.jpg)
មន្ត្រីសុខាភិបាលកំពុងបាញ់ថ្នាំសម្លាប់មេរោគនៅសាលាឯកជនមួយក្នុងរាជធានីភ្នំពេញ។ រូបថត ហ្វេសប៊ុក
ភ្នំពេញៈ ក្រសួងអប់រំ យុវជន និងកីឡាបានអំពាវនាវដល់គណៈគ្រប់គ្រងគ្រឹះស្ថានសិក្សាពាក់ព័ន្ធឱ្យត្រៀមខ្លួនរៀបចំគ្រឹះស្ថានសិក្សាតាមគោលការណ៍ប្រតិបត្ដិស្ដង់ដា សម្រាប់បើកដំណើរការសាលារៀនឡើងវិញក្នុងបរិបទកូវីដ ១៩ ដំណាក់កាលទី ២ ក្នុងនោះក្រសួងក៏បានសម្រេចដាក់ចេញអភិក្រមចំនួន ២ ដោយតម្រូវឱ្យគ្រឹះស្ថានសិក្សាអនុលោមតាមដើម្បីបើកដំណើរការសាលារៀនឡើងវិញ។
លោក ហង់ជួន ណារ៉ុន រដ្ឋមន្ត្រីក្រសួងអប់រំកាលពីថ្ងៃទី ២៤ ខែសីហា បានដឹកនាំកិច្ចប្រជុំនៅទីស្ដីការក្រសួងអប់រំ ដោយបានពិភាក្សាស្ដីពីការបើកដំណើរការឡើងវិញ គ្រឹះស្ថានមត្តេយ្យសិក្សា បឋមសិក្សា និងមធ្យមសិក្សាក្នុងដំណាក់កាលទី ២ ដើម្បីត្រួតពិនិត្យ កែលម្អ និងដាក់ចេញជាវិធានការសម្រាប់សាកល្បងបើកដំណើរការឡើងវិញនូវគ្រឹះស្ថានមត្តេយ្យសិក្សា បឋមសិក្សា និងមធ្យមសិក្សាក្នុងដំណាក់កាលទី ២។
កិច្ចប្រជុំបានសម្រេច «ដាក់ចេញនូវអភិក្រមចំនួន ២ ដែលតម្រូវឱ្យគ្រឹះស្ថានសិក្សាត្រូវអនុលោមតាម។ ក្នុងនោះរួមមាន ១- ការដាក់សុវត្ថិភាព សុខុមាលភាព សុខភាពអ្នកសិក្សា និងបុគ្គលិកអប់រំជាអាទិភាព និងទី ២- ការជំរុញការអប់រំបែបចម្រុះរវាងការធ្វើស្វ័យសិក្សាពីចម្ងាយ ការសិក្សាតាមប្រព័ន្ធអេឡិចត្រូនិក និងការសិក្សាពីចម្ងាយតាមបែបប្រពៃណី»។
លោក រស់ សុវាចា អ្នកនាំពាក្យ ក្រសួងអប់រំបានថ្លែងកាលពីថ្ងៃចន្ទថា រាជរដ្ឋាភិបាលទើបបានផ្ដល់ការឯកភាពលើយុទ្ធសាស្ដ្រស្ដីពីការបើកដំណើរការគ្រឹះស្ថានសិក្សាឡើងវិញជាដំណាក់កាល។ ក្រសួងអប់រំ បាននិងកំពុងបន្តរៀបចំគោលការណ៍ណែនាំស្ដីពីការបើកដំណើរការគ្រឹះស្ថានសិក្សាឡើងវិញដំណាក់កាលទី ២នេះ។
លោក ហង់ជួន ណារ៉ុន នៅក្នុងកិច្ចប្រជុំកាលពីថ្ងៃចន្ទ។ រូបថត ក្រសួងអប់រំ
លោកថ្លែងថា៖ «ក្រសួងអប់រំនឹងបន្តជម្រាបព័ត៌មានអំពីបច្ចុប្បន្នភាពជូនសាធារណជននាពេលក្រោយ។ ចំពោះមុខនេះ ក្រសួងអប់រំសូមអំពាវនាវដល់គណៈគ្រប់គ្រងគ្រឹះស្ថានសិក្សាពាក់ព័ន្ធបន្តត្រៀមខ្លួនរៀបចំគ្រឹះស្ថានសិក្សាតាមគោលការណ៍ប្រតិបត្ដិស្ដង់ដាសម្រាប់ដំណើរការសាលារៀនឡើងវិញក្នុងបរិបទកូវីដ១៩»។
