.jpg)
វេទិកាសម្ដែងរបាំបុរាណខ្មែរនៅក្រៅប្រទេសដែលរៀបចំខុសទម្រង់លក្ខណៈជាតិ។ រូបថត FN
ភ្នំពេញ: ក្រសួងវប្បធម៌ និងវិចិត្រសិល្បៈបានណែនាំដល់អ្នករៀបចំទម្រង់របាំព្រះរាជទ្រព្យ ឬរបាំក្បាច់បុរាណខ្មែរទៅសម្តែងជាលក្ខណៈជាតិ និងអន្តរជាតិ ត្រូវតែសហការជាមួយក្រសួងឲ្យបានជិតស្និទ្ធតាមរយៈការផ្តល់របាយការណ៍សង្ខេបស្តីពីទស្សនទានគោលបំណង ទីកន្លែង និងបរិស្ថានច្បាស់លាស់ មុនពេលចេញទៅសម្ដែងក្នុងកម្មវិធីអ្វីមួយ ដើម្បីចៀសវាងរូបភាពមិនសមរម្យធ្វើឲ្យប៉ះពាល់តម្លៃសិល្បៈ និងកិត្តិយសជាតិ។
តាមសេចក្ដីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈចុះថ្ងៃទី ៤ ខែមីនាដែលភ្នំពេញប៉ុស្ដិ៍ទទួលបានពីម្សិលមិញឲ្យដឹងថា របាំព្រះរាជទ្រព្យ ឬហៅរបាំក្បាច់បុរាណខ្មែរត្រូវបានចុះបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូតាំងពីឆ្នាំ ២០០៣ រហូតមក។ ក្នុងសម័យចក្រភពអង្គរ របាំនេះជារបាំសក្ការៈរាំថ្វាយទេវៈ បួងសួងសុំសេចក្ដីសុខ សិរីសួស្ដី ថ្វាយពរជ័យដល់ជាតិ និងប្រជាជន។
សេចក្ដីប្រកាសព័ត៌មានបន្តថា ក្រោយថ្ងៃរំដោះ ៧ មករា ឆ្នាំ ១៩៧៩ រហូតបច្ចុប្បន្នក្រសួងវប្បធម៌ និងវិចិត្រសិល្បៈរីករាយខ្លាំងដោយសារការរស់ឡើងវិញនៃរបាំព្រះរាជទ្រព្យ ឬរបាំក្បាច់បុរាណខ្មែរដែលក្រសួងក៏ដូចជាបណ្ដាអង្គការ សមាគម ក្រុមសិល្បៈនានា ធ្វើការបង្ហាត់បង្រៀន បណ្ដុះបណ្ដាលយ៉ាងផុសផុលសំដៅរួមចំណែកថែរក្សា ការពារ និងផ្សព្វផ្សាយ ដើម្បីលើកតម្កើងអត្តសញ្ញាណជាតិ ហើយដែលប្រការនេះ ក្រសួងសូមលើកទឹកចិត្តឲ្យមានការចូលរួមកាន់តែច្រើនថែមទៀត។
សេចក្ដីប្រកាសព័ត៌មានបន្ថែមថា ក្រសួងបានសង្កេតឃើញថានៅមានអង្គការ សមាគម ក្រុមសិល្បៈ ឬបុគ្គលខ្លះៗបានប្រើប្រាស់ទម្រង់របាំនេះ ទោះដោយចេតនាក្ដី ខ្វះការប្រុងប្រយ័ត្ននូវក្បួនខ្នាតក្នុងរូបភាពមិនសមរម្យនៅតាមទីកន្លែងមិនសមស្របដែលជាហេតុធ្វើឲ្យអាប់ឱន ឬជាការបន្ទាបបន្ថោកដល់តម្លៃនៃសិល្បៈរបាំព្រះរាជទ្រព្យ ឬរបាំក្បាច់បុរាណខ្មែរប៉ះពាល់ដល់កិត្តិយសនៃអ្នករបាំបុរាណខ្មែរ ដែលមានមនសិការ វិជ្ជាជីវៈច្បាស់លាស់ និងប៉ះពាល់ដល់កិត្តិស័ព្ទនៃប្រជាជាតិខ្មែរទាំងមូល។
