ភ្នំពេញៈ ក្រសួងអប់រំ យុវជន និងកីឡា បានស្នើឱ្យគ្រឹះស្ថានសិក្សាទាំងអស់អនុវត្តម៉ោងបង្រៀន និងរៀននៅតាមពេលវេលាធម្មតាឡើងវិញ បន្ទាប់ពីផ្លាស់ប្ដូរមួយរយៈដើម្បីការពារសុខភាព ខណៈអាកាសធាតុក្ដៅខ្លាំងនារដូវប្រាំងនាពេលកន្លងទៅ។ នេះបើតាមលិខិតក្រសួងអប់រំចេញផ្សាយកាលពីថ្ងៃពុធ។
លិខិតក្រសួងអប់រំដែលចុះហត្ថលេខាដោយ លោករដ្ឋមន្ត្រី ហង់ ជួនណារ៉ុន បានប្រាប់ដល់ប្រធានមន្ទីរអប់រំ យុវជន និងកីឡារាជធានី-ខេត្ដ ទាំងអស់ឲ្យអនុវត្ដម៉ោងបង្រៀន និងរៀនជាប្រក្រតីឡើងវិញ ដោយសំអាងថា លែងប្រឈមនឹងអាកាសធាតុក្ដៅទៀតហើយ។
តាមរយៈលិខិតនេះ បានបញ្ជាក់ឲ្យដឹងថា៖ «រដូវប្រាំងអាកាសធាតុក្ដៅហួតហែងបានកន្លងផុតទៅ រដូវវស្សាបានចូលមកដល់ធ្វើឱ្យអាកាសធាតុផ្លាស់ប្ដូរមកជាប្រក្រតីឡើងវិញ។ ដើម្បីឈានទៅអនុវត្ដម៉ោងបង្រៀននិងរៀនឡើងវិញ ក្រសួងសូមណែនាំដល់គ្រប់គ្រឹះស្ថានសិក្សាទាំងអស់ត្រូវអនុវត្ដម៉ោងពេលចូលនិងចេញជាធម្មតាវិញ»។
ក្រសួងអប់រំបានបញ្ជាក់ថា ពេលព្រឹកចូលរៀននៅម៉ោង ៧ ចេញនៅម៉ោង ១១:៣០ និងពេលសៀលចូលរៀនម៉ោង ១៣ និងចេញម៉ោង ១៧ វិញ។
កាលពីថ្ងៃទី ២៥ ខែ មេសា ក្រសួងអប់រំ បានប្រកាសកាត់បន្ថយម៉ោងសិក្សារបស់សិស្សដោយឱ្យចូលរៀនពេលព្រឹកនៅម៉ោង ៧ ចេញនៅម៉ោង ១០:៣០ និងពេលរសៀលចូលរៀននៅម៉ោង ១៣:៣០ និងចេញនៅម៉ោង ១៧ ។
ការសម្រេចកាត់បន្ថយម៉ោងសិក្សារបស់ក្រសួងអប់រំកាលពីខែមេសាកន្លងទៅ គឺដើម្បីបង្ការទប់ស្កាត់ហានិភ័យ និងចៀសវាងជំងឺផ្សេងៗដែលអាចធ្វើឱ្យប៉ះពាល់ដល់សុខភាពរបស់សិស្ស និងគ្រូបង្រៀនខណៈសីតុណ្ហភាពនៅពេលនោះបានកើនឡើងខ្លាំងលើសពី ៤០ អង្សាសេ។
លោក ពៅ សម្បត្ដិ ប្រធានមន្ទីរអប់រំ យុវជន និងកីឡា ខេត្ដត្បូងឃ្មុំ បានថ្លែងកាលពីម្សិលមិញថា លោកបានប្រាប់ទៅនាយកសាលាទាំងអស់ឱ្យអនុវត្ដម៉ោងចូលរៀននិងបង្រៀនតាមធម្មតាវិញអស់ហើយ។
លោកបានបន្ដថា៖ «សម្រាប់ខេត្ដខ្ញុំមកទល់ពេលឥឡូវនេះយើងបានអនុវត្ដម៉ោងរៀននិងបង្រៀនទៅតាមពេលធម្មតាវិញហើយ។ ក្នុងអំឡុងឆ្លងកាត់រដូវក្ដៅកន្លងទៅនេះគ្រូនិងសិស្សនៅខេត្ដខ្ញុំ មិនមានរងផលប៉ះពាល់អ្វីពីបញ្ហាអាកាសធាតុនេះទេ»។
ប៉ុន្ដែចំពោះបញ្ហាអាកាសធាតុប្រែប្រួលនេះ លោក សម្បត្ដិ បានប្រាប់ថា ទទួលបានបទពិសោធដើម្បីត្រៀមលក្ខណៈប្រឈមនឹងអាកាសធាតុក្ដៅបែបនេះនៅឆ្នាំក្រោយៗទៀត។
លោកបានបន្ដថា៖ «សម្រាប់ឆ្នាំៗក្រោយយើងណែនាំដល់សាលាទាំងអស់ឱ្យត្រៀមបម្រុងក្នុងការផ្សព្វផ្សាយ ទាក់ទងនឹងការថែទាំសុខភាពដល់សិស្សានុសិស្សដូចជា ការបរិភោគទឹកឱ្យបានច្រើន រៀបចំបន្ទប់សិក្សាឱ្យមានបរិយាកាសល្អឱ្យសិស្សា-នុសិស្សរៀនសូត្រ ជាពិសេសយើងនាំគ្នារៀបចំបរិស្ថានសាលារៀនឱ្យមានទីតាំងម្លប់ និងមានភាពបៃតងដើម្បីកាត់បន្ថយបរិយាកាសក្ដៅខ្លាំង»។
លោក រស់ សុវាចា អ្នកនាំពាក្យក្រសួងអប់រំបានថ្លែងកាលពីម្សិលមិញថា នៅក្នុងរដូវក្ដៅកន្លងទៅនេះ មិនមានប៉ះពាល់សុខភាពអ្វីគួរឱ្យគត់សម្គាល់ដល់សិស្សានុសិស្ស លោកគ្រូ អ្នកគ្រូ និងបុគ្គលិកអប់រំនោះទេ។
លោកបានបន្តថា៖ «ក្រសួងអប់រំបានតាមដានលើករណីនេះ ដោយការយកចិត្ដទុកដាក់ខ្ពស់ជាប្រចាំ។ ជាពិសេសក្រសួងបានប្រើយន្ដការដើម្បីដោះស្រាយតាមរយៈក្រុមការងារដោះស្រាយគ្រោះមហន្ដរាយរបស់ក្រសួងអប់រំ»៕