ភ្នំពេញៈ ក្រសួងអប់រំ យុវជន និងកីឡាតាមរយៈកិច្ចសហការជាមួយអង្គការ JICA ជប៉ុនក្រោយពីការអនុវត្ដជោគជ័យលើកម្មវិធីបង្រៀន Think! Think! តាមអនឡាញដែលបានអនុវត្ដសាកល្បងតាំងពីឆ្នាំ ២០១៨ មកនោះនឹងបន្តការបង្រៀននេះរយៈពេល ៣ ឆ្នាំទៀត ២០២០-២០២២ ដល់សាលារៀនចំនួន ៨ ក្នុងខេត្ដសៀមរាប កំពង់ចាម កណ្ដាល ស្វាយរៀង និងខេត្ដព្រៃវែង។
នេះបើយោងតាមលោក សុខ ថា ប្រធាននាយកដ្ឋានបច្ចេកវិទ្យាព័ត៌មាននៃក្រសួងអប់រំបានថ្លែងក្នុងពេលប្រកាសលទ្ធផលត្រីមាសទី១ នៃការស្ទង់មតិផ្ទៀងផ្ទាត់អំពីការប្រើប្រាស់កម្មវិធី Think! Think! ក្រោមគម្រោងរបស់ JICA និងការចុះហត្ថលេខាភាពជាដៃគូរវាងក្រុមហ៊ុន KOOMPI និងក្រុមហ៊ុន Think! Think! កាលពីថ្ងៃទី ២៩ ខែកញ្ញា នៅរាជធានីភ្នំពេញ។
លោកថ្លែងថា ក្រោយពីការអនុវត្ដសាកល្បងនាពេលកន្លងមកនៃកម្មវិធីសិក្សាតាមអនឡាញ កម្មវិធី Think! Think! គឺទទួលបានលទ្ធផលជោគជ័យ ហើយភាគីពាក់ព័ន្ធនឹងបន្តពង្រីកកម្មវិធីសិក្សានេះឱ្យបានគ្រប់ខេត្ដទូទាំងប្រទេសកម្ពុជា។
លោកថ្លែងថា៖ «តាមរយៈក្រុមហ៊ុន Think! Think! និង KOOMPI បានសហការគ្នានេះ គឺចូលរួមជួយដល់វិស័យអប់រំនៅកម្ពុជា ហើយនឹងអាចនាំមកនូវការសិក្សាតាមបែបឌីជីថលនេះ រឹតតែល្អប្រសើរថែមទៀត។ ក្រសួងអប់រំគាំទ្រចំពោះកិច្ចសហប្រតិបត្ដិការ និងការចាប់ផ្ដើមចំពោះក្រុមហ៊ុនក្នុងស្រុកដែលបានជួយដល់វិស័យអប់រំបែបនេះ»។
លោកបន្តថា៖ «យើងនឹងធ្វើការពង្រីកបន្ថែមតាមរយៈកិច្ចសហប្រតិបត្ដិការនេះ។ ក្រុមហ៊ុន Think! Think! និង KOOMPI នឹងប្រឹងប្រែងគិតបន្តដើម្បីដាក់កម្មវិធីបង្រៀន Think! Think! ឱ្យបានគ្រប់សាលារៀននៅទូទាំងប្រទេស»។
លោក សុខ ថា អំពាវនាវដល់សហគមន៍ និងអាណាព្យាបាលនៅតាមបណ្ដាខេត្ដ ចូលរួមជួយដល់សាលារៀន ព្រោះការបំពាក់សម្ភារបច្ចេកវិទ្យាដើម្បីឱ្យមានការសិក្សាតាមបែបឌីជីថលនេះគឺត្រូវការការវិនិយោគមួយចំនួន ទាមទារឱ្យមានការចូលរួមពីអាណាព្យាបាល និងឪពុកម្ដាយសិស្សទាំងអស់។
ក្រសួងអប់រំ និងអង្គការ JICA កាលពីថ្ងៃទី ២៩ ខែកញ្ញា បានប្រកាសប្រើប្រាស់បច្ចេកវិទ្យាថ្មីចំនួន ២ Think! Think! និង KOOMPI ដើម្បីជំរុញដល់ការសិក្សាតាមអនឡាញដល់សិស្សានុសិស្ស។
