ភ្នំពេញៈ ក្រសួងអប់រំ យុវជន និងកីឡាបានស្នើឱ្យលោក ឃួងស្រេង អភិបាលរាជធានីភ្នំពេញជួយអន្តរាគមន៍ និងដោះស្រាយចំពោះម្ចាស់ផ្ទះល្វែង និងសំណង់មិនរៀបរយនៅជាប់របងពហុកីឡដ្ឋានជាតិអូឡាំពិកដែលបានបង្ហូរកាកសំណល់ចូលក្នុងលូរំដោះទឹកភ្លៀង បង្កឱ្យមានក្លិនស្អុយដល់ពហុកីឡដ្ឋានជាតិ។
យោងតាមលិខិតចុះហត្ថលេខាដោយ លោក ស សុខា រដ្ឋលេខាធិការក្រសួងអប់រំកាលពីថ្ងៃទី ៣០ ខែ មីនា ឆ្នាំ ២០២១ ផ្ញើជូន លោក ឃួង ស្រេង បានសរសេររៀបរាប់ថា នៅឆ្នាំ ២០១៨ រដ្ឋបាលរាជធានីភ្នំពេញធ្លាប់បានចេញលិខិតអន្តរាគមន៍ចំនួន ២ លើកដាច់ដោយឡែកពីគ្នា ប៉ុន្តែមកដល់ពេលនេះមិនទាន់ឃើញមានអាជ្ញាធរមូលដ្ឋាន និងស្ថាប័នពាក់ព័ន្ធចុះជួយអន្តរាគមន៍សមស្របណាមួយនៅឡើយ។
លោក ស សុខា ថា អនុលោមតាមគោលនយោបាយរាជរដ្ឋាភិបាលក្នុងការយកចិត្តទុកដាក់លើការលើកកម្ពស់ សុខុមាលភាពប្រជាជន និងដើម្បីត្រៀមលក្ខណៈរៀបចំធ្វើជាម្ចាស់ផ្ទះនៃការប្រកួតកីឡាជាតិ និងអន្តរជាតិផ្សេងៗក្រសួងអប់រំមានភារកិច្ចធ្វើការរៀបចំសណ្តាប់ធ្លាប់ និងអនាម័យនៅក្នុងបរិវេណពហុកីឡដ្ឋានជាតិទាំងមូល។
«បច្ចុប្បន្ននេះនៅជាប់របង ពហុកីឡដ្ឋានជាតិត្រូវបានម្ចាស់ផ្ទះល្វែងជុំវិញបានបង្ហូរកាកសំណល់បន្ទប់ទឹក និងកាកសំណល់ផ្សេងៗ រំលោភចូលក្នុងលូរំដោះទឹកភ្លៀងធ្វើឱ្យជះក្លិនមិនល្អដល់បរិស្ថានក្នុងពហុកីឡដ្ឋានជាតិ ជាពិសេសមកលើសាធារណជន ដើរហាត់ប្រាណ និងលេងកីឡា»។
លោក ឃួង ស្រេង ប្រាប់ ភ្នំពេញ ប៉ុស្តិ៍ ពីម្សិលមិញថា លោកមិនទាន់ទទួលបានលិខិតពីលោក ស សុខា នៅឡើយទេព្រោះពេលនេះកម្ពុជាកំពុងប្រឈមនឹងការផ្ទុះឡើងនូវជំងឺកូវីដ ១៩ ហេតុដូច្នេះលិខិតនេះអាចថា យឺតបន្តិច។ ទោះជាយ៉ាងណា លោក ឃួង ស្រេង បានគូសបញ្ជាក់យ៉ាងខ្លីថា លោកនឹងដោះស្រាយបញ្ហានេះ។
លោក រស់ សុវាចា អ្នកនាំពាក្យក្រសួងអប់រំក៏បានអំពាវនាវសុំអន្តរាគមន៍ពីសំណាក់គណ:អភិបាលរាជធានីភ្នំពេញសូមឱ្យដោះស្រាយករណីខាងលើនេះ ឱ្យបានលឿនផងដែរដើម្បីបន្តចូលរួមលើកកម្ពស់បរិស្ថាន សុខភាពផ្លូវកាយ ផ្លូវចិត្ត របស់ពលរដ្ឋ៕