.jpg)
កិច្ចប្រជុំអភិវឌ្ឍសម្ភារឧបទេសសម្រាប់ការអប់រំ បង្ការទប់ស្កាត់ការប្រេីប្រាស់គ្រឿងញៀនខុសច្បាប់នៅតាមគ្រឹះស្ថានសិក្សា កាលពីថ្ងៃទី ១៨ ឧសភា។ រូបថត NACD
ភ្នំពេញៈ ក្រសួងអប់រំ យុវជន និងកីឡាសហការជាមួយអាជ្ញាធរជាតិប្រយុទ្ធប្រឆាំងគ្រឿងញៀន និងអង្គការដៃគូពាក់ព័ន្ធកំពុងរៀបចំតាក់តែងឯកសារសម្រាប់ការអប់រំ បង្ការ ទប់ស្កាត់ ការប្រើប្រាស់គ្រឿងញៀនខុសច្បាប់ នៅតាមគ្រឹះស្ថានសិក្សាដែលឯកសារនេះគ្រោងនឹងដាក់ឲ្យប្រើប្រាស់តាមសាលារៀនទូទាំងប្រទេសនៅឆ្នាំ ២០២១។
លោកស្រី សឿ សុជាតា អនុរដ្ឋលេខាធិការ និងជាប្រធានក្រុមការងារអភិវឌ្ឍសម្ភារឧបទេសសម្រាប់ការអប់រំ បង្ការទប់ស្កាត់ការប្រើប្រាស់គ្រឿងញៀនខុសច្បាប់នៅតាមគ្រឹះស្ថានសិក្សានៃក្រសួងអប់រំបានថ្លែងប្រាប់ភ្នំពេញ-ប៉ុស្ដិ៍កាលពីថ្ងៃទី ១៨ ឧសភាថា ឯកសារសម្រាប់ការអប់រំ បង្ការ ទប់ស្កាត់ ការប្រើប្រាស់គ្រឿងញៀនខុសច្បាប់ដែលកំពុងរៀបចំតាក់តែងនេះមាន ២ ផ្នែកគឺផ្នែកបឋមសិក្សាមាន ១៥ មេរៀនចែកចេញជា ៤ ជំពូក និងមធ្យមសិក្សាមាន ១៥ មេរៀនចែកជា ៣ ជំពូក។
លោកស្រីថ្លែងថា៖ «ការតាក់តែងឯកសារអប់រំនេះគឺយើងយោងទៅតាមគោលនយោបាយសុខភាពសិក្សារបស់ក្រសួងអប់រំ។ យើងបានចាប់ផ្ដើមរៀបចំតាក់តែងឯកសារអប់រំនេះតាំងពីដើមខែមីនារហូតមកហើយបច្ចុប្បន្នយើងកំពុងកែសម្រួលនូវអត្ថន័យមួយចំនួន។ ឯកសារអប់រំនេះគឺជាសៀវភៅអំណានសម្រាប់ថ្នាក់បឋមសិក្សា និងមធ្យមសិក្សា។ គោលដៅនៃការតាក់តែង ឯកសារអប់រំ គឺ យើងចង់ផ្ដល់ចំណេះដឹងទាក់ទងនឹងបញ្ហាគ្រឿងញៀន ល្បិចកលរបស់ជនខិលខូចចំពោះសកម្មភាពជួញដូរគ្រឿងញៀន និងគ្រោះថ្នាក់ដែលពាក់ព័ន្ធទៅនឹងការប្រើប្រាស់គ្រឿងញៀន»។
លោកស្រីថ្លែងថា៖ «ការរៀបចំតាក់តែងឯកសារអប់រំនេះទាំង ២ ផ្នែកគឺកម្រិតបឋមសិក្សា និងមធ្យមសិក្សាយើងសម្រេចបាន ៧៥ ភាគរយហើយ។ នៅព្រឹកថ្ងៃចន្ទក្រុមការងារយើងបានយកមកកែសម្រួលសេចក្ដីមួយចំនួននៃមេរៀនក្នុងឯកសារអប់រំនេះ»។ លោកស្រីបន្ថែមថា ឯកសារអប់រំនេះគឺរៀបចំឡើងជាឯកសារសម្រាប់ការរៀន និងបង្រៀនតែម្ដងដោយមានភ្ជាប់នូវករណីសិក្សា សម្រាប់ការបណ្ដុះបំណិនត្រិះរិះពិចារណារបស់សិស្ស និងអាចឲ្យសិស្សអនុវត្ដសកម្មភាពនៅពេលសិក្សាផងដែរ។
លោកស្រីបន្តថា៖ «យើងចាប់ផ្ដើមអនុវត្ដការងាររៀបចំតាក់តែងឯកសារនេះក្នុងអំឡុងខែមីនា និងគ្រោងបញ្ចប់នៅឆ្នាំ ២០២១។ ក្រោយបញ្ចប់ការតាក់តែងយើងក៏ត្រូវការដៃគូសហការបន្ថែមទៀតក្នុងការបោះពុម្ពឯកសារអប់រំនេះ»។
