ភ្នំពេញៈ បុគ្គល ៤ រូប ដែលមានបញ្ញាខ្ពស់ ឬទេពកោសល្យពិសេសត្រូវបានក្រសួងអប់រំ យុវជន និងកីឡា កត់ត្រាចំណាំទុកដើម្បីរៀបចំការប្រកាសផ្តល់ឱ្យនូវការអប់រំពិសេសសម្រាប់ពួកគេ ស្របពេលលោកនាយករដ្ឋមន្ត្រីក៏បានហៅយុវជនម្នាក់ដែលមានបញ្ញាខ្ពស់ឱ្យមកជួបលោកនៅគេហដ្ឋាន ខណៈសង្គមស៊ីវិលក៏ស្នើសុំចង់ឱ្យរដ្ឋផ្តល់ការគាំទ្រផ្សេងៗ និងការយកចិត្តទុកដាក់ពិសេសចំពោះបុគ្គលទាំងនោះ។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា ប្រាប់ភ្នំពេញប៉ុស្តិ៍កាលពីថ្ងៃទី ៥ កញ្ញា ថា ចំពោះអ្នកសិក្សាពូកែដែលមានទេពកោសល្យ ឬបញ្ញាខ្ពស់មកដល់ពេលនេះយោងទៅលើរបាយការណ៍របស់នាយកដ្ឋានអប់រំពិសេសរបស់ក្រសួងអប់រំ គឺមានការកត់ត្រាទៅលើបុគ្គល ៤ រូប។ ទី១ កុមារា ហឺទៀង គឹមហុង អាយុ ៩ ឆ្នាំ ទី២ កុមារី ប៊ីបាន់លក្ស្មី អាយុ ៥ ឆ្នាំ ទី៣ កុមារា ធុច សាលិ អាយុ ១៥ ឆ្នាំ ដែលចេះភាសាបរទេសរហូតដល់ ១៥ ភាសា ហើយនិងថ្មីៗនេះ និស្សិត ហុង ភារិន អាយុ ២៣ ឆ្នាំ។
លោក សុវាចា បញ្ជាក់ថា៖ «មកដល់ពេលនេះក្រសួងអប់រំ យុវជន និងកីឡា បាននិងកំពុងរៀបចំប្រកាសស្តីពីការអប់រំពិសេសសម្រាប់អ្នកសិក្សាពូកែ ដែលមានទេពកោសល្យ និងឬបញ្ញាខ្ពស់ ដោយយើងពិនិត្យទៅលើលទ្ធភាពជាក់ស្តែង ដែលក្រសួងមានតួនាទី និងភារកិច្ចត្រូវបំពេញជូនការអប់រំពិសេសសម្រាប់ក្រុមគោលដៅមួយនេះ»។
លោកបន្តថា ខ្លឹមសារប្រកាសនេះមានគោលបំណងលើកកម្ពស់ការអប់រំសម្រាប់អ្នកសិក្សាពូកែ ដែលមានទេពកោសល្យ និងឬបញ្ញាខ្ពស់ ឱ្យមានប្រសិទ្ធភាពប្រកបដោយគុណភាព សមធម៌ និងបរិយាប័ន្ន។
លោកបន្ថែមថា បើក្រឡេកមើលទិដ្ឋភាពសិស្សពូកែ ក្រសួងអប់រំបានធ្វើការងារសិស្សពូកែថ្នាក់ជាតិជាយូរមកហើយដែលមាន ៣ មុខវិជ្ជា គឺអក្សរសាស្ត្រខ្មែរ គណិតវិទ្យា និងរូបវិទ្យា។ ក្នុង ១ ឆ្នាំ ក្រសួងជ្រើសរើសយក ១០ នាក់ក្នុងមុខវិជ្ជានីមួយៗ ពីលេខ ១ ដល់លេខ ១០ សម្រាប់ថ្នាក់ទី ៩ និងថ្នាក់ទី ១២។ សរុបទៅមាន ៦០ នាក់ ក្នុងមួយឆ្នាំសិក្សា។
