The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ឲ្យ​សាលា​អប់រំ​កុមារ​មាន​បញ្ហា​អូទីសឹម រើ​ទីតាំង

ក្រសួង​ឲ្យ​សាលា​អប់រំ​កុមារ​មាន​បញ្ហា​អូទីសឹម រើ​ទីតាំង

Content image - Phnom Penh Post
ទីតាំងសាលាទន្សាយ ដែលក្រសួងសង្គមកិច្ចឲ្យរើចេញ។ រូបថត ហេង ជីវ័ន

ក្រសួង​ឲ្យ​សាលា​អប់រំ​កុមារ​មាន​បញ្ហា​អូទីសឹម រើ​ទីតាំង

ភ្នំពេញៈ ក្រសួង​សង្គមកិច្ច​ អតីត​យុទ្ធជន និង​យុវនីតិ​សម្បទា​បាន​ឱ្យ​អង្គការ​សាលារៀន​ទន្សាយ​ដែល​ផ្ដល់​ការ​អប់រំ​ជា​ពិសេស​ដល់​កុមារ​កើត​មាន​បញ្ហា​អូទីសឹម ​(autism) រើ​ទីតាំង​ចេញ​ពី​បុរី​ទារក​ និង​កុមារ​ជាតិ​ និង​បាន​ប្រាប់​ឱ្យ​ស្វែងរក​អគារ​ប្រើប្រាស់​ផ្ទាល់​ខ្លួន​ បន្ទាប់​ពី​បាន​ជួយ​ផ្ដល់​ទីតាំង​ឱ្យ​អង្គការ​នេះ​ដំណើរការ​អស់​ពេល​ជាង​ ២២ ឆ្នាំ​ ជា​អ្វី​ដែល​ធ្វើ​ឲ្យ​ឪពុក​ម្ដាយ​កុមារ​ខ្លះ​អាច​ឲ្យ​កូន​ឈប់​រៀន​។

លោក ​ហ៊ុន​ ទូច​ នាយក​ប្រតិបត្តិ​អង្គការ​សាលា​រៀន​ទន្សាយ​ បាន​ប្រាប់​ភ្នំពេញ​ប៉ុស្ដិ៍​កាល​ពី​ថ្ងៃ​អង្គារ​ថា​ ខាង​អគ្គនាយកដ្ឋាន​សុខុមាលភាព​កុមារ​កាល​ពី​ថ្ងៃទី ​៣១​ ខែ ​កក្កដា​ បាន​ស្នើ​ឱ្យ​អង្គការ​សាលារៀន​ទន្សាយ​រើ​ទីតាំង​ចេញ​ពី​បុរី​ទារក​ និង​កុមារ​ជាតិ​ នៅ​ភូមិ​ដំណាក់​ធំ​ សង្កាត់​ស្ទឹងមានជ័យ​ ខណ្ឌ​មានជ័យ ​រាជធានី​ភ្នំពេញ ដោយ​លើក​ហេតុផល​ថា ​ដើម្បី​យក​អគារ​ប្រគល់​ឱ្យ​កុមារ​ពិការភាព​ផ្សេង ​ដែល​ត្រូវ​បញ្ជូន​ចេញ​ពី​មន្ទីរ​ពេទ្យ​គន្ធបុប្ឆា​។

លោក​ថា៖​ «ឥឡូវ​ពួក​យើង​កំពុង​ដើរ​រក​ជួល​បន្ទប់​សម្រាប់​ធ្វើ​កន្លែង​ការិយាល័យ​ធ្វើ​ការ​ ហើយ​ពួក​យើង​ក៏​បាន​ប្រជុំ​ប្រាប់​បុគ្គលិក​ទាំង​អស់​ឱ្យ​ត្រៀម​រើ​សម្ភារ​ប្រើប្រាស់​ចេញ​ដែរ​កាល​ពី ​២-៣ ថ្ងៃ​មុន​នេះ​ និង​តាម​គម្រោង​សាលារៀន​ទន្សាយ​នឹង​រើ​ទៅ​កាន់​សាលា​បឋម​សិក្សា​ទួលគោក​នៅ​ពាក់​កណ្ដាល​ខែ​ក្រោយ​នេះ ព្រោះ​សាលា​នេះ ​យើង​បាន​សហការ​គ្នា​ដើម្បី​បង្រៀន​កុមារ​ដែល​កើត​មាន​បញ្ហា​អូទីសឹម»។

