ភ្នំពេញ: ក្រសួងវប្បធម៌ និងវិចិត្រសិល្បៈពីម្សិលមិញបានកោះហៅម្ចាស់ផលិតកម្មមរតកមេឌៀ (Morodok Media) ឲ្យចូលបំភ្លឺជុំវិញការផលិតវីដេអូចម្រៀងមានខ្លឹមសារប្រមាថពលរដ្ឋខេត្តព្រៃវែងតាមការស្នើសុំរបស់លោក ជា សុមេធី អភិបាលខេត្តព្រៃវែង ប៉ុន្ដែអ្នកគ្រប់គ្រងផលិតកម្មនេះថា វីដេអូនោះគ្រាន់តែចង់អប់រំកុំឲ្យរើសអើងអ្នកព្រៃវែងប៉ុណ្ណោះ។
លោក ឡុង ប៉ុណ្ណាស៊ីរីវត្ថ រដ្ឋលេខាធិការ និងជាអ្នកនាំពាក្យក្រសួងវប្បធម៌ និងវិចិត្រសិល្បៈបានថ្លែងពីម្សិលមិញថា ក្រុមប្រឹក្សាវិន័យនៃក្រសួងវប្បធម៌ និងវិចិត្រសិល្បៈបានកោះហៅម្ចាស់ផលិតកម្ម និងអ្នកពាក់ព័ន្ធឲ្យមកបំភ្លឺជុំវិញការផលិតបទចម្រៀងនេះរួចហើយ ដោយពួកគាត់ព្រមធ្វើតាមការស្នើសុំរបស់អភិបាលខេត្តព្រៃវែង និងក្រសួងវប្បធម៌។
លោកបន្តថា ផលិតកម្ម មរតក មេឌៀ នៅមិនទាន់មានការសុំច្បាប់ធ្វើអាជីវកម្ម និងច្បាប់ផលិតវីដេអូគ្រប់ប្រភេទឡើយ។ ដូច្នេះក្រុមប្រឹក្សាវិន័យនៃក្រសួងវប្បធម៌ និងវិចិត្រសិល្បៈបានតម្រូវឲ្យម្ចាស់ផលិតកម្មចេញមុខសុំទោសជាសាធារណៈ ធ្វើកិច្ចសន្យាបញ្ឈប់សកម្មភាពផលិតវីដេអូប៉ះពាល់សង្គម និងតម្រូវឲ្យសុំច្បាប់ ឬអាជ្ញាប័ណ្ណធ្វើអាជីវកម្មឲ្យបានត្រឹមត្រូវ។
លោកថា៖ «ជាទូទៅ បើចង់បើកផលិតកម្មភាពយន្តអ្វីមួយត្រូវតែមកចុះបញ្ជីនៅក្រសួងពាណិជ្ជកម្ម ហើយមកសុំអាជ្ញាប័ណ្ណពីអគ្គនាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈទៀត ដើម្បីដំណើរការអាជីវកម្មបានស្របច្បាប់។ ចំពោះអ្នកចង់ផលិតវីដេអូឃ្លីបពាណិជ្ជកម្មធំៗមួយចំនួនក៏ត្រូវមកសុំច្បាប់នៅក្រសួងវប្បធម៌ និងវិចិត្រសិល្បៈដែរ»។
លោក ឈួន សុខលីម អ្នកគ្រប់គ្រងទូទៅផលិតកម្មមរតក មេឌៀ បានថ្លែងពីម្សិលមិញថា ផលិតកម្មលោកគ្មានបំណងប្រមាថពលរដ្ឋខេត្តព្រៃវែងទេ។ ប៉ុន្តែចង់អប់រំកុំឲ្យមានការរើសអើង និងនិយាយមិនសមរម្យពីពលរដ្ឋខេត្តព្រៃវែង។
លោកបន្តថា កន្លងមកលោកធ្លាប់ឮពាក្យថា អ្នកខេត្តព្រៃវែងដើរសុំទាន ធ្វើចោរលួច ចោរប្លន់ ឬជាអ្នកក្រីក្រជាដើម។ ដូច្នេះទើបនិពន្ធបទចម្រៀងក្នុងន័យអប់រំកុំឲ្យស្អប់ខ្ពើមអ្នកខេត្តព្រៃវែង។
