The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​អប់រំ​​ ឲ្យ​ទប់​ស្កាត់​សកម្មភាព​មិន​ប្រក្រតី​ក្នុង​ទិវា​នៃក្ដី​ស្រឡាញ់

ក្រសួង​អប់រំ​​ ឲ្យ​ទប់​ស្កាត់​សកម្មភាព​មិន​ប្រក្រតី​ក្នុង​ទិវា​នៃក្ដី​ស្រឡាញ់

Content image - Phnom Penh Post
ក្រសួង​អប់រំ បា​ន​ណែ​នាំ​ទៅ​គ្រឹះស្ថាន​សិក្សា​សាធា​រណៈ ​និង​ឯក​ជន​ ឲ្យ​មាន​វិធាន​ការ​ទប់​ស្កាត់​សកម្ម​ភាព​មិន​ប្រក្រ​តី​របស់​សិស្សា​នុសិស្ស​ក្នុង​ថ្ងៃ​ទិ​វា​បុណ្យ​នៃ​ក្ដី​ស្រឡាញ់។ ហុង មិនា

ក្រសួង​អប់រំ​​ ឲ្យ​ទប់​ស្កាត់​សកម្មភាព​មិន​ប្រក្រតី​ក្នុង​ទិវា​នៃក្ដី​ស្រឡាញ់

ភ្នំពេញៈ ក្រសួង​អប់រំ​ យុវ​ជន និង​កីឡា បា​ន​ណែ​នាំ​ទៅ​គ្រឹះស្ថាន​សិក្សា​សាធា​រណៈ ​និង​ឯក​ជន​ ឲ្យ​មាន​វិធាន​ការ​ទប់​ស្កាត់​សកម្ម​ភាព​មិន​ប្រក្រ​តី​របស់​សិស្សា​នុសិស្ស​ក្នុង​ថ្ងៃ​ទិ​វា​បុណ្យ​នៃ​ក្ដី​ស្រឡាញ់ ​(Valentines Day)​ ដែល​នឹង​មក​ដល់​នៅ​ថ្ងៃទី ១៤​ ខែ​កុម្ភៈ​នេះ។​

​សេច​ក្ដី​ណែ​នាំ​នេះ​បាន​​ប្រកាស​កាល​ថ្ងៃ​ទី​ ៧​ កុម្ភៈបាន​សរ​សេរ​ថា​ ក្រសួង​អប់រំ​ បាន​សង្កេត​ឃើញ​ជា​រៀង​រាល់​ឆ្នាំ​នៅ​ថ្ងៃទី​ ១៤​ ខែ​កុម្ភៈ​ ដែល​ជា​ទិវា​បុណ្យ​នៃ​ក្ដី​ស្រឡាញ់ (Valentines Day)​ គឺ​ជា​ឱកាស​មួយ​ដែល​ធ្វើ​ឲ្យ​សិស្សា​នុសិស្ស​មួយ​ចំនួន​យល់​ច្រឡំ​ថា ​បុណ្យ​នេះ ​ជា​ថ្ងៃ​បុណ្យ​​សង្សារ​ ឬ​ជា​ថ្ងៃ​ណាត់​ជួប​គ្នា​រវាង​គូ​ស្នេហ៍។​

​សេច​ក្ដី​ណែ​នាំ​ដដែល​បញ្ជាក់​ថា​៖ «​ទិវា​នេះ​ ពុំ​មែន​ជា​ពិធី​បុណ្យ​ប្រ​ពៃណី​របស់​ជន​ជាតិ​ខ្មែរ​យើង​ទេ​ ហើយ​នៅ​អំឡុង​ប៉ុន្មាន​ឆ្នាំ​ចុង​ក្រោយ​នេះ ​ទិវា​បុណ្យ​នៃ​ក្ដី​ស្រឡាញ់​ កាន់​តែ​មាន​ឥទ្ធិ​ពល​ធំ​ឡើងៗ​ ធ្វើ​ឲ្យ​យុវ​ជន​ភ្លើត​ភ្លើន​ភ្លេច​ការ​សិក្សា​បាត់​បង់​សេច​ក្ដី​ថ្លៃថ្នូរ​របស់​ខ្លួន ​និង​ក្រុម​គ្រួសារ​ ប្រាស​ចាក​វប្ប​ធម៌​ និង​ប្រពៃ​ណី​ជាតិ​ដ៏​ផូ​រផ​ង់​របស់​ខ្មែរ​ទៀត​ផង​»។