លោក ប៉ិច បូឡែន ប្រធានក្រុមប្រឹក្សាភិបាលសហព័ន្ធសេវាអប់រំនៅកម្ពុជាដែលសហព័ន្ធនេះបច្ចុប្បន្នមានគ្រឹះស្ថានសិក្សាឯកជនជិត ១០០ ជាសមាជិកបានសាទរចំពោះផែនការ យុទ្ធសាស្ដ្រនៃការរៀបចំបើកដំណើរការគ្រឹះស្ថានសិក្សាឡើងវិញរបស់ក្រសួងអប់រំនេះ។
លោកចាត់ទុកថា នេះគឺជាការយកចិត្ដទុកដាក់របស់ក្រសួងអប់រំ ចំពោះគ្រឹះស្ថានសិក្សាឯកជនពីព្រោះបើក្រសួងបន្តអូសបន្លាយមិនអនុញ្ញាតឱ្យគ្រឹះស្ថានឯកជនបើកដំណើរការឡើងវិញ គ្រឹះស្ថានឯកជនមួយចំនួនអាចប្រឈមនឹងការបិទអាជីវកម្ម។
លោកថ្លែងថា៖ «បើក្រសួងអប់រំមិនមានផែនការយុទ្ធសាស្ដ្រ បើកដំណើរការគ្រឹះស្ថានសិក្សាឡើងវិញបែបនេះទេ សាលាជាច្រើននឹងបន្តបិទ (បិទអាជីវកម្ម)។ គ្រឹះស្ថានសិក្សាឯកជនរបស់យើង គឺនឹងបន្តសហការជាមួយក្រសួងអប់រំ និងបន្តអនុវត្ដឱ្យបានតាមអភិក្រម និងគោលការណ៍ណែនាំស្ដង់ដារបស់ក្រសួងអប់រំ។ ខ្ញុំជឿជាក់ថា គ្រឹះស្ថានសិក្សារបស់ពួកយើងអាចធ្វើបាន»។
កត្ដាដែលលោក ប៉ិច បូឡែន ជឿជាក់ថា គ្រឹះស្ថានសិក្សាឯកជនអាចអនុវត្ដបានតាមគោលការណ៍ណែនាំរបស់ក្រសួងអប់រំបាននេះគឺដោយសារគ្រឹះស្ថានសិក្សាឯកជនមានបណ្ដាញអ៊ីនធឺណិតដំណើរការល្អអំណោយផលដល់ការបង្រៀន និងការរៀនបែប Online Plus ជាដើម។ ចំណែកគ្រឹះស្ថានសិក្សាឯកជនខ្លះទៀតអាចអនុវត្ដការបង្រៀន និងរៀនបានតាមបែប Online Plus បូកនឹងការសិក្សាពីចម្ងាយ។
សេចក្តីប្រកាសព័ត៌មានរបស់ក្រសួងអប់រំស្ដីពី «ការប្រឡងសញ្ញាបត្រមធ្យមសិក្សាទុតិយភូមិសម្រាប់ឆ្នាំសិក្សា ២០១៩-២០២០» កាលពីថ្ងៃទី ១០ ខែសីហា បានឱ្យដឹងថា លោកនាយករដ្ឋមន្ដ្រី ហ៊ុន សែន បានអនុញ្ញាតឱ្យសិស្សថ្នាក់ទី ៩ និងទី ១២ នៃគ្រឹះស្ថានសិក្សាសាធារណៈចូលរៀននៅក្នុងដំណាក់កាលទី ២ នៅអំឡុងខែកញ្ញាខាងមុខនេះដើម្បីត្រៀមប្រឡងបាក់ឌុបនៅខែធ្នូខាងមុខ។ ការអនុញ្ញាតបើកឱ្យសិស្សចូលរៀនវិញនេះ គឺស្ថិតក្នុងទ្រង់ទ្រាយតូច គឺចំនួន ១៥ នាក់ក្នុង ១ ថ្នាក់ និងត្រូវគោរពតាមវិធានការណែនាំរបស់ក្រសួងសុខាភិបាល និងអង្គការសុខភាពពិភពលោក៕
វីដេអូ៖
