.jpg)
ក្មេងៗកំពុងអូសត្រីនៅតាមប្រឡាយទឹកមួយនៅក្នុងខេត្តកំពង់ធំកាលពីឆ្នាំ ២០១៧។ ហុង មិនា
ភ្នំពេញៈ ក្រសួងអភិវឌ្ឍន៍ជនបទណែនាំឱ្យអាជ្ញាធរដែនដី ចូលរួមប្រមូលទិន្នន័យស្ថិតិអំពីការកំណត់តំបន់ជនបទ និងស្ថានភាពជនបទពិតប្រាកដ ដើម្បីធ្វើសេចក្តីព្រាងគោលនយោបាយជាតិ អភិវឌ្ឍន៍ជនបទពីឆ្នាំ ២០២១ ដល់ឆ្នាំ ២០៣០ សម្រាប់លើកស្ទួយជីវភាពរស់នៅរបស់ប្រជាពលរដ្ឋ។
កាលពីថ្ងៃទី ៨ កុម្ភៈ ក្រសួងអភិវឌ្ឍន៍ជនបទបានរៀបចំសិក្ខាសាលាស្តីពីការពិនិត្យលើវឌ្ឍនភាព និងគុណភាពនៃការប្រមូលទិន្នន័យស្ថិតិអំពីការកំណត់តំបន់ជនបទ ស្ថានភាពជនបទ និងប្រឹក្សាពីគោលបំណងគោលដៅសូចនាករនៃសេចក្តីព្រាងគោលនយោបាយជាតិអភិវឌ្ឍន៍ជនបទពីឆ្នាំ ២០២១ ដល់ឆ្នាំ ២០៣០។ សិក្ខាសាលាដែលធ្វើឡើងនៅខេត្តស្ទឹងត្រែងនេះមានការចូលរួមពីគណៈប្រតិភូក្រសួងអភិវឌ្ឍន៍ជនបទ ប្រធានមន្ទីរអភិវឌ្ឍន៍ជនបទ ព្រមទាំងអភិបាល អភិបាលរងស្រុក មេឃុំ ចៅសង្កាត់មកពីខេត្តចំនួន ៥។
លោក សុខ សារាវុឌ្ឍ រដ្ឋលេខាធិការក្រសួងអភិវឌ្ឍន៍ជនបទដែលបានចូលរួមក្នុងសិក្ខាសាលានេះបានប្រាប់ភ្នំពេញប៉ុស្តិ៍កាលពីម្សិលមិញថា ដើម្បីពិនិត្យលើវឌ្ឍនភាព និងគុណភាពនៃការប្រមូលទិន្នន័យស្ថិតិអំពីការកំណត់តំបន់ជនបទ ឬស្ថានភាពជនបទនានាអាជ្ញាធរដែនដី ត្រូវតែមានការយល់ដឹង និងកាតព្វកិច្ចចូលរួមសហការ។
នៅក្នុងអំឡុងពេលនេះក្រសួងកំពុងបន្តប្រឹក្សាពីគោលបំណងគោលដៅ និងសូចនាករនានា ដើម្បីបញ្ចូលទៅក្នុងសេចក្តីព្រាងគោលនយោបាយជាតិអភិវឌ្ឍន៍ជនបទនេះ ខណៈរាជរដ្ឋាភិបាល សម្រេចដាក់ចេញនូវគោលនយោបាយក្នុងការលើកកម្ពស់សុខុមាលភាពសង្គមជនបទកម្ពុជាប្រកបដោយជីវភាពសមរម្យ សុវត្ថិភាព និងសណ្ដាប់ធ្នាប់សង្គម ផាសុកភាព ការគោរពច្បាប់ សីលធម៌សង្គម និងយុត្តិធម៌សង្គមជាមូលដ្ឋាន ក្នុងគោលដៅលើកកម្ពស់កម្រិតជីវភាពរស់នៅប្រជាជនជនបទ។
លោកបញ្ជាក់ថា៖ «ដំណាក់កាលដែលប្រទេសកម្ពុជា យើងកំពុងអភិវឌ្ឍន៍ ពិសេសការរីកចម្រើននោះ គឺត្រូវទាមទារឱ្យមានការបង្កើតសុខវឌ្ឍនភាពជនបទ ប្រកបដោយសុខដុមនីយកម្ម សមធម៌ បរិយាប័ន្ន និងចីរភាពដែលជាសសរស្ដម្ភទី ២ និងមានសារៈសំខាន់ចាំបាច់មិនអាចខ្វះបានដើម្បីធានាឱ្យមានសុខវឌ្ឍនភាពជនបទកម្ពុជា»។