ក្រសួងវប្បធម៌បានណែនាំឲ្យបណ្តាអង្គការ សមាគម ក្រុមសិល្បៈនានាដែលនឹងរៀបចំទម្រង់របាំព្រះរាជទ្រព្យ ឬរបាំក្បាច់បុរាណខ្មែរទៅសម្តែងជាលក្ខណៈអន្តរជាតិនៅក្រៅប្រទេសត្រូវសហការជាមួយក្រសួងឲ្យបានជិតស្និទ្ធតាមរយៈការផ្តល់ជារបាយការណ៍សង្ខេបស្តីពីទស្សនទាន គោលបំណង ទីកន្លែង និងបរិស្ថានដែលរបាំព្រះរាជទ្រព្យ ឬរបាំក្បាច់បុរាណខ្មែរត្រូវសម្តែង ដើម្បីចៀសវាងនូវរូបភាពមិនសមរម្យ ប៉ះពាល់ដល់តម្លៃសិល្បៈ និងកិត្តិយសរបស់ជាតិ។ ក្រសួងវប្បធម៌អំពាវនាវចំពោះការសម្ដែងរបាំព្រះរាជទ្រព្យ ឬរបាំក្បាច់បុរាណខ្មែរនានាក្នុងប្រទេសក៏ត្រូវមានការប្រុងប្រយ័ត្នចំពោះក្បួនខ្នាត អ្នករបាំ និងទីតាំងឲ្យបានសមរម្យ និងតម្លៃមតិកមនុស្សជាតិ និងកេរដំណែលរបស់បុព្វបុរសខ្មែរផងដែរ។
លោក ឡុង ប៉ុណ្ណាស៊ីរីវត្ថ រដ្ឋលេខាធិការ និងជាអ្នកនាំពាក្យក្រសួងវប្បធម៌ និងវិចិត្រសិល្បៈបានថ្លែងពីម្សិលមិញថា លិខិតនេះគឺជាការនាំទៅគ្រប់សមាគម អង្គការ សិល្បៈករ និងអ្នកពាក់ព័ន្ធនានាជាទូទៅសិនដោយជំហានបន្ទាប់ក្រសួងនឹងកោះហៅអ្នកពាក់ព័ន្ធទាំងនោះមកធ្វើការអប់រំ ណែនាំបន្ថែមទៀត។ ក្រសួងគ្រោងកោះហៅពួកគាត់ទាំងនោះនៅពេលឆាប់ៗនេះ ដើម្បីឲ្យពួកគាត់ទទួលយកអនុសាសន៍រដ្ឋាភិបាល និងសេចក្ដីណែនាំរបស់ក្រសួងវប្បធម៌ និងវិចិត្រសិល្បៈដោយចៀសវាងការប្រព្រឹត្តដដែល។
លោកបញ្ជាក់ថា៖ «កន្លងមកពិតជាមានការប្រព្រឹត្តខុសឆ្គងបែបនេះមែន ដូច្នេះយើងចៀសវាងការខុសបន្តទៀតគឺយើងត្រូវតែផ្សព្វផ្សាយនូវអ្វីដែលជាការត្រឹមត្រូវ ហើយយើងពន្យល់នូវអ្វីដែលជាការខុសឆ្គង ឬវាប៉ះពាល់ដល់សង្គមជាតិ វប្បធម៌ ប្រពៃណីជាតិយើង»។
លោកស្រី ចន ច័ន្ទលក្ខិណា ប្រធានសមាគមសិល្បៈករខ្មែរបានថ្លែងពីម្សិលមិញថា លោកស្រីគាំទ្រចំណាត់ការរបស់រដ្ឋាភិបាល និងក្រសួងវប្បធម៌ និងវិចិត្រសិល្បៈ ព្រោះកន្លងមកពិតជាធ្លាប់មានការសម្ដែងរបាំព្រះរាជទ្រព្យមិនសមរម្យមែន។ ដោយលោកស្រីចង់ឲ្យមានការទប់ស្កាត់ និងអប់រំណែនាំនូវទង្វើមួយចំនួនដែលប៉ះពាល់ដល់កិត្តិយស ឬបន្ទាបតម្លៃរបាំព្រះរាជទ្រព្យនេះ។
លោកស្រីបញ្ជាក់ថា៖ «ខ្ញុំគាំទ្រអនុសាសន៍រដ្ឋាភិបាល ព្រោះកន្លងមកមានគេយករបាំព្រះរាជទ្រព្យទៅសម្ដែងមើលដូចជាមិនដូច មិនសមរម្យទាល់តែសោះ។ ដូច្នេះអាជ្ញាធរពាក់ព័ន្ធគួរតែមានវិធានការអប់រំ ទប់ស្កាត់ ផ្សព្វផ្សាយ និងចាត់វិធានការទៅលើបុគ្គលមួយចំនួនដែលមិនយល់ពីតម្លៃនៃរបាំព្រះរាជទ្រព្យ»។
លោកនាយករដ្ឋមន្ត្រី ហ៊ុន សែន កាលថ្ងៃទី ៣ ខែមីនាបានថ្លែងនៅក្នុងពិធីប្រារព្ធទិវាវប្បធម៌ជាតិដោយលោកបានលើកឡើងអំពីការសម្តែងរបាំព្រះរាជទ្រព្យមួយនៅប្រទេសសិង្ហបុរីគឺខុសវប្បធម៌ ប្រពៃណីខ្មែរ និងប្រមាថដល់រាជវង្សខ្មែរ ហើយលោកបានបញ្ជាឲ្យចាត់វិធានការបុគ្គលទាំងនោះជាបន្ទាន់៕
