.jpg)
គ្រូបង្រៀនម្នាក់នៅសង្កាត់ទួលទំពូងកំពុងបង្រៀនសិស្សតាមអនឡាញ។ ហេង ជីវ័ន
ភ្នំពេញៈ ក្រសួងអប់រំ យុវជន និងកីឡាបានសម្រេចចំណាយលើការធ្វើសិក្ខាសាលា និងការបណ្ដុះបណ្ដាលតាមអនឡាញទៅដល់គ្រូឧទ្ទេស នៅតាមគ្រឹះស្ថានបណ្តុះបណ្តាលគ្រូបង្រៀន និងពិនិត្យគាំទ្រថវិកាដល់គ្រូ ព័ត៌មានវិទ្យា (IT) សម្រាប់ការបង្រៀននៅនឹងកន្លែងដោយខ្លួនឯង។
ការសម្រេចនេះធ្វើឡើងក្រោយពីកិច្ចជុំតាមប្រព័ន្ធអនឡាញស្ដីពីការគាំទ្រការរៀន និងបង្រៀនពីចម្ងាយដែលស្របតាមបរិបទបច្ចុប្បន្នដឹកនាំដោយលោក ហង់ជួន ណារ៉ុន រដ្ឋមន្ត្រីក្រសួងអប់រំកាលពីថ្ងៃទី ២ ខែមេសា។ កិច្ចប្រជុំនេះក៏មានការចូលរួមពីមន្ដ្រីនៃអង្គភាពជំនាញថ្នាក់កណ្ដាលរបស់ក្រសួងថ្នាក់ដឹកនាំវិទ្យាស្ថានជាតិអប់រំ វិទ្យាស្ថានគរុកោសល្យរាជធានីភ្នំពេញ និងបាត់ដំបងព្រមទាំងនាយក នាយិកាមជ្ឈមណ្ឌលគរុកោសល្យភូមិភាគទាំង ៤ នាយក នាយិកាសាលាគរុកោសល្យ និងវិក្រឹតការខេត្តទាំង ១៦ សាលាគរុកោសល្យមត្តេយ្យមជ្ឈិម និងវិទ្យាស្ថានអប់រំពិសេស។
តាមលទ្ធផលនៃកិច្ចប្រជុំរបស់ក្រសួងអប់រំបញ្ជាក់ថា អង្គប្រជុំបានសម្រេចរៀបចំគោលការណ៍ចំណាយលើការធ្វើសិក្ខាសាលា និងការបណ្ដុះបណ្ដាលអនឡាញសម្រាប់ប្រើប្រាស់ផ្ទៃក្នុងរបស់ក្រសួងអប់រំដោយត្រូវមានការឯកភាពពីក្រសួងសេដ្ឋកិច្ច និងហិរញ្ញវត្ថុ និងដើម្បីស្វែងរកការគាំទ្រពីដៃគូអភិវឌ្ឍន៍។
អង្គប្រជុំបានសម្រេចរៀបចំបញ្ជីតម្រូវការលម្អិតនូវសម្ភារបច្ចេកទេស សម្រាប់ដំណើរការរៀន និងបង្រៀនតាមប្រព័ន្ធអនឡាញ។ រៀបចំបែងចែកសម្ភារបច្ចេកទេសដែលមាននៅក្នុងឃ្លាំងជូនទៅគ្រឹះស្ថានបណ្ដុះបណ្ដាលគ្រូបង្រៀនឱ្យបានស្មើៗគ្នា។ នៅក្នុងដំណាក់កាលទី ២ ក្រសួងនឹងរៀបចំទិញបន្ថែម (សម្ភារបច្ចេកទេស សម្រាប់ដំណើរការរៀន និងបង្រៀនតាមប្រព័ន្ធអនឡាញ) ដើម្បីបំពេញតម្រូវការ។
