ភ្នំពេញៈ រាជរដ្ឋាភិបាលកម្ពុជាតាមរយៈក្រសួងអប់រំ សហភាពអឺរ៉ុប (EU) និងយូនីសេហ្វបន្តការប្ដេជ្ញាចិត្តរួមគ្នាក្នុងការការពារសិទ្ធិទទួលបានការអប់រំដល់កុមារ បើទោះជាមានបញ្ហាប្រឈមថ្មីៗដ៏សែនពិបាកបង្កដោយជំងឺកូវីដ១៩ យ៉ាងណាក៏ដោយ។ សហភាពអឺរ៉ុបក៏បានផ្ដល់ថវិកាចំនួន ២ លានអឺរ៉ូដល់ដំណើរការបើកសាលារៀនឡើងវិញនាពេលជួបវិបត្ដិនេះ។
នេះបើយោងតាមសេចក្ដីប្រកាសព័ត៌មានរួមគ្នារបស់ស្ថាប័នទាំង ៣ ក្នុងពេលធ្វើដំណើរទៅកាន់ខេត្តសៀមរាប ដើម្បីវាយតម្លៃពីវឌ្ឍនភាពរបស់សាលារៀននៅកម្ពុជានៅក្នុងដំណើរការបើកសាលារៀនឡើងវិញប្រកបដោយសុវត្ថិភាព ក្រោមអធិបតីភាពរដ្ឋមន្ត្រីក្រសួងអប់រំ យុវជន និងកីឡា ឯកអគ្គរដ្ឋទូតសហភាព-អឺរ៉ុបប្រចាំព្រះរាជាណាចក្រកម្ពុជា និងតំណាងយូនីសេហ្វកាលពីម្សិលមិញ។
រដ្ឋមន្ត្រីក្រសួងអប់រំលោក ហង់ជួន ណារ៉ុន បានថ្លែងក្នុងដំណើរទៅខេត្ដសៀមរាបនោះថាក្រសួងអប់រំសូមស្វាគមន៍ចំពោះការឧបត្ថម្ភបន្ថែមពីសហភាពអឺរ៉ុបដល់សាលារៀន និងសិស្សានុសិស្សនៅទូទាំងប្រទេសក្នុងពេលដ៏សែនពិបាកនេះ។
តាមរយៈសេចក្តីប្រកាសព័ត៌មានលោករដ្ឋមន្ដ្រីថ្លែងថា៖ «ការគាំទ្រនេះនឹងជួយឱ្យយើងធានាថា កុមារនៅតែអាចបន្តទទួលឱកាសរៀនសូត្រ បើទោះជាកំពុងប្រឈមនឹងបញ្ហាលំបាកៗដែលបង្កឡើងដោយសារជំងឺកូវីដ១៩ក៏ដោយ»។
លោក ហង់ជួន ណារ៉ុន បន្តថា៖ «ជំនួយគាំទ្រសម្រាប់ការបើកទ្វារសាលារៀនឡើងវិញប្រកបដោយសុវត្ថិភាពពីសហភាព-អឺរ៉ុប និងដៃគូរបស់មូលនិធិភាពជាដៃគូសម្រាប់អភិវឌ្ឍសមត្ថភាព វិស័យអប់រំ (CDPF) ដទៃទៀតនឹងធ្វើឱ្យសហគមន៍មានទំនុកចិត្តថា សិស្សានុសិស្សដែលជាកូនចៅរបស់ពួកគាត់នឹងអាចវិលត្រឡប់ទៅសាលារៀនវិញក្នុងបរិយាកាសសិក្សាប្រកបដោយសុវត្ថិភាព និងមានការគាំទ្រ»។
ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជាលោកស្រី ខាមិន ម៉ូរ៉េណូ ថ្លែងក្នុងឱកាសនោះដែរថា ការអប់រំ គឺជាសិទ្ធិមនុស្សមូលដ្ឋាន និងជាសសរគ្រឹះមួយសម្រាប់ការអភិវឌ្ឍរបស់ប្រទេសកម្ពុជា។ នៅទូទាំងពិភពលោកជំងឺកូវីដ ១៩ កំពុងបង្អាក់នូវការទទួលបានឱកាសអប់រំរបស់កុមារ ហើយកត្តានេះអាចក្លាយជាឧបសគ្គសម្រាប់ការស្តារទ្បើងវិញនាពេលអនាគត។
តាមរយៈសេចក្តីប្រកាសរួមលោកស្រីបន្តថា៖ «អស់រយៈពេលជាង ១៥ ឆ្នាំមកហើយសហភាពអឺរ៉ុបគឺជាដៃគូដ៏រឹងមាំរបស់ក្រសួងអប់រំ ហើយយើងមានមោទនភាពក្នុងការគាំទ្រយុទ្ធនាការរបស់ក្រសួងដើម្បីបើកសាលារៀនទ្បើងវិញប្រកបដោយសុវត្ថិភាពនៅទូទាំងប្រទេស»។
