ភ្នំពេញៈ ក្រសួងសុខាភិបាលទទូចដល់គណៈវិជ្ជាជីវៈសុខាភិបាលត្រូវពង្រឹងសមត្ថភាព និងអនុវត្តក្រមសីលធម៌គ្រូពេទ្យ ដើម្បីចូលរួមលុបបំបាត់ការត្អូញត្អែររបស់ប្រជាពលរដ្ឋដែលថា គ្រូពេទ្យមួយចំនួនប្រើប្រាស់ពាក្យសម្តីមិនសមរម្យ និងមិនយកចិត្តទុកដាក់ចំពោះអ្នកជំងឺជាដើម។
ការទទូចនេះបានធ្វើឡើងនៅក្នុងកិច្ចប្រជុំស្តីពីការបូកសរុបលទ្ធផលការងារប្រចាំឆ្នាំ ២០១៩ និងលើកទិសដៅអនុវត្តការងារបន្តសម្រាប់ឆ្នាំ ២០២០ របស់គណៈកម្មការកណ្តាលសម្រាប់ត្រួតពិនិត្យ តាមដាន និងវាយតម្លៃសេវាវេជ្ជសាស្ត្រអមវេជ្ជសាស្ត្រ និងជំនួយវេជ្ជសាស្ត្រឯកជនកាលពីថ្ងៃអង្គារនៅសណ្ឋាគារកាំបូឌីយ៉ាណាដែលមានការចូលរួមពីក្រុមគ្រូពេទ្យជាង ៥០ នាក់។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងថាកន្លងទៅក៏មានក្រុមគ្រូពេទ្យមួយចំនួនតូចមិនបានគោរពទៅតាមក្រមសីលធម៌វិជ្ជាជីវៈ ហើយបង្កឲ្យមានការរិះគន់ ដែលធ្វើឲ្យប៉ះពាល់កិត្តិយសដល់ក្រុមគ្រូពេទ្យទាំងមូល។
លោកស្រីបញ្ជាក់ថា៖ «ដូច្នេះដើម្បីលុបបំបាត់ការត្អូញត្អែររបស់ប្រជាពលរដ្ឋ គណៈវិជ្ជាជីវៈសុខាភិបាលទាំងអស់ត្រូវតែពង្រឹងសមត្ថភាពរបស់ខ្លួន ក៏ដូចជាយន្តការនៃការគ្រប់គ្រងដល់អ្នកប្រកបវិជ្ជាជីវៈសុខាភិបាល ហើយជាពិសេសទៀត គឺត្រូវតែពង្រឹងនូវក្រមសីលធម៌របស់គ្រូពេទ្យ។ យើងត្រូវរួមគ្នាធ្វើម៉េចឲ្យមានការកែប្រែ និងផ្លាស់ប្តូរឥរិយាបថរបស់គ្រូពេទ្យមួយចំនួនតូចដែលគាត់មិនទាន់មានអត្តចរិតល្អ និងមានបញ្ហាធ្វើឲ្យអតិថិជន ឬអ្នកជំងឺតែងតែមានការថ្នាំងថ្នាក់នោះ»។
ថ្លែងដោយទទូចពីបញ្ហានេះលោកស្រីក៏បានលើកឡើងដោយយោងនូវអនុក្រឹត្យចុះហត្ថលេខាដោយប្រមុខរាជរដ្ឋាភិបាលស្តីអំពីក្រមសីលធម៌គ្រូពេទ្យមកបញ្ជាក់ផងដែរថា តួនាទីចាំបាច់របស់គណៈវិជ្ជាជីវៈគ្រូពេទ្យគឺត្រូវតែពិនិត្យ និងតាមដាននូវការអនុវត្តក្រមសីលធម៌គ្រូពេទ្យសម្រាប់អ្នកប្រកបវិជ្ជាជីវៈសុខាភិបាល។
លោកបន្ថែមថា៖ «នៅពេលដែលគាត់ (គ្រូពេទ្យ) មកចុះបញ្ជិកាជាមួយគណៈវិជ្ជាជីវៈនេះគឺត្រូវតែពិនិត្យឡើងវិញ ថាតើគាត់បានយល់ដឹងអំពីក្រមសីលធម៌គ្រូពេទ្យទៅតាមអនុក្រឹត្យដែលបានចែងស្តីពីក្រមសីលធម៌គ្រូពេទ្យហើយឬនៅ? ពីព្រោះនៅក្នុងអនុក្រឹត្យនេះបាននិយាយច្បាស់ណាស់ថា អ្នកដែលមកសុំចុះបញ្ជិកា គឺត្រូវតែបង្ហាញថាគាត់បានអាននូវអនុក្រឹត្យស្តីពីវិជ្ជាជីវៈ និងត្រូវតែស្បថទៀតថានឹងអនុវត្តទៅតាមច្បាប់នេះ ដោយមានការចុះហត្ថលេខាបញ្ជាក់»។