លោក​បន្ត​ថា​ ការ​រើ​ទីតាំង​នេះ​ នឹង​ធ្វើ​ឱ្យ​អង្គការ​សាលារៀន​ទន្សាយ​ប្រឈម​ទៅ​នឹង​បញ្ហា​មួយ​ចំនួន​ដូចជា ​សិស្ស​អូទីសឹម​ខ្លះ ​អាច​ឈប់​រៀន​វិញ ​និង​គ្រូ​ខ្លះ​ទៀត​ឈប់​ពី​ការងារ​ ដោយសារ​មាន​ផ្ទះ​នៅ​ឆ្ងាយ​ពី​សាលា។ ​លើស​ពី​នេះ ​អង្គការ​នឹង​កាន់​តែ​ប្រឈម​ទៅ​នឹង​វិបត្តិ​ខ្វះខាត​ថវិកា​ ដោយសារ​ត្រូវ​ចំណាយ​លើ​ការ​បំពាក់​សម្ភារ​ឡើង​វិញ ខណៈ​ជំនួយ​ដែល​អង្គការ​ទទួល​បាន​តិច​ជាង​ការ​ចំណាយ​ប្រចាំ​ខែ​។

លោក​ថា៖ ​«យើង​មិនមែន​មិន​ចង់​រើ​ចេញ​ពី​ហ្នឹង​ទេ ​ប៉ុន្តែ​យើង​ចង់​ឱ្យ​រដ្ឋាភិបាល​ជួយ​គាំទ្រ​ផ្ដល់​ជា​អគារ​សិក្សា​នៅ​កន្លែង​ដែល​ជិត​គ្នា (បុរី​ទារក​និង​កុមារ​ជាតិ) ព្រោះ​យើង​គ្មាន​លុយ​ទៅ​ទិញ​ដី ​ឬ​សាងសង់​អគារ​ខ្លួន​ឯង​ទេ ប៉ុន្តែ​យើង​ចង់​ផ្ដល់​ការ​អប់រំ​ដល់​កុមារ​ដល់​ទី​កន្លែង ហើយ​ប្រសិន​បើ​ឱ្យ​សាលារៀន​ទន្សាយ​ទៅ​រដ្ឋ​គ្រប់គ្រង​ទៅ អាហ្នឹង​ក៏​ខ្ញុំ​ពេញ​ចិត្ត​ដែរ​»។

អង្គការ​សាលារៀន​ទន្សាយ​បាន​បង្កើត​ឡើង​កាល​ពី​ឆ្នាំ ​១៩៩៧ ដើម្បី​ការ​ផ្ដល់​ការ​អប់រំ​ដល់​កុមារ​ងាយ​រងគ្រោះ​ដោយសារ​កើត​មាន​បញ្ហា​អូទីសឹម​ នៅ​ក្នុង​បុរី​ទារក ​និង​កុមារ​ជាតិ​ហើយ​កាល​ពី​ឆ្នាំ ​២០០៨ ​អង្គការ​នេះ​បាន​បើក​ឱ្យ​មាន​ថ្នាក់​បង្រៀន​សមាហរណកម្ម​លើក​ដំបូង​ក្នុង​សាលា​បឋម​សិក្សា​ទួលគោក ​និង​បាន​បន្ត​ពង្រីក​ការ​អប់រំ​ដល់​កុមារ​អូទីសឹម​នៅ​តាម​សាលា​បឋម​សិក្សា​មួយ​ចំនួន​ទៀត​ក្នុង​ខេត្ត​ចំនួន ​៣ ​ដូច​ជា​ កំពង់ស្ពឺ​ កណ្ដាល និង​សៀមរាប។