ថ្មីៗនេះ និស្សិតអាហារូបករណ៍មួយរូបឈ្មោះ ហុង ភារិន វ័យ ២៣ ឆ្នាំ ដែលកំពុងសិក្សានៅប្រទេស ថៃ មានទេពកោសល្យជាអច្ឆរិយក្នុងការចងចាំ។ យុវជនរូបនេះអាចចងចាំតួលេខ ៣០ ខ្ទង់តែក្នុងរយៈពេល ៣០ វិនាទី។ ភារិន អាចចងចាំលេខរៀងសន្លឹកបៀទាំង ៥២ សន្លឹក និងអាចចងចាំប្រតិទិនរហូតដល់ទៅ ៧០០ ឆ្នាំ ខណៈយុវជនរូបនេះបានចូលរួមបង្ហាញសមត្ថភាពក្នុងកម្មវិធី “Super 100” របស់ទូរទស្សន៍ថៃមួយឈ្មោះ Workpoint។
ដោយឃើញភាពប៉ិនប្រសប់របស់ ហុង ភារិន កាលពីថ្ងៃសុក្រលោកនាយករដ្ឋមន្ត្រី ហ៊ុន សែន បានហៅយុវជនរូបនេះ និងបងប្រុសរបស់គាត់ ហុង ភារុន ឱ្យមកជួបលោកនៅគេហដ្ឋាន។
លោក ហ៊ុន សែន បានប្រកាសក្នុងហ្វេសប៊ុកក្នុងថ្ងៃនោះថា ការជួបយុវជន ហុង ភារិន គឺដើម្បីចង់ឈ្វេងយល់ពីបំណង និងគោលដៅរបស់ ហុង ភារិន ដើម្បីងាយស្រួលដល់ការជួយរបស់លោកឱ្យស្របជាមួយបំណងដែលយុវជនរូបនេះចង់ទៅ និងចង់បាន។
លោក ហ៊ុន សែន ប្រកាសថា៖ «ខ្ញុំក៏បានជួយដល់ ហុង ភារុន ដែលរៀនចប់បរិញ្ញាបត្រ និងកំពុងធ្វើការនៅក្រសួងសេដ្ឋកិច្ច និងហិរញ្ញវត្ថុផ្នែកពន្ធដារឱ្យបន្តរៀនយកបរិញ្ញាបត្រជាន់ខ្ពស់តទៅទៀត។ ជូនពរកូនប្រុសទាំង ២ ជួបតែសេចក្តីសុខ និងសម្រេចនូវបំណងប្រាថ្នាដែលកូនចង់បាន»។
អង្គការសង្គមស៊ីវិលក៏បានលើកឡើងថា រដ្ឋគួរតែផ្តល់ការគាំទ្រផ្សេងៗដល់មនុស្សដែលមានសមត្ថភាព និងទេពកោសល្យពិសេស ទាំងការអភិវឌ្ឍចំណេះដឹងដើម្បីឱ្យពួកគាត់មានលទ្ធភាពស្រាវជ្រាវ និងបញ្ចេញគំនិតថ្មីៗ ការរកឃើញថ្មីៗ ឬការយល់ឃើញថ្មីៗ។ បើមិនដូច្នេះទេ សមត្ថភាពរបស់អ្នកដែលមានទេពកោសល្យពូកែៗទាំងនេះនឹងអាចចុះថយ។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាពបានប្រាប់ភ្នំពេញប៉ុស្តិ៍កាលពីថ្ងៃទី ៥ កញ្ញាថាចំពោះយុវជនដែលមានទេពកោសល្យខ្ពស់ មិនត្រឹមតែក្រសួងអប់រំនោះទេ ដែលគួរតែយកចិត្តទុកដាក់ គឺរដ្ឋទាំងមូល ពីព្រោះមនុស្សមានសមត្ថភាពបែបនេះមិនងាយរកបាននោះទេ។ លោកថា រដ្ឋមានការខ្វះចន្លោះក្នុងការស្វែងរក ឬក៏មិនសូវចាប់អារម្មណ៍ទៅលើចំណុចពិសេសរបស់យុវជនកម្ពុជាដែលនេះគឺជាបញ្ហា។