អង្គប្រជុំសម្រេច «រៀបចំការបណ្ដុះបណ្ដាលអនឡាញពីថ្នាក់កណ្តាលទៅគ្រូឧទ្ទេសនៅតាមគ្រឹះស្ថានបណ្តុះបណ្តាលគ្រូ និងពិនិត្យមើលការគាំទ្រថវិកាដល់គ្រូព័ត៌មានវិទ្យា (IT) សម្រាប់ការគាំទ្រការបង្រៀននៅនឹងកន្លែងដោយខ្លួនឯង និងត្រូវរៀបចំការប្រជុំប្រចាំខែ សម្រាប់ត្រួតពិនិត្យមើលការអនុវត្តការរៀន និងបង្រៀនតាមអនឡាញ»។
អង្គប្រជុំក៏បានសម្រេចឱ្យប្រើប្រាស់កញ្ចប់ថវិកាដែលមានស្រាប់សម្រាប់សេវាអ៊ីនធឺណិត និងរៀបចំគម្រោងពិសេសមួយគាំទ្រសេវាអ៊ីនធឺណិតនេះនឹងស្វែងរកការគាំទ្រពីដៃគូអភិវឌ្ឍន៍ សម្រាប់គាំទ្រអាហារូបករណ៍ដល់គរុសិស្ស គរុនិស្សិត។
លោក រស់ សុវាចា អ្នកនាំពាក្យក្រសួងអប់រំថ្លែងថា កិច្ចប្រជុំនេះជាការបន្តចូលរួមលើកកម្ពស់ការអប់រំតាមបែបឌីជីថលស្របតាមផែនការយុទ្ធសាស្ត្ររបស់ក្រសួងអប់រំឆ្នាំ ២០១៩-២០២៣។ យុទ្ធសាស្ត្ររបស់ក្រសួងអប់រំ សម្រាប់លើកកម្ពស់ការអប់រំតាមបែបឌីជីថលគឺបញ្ជ្រាបបច្ចេកវិទ្យាព័ត៌មាន និងសារគមនាគមន៍ (ប.ព.ស) ឱ្យក្លាយជាឧបករណ៍សម្រាប់បង្រៀន និងរៀន និងចែករំលែកចំណេះដឹងក្នុងវិស័យអប់រំទាំងមូល សំដៅឱ្យសិស្សនិស្សិតនូវចំណេះដឹង និងបំណិន ប.ព.ស ដើម្បីធ្វើអន្តរកាលទៅរកពិភពការងារក្នុងសតវត្សរ៍ទី២១។
លោកថ្លែងថា៖ «យុទ្ធសាស្ត្ររបស់ក្រសួងអប់រំ គឺផ្ដល់ធនធានហិរញ្ញវត្ថុចាំបាច់ ដើម្បីគាំទ្រដល់ការប្រើប្រាស់ ប.ព.ស ក្នុងវិស័យអប់រំ ដោយប្រើប្រាស់ថវិការបស់រដ្ឋាភិបាល និងធ្វើការសម្របសម្រួលភាពជាដៃគូរវាងវិស័យឯកជន និងវិស័យសាធារណៈ និងការគាំទ្ររបស់ដៃគូអភិវឌ្ឍន៍នានាសម្រាប់រ៉ាប់រងចំណាយមូលធន និងចំណាយចរន្ត»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ បានលើកឡើងពីផលវិបាកជាច្រើនសម្រាប់គ្រូបង្រៀន ចំពោះការបង្រៀនសិស្សតាមអនឡាញ ដូចជាខ្វះចំណេះដឹងផ្នែកបច្ចេកវិទ្យា កង្វះសម្ភារ និងត្រូវចំណាយថវិកាផ្ទាល់ខ្លួនសម្រាប់ប្រើប្រាស់សេវាអ៊ីនធឺណិត។
លោកស្រីថ្លែងថា៖ «យើងឃើញថា ក្រសួងអប់រំ ខិតខំរកវិធីសាស្ដ្រជួយដល់គ្រូបង្រៀនហើយវិធីសាស្ដ្ររបស់ក្រសួងក៏ល្អដែរ ប៉ុន្ដែការអនុវត្ដគឺមិនទាន់បានលទ្ធផលល្អ ១០០% ទេ»៕
