ភ្នំពេញៈ ក្រសួងអប់រំយុវជន និងកីទ្បា និងយូនីសេហ្វបានចេញផ្សាយនូវកម្មវិធីនិទានរឿងថ្មីមួយមានឈ្មោះថា «តីតី និទានរឿង» ដើម្បីលើកកម្ពស់អក្ខរកម្ម និងលើកទឹកចិត្តកុមារឱ្យអានដោយក្រសួងបញ្ជាក់ថា កម្មវិធីនិទានរឿងថ្មីនេះនឹងផ្តល់នូវក្តីសង្ឃឹម និងក្តីរីករាយដល់កុមារ និងគ្រួសារនៅក្នុងដំណាក់កាលនៃការរាតត្បាតនៃជំងឺកូវីដ ១៩ ដែលកុមារទាំងអស់ត្រូវបានតម្រូវឱ្យសិក្សានៅតាមផ្ទះ។
នេះបើតាមសេចក្តីប្រកាសព័ត៌មានរួមរវាងក្រសួងអប់រំ និងយូនីសេហ្វដែលបានផ្សព្វផ្សាយកម្មវិធីនិទានរឿងថ្មី សម្រាប់កុមារនេះកាលពីថ្ងៃទី ១៣ ខែមិថុនា។ សេចក្ដីប្រកាសព័ត៌មានឲ្យដឹងថា កម្មវិធីនិទានរឿងថ្មីនេះជាខ្សែវីដេអូថតទុកជាមុនមានចំនួន ១២ វគ្គដែលមួយវគ្គមានរយៈពេល ៣០ នាទី ត្រូវបានផលិតទ្បើង ដើម្បីអប់រំរួមទាំងផ្តល់ការកម្សាន្តដល់កុមារ និងគ្រួសារ។ ក្នុងវគ្គនីមួយៗក៏មានបញ្ចូលនូវកម្មវិធីសំណួរ-ចម្លើយជាមួយអ្នករៀបចំកម្មវិធីរបស់យូនីសេហ្វ ដែលទស្សនិកជនអាចសួរសំណួរទាក់ទងនឹងការការពារខ្លួន និងវិធានការបង្ការពីជំងឺកូវីដ ១៩។ កម្មវិធីនេះនឹងមានផ្សព្វផ្សាយនៅប៉ុស្តិ៍ទូរទស្សន៍ ទទក២ ទំព័រហ្វេសប៊ុក ក្រសួងអប់រំ គណៈកម្មាធិការជាតិគាំពារ និងអភិវឌ្ឍន៍កុមារតូច និងយូនីសេហ្វផងដែរ។
សេចក្ដីប្រកាសដដែលថា រឿងនិទានត្រូវបានអានដោយតួអង្គកំប្លុកកំប្លែង ២ រូប និងដកស្រង់ចេញពីសៀវភៅរឿងដែលបោះពុម្ពដោយអង្គការស៊ីប៉ា ដែលជាអង្គការធ្វើការជាដៃគូយ៉ាងជិតស្និទ្ធជាមួយក្រសួងអប់រំ និងយូនីសេហ្វដែលបាននិងកំពុងផលិតនូវសៀវភៅអប់រំល្អៗសម្រាប់កុមារកម្ពុជា ដើម្បីលើកកម្ពស់សមត្ថភាពអំណាន និងចំណេះដឹងរបស់ពួកគេផងដែរ។
លោក ហង់ជួន ណារ៉ុន រដ្ឋមន្ត្រីក្រសួងអប់រំបានថ្លែងក្នុងពេលផ្សព្វផ្សាយកម្មវិធីតីតីនិទានរឿងនេះ និងបានសម្តែងនូវសេចក្តីរីករាយចំពោះការផលិតកម្មវិធីដែលមានភាពច្នៃប្រឌិត និងលើកទឹកចិត្ត ដើម្បីជួយដល់កុមារកម្ពុជាក្នុងការរៀនពីចម្ងាយ។
លោកថា៖ «ក្រសួងរបស់យើងខ្ញុំមានសេចក្តីសោមនស្ស នឹងធ្វើការចាក់ផ្សាយនូវកម្មវិធីនិទានរឿងថ្មីនេះ សម្រាប់សេចក្តីរីករាយរបស់កុមារ និងគ្រួសារតាមរយៈប្រព័ន្ធរៀនសូត្រអនទ្បាញរបស់យើង ក៏ដូចជាតាមរយៈប៉ុស្តិ៍ទូរទស្សន៍ ទទក២»។ លោកឲ្យដឹងថា ក្រសួងអប់រំជាមួយនឹងការគាំទ្រពីយូនីសេហ្វកំពុងផ្តល់ឱកាសសិក្សាពីចម្ងាយលើមុខវិជ្ជាសំខាន់ៗ ទៅដល់សិស្សានុសិស្សចាប់តាំងពីថ្នាក់មត្តេយ្យរហូតដល់មធ្យមសិក្សា ដែលនៅក្នុងនោះរួមមានការសិក្សាតាមប្រព័ន្ធអនទ្បាញ ទូរទស្សន៍ និងវិទ្យុជាដើម។
ប្រធានផ្នែកអប់រំ យូនីសេហ្វកម្ពុជាលោកស្រី ខេធឺរីន ប៊ឺនណេត ថ្លែងថា៖ «កម្មវិធីតីតីនិទានរឿង ក៏ដូចជាកម្មវិធីរៀនសូត្រពីចម្ងាយសំខាន់ៗ និងមានលក្ខណៈចម្រុះដទៃទៀតដែលយូនីសេហ្វកំពុងគាំទ្រក្រសួងអប់រំគឺមានសារៈសំខាន់ក្នុងការលើកកម្ពស់សមភាព និងគណនេយ្យភាពក្នុងការផ្តល់សេវាអប់រំ ដើម្បីឱ្យកុមារដែលងាយរងគ្រោះបំផុតនៅតែមានឱកាសបន្តរៀនសូត្របាន»។ លោកស្រីបន្តថា ដើម្បីធានាថា កុមារគ្រប់រូប និងគ្រួសារ បានដឹងនិងអាចរៀនសូត្រពីកម្មវិធី តីតីនិទានរឿងនេះយូនីសេហ្វសូមលើកទឹកចិត្តទស្សនិកជនឱ្យចូលរួមចែករំលែកអំពីសៀវភៅដែលខ្លួនពេញចិត្ត នៅតាមប្រព័ន្ធបណ្តាញសង្គមដោយប្រើប្រាស់ hashtag #TeyTeyNitean៕