.jpg)
កម្មវិធី WhatsApp ដែលមាននៅក្នុងទូរស័ព្ទដៃ។ ហុង មិនា
ភ្នំពេញៈ ក្រសួងប្រៃសណីយ៍ និងទូរគមនាគមន៍ប្រាប់ឱ្យអ្នកប្រើប្រាស់ប្រព័ន្ធ WhatsApp ប្រុងប្រយ័ត្ននឹងល្បិចលួចថ្មីដោយការផ្ញើជាសារឱ្យអ្នកប្រើប្រាស់បញ្ជូនលេខកូដ ៦ ខ្ទង់ ដែលងាយនឹងឱ្យចោរបច្ចេកវិទ្យាចូលគ្រប់គ្រងគណនីរបស់ខ្លួន ដើម្បីប្រព្រឹត្តសកម្មភាពផ្សេងៗដែលនាំឱ្យប៉ះពាល់ដល់ផលប្រយោជន៍។
ជាមួយនឹងការប្រកាសឱ្យប្រុងប្រយ័ត្ននេះ ក្រសួងក៏បានដាក់ចេញវិធានការរារាំងការវាយប្រហារតាមប្រព័ន្ធ WhatsApp នេះដោយស្នើឱ្យអ្នកប្រើរាយការណ៍ ឬសុំជំនួយបច្ចេកទេសមកកាន់នាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មានរបស់ក្រសួងផងដែរ។
តាមសេចក្តីជូនដំណឹងរបស់ក្រសួងនេះបានឱ្យដឹងពីថ្ងៃទី ៥ មករាថា៖ «នាពេលថ្មីៗនេះ ការវាយប្រហារតាម WhatsApp កំពុងកើតមានឡើងគួរឱ្យព្រួយបារម្ភ។ ចោរបច្ចេកវិទ្យាបានវាយប្រហារដោយក្លែងបន្លំធ្វើជាផ្ញើសារតាម WhatsApp ទៅកាន់អ្នកប្រើ (ជនរងគ្រោះ) ដែលអាចមានខ្លឹមសារថា «sorry! I sent 6- digit code by SMS by mistake.Can you transfer it to me? It is urgent»។ ខ្លឹមសារទាំងនេះក៏អាចត្រូវបានផ្ញើពីមិត្តភក្តិ ឬអ្នកដែលយើងស្គាល់ផងដែរក្នុងករណីដែល WhatsApp របស់បុគ្គលនោះត្រូវបានគេលួចរួចហើយ»។
បើតាមក្រសួងនេះ ដើម្បីចៀសវាងធ្លាក់ក្នុងអន្ទាក់បោកប្រាស់ អ្នកប្រើប្រាស់ WhatsApp គួរត្រួតពិនិត្យលើខ្លឹមសារ និងគណនីរបស់បុគ្គលដែលបានផ្ញើសារមកនោះឱ្យបានច្បាស់លាស់ និងមិនគួរធ្វើតាមការទាមទារនោះទេ។ ក្នុងករណីសង្ស័យ អ្នកប្រើប្រាស់គួរតែទូរស័ព្ទទៅសួរម្ចាស់គណនីផ្ទាល់ ហើយបើដឹងថា មិនមែនជាម្ចាស់ពិតប្រាកដ អ្នកប្រើប្រាស់អាចបិទការទទួលសារនោះ តាមរយៈពាក្យជាភាសាអង់គ្លេសថា block។
ក្រសួងបានបន្ថែមថា៖ «អ្នកប្រើប្រាស់ទាំងអស់មិនត្រូវផ្ញើសារលេខ ៦ ខ្ទង់ ទៅឱ្យអ្នកប្រើប្រាស់ដទៃនោះទេបើទោះជាមនុស្សដែលធ្លាប់ស្គាល់គ្នា ឬធ្លាប់ផ្ញើសារជាមួយគ្នារាល់ថ្ងៃក៏ដោយ ជាពិសេសលេខកូដ ៦ ខ្ទង់នៃកម្មវិធីបណ្តាញសង្គម ដូចជា WhatApp Telegram Messenger Viber line ឬកម្មវិធីប្រើប្រាស់សេវាធនាគារតាមទូរស័ព្ទជាដើម»។
ក្រសួងប្រៃសណីយ៍បន្ថែមដែរថា ក្នុងករណីអ្នកប្រើប្រាស់បានបញ្ជូនលេខកូដ ៦ ខ្ទង់ ដែលបានពីក្រុមហ៊ុន WhatsApp នោះចោរបច្ចេកវិទ្យាអាចចូលគណនី WhatApp របស់អ្នកប្រើប្រាស់ ដោយប្រើលេខ ៦ ខ្ទង់នោះ និងលេខទូរស័ព្ទរបស់អ្នកប្រើប្រាស់បានដោយជោគជ័យ។
លោក ង៉ែត មុសេ ទីប្រឹក្សាឯករាជ្យផ្នែកសន្តិសុខបច្ចេកវិទ្យាបានប្រាប់ ភ្នំពេញ ប៉ុស្តិ៍ កាលពីម្សិលមិញថា ការប្រើវិធីសាស្ត្រថ្មីៗនេះគឺជាឥរិយាបថរបស់ចោរបច្ចេកវិទ្យាដែលតែងផ្លាស់ប្តូរវិធីសាស្ត្រថ្មីៗ ដើម្បីឱ្យអ្នកប្រើចាញ់បោកទៅតាមឧបាយកលទាំងនោះ។
លោកបន្តថា តាមរយៈបទពិសោធដែលធ្លាប់ជួបប្រទះគឺជាចេតនារបស់ចោរក្នុងការលួចយកគណនីមកបោកបញ្ឆោតដើម្បីទទួលបានលុយកាក់ ឬលួចទិន្នន័យ និងឯកសារមួយចំនួនពីអ្នកប្រើប្រាស់។
លោកបញ្ជាក់ថា៖ «ពួកចោរបច្ចេកវិទ្យាទាំងនេះ តែងស្វែងរកមធ្យោបាយថ្មី បន្ទាប់ពីអ្នកប្រើប្រាស់បានដឹងពីវិធីសាស្ត្រនៃការវាយប្រហារមុនៗដែលនាំឱ្យអ្នកប្រើប្រាស់ដែលខ្វះការពិចារណានឹងបន្តចាញ់បោក។
នៅពេលយើងក្លាយជាគោលដៅនៃការវាយប្រហារលេខទូរស័ព្ទរបស់យើងនឹងក្លាយទៅជាវិធីសាស្ត្រដែលឱ្យក្រុមចោរបច្ចេកវិទ្យាធ្វើសកម្មភាព»។
ជាមួយនឹងការបកស្រាយយ៉ាងដូច្នេះលោក ង៉ែត មុសេ បានជំរុញឱ្យអ្នកប្រើប្រាស់មានការប្រុងប្រយ័ត្ន ជាពិសេសនៅតាមស្ថាប័នធំៗ មិនថាតែស្ថាប័នឯកជន ឬរដ្ឋ ដែលប្រើប្រាស់ប្រព័ន្ធទាំងនេះសម្រាប់ជាប្រយោជន៍ក្នុងការបំពេញការងារ ខណៈលោកលើកទឹកចិត្តឱ្យធ្វើរបាយការណ៍ជាក់លាក់អំពីហេតុការណ៍ដែលខ្លួនជួបប្រទះទៅស្ថាប័នមានសមត្ថកិច្ច ជាពិសេសគឺក្រុមហ៊ុនបច្ចេកវិទ្យានោះដោយផ្ទាល់៕