ទោះជាយ៉ាងណាលោកស្រី ឱ វណ្ណឌីន បានលើកទឹកចិត្តដល់ក្រុមគ្រូពេទ្យភាគច្រើនដែលបានគោរពត្រឹមត្រូវទៅតាមវិជ្ជាជីវៈរបស់ខ្លួន តែបានជំរុញឲ្យចូលរួមបន្ថែមទៀតក្នុងការពង្រឹងវិជ្ជាជីវៈនេះ ដើម្បីធ្វើឲ្យវិស័យសុខាភិបាលនៅកម្ពុជាប្រកបដោយប្រសិទ្ធភាព និងពេញចិត្តពីប្រជាពលរដ្ឋទូទៅ។
យោងតាមច្បាប់ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាលឆ្នាំ ២០១៦ ដែលបានចែងពីយន្តការ និងការប្រព្រឹត្តទៅរបស់អ្នកប្រកបវិជ្ជាជីវៈសុខាភិបាលទូទាំងប្រទេសបានចែងពីការដាក់ទណ្ឌកម្មខាងវិន័យ និងបណ្តឹងតវ៉ាចំពោះការប្រព្រឹត្តកំហុសឆ្គងក្នុងការបំពេញការងារ ដូចជា ការព្រមាន ការកត់ទុកក្នុងឯកសារផ្ទាល់ខ្លួន រហូតដល់ការផ្អាក ឬដកហូត និងលុបឈ្មោះចេញពីបញ្ជីគណៈវិជ្ជាជីវៈសុខាភិបាលផងដែរ។
លោក អ៊ុន សាន ប្រធានគណៈគិលានុបដ្ឋាកកម្ពុជាដែលគ្រប់គ្រងគិលានុបដ្ឋាកជាង ២០ ០០០ នាក់ ទាំងក្នុងវិស័យឯកជន និងរដ្ឋនៅទូទាំងប្រទេសបានប្រាប់ភ្នំពេញប៉ុស្តិ៍កាលពីម្សិលមិញដោយបានទទួលស្គាល់នូវចំណុចខ្វះខាតមួយចំនួនដែលកើតចេញពីក្រុមគ្រូពេទ្យមួយចំនួនតូច។
យ៉ាងណាក៏ដោយលោកបានអះអាងថា គណៈគិលានុបដ្ឋាកកម្ពុជាបានបណ្តុះបណ្តាលជាប្រចាំដល់គ្រូពេទ្យទាំងអស់ដែលនៅក្រោមឱវាទរបស់ខ្លួន និងតែងតែជំរុញឲ្យគ្រូពេទ្យគោរពទៅតាមក្រមសីលធម៌វិជ្ជាជីវៈរបស់ខ្លួន ព្រមទាំងធ្លាប់បានដាក់ទណ្ឌកម្មចំពោះគ្រូពេទ្យទាំងឡាយណាដែលបានប្រព្រឹត្តកំហុសទៀតផង។
លោកបញ្ជាក់ថា៖ «យើងបានពង្រឹងរហូតទៅលើក្រមសីលធម៌របស់យើងដើម្បីធ្វើម៉េចឲ្យពលរដ្ឋទទួលបានសេវាល្អ គុណភាព និងសុវត្ថិភាព។ ពេលខ្លះក៏មានការយល់ច្រឡំលើទំនាក់ទំនងគ្នារវាងអ្នកជំងឺ និងគ្រូពេទ្យ ហើយការខ្វះខាតតិចតួច យើងក៏មានការលើកទឹកចិត្តដោយធ្វើយ៉ាងណាពង្រឹងការងាររបស់ខ្លួន»។
គណៈវិជ្ជាជីវៈសុខាភិបាលដែលស្ថិតក្រោមការគ្រប់គ្រងរបស់ក្រសួងសុខាភិបាលត្រូវបានបែងចែក ដើម្បីសម្រួលឲ្យការគ្រប់គ្រងអ្នកប្រកបវិជ្ជាជីវៈសុខាភិបាលទាំងអស់មាន គុណវុឌ្ឍិ សមត្ថភាព សម្បទាគ្រប់គ្រាន់ក្នុងការប្រកបវិជ្ជាជីវៈដែលមានដូចជា គណៈគ្រូពេទ្យ គណៈគិលានុបដ្ឋាក-កម្ពុជា គណៈឆ្មបកម្ពុជា គណៈទន្តពេទ្យកម្ពុជា និងគណៈឱសថការីកម្ពុជាជាដើម៕