បើ​តាម​លោក ​ហ៊ុន ទូច ​បច្ចុប្បន្ន អង្គការ​សាលារៀន​ទន្សាយ​កំពុង​ជួយ​ផ្ដល់​ការ​អប់រំ​ពិសេស​ដល់​កុមារ​កើត​មាន​បញ្ហា​អូទីសឹម​សរុប​ចំនួន ​៦៣៧ ​នាក់​ ដោយ​មាន​គ្រូ​បង្រៀន​សរុប ​៤៧ ​នាក់។​ក្នុង​នោះ​កុមារ​ប្រហែល ​៧០ ​នាក់ ​កំពុង​រៀន​នៅ​ក្នុង​បុរី​ទារក​ និង​កុមារ​ជាតិ ដោយ​អង្គការ​ទទួល​បាន​បន្ទប់​ចំនួន ​៤ ​ដែល ​៣ ​បន្ទប់​ធ្វើ​ជា​ថ្នាក់​រៀន ​និង ​១ ​បន្ទប់​ទៀត​ធ្វើ​ជា​ការិយាល័យ​​បុគ្គលិក។

អ្នកស្រី ​ក្រៃ សុខកញ្ញា រស់នៅ​សង្កាត់​ភ្នំពេញ​ថ្មី​ បាន​លើក​ឡើង​ថា អ្នកស្រី​មាន​កូន​ប្រុស​ម្នាក់​អាយុ ​៦ ​ឆ្នាំ កំពុង​សិក្សា​នៅ​ក្នុង​សាលារៀន​ទន្សាយ​នៅ​ក្នុង​បុរី​ទារក​ និង​កុមារ​ជាតិ ​ដោយសារ​កើត​អូទីសឹម​ គឺ​មិន​ចេះ​និយាយ​ និង​ខ្សោយ​ការ​ស្ដាប់​។

អ្នកស្រី​បាន​អះអាង​ថា បន្ទាប់​ពី​ទទួល​ដំណឹង​ពី​អង្គការ​ ឪពុក​ម្ដាយ​ដែល​មាន​កូន​រៀន​ទីតាំង​ចាស់​បាន​ជជែក​គ្នា​អំពី​ការ​បង្ខំ​ចិត្ត​ឱ្យ​កូន​ត្រូវ​ឈប់​រៀន​ ដោយសារ​ផ្ទះ​ឆ្ងាយ​ពី​សាលា​ទៅ​សាលា​បឋម​សិក្សា​ទួលគោក​ដែល​ជា​ទីតាំង​ថ្មី​។

អ្នកស្រី​ថា៖ ​«តាម​អារម្មណ៍​ខ្ញុំ ​រដ្ឋាភិបាល​ដូច​ជា​ មិន​ទទួល​ខុស​ត្រូវ​ទេ ហើយ​រដ្ឋាភិបាល​ដូច​ជា​ផ្ដោត​តែ​លើ​ក្មេង​ដែល​ពិការ​ដែរ ​តែ​ដូច​ជា​ ពិការ​ដៃ ​ឬ​ជើង​ ហើយ​ដូច​ជា​អត់​ផ្ដោត​លើ​កុមារ​អូទីសឹម​ ស្រប​ពេល​ដែល​ក្មេង​មាន​អូទីសឹម​ គេ​មិន​សូវ​ដឹង ហើយ​រដ្ឋាភិបាល​មិន​សូវ​ខ្វល់​ទៅ​ទៀត​ ព្រោះ​ឥឡូវ​ក្មេង​មាន​បញ្ហា​អូទីសឹម​កើត​ច្រើន​ដែរ​ហ្នឹង»​។