សេចក្ដីប្រកាសព័ត៌មានស្ដីពីការប្រកាសប្រើប្រាស់បច្ចេកវិទ្យាថ្មីទាំង ២ បានឱ្យដឹងថា កម្មវិធី Think! Think! ដែលជាកម្មវិធីរៀនតាមប្រព័ន្ធអេឡិចត្រូនិកលេខ ១ របស់ជប៉ុននឹងក្លាយជាកម្មវិធីដំឡើងដំបូងគេនៅក្នុងកុំព្យូរទ័រយួរដៃ KOOMPI ម៉ូដែលថ្មី E11 ដែលត្រូវបានរចនាឡើងជាមួយនឹងការសិក្សាសម្រាប់សិស្ស និងផ្តល់ជូនទាំងជម្រើស ទាំងការឧបត្ថម្ភ និងតម្លៃសមរម្យបំផុត ដើម្បីជាការផ្តួចផ្តើមដល់ការសិក្សារបស់សិស្សទាំងអស់។
លោក ថុល រិទ្ធី នាយកប្រតិបត្តិក្រុមហ៊ុន KOOMPI បានថ្លែងថា៖ «អ្នករាល់គ្នាអាចមានលទ្ធភាពទិញកុំព្យូទ័ររបស់យើងក្នុងតម្លៃសមរម្យ។ យើងបង្កើតឱកាសស្មើគ្នាសម្រាប់អ្នករាល់គ្នា ដើម្បីទទួលបានការអប់រំល្អបំផុត»។
លោក ដាយគិ វ៉ាតាណាប៊ិ អគ្គនាយកក្រុមហ៊ុន Think! Think! បានថ្លែងថា៖ «ឥឡូវនេះយើងមាន Think! Think! ជាក្រុមហ៊ុន software ដែលល្អបំផុតមកពីប្រទេសជប៉ុន សហការរួមគ្នាផ្តល់នូវផលិតផលថ្មីនៃ KOOMPI OS ដែលអាចប្រើប្រាស់ កម្មវិធី Think! Think!»។
លោកស្រី ណៅកូ អ៊ីដិ តំណាងអង្គការ JICA បានថ្លែងថា៖ «គម្រោងរបស់ Think! Think! បានជះឥទ្ធិពលជាវិជ្ជមានយ៉ាងខ្លាំងដល់សង្គមកម្ពុជា ហើយទីស្នាក់ការធំរបស់ JICA ក៏យកចិត្តទុកដាក់ខ្លាំងចំពោះគម្រោងនេះដែរ»។ លោកស្រីបន្តថា តាមរយៈគម្រោងនេះអាចជំរុញលើកទឹកចិត្តសិស្សឱ្យសិក្សានៅផ្ទះក្នុងអំឡុងពេលវិបត្ដិកូវីដ ១៩។ អង្គការ JICA បានសហការជាមួយ MoYES ដើម្បីផ្តល់ជូនមេរៀន Think!Think! តាមអ៊ីនធឺណិត និងហ្វេសប៊ុករបស់ក្រសួងអប់រំ ហើយក៏ត្រូវបានផ្សព្វផ្សាយនៅលើប៉ុស្តិ៍ទូរទស្សន៍ជាតិផងដែរ។
បើតាមលោកស្រី ណៅកូ អ៊ីដិ Think! Think! ជាកម្មវិធីសិក្សាដ៏ល្អជួយបង្កើន IQ ជំនួយដល់ការគិតបានស៊ីជម្រៅ និងបំណិនផ្នែកសង្គមរបស់កុមារ។ ជាពិសេសក្នុងអំឡុងពេលដែលកម្ពុជាកំពុងប្រឈមមុខនឹងជំងឺកូវីដ ១៩ កុមារអាចរីករាយក្នុងការសិក្សាកម្មវិធីនេះដោយខ្លួនឯងជាមួយសមាជិកគ្រួសារនៅតាមផ្ទះ៕