ភ្នំពេញៈ លោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡាកាល ពីម្សិលមិញបានចាត់វិធានការដល់អង្គភាពក្រោមឱវាទក្រសួងអប់រំ គ្រប់លំដាប់ថ្នាក់ផ្អាករាល់បេសកកម្មក្នុងប្រទេស ហើយកិច្ចប្រជុំ សិក្ខាសាលា វគ្គបំប៉ន និងវគ្គបណ្ដុះបណ្ដាលទាំងអស់ត្រូវធ្វើតាមអនឡាញរយៈពេល ២ សប្ដាហ៍ ចាប់ពីថ្ងៃទី ២៤ ខែកុម្ភៈ តទៅ។
លោករដ្ឋមន្ត្រីបានថ្លែងតាមរយៈសេចក្ដីណែនាំថា វិធានការនេះគឺដើម្បីចូលរួមបង្ការ និងទប់ស្កាត់ការរាតត្បាតនៃជំងឺកូវីដ ១៩ ពីអ្នកដែលពាក់ព័ន្ធព្រឹត្ដិការណ៍សហគមន៍ ២០ កុម្ភៈ ក្នុងរាជធានីភ្នំពេញ និងខេត្ដកណ្ដាលទៅខេត្ដដទៃទៀត និងអនុវត្តតាមការណែនាំរបស់រាជរដ្ឋាភិបាល។
លោករដ្ឋមន្ដ្រីបញ្ជាក់ថា៖ «រាល់បេសកកម្មក្នុងប្រទេសត្រូវផ្អាករយៈពេល ២ សប្ដាហ៍ ចាប់ពីថ្ងៃទទួលបានសេចក្ដីណែនាំនេះតទៅ (២០ កុម្ភៈ) លើកលែងតែករណីចាំបាច់បំផុត និងត្រូវមានការយល់ព្រមពីឯកឧត្ដមបណ្ឌិតសភាចារ្យរដ្ឋមន្ដ្រី។ រាល់កិច្ចប្រជុំ សិក្ខាសាលាវគ្គបំប៉ន និងវគ្គបណ្ដុះបណ្ដាលទាំងអស់ ត្រូវអនុវត្ដតាមអនឡាញទាំងស្រុង»។
លោកបានណែនាំថា អង្គភាពថ្នាក់ជាតិ ថ្នាក់ក្រោមជាតិទាំងអស់ត្រូវតាមដាន និងរាយការណ៍ជាប្រចាំអំពីស្ថានភាព សុខភាពមន្ដ្រីរបស់ខ្លួនក្នុងករណីបុគ្គលិកអប់រំណាមានការសង្ស័យ ឬមានរោគសញ្ញាស្រដៀងនឹងជំងឺកូវីដ ១៩ ត្រូវទូរស័ព្ទជាបន្ទាន់ទៅលេខ ១១៥ ដើម្បីពិគ្រោះយោបល់ និងផ្ដល់ព័ត៌មានមកអង្គភាពដើម្បីរាយការណ៍មកក្រុមការងារទប់ស្កាត់ការរីករាលដាលនៃជំងឺកូវីដ ១៩ របស់ក្រសួងអប់រំ។
លោក រស់ សុវាចា អ្នកនាំពាក្យក្រសួង អប់រំ យុវជន និងកីឡាបានថ្លែងកាលពីម្សិលមិញថា ចំពោះមុខនេះក្រសួងអប់រំ បន្តតាមដាន និងវាយតម្លៃស្ថានការណ៍ជាក់ស្តែងនៃកូវីដ ១៩ ប្រកបដោយការយកចិត្តទុកដាក់កម្រិតខ្ពស់បំផុតស្របនឹងកិច្ចសហការជាមួយក្រសួងសុខាភិបាល និងភាគីពាក់ព័ន្ធ។
លោកថ្លែងថា៖ «ក្រសួងនឹងជម្រាបបន្ថែមជូនសាធារណជននៅពេលមានការវិវត្តថ្មី។ ជារួមអង្គភាពក្រោមឱវាទក្រសួងអប់រំដែលពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ បានចាត់ចែងអនុវត្តវិធានការតាមការណែនាំរបស់ក្រសួងសុខាភិបាលយ៉ាងខ្ជាប់ខ្ជួន។ លទ្ធផល តេស្តកូវីដ១៩ របស់អ្នកពាក់ព័ន្ធស្ថិតក្នុងការផ្សព្វផ្សាយរបស់ក្រសួងសុខាភិបាល»។