លោក រស់ សុវាចា អ្នកនាំពាក្យក្រសួង អប់រំ បានថ្លែងកាលពីថ្ងៃចន្ទថា អវត្តមានគ្រឿងញៀនខុសច្បាប់នៅគ្រឹះស្ថានសិក្សាជាការចូលរួមលើកកម្ពស់គុណភាពអប់រំនៃកម្ពុជា។ ការអភិវឌ្ឍសម្ភារឧបទេសសម្រាប់ការអប់រំបង្ការទប់ស្កាត់ការប្រើប្រាស់គ្រឿងញៀនខុសច្បាប់នៅតាមគ្រឹះស្ថានសិក្សា មានគោលដៅធ្វើឲ្យលែងមានការប្រើប្រាស់គ្រឿងញៀនខុសច្បាប់នៅគ្រឹះស្ថានសិក្សាដោយបង្កើនប្រសិទ្ធភាពក្នុងការបង្ការទប់ស្កាត់ការប្រើប្រាស់គ្រឿងញៀនខុសច្បាប់តាមរយ:ការពិនិត្យវឌ្ឍនភាពការងារតាក់តែងឯកសារមេរៀនដើម្បីឈានទៅដល់ការបោះពុម្ពផ្សព្វផ្សាយនាពេលខាងមុខ។
លោកថ្លែងថា៖ «ការងារនេះជាកិច្ចសហការបន្តរវាងក្រសួងអប់រំ អគ្គលេខាធិការដ្ឋានអាជ្ញាធរជាតិ ប្រយុទ្ធប្រឆាំងគ្រឿងញៀន វិស័យឯកជន និងដៃគូអភិវឌ្ឍន៍ដូចជាអង្គការប្លែនអន្តរជាតិ កម្ពុជា និងអង្គការ Cambodia ACTs។ ជារួមការងារនេះស្ថិតក្នុងផែនការយុទ្ធសាស្ត្រវិស័យអប់រំឆ្នាំ ២០១៩-២០២៣ និងឆ្ពោះទៅឆ្នាំ ២០៣០ ដែលក្រសួងអប់រំ ប្តេជ្ញាសម្រេចឲ្យបានគោលដៅអភិវឌ្ឍន៍ប្រកបដោយចីរភាពទី ៤ ស្តីពីការអប់រំដោយឈរលើគោលការណ៍គុណភាព សមធម៌ បរិយាប័ន្នការសិក្សាពេញមួយជីវិតសម្រាប់ទាំងអស់គ្នា»។
លោកបន្តថា ឯកសារអប់រំនេះនឹងដើរតួនាទីសំខាន់ក្នុងការចូលរួមអប់រំសិស្សានុសិស្ស លោកគ្រូ អ្នកគ្រូ និងគ្រប់ភាគីពាក់ព័ន្ធឲ្យមានការយល់ដឹងបន្ថែមលើហានិភ័យបង្កដោយការប្រើប្រាស់គ្រឿងញៀនខុសច្បាប់ដើម្បីលើកកម្ពស់ការចូលរួមបង្ការទប់ស្កាត់ការប្រើប្រាស់គ្រឿងញៀននៅតាមគ្រឹះស្ថានសិក្សា។ នាពេលខាងមុខក្រសួងអប់រំ និងដៃគូសហការនឹងពិនិត្យខ្លឹមសារឯកសារអប់រំខាងលើ ដើម្បីពិចារណាយកទៅធ្វើតេស្តសាកល្បងតាមទម្រង់ផ្សេងៗដូចជាក្នុងថ្នាក់រៀនករណីសិក្សា ការត្រួតពិនិត្យ បណ្តាញមិត្តអប់រំមិត្ត សាលាគរុកោសល្យភូមិភាគនៅរាជធានី-ខេត្តគោលដៅ។
លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទានៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងកាលពីម្សិលមិញដែរថាការតាក់តែងឯកសារអប់រំនេះគឺដើម្បីសំដៅ ពង្រឹងគុណភាព បង្ការ ទប់ស្កាត់ការប្រើប្រាស់គ្រឿងញៀននៅក្នុងគ្រឹះស្ថានសិក្សាទាំងរដ្ឋ និងឯកជន ព្រោះកន្លងមកមានការរិះគន់ថា ក្នុងសាលារៀនមិនមានការប្រើប្រាស់គ្រឿងញៀនទេ ប៉ុន្ដែនៅក្រៅសាលារៀនមានការប្រើប្រាស់។ «ការតាក់តែងឯកសារនេះគឺដើម្បីឲ្យសិស្សានុសិស្ស និងអ្នកពាក់ព័ន្ធផ្សេងទៀតបានយល់ដឹងកាន់តែច្រើនថែមទៀតធ្វើយ៉ាងណាចូលរួមបង្ការទប់ស្កាត់បញ្ហាគ្រឿងញៀនទាំងអស់គ្នាព្រោះគ្រួសារគ្មានគ្រឿងញៀន សហគមន៍នឹងមានសុវត្ថិភាព»៕
