ភ្នំពេញៈ ក្រសួងធនធានទឹក និងឧតុនិយមកាលពីម្សិលមិញ បានជូនដំណឹងជាថ្មីពីបញ្ហាអាកាសធាតុនៅកម្ពុជា ចាប់ពីថ្ងៃទី ២២ ដល់ថ្ងៃទី ២៨ខែ សីហា ខណៈឥទ្ធិពលប្រព័ន្ធសម្ពាធទាប និងព្យុះទី១១ ឈ្មោះ «បៃលូ» នឹងធ្វើឲ្យកម្ពុជា មានភ្លៀងធ្លាក់ពីតិចទៅច្រើន និងឲ្យពលរដ្ឋមានការប្រុងប្រយ័ត្នខ្ពស់ ចំពោះបាតុភូតខ្យល់ ផ្គរ រន្ទះ និងរលកសមុទ្រ។
ក្រសួងបានបញ្ជាក់ថា ចាប់ពីថ្ងៃទី ២២ ដល់ថ្ងៃទី ២៤ ខែ សីហា ស្ទើរទូទាំងប្រទេស នឹងមានភ្លៀងធ្លាក់រាយប៉ាយក្នុងកម្រិតពីតិចទៅបង្គួរ និងចាប់ពីថ្ងៃទី ២៥ ដល់ថ្ងៃទី ២៨ ខែសីហាបណ្តាខេត្តនៅតំបន់មាត់សមុទ្រ រួមមាន ខេត្តកោះកុង និងខេត្តព្រះសីហនុ អាចនឹងមានភ្លៀងធ្លាក់ពីបង្គួរទៅច្រើន។ ឥទ្ធិពលប្រព័ន្ធសម្ពាធទាប និងព្យុះធ្វើឲ្យលើផ្ទៃមេឃមានខ្យល់បោកបក់ខ្លាំង និងរលកសមុទ្រខ្ពស់។ បណ្តាខេត្តចាប់ពីតំបន់វាលទំនាបភាគកណ្តាលឡើងទៅលើនឹងមានភ្លៀងធ្លាក់ក្នុងកម្រិតពីបង្គួរទៅច្រើន។
ក្រសួងបញ្ជាក់ថា៖ «បណ្តារាជធានីខេត្តនៅប៉ែកខាងក្រោមនឹងអាចមានភ្លៀងធ្លាក់ពីមធ្យមទៅបង្គួរ។ ទន្ទឹមនោះអាចមានផ្នែកខ្លះភ្លៀងធ្លាក់ច្រើន។ សូមសាធារណជនមានការប្រុងប្រយ័ត្នខ្ពស់ ចំពោះបាតុភូត ខ្យល់ ផ្គរ រន្ទះ និងរលកសមុទ្រ ដែលអាចកើតមានឡើងជាយថាហេតុ»។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម មិនអាចសុំការបកស្រាយបន្ថែមជុំវិញបញ្ហាអាកាសធាតុនេះបានទេពីម្សិលមិញ ដោយមិនមានអ្នកទទួលទូរស័ព្ទ។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុ បានថ្លែងប្រាប់ភ្នំពេញប៉ុស្ដិ៍ម្សិលមិញថា ទាក់ទងនឹងស្ថានភាពអាកាសធាតុនេះ លោកអភិបាលខេត្ដព្រះសីហនុបានដាក់បទបញ្ជាឲ្យជូនដំណឹងដល់ប្រជាពលរដ្ឋ និងត្រៀមលក្ខណៈ និងកងកម្លាំងរបស់ខេត្ដជាមុន ដើម្បីជួយសង្គ្រោះដល់ពលរដ្ឋ។
