.jpg)
យុវសិស្សនៅភ្នំពេញពេលចូលប្រឡងបាក់ឌុបឆ្នាំមុន។ ភ្នំពេញ ប៉ុសិ៍្ត
ភ្នំពេញៈ ក្រសួងអប់រំយុវជន និងកីឡា បានចេញប្រកាសកាលពីថ្ងៃទី ៧ កក្កដា ថា ក្រសួងនឹងកាត់បន្ថយមុខវិជ្ជាប្រឡងពី ១០ មុខវិជ្ជាមកនៅត្រឹម ៧ មុខវិជ្ជាដដែល សម្រាប់ការប្រឡងសញ្ញាបត្រមធ្យមសិក្សាទុតិយភូមិឬបាក់ឌុបដែលត្រូវធ្វើនៅថ្ងៃទី ១៩ និងទី ២០ ខែសីហាខាងមុខនេះដើម្បីបន្ថយបន្ទុកនិងខ្វល់ខ្វាយរបស់បេក្ខជនពីការប្រឡង ២ ថ្ងៃកន្លះ មកនៅត្រឹម ២ ថ្ងៃ។
ក្រសួងអប់រំបានប្រកាសក្នុងហ្វេសប៊ុកថា៖ «ចំណុចនេះមិនបានធ្វើឲ្យប៉ះពាល់ដល់គុណភាពនៃការសិក្សាទេ ដោយសិស្សទាំងអស់បានពង្រឹងសមត្ថភាពតាមរយៈការប្រឡងឆមាសនូវគ្រប់មុខវិជ្ជារួចហើយ»។
លោក រស់ សុវាចា អ្នកនាំពាក្យក្រសួងអប់រំ បានប្រាប់ភ្នំពេញប៉ុស្តិ៍ថា ក្រសួងអប់រំយុវជន និងកីឡាមានចេតនាពង្រឹងគុណភាពរៀននិងបង្រៀន ជាពិសេសគឺការប្រឡងបាក់ឌុប។ ការបន្ថយចំនួនមុខវិជ្ជាប្រឡងនេះគឺនឹងអាច [បន្ទន់] បរិយាកាសសិក្សា និងការត្រៀមខ្លួនរបស់សិស្សានុសិស្ស។គុណភាពប្រឡងនឹងនៅមានទម្ងន់អាស្រ័យលើការខំប្រឹងរៀន និងការត្រៀមរបស់សិស្សដោយជឿលើសមត្ថភាពខ្លួនផ្ទាល់ដោយមិនពឹងលើបរិយាកាសក្រៅ។
លោក សុវាចា បានបញ្ជាក់ថា៖ «ស្វ័យសិក្សាយើងមានទម្ងន់ក្នុងការរៀនត្រៀម ដើម្បីយកលទ្ធផលវិជ្ជមានទៅតាមរៀងៗខ្លួនរបស់ពួកគាត់ (សិស្ស)»។
លោកបានបន្ថែមថា តាំងពីកំណែទម្រង់ក្នុងឆ្នាំ ២០១៤ មកការរៀនគឺមាន ១០ មុខវិជ្ជា តែការប្រឡងមានតែ ៧ មុខវិជ្ជា។
លោកថា៖ «មិនមែនលើកទី១ ដែលយើងទើបតែកាត់ហ្នឹងទេ គឺតាំងពីឆ្នាំ ២០១៤ មក»។
បើតាមក្រសួងនេះសម្រាប់សិស្សដែលប្រឡងវិញ្ញាសាថ្នាក់វិទ្យាសាស្ត្រសង្គម ៣ មុខវិជ្ជា នឹងត្រូវកាត់ចេញដែលមាន ជីវវិទ្យា គីមីវិទ្យា និងរូបវិទ្យា។ ចំពោះសិស្សប្រឡងវិញ្ញាសាថ្នាក់វិទ្យាសាស្ត្រវិញ មុខវិជ្ជា ៣ ដែលត្រូវកាត់ចេញមាន ភូមិវិទ្យា សីលធម៌ ពលរដ្ឋវិជ្ជា ផែនដី និងបរិស្ថានវិទ្យា។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ បានប្រាប់ភ្នំពេញប៉ុស្តិ៍ថា ការកាត់បន្ថយមុខវិជ្ជានេះធ្វើឱ្យគ្រូបង្រៀនដែលមិនមានមុខវិជ្ជាប្រឡងមិនទទួលបានការគោរពពីសិស្ស ហើយសិស្សក៏មិនចង់រៀនមុខវិជ្ជាដែលមិនប្រឡងដែរ។