ដើ​ម្បី​ពង្រឹង​ការ​អនុវត្ដ​បទ​បញ្ជា​ផ្ទៃ​ក្នុង​សម្រាប់​គ្រឹះ​ស្ថាន​សាធា​រ​ណៈ​ និង​ឯក​ជន​ ក្រសួង​បាន​ធ្វើ​ការ​ណែ​នាំ​ស្ដីពី​ការ​ចាត់​វិធាន​ការ ​ទប់​ស្កាត់​ស​កម្ម​ភាព​មិន​ប្រ​ក្រតី​ ក្នុង​ទិវា​បុណ្យ​នៃ​ក្ដី​ស្រឡាញ់​ ដោយ​ប្រាប់​ឲ្យ​​គ្រឹះ​ស្ថាន​សិក្សា​សាធា​រណៈ​ និង​ឯក​ជន​ ត្រូវ​ផ្សព្វ​ផ្សាយ​ដល់​សិស្សានុ​សិស្ស​តា​ម​​​គ្រប់​មធ្យោ​បាយ​ ដូ​ច​ជា​តា​ម​រយៈ​ការ​ប្រជុំ​នៅ​ពេល​គោរព​ទង់ជាតិ​ កុំ​ឲ្យ​មាន​ការ​យល់​ខុស​អំពី​អត្ថ​ន័យ​នៃ​ទិវា​នៃ​ក្ដី​ស្រ​ឡាញ់​នេះ​ទៀត។​

​-ត្រូវ​ពង្រឹង​ការ ​អនុវត្ដ​បទ​​បញ្ជា​ផ្ទៃ​ក្នុង ​របស់​គ្រឹះ​ស្ថាន​សិក្សា​សាធា​រណៈ​​ឲ្យ​បាន​ម៉ឺង​ម៉ាត់​ ជា​ពិសេស​លើ​ការ​គ្រប់​គ្រង​ សីល​ធម៌​ និង​វិន័យ​ ដោយ​តាម​ដាន​អវត្ដ​មាន​របស់​សិស្សា​​-​នុ​សិស្ស​ជា​ប្រចាំ។​

​-គ្រឹះ​ស្ថាន​សិក្សា​សាធារ​ណៈ ​និង​ឯក​ជន​ត្រូវ​ជំរុញ​ដំណើរ​ការ​របស់​ក្រុម​ប្រឹក្សា​យុវជន​ ក្រុមប្រឹក្សា​កុមារ​ប្រចាំ​សាលា​ដោ​យ​​​អនុ​វត្ដ​សកម្ម​ភាព​ «មិត្ដ​អប់រំ​មិត្ដ»។​

-ត្រូវ​ធ្វើ​ទំនាក់​ទំនង​ជិត​ស្និទ្ធ​ជា​មួយ​មាតា​បិតា​ ​អាណា​ព្យាបាល​សិស្ស​ សហ​គមន៍​ដើម្បី​ផ្ដល់ ​និង​ទទួល​ព័ត៌​មាន​នានា​ ពាក់​ព័ន្ធ​នឹង​សកម្ម​ភាព​មិន​ប្រក្រ​តី​ដែល​ប្រព្រឹត្ត​ដោយ​សិស្សា​នុ​សិស្ស​ ដើ​ម្បី​សហ​ការ​គ្នា​អប់​រំ​ណែ​នាំ​កែ​លម្អ​សិស្សា​នុ​​សិស្ស​ឲ្យបាន​ទាន់​ពេល​វេលា។

លោក​ រស់ ​សុវាចា​ អ្នក​នាំ​​ពាក្យ​ក្រសួង​អប់រំ ​យុវជ​ន​ និង​កីឡា ​បាន​បញ្ជាក់​កាល​ពី​ម្សិលមិញ​ថា​ យុវជន​គួរ​ចាត់​ទុក​ថ្ងៃ​ ១៤ ​កុម្ភ:​ ជា​ថ្ងៃ​មួយ​ដូច​ធម្មតា ​សម្រាប់​បំពេញ​ការងារ​ និង​ការ​សិក្សា​។ ​បើ​ឆ្លៀត​ឱកាស​បាន​ យុវជន​ គួរ​ធ្វើ​ការ​ងារ​សង្គម​ដែល​មាន​ប្រ​យោជន៍​ជា​វិជ្ជ​មាន​ដល់​ខ្លួន​ឯង ​និង​អ្នកដទៃ​។​