លោកថ្លែងថា៖ «ជាបទបញ្ជារបស់ឯកឧត្ដមអភិបាលខេត្ដទាក់ទងនឹងស្ថានភាពអាកាសធាតុនៅក្នុងខេត្ដព្រះសីហនុ គឺលោកបានចេញបទបញ្ជាឲ្យធ្វើការផ្សព្វផ្សាយជូនដំណឹងដល់ប្រជាពលរដ្ឋ និងប្រជានេសាទ ឲ្យមានការប្រុងប្រយ័ត្នខ្ពស់បំផុត ចំពោះស្ថានការណ៍អាកាសធាតុដែលមិនល្អ។ ក្នុងនោះលោកក៏បញ្ជាឲ្យកម្លាំង និងមន្រ្ដីរាជការក្នុងខេត្ដទាំងអស់ត្រៀមលក្ខណៈរួចជាស្រេចក្នុងការជួយសង្គ្រោះ ចំពោះហេតុការណ៍ដែលអាចកើតមានឡើងជាយថាហេតុណាមួយ»។
លោក សុខ សុទ្ធី អ្នកនាំពាក្យរដ្ឋបាលសាលាខេត្ដកោះកុង ថ្លែងកាលពីម្សិលមិញដែរថា តាមរយៈសេចក្ដីជូនដំណឹងរបស់ក្រសួងធនធានទឹក អំពីបញ្ហាអាកាសធាតុនេះ រដ្ឋបាលខេត្ដបានបន្តផ្សព្វផ្សាយដល់ពលរដ្ឋពិសេសប្រជានេសាទឲ្យមានការប្រុងប្រយ័ត្នរួចហើយ។
លោកថ្លែងថា ទាក់ទងនឹងជំនន់ទឹកភ្លៀងដែលបានជន់លិចកាលពីដើមខែសីហានោះ គឺបានស្រកចុះវិញហើយ ព្រោះខេត្ដកោះកុង មានប្រឡាយបង្ហូរទឹកភ្លៀងចេញទៅបឹង និងសមុទ្រច្រើន។ ដូច្នេះមិនបង្កឲ្យមានជំនន់ទឹកភ្លៀងយូរថ្ងៃ ធ្វើឲ្យប៉ះពាល់ដល់ពលរដ្ឋទេ។
លោកថ្លែងថា៖ «រដ្ឋបាលខេត្ដនឹងគណៈបញ្ជាការឯកភាពខេត្ដបានផ្សព្វផ្សាយសេចក្ដីជូនដំណឹងរបស់ក្រសួងធនធានទឹក ទៅដល់ប្រជាពលរដ្ឋ ហើយក៏បានត្រៀមលក្ខណៈទប់ទល់ និងជួយសង្គ្រោះប្រជាពលរដ្ឋក្នុងករណីមានឧបទ្ទវហេតុណាមួយកើតឡើងដោយចៃដន្យផងដែរ»។
គួររំឭកថា គ្រោះទឹកជំនន់ទឹកភ្លៀងបានបង្កផលប៉ះពាល់ដល់សង្កាត់ទាំង ៤ នៃក្រុងព្រះសីហនុ និងស្រុកព្រៃនប់។ ក្នុងនោះពលរដ្ឋរងផលប៉ះពាល់ចំនួន ១ ៧៣៦ គ្រួសារ ផ្ទះចំនួន ៩៣៧ ខ្នង និងសម្ភារ រថយន្ត ម៉ូតូ ម៉ាស៊ីនភ្លើង និងគ្រឿងអេឡិចត្រូនិករាប់រយគ្រឿងផ្សេងទៀត។
ជាវិធានការដើម្បីរំដោះទឹកភ្លៀងចេញពីក្រុងព្រះសីហនុ លោក គួច ចំរើន អភិបាលខេត្ដព្រះសីហនុ បានអំពាវនាវដល់អ្នកចាក់ដី និងអ្នកសាងសង់រំលោភលើអូរប្រឡាយត្រូវប្រញាប់កាយចេញវិញ ដើម្បីរំដោះជំនន់ទឹកភ្លៀងដែលកំពុងជន់លិចក្រុង និងស្រុកមួយចំនួនក្នុងខេត្ដនេះ៕