លោកស្រី បញ្ជាក់ថា៖ «នេះជារឿងមួយដែលសំខាន់។ ប៉ុន្តែចំពោះសិស្សានុសិស្សគាត់សប្បាយចិត្តទេ?នៅពេលដែលប្រឡងតែ ៧ មុខ ព្រោះអីធ្វើឱ្យគាត់ថា ងាយស្រួលក្នុងការទន្ទេញមេរៀន ឬក៏ងាយស្រួលក្នុងការចាប់យកតែ ៧ មុខ។ ប្រសិនបើក្រសួងគិតថា ចង់ ៧ មុខ ត្រូវកាត់បន្ថយនូវម៉ោងសិក្សាក៏មានតែ ៧ មុខដែរ»។ អ៊ីចឹងនេះជាអ្វីដែលជាសារលោកគ្រូអ្នកគ្រូយើងកំពុងតែមិនពេញចិត្ត»។
លោក នៅ ចាន់មុន្នី ជាគ្រូបង្រៀនមុខវិជ្ជាគីមីវិទ្យានៅវិទ្យាល័យ ហ៊ុន សែន បរិបូណ៌ ខេត្តកំពង់ឆ្នាំងបានថ្លែងថា លោកចង់ឱ្យមានការប្រឡង ១០ មុខវិជ្ជាដូចមុន។ បើមិនដូច្នោះទេសិស្សត្រូវបោះបង់ការរៀនមុខវិជ្ជាខ្លះ។
លោក មុន្នី ថា៖ «អ៊ីចឹងឧទាហរណ៍ ថ្នាក់វិទ្យាសាស្ត្រអ៊ីចឹង មុខវិជ្ជាភូមិ មុខវិជ្ជាផែនដី មុខវិជ្ជាសីលធម៌ គេអត់ប្រឡង។ អ៊ីចឹងសិស្សវាអត់រៀនហ្មងម៉ោងហ្នឹង។ វាគិតអ៊ីចឹង។ ទី២ ដូចជាមុខវិជ្ជាសង្គមអ៊ីចឹង វាអត់ប្រឡងគីមី អត់ប្រឡងរូបវិទ្យា អត់ប្រឡងជីវៈអ៊ីចឹង។ អ៊ីចឹង វាគិតថាមិនដឹងវារៀនធ្វើអីផងមុខវិជ្ជាហ្នឹង។ អ៊ីចឹងដល់ម៉ោងវាអត់សូវចង់រៀន។ ទៅផ្ទះវិញ វាអត់សូវមើល អត់សូវអីអ៊ីចឹង ហើយការរៀនរបស់សិស្សខ្សោយ»។
ទោះយ៉ាងណា យុវសិស្ស ឆិលឆាយលាវ អាយុ ១៩ ឆ្នាំ រៀននៅវិទ្យាល័យ ហ៊ុន សែន បរិបូណ៌ ខេត្តកំពង់ឆ្នាំង បានគាំទ្រការបន្ថយមុខវិជ្ជាប្រឡងនេះព្រោះមិនផ្តោតខ្លាំងលើមុខវិជ្ជាទាំង ១០ មុខដូចមុន។
យុវសិស្សរូបនេះ បញ្ជាក់ថា៖ «យើងអត់សូវគិតច្រើន ហើយយើងក៏អត់សូវចំណាយពេលច្រើន។បើប្រឡង ១០ មុខ ខ្ញុំត្រូវរៀនមុខវិជ្ជាច្រើន ប៉ុន្តែបើប្រឡង ៧ មុខអ៊ីចឹង ខ្ញុំត្រូវរៀនមុខវិជ្ជាណាគោល»។
បើតាមការប្រកាសរបស់ក្រសួងអប់រំកាលពីថ្ងៃទី ៣ កក្កដា ការប្រឡងបាក់ឌុបឆ្នាំនេះ មានបេក្ខជនដាក់ពាក្យសរុប ១១៩ ២១៧ នាក់ (ស្រី ៦១ ០៣១នាក់)។ សំណើមណ្ឌលប្រឡងមាន ២០២ មណ្ឌល និងសំណើបន្ទប់ប្រឡងមាន ៤ ៨០៩ បន្ទប់។
នៅពេលសួរពីការចូលរួមសង្កេតការណ៍ការប្រឡងបាក់ឌុបពីអង្គភាព (ACU) លោក សុវាចា បានបញ្ជាក់ថា ក្រសួងអប់រំនឹងជម្រាបជូនខ្លឹមសារនៅក្នុងសន្និសីទកាសែតនាពេលឆាប់ៗនេះដូចដែលធ្លាប់ធ្វើជារៀងរាល់ឆ្នាំដែរ។
លោក ឱម យ៉ិនទៀង ប្រធានអង្គភាព (ACU) មិនអាចទាក់ទងសុំការបញ្ជាក់ពីការចូលរួមសង្កេតការណ៍ការប្រឡងបាក់ឌុបនៅឆ្នាំនេះបានទេ កាលពីម្សិលមិញ៕
