ភ្នំពេញៈ ក្រសួងមុខងារសាធារណៈបង្វែរសំណុំរឿងនៃពាក្យបណ្តឹងតវ៉ារបស់គ្រូពេទ្យម្នាក់ឲ្យទៅរដ្ឋបាលខេត្តប៉ៃលិន ដោយបានបញ្ជាឱ្យបង្កើតគណៈកម្មាធិការសម្រុះសម្រួលមួយ ដើម្បីដោះស្រាយតាមនីតិវិធី ករណីបណ្ដេញគ្រូពេទ្យរូបនោះ ចេញពីក្របខ័ណ្ឌរដ្ឋបន្ទាប់ពីមានការបង្ហោះសារពីភាពអសកម្មដែលគាត់បានជួបប្រទះ។
ការមានចំណាត់ការរបស់ក្រសួងមុខងារសាធារណៈនេះបានធ្វើឡើងបន្ទាប់ពីគ្រូពេទ្យម្នាក់ម្នាក់នេះបានដាក់ពាក្យបណ្តឹងតវ៉ាទៅក្រសួងសុខាភិបាល និងក្រសួងមុខងារសាធារណៈ កាលពីថ្ងៃទី ២៤ មីនា ដើម្បីស្នើឱ្យស្ថាប័នទាំង ២ នេះ ជួយរកយុត្តិធម៌ជូនគាត់។
គ្រូពេទ្យនៅខេត្តប៉ៃលិនលោក ខឹម មុនីកុសល ត្រូវបានលោកស្រី បាន ស្រីមុំ អភិបាលខេត្តប៉ៃលិនចេញលិខិតបណ្ដេញចេញពីក្របខ័ណ្ឌរដ្ឋកាលពីថ្ងៃទី ១៩ មីនា ដោយសំអាងថា គ្រូពេទ្យរូបនេះបានប្រព្រឹត្តកំហុស និងការឆ្គាំឆ្គងក្នុងវិជ្ជាជីវៈ។
លិខិតមួយច្បាប់ដែលចុះហត្ថលេខាដោយលោក ព្រុំ សុខា រដ្ឋមន្ត្រីក្រសួងមុខងារសាធារណៈផ្ញើជូនទៅកាន់អភិបាលខេត្តប៉ៃលិន កាលពីថ្ងៃទី ២៦ មីនា បានសង្កត់ធ្ងន់ថា៖ «ខ្ញុំសូមបង្វែរពាក្យបណ្តឹងតវ៉ានេះទៅរដ្ឋបាលខេត្តប៉ៃលិនដើម្បីបង្កើតគណៈកម្មាធិការសម្រុះសម្រួលទំនាស់ពាក់ព័ន្ធនឹងកិច្ចការមុខងារសាធារណៈខេត្តប៉ៃលិនក្នុងការដោះស្រាយករណីនេះឲ្យស្របតាមគោលការណ៍បែបបទ និងនីតិវិធីដែលមានជាធរមាន»។
នៅក្នុងលិខិតនោះលោករដ្ឋមន្ត្រីបានអះអាងថា គឺអនុលោមទៅតាមមាត្រា ៦៧ ដល់មាត្រា ៧០ នៃព្រះរាជក្រឹត្យស្តីពីលក្ខន្តិកៈ ដោយឡែកសម្រាប់បុគ្គលិករដ្ឋបាលថ្នាក់ក្រោមជាតិ និងលិខិតបទដ្ឋានគតិយុត្តដទៃទៀត ហើយបានរំពឹងថា អភិបាលខេត្តនេះនឹងដោះស្រាយឱ្យទទួលបានលទ្ធផលល្អប្រសើរ។