លោក សុខលីម បញ្ជាក់ថា៖ «ខ្ញុំបានចូលបំភ្លឺរួចហើយ គឺពួកខ្ញុំគ្មានបំណងអាក្រក់ណាមួយទេ តែបើមានការប៉ះពាល់ខ្លាំងមែន ខ្ញុំបានសុំទោសជាសាធារណៈរួចហើយ ខ្ញុំក៏អ្នកព្រៃវែង អ្នកនិពន្ធបទចម្រៀងក៏ជាអ្នកព្រៃវែងដែរ អ៊ីចឹងរឿងអីដែលពួកខ្ញុំទៅបង្អាប់ស្រុកកំណើតខ្លួនឯង? ទោះបីយ៉ាងណា ខ្ញុំបានយល់ព្រមលុបបទចម្រៀងចេញពីផេកអស់ហើយ ហើយខ្ញុំក៏បានកែតម្រូវរាល់អ្វីដែលជាកំហុសឆ្គងដែរ»។
តាមលិខិតរបស់លោក ជា សុមេធី អភិបាលខេត្តព្រៃវែងចុះថ្ងៃទី ៣ ខែកក្កដាដែលភ្នំពេញប៉ុស្ដិ៍ទទួលបានពីម្សិលមិញលោកបានស្នើសុំឲ្យចាត់វិធានការចំពោះផលិតកម្មមរតក មេឌៀ ដែលបានបង្ហោះឃ្លីបវីដេអូបទចម្រៀងមួយ «អ្នកព្រៃវែងអាក្រក់ត្រង់ណា»។
លិខិតបន្តថា នៅថ្ងៃទី ២ ខែកក្កដា ឆ្នាំ ២០២០ ផលិតកម្មមរតកមេឌៀ បានបង្ហោះឃ្លីបវីដេអូនេះក្នុងផេកហ្វេសប៊ុក Morodok Media និងបណ្ដាញយូធូប (YouTube) ដែលក្នុងខ្លឹមសារ និងរូបភាពថា អ្នកព្រៃវែងសុទ្ធតែអ្នកមិនល្អ ពូជចោរលួច ចោរប្លន់ កាប់ចាក់ សុំទាន និងជាអ្នកក្រ។
លិខិតដដែលបានចាត់ទុកអំពើនេះថា ជាការប្រមាថធ្ងន់ធ្ងរមកលើកិត្តិយស សេចក្ដីថ្លៃថ្នូរ និងសតិអារម្មណ៍ ពលរដ្ឋខេត្តព្រៃវែង ដោយបង្កើតនូវការរើសអើង និងជាសកម្មភាពវិទ្ធង្សនាវប្បធម៌យ៉ាងធ្ងន់ធ្ងរចំពោះប្រជាជាតិកម្ពុជា។
លិខិតបញ្ជាក់ថា៖ «ក្នុងន័យនេះ រដ្ឋបាលខេត្តព្រៃវែងសូមស្នើសុំឲ្យចាត់វិធានការច្បាប់ចំពោះផលិតកម្មមរតកមេឌៀ ជាពិសេសពាក់ព័ន្ធទៅនឹងបទល្មើសញុះញង់បង្កឲ្យមានការរើសអើង និងប្រព្រឹត្តបទល្មើស ហើយផលិតកម្មមរតក មេឌៀ ត្រូវលុបវីដេអូ និងធ្វើការបកស្រាយសុំទោសជាសាធារណៈឡើងវិញ»។
លោក ជា សុមេធី អភិបាលខេត្តព្រៃវែងកាលពីម្សិលមិញមិនអាចទាក់ទងសុំការបញ្ជាក់បន្ថែមជុំវិញករណីនេះបានទេ ដោយទូរស័ព្ទលោកគ្មានអ្នកទទួល។
តាមវីដេអូខារ៉ាអូខេរយៈពេលជិត ៣ នាទី ដែលបង្ហោះនេះបានរៀបរាប់ពីគ្រួសារអ្នកខេត្តព្រៃវែងបានចូលស្ដីដណ្ដឹងកូនក្រមុំអ្នកភ្នំពេញ ប៉ុន្ដែម្ដាយខាងស្រីបានផ្ដាច់ពាក្យ និងដេញទៅវិញ ក្រោយពីដឹងថា ខាងប្រុសជាអ្នកព្រៃវែង ហើយថែមទាំងពោលពាក្យប្រមាថថា «អ្នកព្រៃវែង សុទ្ធតែអ្នកមិនល្អ ពូជចោរលួច ចោរប្លន់ កាប់ចាក់ សុំទាន និងជាអ្នកក្រ»។ ដូច្នេះទើបធ្វើឲ្យមានការរិះគន់ខ្លាំងបែបនេះ៕
វីដេអូ៖