លោកបន្តថាសូម្បីតែក្មេងប្រុសម្នាក់ឈ្មោះ ធុច សាលិ នៅខេត្តសៀមរាប ដែលមានទេពកោសល្យចេះនិយាយបានច្រើនភាសាកាលពីឆ្នាំ ២០១៨ ក៏រដ្ឋមិនបានដឹងនោះដែរ។ ប៉ុន្តែបែរជាត្រូវបានចាប់អារម្មណ៍ ឬបានដឹងចេញពីមគ្គុទេ្ទសក៍ទេសចរណ៍បរទេសទៅវិញ។
លោក យង់ គិមអេង ថ្លែងថា៖ «នេះជារឿងសំខាន់។ គួរតែរក្សាគាត់ដើម្បីឱ្យគាត់បន្តជំនាញពិសេសរបស់គាត់បានវែងឆ្ងាយទៅទៀត។ ប្រសិនបើគាត់ជួបស្ថានការណ៍ដែលវាតានតឹង ដែលវាពិបាក អាហ្នឹងអាចធ្វើឱ្យគាត់អាចថមថយនូវសមត្ថភាពពិសេសរបស់គាត់ហ្នឹងដែរ។ អ៊ីចឹងគួរតែមានការយកចិត្តទុកដាក់ពិសេសទៅលើគាត់»។
លោកបានបញ្ជាក់ថា ក្នុងការស្វែងរកអ្នកដែលមានទេពកោសល្យគឺត្រូវពឹងផ្អែកលើអាជ្ញាធរពាក់ព័ន្ធផ្សេងៗ។ ស្ថាប័នពាក់ព័ន្ធត្រូវតែមានការចាប់អារម្មណ៍ពីបញ្ហានេះ ហើយរដ្ឋគួរតែធ្វើយ៉ាងណាឱ្យបានដឹងពីបញ្ហានេះផងដែរ។
លោក ស ម៉ូរី អនុប្រធានបណ្តាញយុវជនកម្ពុជាក៏បានលើកឡើងថ្ងៃទី ៥ កញ្ញា ដែរថា ដើម្បីលើកទឹកចិត្តដល់យុវជនដែលមានសមត្ថភាពបែបនេះ ក្រសួងអប់រំគួរតែធ្វើការពិភាក្សាដោយផ្ទាល់ជាមួយយុវជនណាដែលមានសមត្ថភាពអច្ឆរិយ និងលេចធ្លោ។ ការធ្វើបែបនេះគឺដើម្បីសិក្សាបន្ថែមទៀតអំពីទេពកោសល្យ ជំនាញ និងអ្វីដែលជាតម្រូវការរបស់ពួកគាត់ ដោយជួយគាំទ្រពួកគាត់បន្ថែមដើម្បីពង្រីកសមត្ថភាព និងជំនាញពីធម្មជាតិដែលពួកគាត់មានស្រាប់សម្រាប់បម្រើសង្គមកម្ពុជា។
លោកថ្លែងថា៖ «ប្រសិនបើយើងឃើញមនុស្សដែលមានសមត្ថភាពពូកែៗហើយ យើងមិនយកចិត្តទុកដាក់ដល់គាត់ ខ្វះការគាំទ្រទៅដល់គាត់ បើសិនក្នុងស្ថានភាពបែបហ្នឹង យើងអត់បានពង្រឹងធនធានមនុស្សដែលមានស្រាប់ ឬក៏មនុស្សដែលមានទេពកោសល្យស្រាប់។ ខ្ញុំគិតថា វាជារឿងមួយដែលគួរឱ្យសោកស្តាយ»៕