.jpg)
ស្ត្រីនៅភ្នំពេញម្នាក់ក្នុងពេលកំពុងបីកូនកាលពីថ្ងៃទី ២៤ កញ្ញាថ្មីៗនេះ។ ហេង ជីវ័ន
ភ្នំពេញៈ ក្រសួងមហាផ្ទៃបានណែនាំឱ្យរដ្ឋបាលឃុំ-សង្កាត់ ទូទាំងប្រទេសត្រូវរៀបចំបង្កើតគណៈកម្មាធិការទទួលបន្ទុកកិច្ចការនារី និងកុមារនៅតាមឃុំ-សង្កាត់របស់ខ្លួន ដើម្បីជួយការងារដល់រដ្ឋបាលឃុំ-សង្កាត់ ប្រសិនបើមិនទាន់បានបង្កើតគណៈកម្មាធិការនេះនៅឡើយទេនោះ។
កាលពីថ្ងៃទី ២២ ខែ កញ្ញា ឆ្នាំ ២០២០ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានចុះហត្ថលេខាលើប្រកាសមួយ ដើម្បីកំណត់អំពីការរៀបចំ និងការប្រព្រឹត្តទៅរបស់គណៈកម្មាធិការទទួលបន្ទុកកិច្ចការនារី និងកុមារ ឃុំ-សង្កាត់ដែលមានគោលដៅកំណត់អំពីសមាសភាព តួនាទី ភារកិច្ច និងរបៀបរបបការងាររបស់គណៈកម្មាធិការនេះ។
ប្រកាសនេះមាន ៨ ជំពូក និង ២៥ ប្រការបានឱ្យដឹងថា គណៈកម្មាធិការនេះ មានភារកិច្ច ផ្តល់យោបល់ និងជួយរដ្ឋបាលឃុំ សង្កាត់ ក្នុងការសម្របសម្រួល និងអនុវត្តសកម្មភាពសេវាសង្គមនៅតាមមូលដ្ឋានរបស់ខ្លួន និងមានសមាជិកចំនួនជាង ១០ រូបដែលមេឃុំ ឬចៅសង្កាត់ជាប្រធានគណៈកម្មាធិការ។ នៅក្នុងអំឡុងពេលមិនទាន់បានរៀបចំបង្កើតគណៈកម្មាធិការទទួលបន្ទុកកិច្ចការនារី និងកុមារឃុំ សង្កាត់ តាមស្មារតីប្រកាសនេះ គណៈកម្មាធិការទទួលបន្ទុកកិច្ចការនារី និងកុមារឃុំ សង្កាត់ ដែលបានបង្កើត ហើយតាមស្មារតីនៃសេចក្តីណែនាំកាលពីឆ្នាំ ២០០៧ ត្រូវបន្តអនុវត្តការងាររបស់ខ្លួន។
លោកស្រី ជី ច័ន្ទរស្មី ប្រធាននាយកដ្ឋានកិច្ចការរដ្ឋបាល ក្រុង ស្រុក ឃុំ សង្កាត់នៃក្រសួងមហាផ្ទៃបានប្រាប់ភ្នំពេញប៉ុស្តិ៍កាលពីថ្ងៃ ៣០ កញ្ញា ថា កន្លងទៅគណៈកម្មាធិការនេះគឺត្រូវបានតម្រូវឱ្យមាននៅតាមឃុំ សង្កាត់ រួចមកហើយ តាមរយៈសេចក្តីណែនាំ។ ប៉ុន្តែដោយសារបច្ចុប្បន្នមុខងាររបស់គណៈកម្មការនេះ កាន់តែធំ និងត្រូវបំពេញតួនាទី ឬភារកិច្ចច្រើន ទើបក្រសួងសម្រេចបង្កើតជាប្រកាសឱ្យកាន់តែមានវិសាលភាពតែម្តង។
លោកស្រីថ្លែងថា៖ «ដោយសារតែការងារ និងតួនាទីភារកិច្ចរបស់គណៈកម្មាធិការនេះកើនច្រើន មានការទម្លាក់ការងារឱ្យគាត់ច្រើនមុខ ដល់ពេលអ៊ីចឹង យើងគ្រាន់តែកែវាបន្តិចទៅពីសេចក្តីណែនាំមកជាប្រកាសដើម្បីឱ្យគាត់ស្រួលធ្វើការ ហើយក៏ប្រមូលផ្តុំការងារទាំងអស់ចូលគ្នា (ប្រកាស)»។ «កាលពីកន្លងមក នៅពេលយើងដាក់ការងារណាមួយឱ្យគាត់ អ៊ីចឹង យើងចេញលិខិតមួយ និងការណែនាំបន្ថែមដែលធ្វើម្តងមួយ។ ធម្មតាដល់ពេលច្រើនពេកទៅ អ្នកធ្វើការក៏គាត់ច្របូកច្របល់ដែរ ដល់ពេលយើងចេញប្រកាសនេះតែមួយ ហើយសង្ខេបឡើងវិញ និងប្រមូលឯកសារទាំងអស់រៀបឱ្យស្អាត គាត់ក៏ស្រួលធ្វើការដែរ»។
លោក ពា ហន ចៅសង្កាត់អូឡាំពិកដែលបានបង្កើតគណៈកម្មាធិការនេះរួចរាល់ហើយបានឱ្យដឹងថា គណៈកម្មាធិការនេះគឺបានចូលរួមចំណែកជួយដល់ស្ត្រី និងកុមារដែលជួបប្រទះនៅក្នុងមូលដ្ឋានបានយ៉ាងច្រើន។
លោកថា៖ «បើការណែនាំថ្មី គឺយើងនឹងធ្វើតាមការណែនាំថ្មីនេះ ហើយវាក៏កាន់តែប្រសើរផងដែរ ប្រសិនជាប្រកាសនេះបានបញ្ជាក់យ៉ាងច្បាស់អំពីតួនាទី ភារកិច្ច និងបែបបទនៃការប្រព្រឹត្តទៅរបស់គណៈកម្មាធិការនេះក្នុងប្រកាសតែមួយ»។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានលើកឡើងកាលពីម្សិលមិញថា ការបង្កើតគណៈកម្មាធិការនេះនឹងអាចចូលរួមឱ្យបានយ៉ាងសកម្មដល់ពលរដ្ឋមូលដ្ឋាន ខណៈបច្ចុប្បន្ននេះគឺបញ្ហាអំពើហិង្សាលើស្ត្រី និងកុមារមានការកើនឡើង។
លោកបានបញ្ជាក់ថា៖ «វាក៏បានចូលរួមផ្តល់សិទ្ធិ សេរីភាព និងអំណាចដល់សមាជិកគណៈកម្មាធិការនេះឱ្យបានធ្វើការងារឱ្យបានពេញដៃពេញជើង និងមានប្រសិទ្ធភាពខ្ពស់ជាងមុន។ បន្ថែមពីនេះ ដើម្បីធ្វើឱ្យដំណើរការនេះ ប្រសិទ្ធភាពគឺត្រូវការមិនត្រឹមតែប្រកាសនោះទេ គឺត្រូវមានឆន្ទៈនយោបាយពិតប្រាកដនៅក្នុងការផ្តល់អំណាចឱ្យឃុំ សង្កាត់ បានធ្វើកិច្ចការងារនេះ និងមានកញ្ចប់ថវិកាគ្រប់គ្រាន់»៕