ជាក់​ស្តែង​ សាកល​វិទ្យា​​​ល័យ​ភូមិន្ទ​ភ្នំពេញ​ តែង​តែ​ឆ្លៀត​ឱកាស​ប្រារព្ធ​ពិធី​សប្បុរ​សធម៌ ក្នុង​អំឡុង​ពេល​ថ្ងៃ ១៤ ​កុម្ភ:​នេះ​។ ​ចំណែក​ឯសា​កល​វិទ្យា​ល័យ​ស្វាយ​រៀង​នឹង​ប្រារព្ធ​ពិធី​បរិច្ចាគ​ឈាម​លើក​ទី ៤​ ក្នុង​អំឡុង​ពេល​ថ្ងៃ​ ១៤ ​កុម្ភ​: ឆ្នាំ ​២០១៩ ​នេះ​ដែរ។​

​លោក​ សុវា​ចា ថ្លែង​​ថា​៖ ​​«ដូ​ច​ឆ្នាំ​កន្លង​មក​ដែរ​ គ្រឹះ​ស្ថាន​សិក្សា​ក្រោម​ឱវាទ​ក្រសួង​អប់រំ​ យុវ​ជន​ និង​កីឡា​បាន​បំពេញ​ការងារ​តាម​ស្មារតី​នៃ​សេចក្តី​ប្រកាស​របស់​ក្រសួង​ប្រកប​ដោយ​ការ​យក​ចិត្ត​ទុក​ដាក់​និង​ភាព​ទទួល​ខុស​ត្រូវ​ខ្ពស់»។​

​លោក​បាន​បង្ហាញ​ថា ​ក្រោម​កិច្ច​សហ​ការ​ជា​មួយ​គ្រប់​ភាគី​ពាក់​ព័ន្ធ​ទាំង​អស់​រួម​មាន​សិស្សា-​នុសិស្ស​ និង​មាតា​បិតា ​ជាពិសេ​ស​ ពីសំ​ណាក់​បណ្តាញ​សារព័ត៌​មាន​ទាំង​អស់​ ក្រ​សួង​សង្កេត​ឃើញ​ថា​ ការយល់ច្រឡំ​ពិន័យ​របស់​ថ្ងៃ​ ១៤ ​កុម្ភ:​របស់​យុវ​ជន​នេះ ​មាន​ការ​ថយចុះ​គួរ​ឲ្យ​កត់​សម្គាល់​។​ ក្រសួង​ជឿជាក់​ថា​ គ្រប់​ស្ថាប័ន ​និង​ភាគី​ពាក់​ព័ន្ធ​ទាំង​អស់​នឹ​ង​បន្ត​ចូល​រួម​អប់រំ​សិស្សា​នុសិស្ស។​

​លោក​ សុវាចា​ ថ្លែង​​ថា​៖​ «​សិស្សា​នុសិស្ស ​និង​យុវជន​គួរ​ចាំថា​ អនា​គត​របស់​គាត់​ស្ថិត​នៅ​ក្នុង​កណ្តាប់​ដៃ​របស់​គាត់​ផ្ទាល់។ ​ដូច​នេះ​ គាត់​ត្រូវ​សម្រេច​ចិត្ត​ប្រកប​ដោយ​ការពិចារ​ណា​ឲ្យ​បាន​គ្រប់​ជ្រុងជ្រោយ​មុន​នឹង​ធ្វើ​អ្វីមួយ»។​