ទោះ​ជា​យ៉ាង​ណា​ លោក ​តូច ចាន់នី មន្ត្រី​នាំពាក្យ​ក្រសួង​សង្គម​កិច្ច​បាន​បញ្ជាក់​ថា ការ​ឱ្យ​អង្គការ​សាលារៀន​ទន្សាយ​រើ​ទីតាំង​នេះ​គឺ​មិនមែន​ដោយសារ​មាន​រឿង​ប៉ះ​ទង្គិច​គ្នា​អ្វី​ឡើយ ​ប៉ុន្តែ​ដោយសារ​រដ្ឋាភិបាល​ត្រូវ​ការ​អគារ​សម្រាប់​ផ្ដល់​ការ​មើលថែ​ដល់​ទារក​ពិការ​ដែល​ត្រូវ​បាន​ឪពុក​ម្ដាយ​បង្កើត​ហើយ​បោះ​ចោល​នៅ​តាម​មន្ទីរពេទ្យ​ដែល​បច្ចុប្បន្ន​កំពុង​កើត​ឡើង​ស្ទើរ​រៀងរាល់​ថ្ងៃ។​

លោក​ថា៖ ​«អ៊ីចឹង​ទីតាំង​រាល់​ថ្ងៃ​ហ្នឹង ​គឺ​យើង​ឱ្យ​គាត់​ខ្ចី​ប្រើប្រាស់​បណ្ដោះអាសន្ន​ទេ ហើយ​នៅ​ពេល​ណា​ក្រសួង​ត្រូវការ គឺ​ត្រូវ​ប្រគល់​ឱ្យ​ក្រសួង​ដោយ​គ្មាន​លក្ខខណ្ឌ​ទេ អ៊ីចឹង​នៅ​ពេល​ជួប​បញ្ហា​ដើម្បី​ពង្រីក​កម្មវិធី​ជួយ​សង្គ្រោះ​បន្ថែម​យើង​គ្មាន​ជម្រើស​ផ្សេង​ទេ»។

មន្ត្រី​នៅ​ក្រសួង​សង្គម​កិច្ច​ធ្លាប់​បាន​ប៉ាន់​ប្រមាណ​ថា​ ប្រទេស កម្ពុជា មាន​កុមារ​កើត​មាន​បញ្ហា​អូទីសឹម​ ប្រមាណ ​៥ ​ពាន់​នាក់​ រីឯ​ចំនួន​អង្គការ​ដែល​ជួយ​បណ្ដុះបណ្ដាល​ដល់​កុមារ​អូទីសឹម​នេះ​មាន​ជាង ​១០ ​អង្គការ​។

លោក ហ៊ុន ទូច បាន​បញ្ជាក់​ថា កុមារ​អូទីសឹម​ មាន​លក្ខណៈ​ខុសៗ​គ្នា ក្មេង​ខ្លះ​ខ្សោយ​ភាសា​មិន​អាច​និយាយ ​និង​ស្ដាប់​បាន ​ខ្លះ​ទៀត​ខ្សោយ​ខាង​ទំនាក់ទំនង​សង្គម​ដោយ​មិន​ចង់​មាន​មិត្តភក្ដិ និង​ខ្លះ​ទៀត​មាន​ការ​រពឹស​ខុស​ពី​ធម្មតា​ ប៉ុន្តែ​លោក​ថា កុមារ​អូទីសឹម​ខ្លះ​អាច​វិល​ទៅ​រក​ភាព​ធម្មតា​វិញ ប្រសិន​បើ​អាច​បណ្ដុះបណ្ដាល​ពួក​គេ​ឱ្យ​ចេះ​និយាយ​ភាសា​ និង​ស្ដាប់​ភាសា​បាន​នៅ​អំឡុង​អាយុ ​៥ ​ទៅ ៦ ​ឆ្នាំ៕​

អត្ថបទគួរចាប់អារម្មណ៍