លោក សុខ សារាវុឌ្ឍ រំពឹងថានៅពេលមានការចូលរួមពីអាជ្ញាធរដែនដី ក្នុងការប្រមូលទិន្នន័យស្ថិតិអំពីការកំណត់តំបន់ជនបទ ស្ថានភាពជនបទពិតប្រាកដ ដើម្បីធ្វើសេចក្តីព្រាងគោលនយោបាយជាតិអភិវឌ្ឍន៍ជនបទឆ្នាំ ២០២១-២០៣០ នឹងអាចអនុវត្តបានដោយមានប្រសិទ្ធភាពក្នុងការជួយលើកស្ទួយជីវភាពរស់នៅរបស់ប្រជាពលរដ្ឋ តាមតំបន់ជនបទនានាក្នុងប្រទេសកម្ពុជា។
លោក ព្រំ ចន្ថា ប្រធានមន្ទីរអភិវឌ្ឍន៍ជនបទ ខេត្តស្ទឹងត្រែង បានលើកឡើងថា ខេត្តរបស់លោកបានអនុវត្តសកម្មភាពជាច្រើនកន្លងមកដែលបានចូលរួមលើកស្ទួយគោលនយោបាយជាតិរបស់រាជរដ្ឋាភិបាល។
លោកបន្តថា៖ «អ្វីទាំងនេះ គឺដើម្បីឱ្យមានការអភិវឌ្ឍតាមជនបទ ពិសេសតម្រូវការចាំបាច់នានារបស់ប្រជាពលរដ្ឋ តាមមូលដ្ឋាន តំបន់ជនបទ និងអនុវត្តស្របតាមផែនការយុទ្ធសាស្ត្ររបស់ក្រសួងអភិវឌ្ឍន៍ជនបទ ដែលបានដាក់ចេញឱ្យអនុវត្ត»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានប្រាប់ ភ្នំពេញ ប៉ុស្តិ៍ថា ការអភិវឌ្ឍជនបទនេះគឺជាការអភិវឌ្ឍមួយ ដែលត្រូវឱ្យមានការចូលរួមជាអន្តរវិស័យ ដើម្បីដោះស្រាយបញ្ហាជាច្រើននៅតាមជនបទ។ បន្ថែមពីនេះ រដ្ឋាភិបាលក៏ដូចជាក្រសួង ក៏ត្រូវធ្វើការបែងចែកតំបន់ជនបទនេះជា ២ ផងដែរ ដែលមានតំបន់ជនបទជិតទីប្រជុំជន និងតំបន់ជនបទនៅដាច់ស្រយាល។
ការបែងចែកដូច្នេះក្នុងន័យដើម្បីធ្វើការអភិវឌ្ឍន៍តំបន់ជនបទឱ្យចំគោលដៅ និងពេលវេលាពាក់ព័ន្ធនឹងបញ្ហាទឹកស្អាត អនាម័យ សុខភាព និងការកសាងហេដ្ឋារចនាសម្ព័ន្ធ។
លោកបញ្ជាក់ថា៖ «ជាទិសដៅរួមការបង្កើតការអភិវឌ្ឍមួយដែលមានទម្រង់អន្តរវិស័យគឺត្រូវតែពង្រឹង ព្រោះកន្លងមកយើងឮថា ក្រសួងខ្លះ ធ្វើការទៅ ពុំសូវស៊ីចង្វាក់គ្នា នៅពេលដែលទៅដោះស្រាយបញ្ហារួម»។ លោកថា បញ្ហាមួយចំនួននៅឯជនបទគឺចាំបាច់ណាស់ត្រូវការមានគណនេយ្យភាពទៅវិញទៅមកក្នុងការដោះស្រាយបញ្ហាប្រឈមរបស់ប្រជាពលរដ្ឋរួមគ្នាតែម្តង ដើម្បីឱ្យការទទួលខុសត្រូវទៅវិញទៅមកនេះបានផលប្រយោជន៍ទៅដល់ក្រុមងាយរងគ្រោះ និងក្រុមដែលត្រូវការការជួយបំផុត៕