លោកបានបញ្ជាក់ថា៖ «ចំពោះសាលារៀនពាក់ព័ន្ធក្រសួងអប់រំ យុវជន និងកីឡាបានផ្អាកដំណើរការសិក្សាក្នុងថ្នាក់រៀនជាបណ្តោះអាសន្ន និងបន្តការសិក្សាតាមអនឡាញតាមទិដ្ឋភាពជាក់ស្តែង»។
លោក ចាន់ ថា អភិបាលរងខេត្ដព្រៃវែងបានថ្លែងកាលពីម្សិលមិញថា ខេត្ដព្រៃវែងមានការពាក់ព័ន្ធនឹងករណីព្រឹត្ដិការណ៍ឆ្លងកូវីដ ២០ កុម្ភៈ ដោយប្រយោលតាមរយៈស្ដ្រីម្នាក់នៅភ្នំពេញបានទៅចូលរួមពិធីមង្គលការនៅភូមិទួលសង្កែទទឹង ឃុំជាច ស្រុកកំចាយមារ កាលពីថ្ងៃទី ១៧ ខែកុម្ភៈ ហើយស្ដ្រីរូបនេះមានប្ដីជាជនជាតិចិនមានវិជ្ជមានកូវីដ ១៩ និងបានធ្វើតេស្តឃើញវិជ្ជមានកូវីដ ១៩ នៅថ្ងៃទី ២១ ខែកុម្ភៈ ។
លោកថ្លែងថា តាមរយៈករណីពាក់ព័ន្ធដោយប្រយោលជាមួយស្ដ្រីរូបនេះក្នុងខេត្ដព្រៃវែងមានអ្នកពាក់ព័ន្ធចំនួន ៤១ នាក់ បានត្រូវបានអាជ្ញាធរខេត្ដស្រាវជ្រាវរកឃើញ និងយកសំណាកទៅពិនិត្យ និងនាំយកទៅធ្វើចត្តាឡីស័ករួចហើយ។
លោកថ្លែងថា៖ «អ្នកពាក់ព័ន្ធដោយប្រយោលម្នាក់ជាគ្រូបង្រៀន យើងក៏បាននាំយកគាត់មកធ្វើចត្ដាឡីស័ក និងយកសំណាកមកពិនិត្យរួចហើយ ប៉ុន្ដែលទ្ធផលអវិជ្ជមាន សាលាបឋមសិក្សាដែលពាក់ព័ន្ធមួយ យើងបានផ្អាកបណ្ដោះអាសន្ន។ យើងកំពុងបន្តធ្វើចត្ដាឡីស័កចំពោះអ្នកពាក់ព័ន្ធទាំងអស់ ហើយលទ្ធផលតេស្តជំហានដំបូងគឺអវិជ្ជមានទាំងអស់»។
ក្រសួងសុខាភិបាលកាលពីម្សិលមិញបានប្រកាសថា នៅថ្ងៃទី ២៣ ខែកុម្ភៈ ស្ដ្រីជនជាតិចិន ២ នាក់ ធ្វើតេស្តឃើញវិជ្ជមានកូវីដ ១៩ ពួកគេកំពុងត្រូវបានដាក់ឱ្យសម្រាកព្យាបាលនៅមន្ទីរពេទ្យបង្អែកខេត្ដព្រះសីហនុ។
ពាក់ព័ន្ធនឹងករណីស្ដ្រីជនជាតិចិនទាំង ២ នាក់នេះ រដ្ឋបាលខេត្ដព្រះសីហនុកាលពីម្សិលមិញបានអំពាវនាវឱ្យប្រជាពលរដ្ឋ ដែលធ្លាប់ចេញចូលនៅសណ្ឋាគារជីនប៉ីទាំង ៣ សាខា និងអគារស្នាក់នៅរួមរបស់បុគ្គលិកក្រុមហ៊ុនជីនប៉ីចាប់ពីយប់ថ្ងៃទី ១៦ ខែកុម្ភៈ និងសណ្ឋាគារហ័ងហ្គ័នជាយី ក្នុងក្រុងព្រះសីហនុ ចាប់ពីយប់ថ្ងៃទី ២០ ខែកុម្ភៈ ដែរ ឬដឹងថា បានប៉ះពាល់ជាមួយអ្នកជំងឺកូវីដ១៩ ដែលជាជនជាតិចិនទាំង ២ នាក់នេះត្រូវមកធ្វើតេស្តរកមេរោគកូវីដ ១៩។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុថ្លែងថា៖ «ពាក់ព័ន្ធជាមួយសាលារៀន និងកន្លែងផ្សេងទៀតគឺមិនទាន់មានគោលការណ៍ទេ។ ជាក់ស្ដែងចំពោះមុខអ្វីដែលយើងត្រូវធ្វើ គឺយើងប្រមូល ស្វែងរកអ្នកដែលមានការប៉ះពាល់ផ្ទាល់ និងប្រយោល»៕