​លោក ​ឃឹម ផុន នាយក​ប្រតិ​បត្តិ ​NTC GROUP​ ដែល​មាន​សាលា​រៀន​សុវណ្ណ​ភូមិ​ បច្ចុប្បន្ន​មាន ​២៧​ សាខា​​ទូទាំង​​ប្រទេស​កម្ពុជា​ និង​មាន​សិស្ស​កំពុង​សិក្សា​ជិត​ ៤ ម៉ឺន​នាក់​ និង​មាន​សាលា​រៀន​កម្រិត​ជាតិ និង​អន្តរ​ជាតិ​ជា​ច្រើន​ទៀត​ជា​សម្ព័ន្ធ​នោះ បាន​ថ្លែង​ប្រាប់​ភ្នំពេញ​ប៉ុស្ដិ៍​ម្សិល​មិញ​ថា​ ជា​ទូទៅ​កាល​ពីមុន​មក​សិស្ស​តែង​មាន​ការ​យល់​ច្រឡំ​ថា ថ្ងៃ​ ១៤ ​កុម្ភៈ ​ជា​ថ្ងៃ​បុណ្យ​សង្សារ​ ប៉ុន្ដែ​ប្រហែល​ជា​ ៣ ​ឆ្នាំ​ចុង​ក្រោយ​នេះ ​ក្រោយ​ពី​មាន​ការ​ប្រកាស​របស់​រាជ​រដ្ឋាភិ​បាល​ក៏​ដូច​ជា​ក្រសួង​អប់រំ​ ឲ្យ​​មាន​វិធាន​ការ​ផ្សព្វផ្សាយ​ទៅ​យុវជន​កុំ​ឲ្យ​គិត​ថា​ថ្ងៃ ១៤ ​កុម្ភៈ​ជា​ថ្ងៃ​ដែល​ប្រព្រឹត្ដ​សកម្ម​ភាព​ផ្ដេស​ផ្ដាស​នោះ​សាលា​រៀន​របស់​លោក​តែង​តែ​យក​ថ្ងៃ ​១៤ ​កុម្ភៈ​ នេះ​ ជា​ថ្ងៃ​ផ្សព្វ​ផ្សាយ​ណែ​នាំ​ដល់​​យុវជន​រហូត​មក។​

​លោក​ ថ្លែង​ថា​៖ «​យើង​អត់​ចង់​​ឲ្យ​សិស្ស​គាត់​យល់​ថា ​ជា​ថ្ងៃ​ដែល​គាត់​មាន​សង្សារ​មាន​អីនោះ​ទេ។​ យើង​ឲ្យ​នាយក​តាម​សាលា​ផ្ទាល់​គាត់​ផ្សព្វ​ផ្សាយ​ទៅ​សិស្ស​​ថា ថ្ងៃ​ ១៤ កុម្ភៈ​​នេះ​មិន​មែន​ជាថ្ងៃ​ដែល​គាត់​យល់​ខុស​នោះ​ទេ​។ ​យើង​ផ្សព្វផ្សាយ​បែប​នេះ ​ឲ្យ​ទៅជា​វប្ប​ធម៌​រួម​មួយ​ ឥឡូវ​​វប្បធម៌​ហ្នឹង​ពួក​គាត់​ស៊ាំ​លែង​មាន​ការ​យល់​ខុស​ទៀត​ហើយ​ សិស្ស​នៅ​សាលា​យើង​»។​

លោក​ អុឹម ​សុធី ​នា​យក​ប្រតិ​បត្ដិ​ ក្រុម​ប្រឹក្សា​យុវ​ជន​កម្ពុជា​ (Youth Council of Cambodia)​ បាន​លើក​ឡើង​ថា ​សិស្សា​នុ​-​សិស្ស​មា​ន​ការ​យល់​ដឹង​ពី​ទិវា​បុណ្យ​នៃ​ក្ដី​ស្រឡាញ់​បាន​ច្រើន​ជាង​មុន​ មិន​បាន​យល់​ច្រឡំ​ថា ​ជាថ្ងៃ​បុណ្យ​សង្សារ​ដូច​មុន​ទេ​។​

​លោក​បន្ដ​ថា​៖ ​«​យើង​មើល​ទៅ​ពួកគាត់​ មិន​មាន​រូបភាព​ ឬស​កម្ម​ភាព​ដូច​កាល​ពី​មុន​ៗ​ទេ។​ ​ខ្ញុំ​បាន​ជួប​ពួក​គាត់​ច្រើន​ហើយ​សួរ​ទៅ​ពួក​គាត់ តែ​ពួក​គាត់​ប្រាប់​ថា ​ពួក​គាត់​មិន​ដែល​យក​ចិត្ដ​ទុក​ដាក់​ចំពោះ​ថ្ងៃ​ទិវា​បុណ្យ​នៃ​ក្ដី​ស្រឡាញ់​នេះ​ទេ​»​៕​​

អត្ថបទគួរចាប់អារម្មណ៍