូវបានវាស់កម្ដៅ មុននឹងអនុញ្ញាតអោយចូលរៀននៅសាលាអន្តរជាតិប៊ែលធី កាលពីខែមករា។ ហេង ជីវ័ន
ភ្នំពេញៈ មន្ត្រីក្រសួងអប់រំយុវជន និងកីឡាបានយល់ព្រមមិនឱ្យធ្វើតេស្ដរកជំងឺកូវីដ ១៩ លើសិស្សមុនអនុញ្ញាតឱ្យសិស្សចូលរៀនផ្ទាល់នៅសាលានៅក្នុងសាលារៀនចំនួន ២០ នៅក្នុងរាជធានីភ្នំពេញ និងបណ្ដាខេត្តមួយចំនួន ក្រោយពីមានការតវ៉ារបស់ឪពុកម្ដាយសិស្ស ថាការធ្វើតេស្ដលើសិស្ស គឺជារឿងមិនចាំបាច់។
លោក រស់ សុវាចា មន្ត្រីនាំពាក្យក្រសួងអប់រំបានប្រាប់ភ្នំពេញប៉ុស្ដិ៍ម្សិលមិញតាមរយៈតេឡេក្រាមថា ក្រសួងបានពិចារណាឡើងវិញ និងបានព្រមព្រៀងគ្នាជាមួយក្រសួងសុខាភិបាល និងការយល់ព្រមពីលោកនាយករដ្ឋមន្ត្រី ហ៊ុន សែន ដើម្បីលើកលែងការតម្រូវឱ្យសិស្សត្រូវធ្វើតេស្ដជំងឺកូវីដ ១៩ មុនអនុញ្ញាតឱ្យពួកគេត្រឡប់ចូលរៀននៅក្នុងបរិវេណសាលាឡើងវិញ។
លោក សុវាចា បានឲ្យដឹងទៀតថា៖ «ប្រសិនបើសិស្ស ឪពុកម្ដាយរបស់សិស្ស ឬសមាជិកបុគ្គលិករបស់សាលារៀនទាំង ២០ បានត្រឡប់ពីក្រៅប្រទេសមកកម្ពុជាវិញមុនដើមខែមិថុនា ឬមិនបានធ្វើដំណើរចាកចេញពីប្រទេសកម្ពុជា។ ពួកគេមិនតម្រូវឱ្យធ្វើតេស្ដឡើយ។ ក៏ប៉ុន្តែប្រសិនបើសិស្ស ឪពុកម្ដាយសិស្ស សមាជិកបុគ្គលិករបស់សាលាទាំង ២០ បានត្រឡប់ពីក្រៅប្រទេសមកកម្ពុជាបន្ទាប់ពីដើមខែមិថុនា គឺពួកគេត្រូវតែធ្វើតេស្ដរកជំងឺកូវីដ ១៩»។
ការកែសម្រួលនេះបានកើតឡើង បន្ទាប់ពីក្រុមឪពុកម្ដាយដែលមានកូនត្រូវចូលរៀននៅក្នុងការបើកសាលារៀនដំណាក់កាលទី ១ នៅក្នុងខែសីហានេះ បានតវ៉ាកាលពីសប្ដាហ៍មុនមិនឱ្យសាលាធ្វើតេស្ដលើកូនៗរបស់ពួកគេឡើយ ដោយព្រួយបារម្ភថា ការធ្វើតេស្ដនោះអាចធ្វើឱ្យកូនក្មេងឈឺច្រមុះ និងមិនចាំបាច់ដោយសារសិស្សនឹងត្រូវធ្វើដំណើរទៅវិញទៅមកជារៀងរាល់ថ្ងៃពីសាលាមកផ្ទះវិញ។
ការតវ៉ានេះ បន្ទាប់ពីក្រុមឪពុកម្ដាយបានទទួលលិខិតពីខាងសាលាដែលសាលាអះអាងថា ក្រសួងអប់រំបានតម្រូវឱ្យឪពុកម្ដាយត្រូវយល់ព្រមឱ្យកូនមកធ្វើតេស្ដ មុនអនុញ្ញាតឱ្យចូលទៅក្នុងបរិវេណសាលារៀន ខណៈខាងសាលារៀនបានតម្រូវឱ្យឪពុកម្ដាយត្រូវបង់ថ្លៃធ្វើតេស្ដពី ១០០ ដុល្លារ ទៅ ១១០ ដុល្លារ សម្រាប់ការធ្វើតេស្ដលើសិស្សម្នាក់។
លោក សុវាចា ថ្លែងថា ជាទូទៅក្រសួងអប់រំតែងទទួលយកមតិរិះគន់ក្នុងន័យស្ថាបនាពីក្រុមភាគីពាក់ព័ន្ធទាំងអស់។ លិខិតរបស់សាលារៀនឯកជនអន្តរជាតិមួយដែលភ្នំពេញប៉ុស្ដិ៍ទទួលបាននៅថ្ងៃម្សិលមិញគឺបានដកចេញលក្ខខណ្ឌធ្វើតេស្ដ។ ប៉ុន្តែមុនបញ្ជូនកូនមកសិក្សាផ្ទាល់នៅសាលារៀនក្នុងបរិបទកូវីដ ១៩ ឪពុកម្ដាយត្រូវយល់ព្រមលើកិច្ចព្រមព្រៀងខ្លះដូចជាត្រូវពន្យល់កូនឱ្យអនុវត្តឱ្យបានខ្ជាប់ខ្ជួនតាមពិធីសារអនាម័យ និងត្រូវបង់ថ្លៃសិក្សាពេញទោះសិស្សត្រូវឆ្លាស់វេនពេលរៀននៅសាលា និងតាមអនឡាញ ១ សប្ដាហ៍ម្ដងក៏ដោយ៕