លោកស្រីបញ្ជាក់ថា៖ «ជាផ្នែកនៃការគាំទ្ររបស់យើងឆ្លើយតបនឹងជំងឺកូវីដ ១៩ និងកម្មវិធីស្តារទ្បើងវិញយើងនឹងចូលរួមចំណែកបង្កើនចំនួនអាហារូបករណ៍សម្រាប់កុមារ និងគ្រួសារងាយរងគ្រោះជាងគេដែលទទួលរងប៉ះពាល់ខ្លាំងពីវិបត្តិនេះ»។
ជាមួយគ្នានេះ លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំប្រទេសកម្ពុជា ថ្លែងថា គ្រប់វិបត្តិទាំងអស់សុទ្ធតែមានកាលានុវត្តភាពសម្រាប់គិតសាជាថ្មី និងស្ថាបនាឡើងវិញឱ្យកាន់តែប្រសើរជាងមុន។ វាមានសារៈសំខាន់ណាស់ដែលវិធានការឆ្លើយតបចំពោះជំងឺកូវីដ ១៩ បានក្លាយជាកាតាលីករសម្រាប់បើកដំណើរការសាលារៀនឡើងវិញឱ្យរឹតតែប្រសើរជាងមុនដើម្បីធ្វើឱ្យសាលារៀនក្លាយជាកន្លែងដែលមានបរិយាប័ន្ន និងមានភាពធន់។
លោកស្រីថ្លែងថា៖ «គោលដៅនេះអាចសម្រេចទៅបានតាមរយៈកិច្ចខិតខំប្រឹងប្រែងរួមគ្នារបស់ដៃគូអភិវឌ្ឍន៍ ក្រោមការដឹកនាំរបស់រាជរដ្ឋាភិបាលកម្ពុជា»។
សេចក្ដីប្រកាសព័ត៌មានរួមដដែលបញ្ជាក់ថា សហភាពអឺរ៉ុបក៏កំពុងធ្វើការងារជាមួយយូនីសេហ្វ និងក្រសួងអប់រំ ដើម្បីពង្រឹង និងពង្រីកកម្មវិធីអាហារូបករណ៍នៅទូទាំងប្រទេសផងដែរ ដែលកម្មវិធីនេះគឺជាសសរស្ដម្ភមួយដ៏សំខាន់នៃប្រព័ន្ធគាំពារសង្គមរបស់កម្ពុជា។
កម្មវិធីនេះមានសារៈសំខាន់ក្នុងការជំរុញឱ្យមានការគោរពនូវសិទ្ធិទទួលបានការអប់រំរបស់កុមារ ដែលជួបការលំបាកជាងគេ។ ពោលគឺកុមារដែលប្រឈមនឹងការបោះបង់ចោលការសិក្សា ដោយសារតែផលប៉ះពាល់សង្គមសេដ្ឋកិច្ចបង្កដោយជំងឺកូវីដ១៩មកលើក្រុមគ្រួសាររបស់ពួកគេ។
សេចក្ដីប្រកាសព័ត៌មានរួមនេះបន្ថែមថា តាមរយៈការគាំទ្រនេះយុទ្ធនាការត្រឡប់ចូលរៀនវិញនៅទូទាំងប្រទេសត្រូវបានអនុវត្តដោយក្រសួងអប់រំ និងយូនីសេហ្វ ដើម្បីផ្ដល់ការណែនាំដល់កុមារ មាតាបិតា លោកគ្រូអ្នកគ្រូ និងបុគ្គលិកសាលារៀនអំពីរបៀបធ្វើឱ្យសាលារៀនមានសុវត្ថិភាពបំផុត និងកាត់បន្ថយហានិភ័យនៃការចម្លងជំងឺកូវីដ ១៩។
យុទ្ធនាការនេះនឹងបន្តរហូតដល់ឆ្នាំ ២០២១ និងអាចពង្រីកវិសាលភាពបន្ថែមទៀតដើម្បីបញ្ចូលព័ត៌មានដ៏មានតម្លៃ និងផ្ដល់ការលើកទឹកចិត្តផ្សេងៗមិនត្រឹមតែដើម្បីធ្វើឱ្យសាលារៀនមានសុវត្ថិភាពប៉ុណ្ណោះទេ ប៉ុន្តែថែមទាំងបង្កើតនូវបរិយាកាសដ៏ល្អប្រសើរ និងផ្ដល់ការគាំទ្រដល់កុមារដើម្បីឱ្យពួកគេអាចរៀនសូត្របានចេះដឹង និងរីកចម្រើនផងដែរ៕